(麻帆良市時報記者巴マミ報導)
由 1980 年代初開始, 九巴開始引進 12m 三軸雙層巴士,
以應付載客需求高嘅路線, 直至 1986 年, 九巴開始大量購買長度減少一米嘅 11m 三軸巴士,
強調佢地擁有比 12m 三軸巴士更加靈活嘅操控性能,同時又擁有不遜於 12 米車嘅高載量,
其中九巴喺 1986 年底引入嘅第一批 Dennis Dragon 11m (S3N1-55),
其下層提供較大嘅企位空間, 令下層企位高達 55 個,
比 Dennis Dragon 12m 嘅 40 人仲要多! 再加上上層使用 3+2 座位編排,
令佢地每架巴士嘅總載量達 151 人。呢批巴士同 12m 嘅 Dennis Dragon 一樣,
使用有 220 匹馬力嘅 Gardner 6LXCT 引擎同 Voith DIWA D851 三前速全自動波箱,
呢批巴士常見於市區客量較高嘅路線, 喺海隧線同來往市區至新市鎮嘅路線,
亦可以見到佢地嘅蹤影。隨著車齡增長, 加上新式嘅空調雙層巴士投入服務,
呢批巴士亦喺 2000 年代初退役。
今日, 麻帆良市正式歡迎九巴 Dennis Dragon 11m 巴士登場!
呢款曾經係九巴主力之一嘅 "巨龍", 因為佢地配用吉拿 (Gardner) 引擎,
而被稱為 "吉龍", 亦因為佢地有一大片俗稱 "水塘位" 嘅企位空間而被戲稱為 "水塘龍",
市長 Super Bus 話, 呢款巴士以前住紅磡搭 6F 就搭得多啦,
因為 6F 就係用呢款巴士做主力車嘅, 有時出旺角、深水埗,
除左會搭 6C 之外, 6F 亦係另一個選擇。呢批巴士比 Super Bus 嘅印象,
就係佢地同 12m 巨龍一樣樣, 但係就少左一格窗位,
同埋冇左 "頭短尾長" 嘅樣子, 坐上車嘅感覺,
Super Bus 憶述, 呢款車行緊果陣, 會有一D "時時聲" 喺車輪度發出,
似乎係巴士嘅氣墊懸掛系統運作嘅聲音, 特別係停車果陣,
巴士停定之後, 車頭 "Up 下 Up 下", 車輪亦跟住同時發出 "時時聲",
係其他巴士都冇嘅。除左 6F 之外, Super Bus 亦都喺 66 號線坐中呢款車,
由屯門出旺角, 可見呢款巴士當時真係隨處可見,
可惜隨住年代嘅過去, 呢D巴士亦已經消失於路面多時,
要尋找佢地昔日嘅風釆, 只有喺相片, 或者呢架 6F 巴士,
去勾起腦海中嘅回憶啦...
隆重歡迎! 九巴 Dennis Dragon 11m 巴士, 見參!!
今日臨出門口返工前收到, 隨城巴 Leyland Olympian 10.4m 一齊到埗 (見另文), 不過竟然嚟多架不速之客 --
我淨係想要架 Network 26 咋, 點知無厘頭地搭多架 61 過嚟, 同埋架 Network 26
未拆盒個上層頭窗已經甩左仲喺盒入面趟來趟去, 不過已經整番好, 另外果兩架冇事...
本文主角
證書編號 00053, 限量 500 架
正式落地!! 櫻ミク又來迎接新車~ ^^
九巴巨龍車身之演進
仲爭架 101, 希望快D到手~
Thanks for reading~ |
