(麻帆良市時報記者鹿目まどか報導)
1945 年二次大戰結束, 日軍投降香港重光, 並且由英國重新接回香港嘅管治權,
英國軍部當時發出嘅第一個命令, 就係要九巴重新投入運作, 為市民提供服務,
但係戰後初期, 各地正值百廢待興之際, 當時香港嘅公共交通服務亦陷入一片混亂之中,
九巴喺戰前原有嘅單層巴士車隊, 唔係喺戰時被日軍徵用,
就係已經遭受炮火所被壞, 餘下可使用嘅巴士亦所餘不多,
九巴唯有用貨車或者軍車改裝, 權充巴士行走, 但係呢尐巴士同改裝車輛始終都有殘舊嘅一日,
而且由貨車改裝嘅 "巴士" 亦始終應付唔到乘客嘅需要, 上落亦不便,
及至後來中國大陸爆發國共內戰引發前所未有嘅難民潮,
令當時香港人口日益急劇澎脹, 市民對公共交通服務嘅需求亦隨之增加,
雖然九巴喺 1949 年開始引進全港首批雙層巴士 -- Daimler CVG5, 或者九巴內部稱為 "丹拿A型" 巴士,
以應付市民需求, 但係當時有部份路線所途經嘅道路, 例如行走新界郊區嘅路線,
並不適合雙層巴士行走, 由貨車改裝而成嘅巴士更無法應付日益增加嘅客量需求,
所以九巴亦引入唔少單層巴士車隊為市民提供服務,
包括 Bedford OB, Tilling Stevens "白水箱", Commer, 同 Dennis Pax 等新巴士以應付需求,
但係當中部份車款載客量偏低, 未能滿足部份客量較高嘅路線需要,
隨著香港人口喺五、十年代不斷持續增加, 市民對巴士服務嘅需求亦有增無減,
於是九巴喺 1960 年開始, 向英國 "亞比安" (Albion) 車廠引入首批單層巴士。
九巴喺 1960 年引入嘅 "亞比安" Victor VT17AL 型巴士 (下稱 VT17AL),
係九巴首批引入嘅 "亞比安" 單層巴士, 呢批連樣辦車在內合共 101 架嘅 "亞比安" 巴士,
使用由 Leyland 提供嘅出口版本 E0.350 引擎, 連接 Leyland 5前速恆久嚙合式手動波箱, 驅動後軸,
全數巴士配上由英國 British Aluminium Co. 提供嘅雙門車身, 以散件形式喺香港由九巴自行裝妥車身,
喺 1961 年投入服務。呢批巴士設有 39 - 41 個座位, 另可容納 14 個企位名額,
令呢款有 30 呎長嘅巴士總載客量達 55 - 56 人 (後來因為實施一人控制,
加上政府對公共巴士乘客企位空間嘅修例, 座位同企位名額亦有所調整, 但總載客量變化不大),
初期呢批巴士使用鋼管式拉閘, 車上亦設有售票員負責售票同開關拉閘,
後來被電控閘門所取代, 直到 1970 年代九巴開始實施一人控制,
部份巴士更被改作單門上落, 後車門被封, 只保留前門上落。
呢尐巴士主要行走行走郊外偏遠嘅路線, 亦有行走連接市區與新界之間嘅路線,
部份巴士後來亦由九巴重建車身, 以較方角嘅車身線條示人,
值得一提嘅係有部份 "亞比安" VT17AL 型巴士,
後期被改配上由已經退役嘅後輩 -- "亞比安" Victor VT23L 型巴士移殖過來嘅 Leyland E0.370 引擎,
除左因為引擎馬力較大之外, 亦因為路線需要, 例如林錦公路嘅車輛闊度限制,
只有 VT17AL 型巴士可以勝任 ( VT17AL 全幅為 7 呎 6 吋, 以當時嘅大巴士嚟講佢地係車身闊度最窄嘅車款),
令呢款巴士一度成為行走林錦公路嘅精兵。
"亞比安" VT17AL 型巴士喺九巴車隊入面仲有一段小插曲,
佢地到港之後嘅其中 12 新車並未即時投入服務, 其中九部更喺 1971 年被改作訓練巴士,
原本嘅 HK 同 AD 字首車牌亦被改換 (當時政府設有車牌預留政策,
所以九巴好多巴士車牌都係以 HK 同 AD 開首, 呢個政策直至 1970 年代取消),
"公共巴士" 嘅分類名稱亦被更改為 "私家巴士",
最後喺 1973 -75 年間又再被改作公共巴士, 以新車牌出街作載客用途,
至於九巴為何要作出如此安排, 依家亦已經無從稽考。
無論如何, "亞比安" VT17AL 型巴士喺九巴車隊服務嘅日子,
比起當時, 甚至現在嘅任何單層巴士車款都要長, 最後退役嘅 "亞比安" VT17AL 型巴士,
喺 1987 年正式退役, 一共服務左九巴二十六個年頭。
今日, 麻帆良市正式歡迎九巴 "亞比安" Victor VT17AL 型巴士登場!!
呢款喺 1960 年代喺九巴車隊吒咤一時嘅九巴精兵,
市長 Super Bus 話, 雖然佢未曾坐過甚至見過呢款單層巴士,
因為佢並唔係生於那個年代, 第一次見呢款車係九巴係 1993 年嘅巴士年曆海報,
同埋後來一次偶然嘅機會睇到電視播放嘅粵語殘片,
背景一架同款巴士經過, 所以佢對呢款巴士嘅認知非常淺,
直到後來睇到某汽車雜誌嘅專欄, 介紹九巴嘅 "亞比安" 巴士,
先至對呢款巴士有一尐認識, 相中巴士車頭嘅設計,
亦令 Super Bus 留下深刻嘅印象, 佢仲話相比起當時九巴嘅雙層巴士,
九巴嘅單層巴士款式反而更加多姿多采, 當中嘅 "亞比安" 巴士尤其精采,
相比之下, 當時九巴嘅雙層巴士除左長度唔同之外, 感覺好似千篇一律, 冇乜太大變化。
Super Bus 仲話, 讀中學果陣搭 12A 返學放學, 有時遇到一尐車長都會傾下 "巴士經",
佢話雖然 "亞比安" 巴士曾經係九巴單層巴士車隊嘅主力, 但係同一尐年資較高嘅車長交談之間,
發現原來喺佢地嘅心目中, 揸呢尐巴士並唔係好受, 甚至可以話係一件苦差!
"揸呢尐 "丫路品", 個波掌 (指極力子) 重到死,
每次入波都要大力踩個波掌, 稍為少尐力都會比個波掌打番轉頭痛到你隻腳嗌哂救命,
有尐師傅為左唔想受 "波掌打腳" 之苦, 索性就咁推支波棍入波轉波,
踩波掌都嫌費事, 掃牙聲夠哂震撼! 引擎又夠嘈, 坐正引擎位隔離揸車夏天熱到黐筋,
邊似依家尐巴士可以揸得咁舒服吖!?" 雖然對曾經揸過 "丫路品" 嘅車長嚟講,
揸呢尐巴士無疑係一件苦事, 始終當時嘅汽車科技冇今時今日咁先進同成熟,
更遑論有風油呔、自動變速同氣墊懸掛系統呢尐喺今時今日嘅巴士必有嘅配備,
但係 Super Bus 話, "亞比安" 巴士喺九巴車隊立下嘅汗馬功勞,
依然係值得肯定嘅。
隆重歡迎! 九巴 "亞比安" Victor VT17AL 型巴士, 見參!!
附有九巴 "九條龍" Logo 水貼三個, 等玩家自行貼上,
實際只需兩個, 分別貼喺車身兩側車牌號碼對上嘅位置
證書編號 262, 限量 300 架
正式落地!
HK4518 喺 1970 年代獲得車隊編號為 L17
九巴 70 號同亞比安單層巴士一樣, 都已經成為歴史
司機位門可以被打開
同九巴 Seddon Pennine 4 合照,
九巴喺 1970 年引入 100 架 Seddon Pennine 4 型巴士,
以應付當時衛星城市, 例如荃灣嘅發展所帶來嘅交通服務需求,
可惜呢批巴士問題多多, 儘管九巴嘗試將呢批巴士進行大改以令佢地可以重新出征,
最後亦只係服務左短短十年時間即告淘汰, 相比之下,
亞比安巴士反而顯得可靠耐用
那些年, 喺 70 號行走過嘅九巴巴士,
不知不覺, 九巴 70 號已經取消左五年之久...
真車相, 留意初期九巴嘅巴士使用鋼管式車閘
本文主角 L17, 已經改用電閘, 並且實行一人控制
另一張 L17 真車相, 留意車頭水箱網後期已被改換九巴自行設計嘅款式,
車外嘅電閘按掣位置亦有所改動
最後服役於九巴嘅亞比安 VT17AL 型巴士,喺 1987 年正式退役, 一共服務左九巴二十六個年頭
期待鋼管閘版亞比安有機會推出, 並借此向呢批亞比安巴士作最後致敬!
Thanks for reading~ |
