(麻帆良市時報記者鹿目まどか報導)
隨住 1940 - 50 年代二次大戰結束, 日軍投降香港重光, 同中國國共內戰引發前所未有嘅難民潮,
香港人口日益急劇增長, 市民對公共交通服務嘅需求亦隨之增加,
於是九巴於 1949 年由英國 Daimler 車廠引入全港首批雙層巴士 -- Daimler CVG5 (九巴內部稱為 "丹拿 A 型"),
以滿足市民需求, 之後九巴亦不斷向 Daimler 引入更多雙層巴士為市民服務, 成為 Daimler 喺海外嘅重要客户之一,
但係隨住人口不斷膨漲, 同更多大型公共屋邨相繼落成同入伙, 市民對公共巴士服務嘅需求亦有增無減,
儘管九巴喺 1960 年代初引入 30 呎長嘅 Daimler CVG6 型巴士 (九巴內部稱為 "丹拿 C 型"),
已經係當時九巴車隊中最大型嘅巴士, 但係九巴旋即發現呢批巴士都係無法滿足需求,
因此九巴向 Daimler 車廠提出設計載客量更高嘅巴士嘅構思,
但係由於當時 Daimler 已經忙於設計新式嘅第一代後置引擎巴士 --
Fleetline 嘅研究工作並且進入量產階段, 已經冇多餘嘅資源去兼顧九巴呢個要求,
加上 Daimler 認為呢種巴士唔會喺英國嘅巴士市場起到用家嘅興趣,
長度亦超過當時英國嘅法定標準 (當時 30 呎已經係英國法定巴士最長長度), 拒絕左九巴嘅要求,
於是九巴唯有退而求其次, 尋找其他車廠嘅合作, 最後英國嘅 AEC 回應左九巴嘅訴求,
設計出長度達 34 呎嘅 AEC Regent V 型巴士 (俗稱 "長龍" 或者 "大水牛"),
並且獲得九巴嘅 210 架新車嘅訂單, 眼見九巴同 AEC 嘅呢D舉動,
Daimler 亦怕失去九巴呢個大客户, 於是參照對手嘅底盤設計, 依樣畫葫蘆,
再喺自家出品嘅 CVG6 底盤上加以改良, 成為 Daimler CVG6-34 呎嘅新巴士,
以挽回失地同爭取九巴嘅新車訂單。
九巴喺 1967 年引入首批共 20 部 Daimler CVG6LX-34 呎型雙層巴士,
呢批巴士被九巴編為 "丹拿 D 型", 由 Metal Section 提供車身,
使用分別位於車前同車尾電動閘門, 同後置式樓梯嘅雙門車身設計,
同時擁有達 110 人以上嘅高載客量, 呢D巴士配有更大馬力嘅 Gardner 6LX引擎，
最大馬力達150匹, 配備原廠嘅 Daimatic 四前速半自動變速箱, 驅動後軸,
取代以往令車長感到既麻煩又浪費氣力嘅先選式波箱, 令車長駕車時較為輕鬆,
因而得到 "獨腳龍" 嘅稱號, 因為半自動波箱無須再踩 "極力子" 轉波,
左腳從此亦落得清閒, 而半自動波箱從此亦成為日後九巴新車嘅標準配備,
一直到配置全自動波箱嘅 Dennis Jubilant 同利蘭勝利二型巴士出現為止。
因為丹拿 D 型嘅成功, 九巴再喺 1969 至 1972 年間分批訂講共 200 架 Daimler CVG6LX-34 型嘅新車,
機械規格維持不變, 車身同樣由 Metal Section 提供, 但係則改為全闊前門同半闊中門嘅車身規格,
樓梯亦改為位於司機位之後 (其中兩部就位於車身中部, 對正落車中門),
呢批巴士其後被九巴編為 "丹拿E型", 同時亦被車長戲稱為 "長牛",
其中喺 1972 年更一口氣訂購130輛丹拿E型，用作當年紅磡海底隧道通車時嘅主力車隊,
呢批巴士由服役當日開始已經被九巴安排作一人控制, 車上附設錢箱,
並且喺車頭車尾貼有上車投幣嘅標誌以玆識別, 亦成為九巴首批全新嘅一人控制巴士。
由於 Daimler 嘅 CV 系列喺當時已經正式停產,
呢批巴士因此亦與同期訂購嘅另一批 115 架 30 呎長嘅 Daimler CVG6 巴士 (被九巴編為 "丹拿 F 型", 綽號 "牛仔"),
成為 Daimler 最後一批出廠嘅 CVG6 型巴士。
雖然丹拿 E 型因為擁有同丹拿 D 型一樣嘅高載量, 而被派住行走市區甚至海隧路線行走,
但係呢尐擁有傳統半駕駛艙設計嘅 Daimler 雙層巴士,
始終唔及同廠嘅 Fleetline "珍寶" 同 Leyland Atlantean 呢D後置引擎巴士,
擁有適合一人控制模式嘅先天條件, 亦令駕駛呢尐巴士車款車長嘅工作量大增,
隨住更多新式而又更適合一人控制模式嘅車款投入服務, 呢尐巴士後期亦只被派往客量少的路線行走,
直至 1988 年退役, 但係出乎意料地, 喺 1990 年部份丹拿 E 型再度復出行走,
一直服役至 1991 年先至完全退役, 部份巴士退役後被必達巴士公司購入,
並且轉運往中國大陸同南非嘅馬拉維繼續行走,
九巴亦有保留部份退役嘅丹拿 E 型巴士, 並且改裝作開頂巴士,
有一架就被改裝為接載兩架喺大型活動作為教導小朋友公民教育嘅小巴士 --
聰明巴士嘅專用車, 並且命名為 "巴士博士"。呢架 "巴士博士" 喺 2012 年,
被九巴再度重建, 修復至 1990 年初退役時嘅樣子,
令大眾有機會一睹呢款宮曾經喺 1970 - 80 年代叱咤一時嘅 "長牛" 嘅風采!
今日, 麻帆良市隆重歡迎九巴丹拿 E 型 "長牛" 歸隊!
呢架 70 後巴士車款, 雖然市長 Super Bus 背後嘅有一份執著 --
佢對車頭好似凹左一邊嘅老爺車款並唔起興趣,
所以凡係類似設計嘅老爺巴士車款佢一概無視, 但係人始終都會鍾意懷舊,
其實呢款長牛巴士都曾經係陪佢成長過嘅巴士車款之一,
Super Bus 話以前佢住紅磡, 有時坐 13A 都會坐到呢款巴士,
最有印象係其中一次同亞嫲夜晚坐 101 返屋企,
果陣 101 已經係以三車軸嘅 Dennis Dragon 12米掛帥,
但係果晚竟然嚟左長牛, 一上車, 全闊車門另邊嘅 "龍門架" 令 Super Bus 印象尤深,
亦係佢坐長牛留下最深刻印象嘅一次啦, Super Bus 仲話,
80 年代末唔見呢D巴士行, 正當佢以為長牛從此消聲匿跡之際,
喺 1990 年啱啱上中一, 喺搭 12A 放學果陣赫然喺九龍城見佢出現,
行走 11D 路線, Super Bus 表示佢果陣都嚇左一嚇, 唔敢相信自己雙眼,
以為自己睇錯, 唔敢相信呢款喺香港街道上消失已久嘅雙層巴士車款,
竟然會再度復出, 相信其他有喺果陣見過甚至坐過佢地嘅人,
或者都有同 Super Bus 一樣嘅諗法啦, 依家呢D "牛牛" 雖然已經退役左成廿年咁耐,
但係依然仲可以喺一D大型場合見到佢地出現, 只係以唔同嘅形式同大家見面,
仲記得喺 1993 年果幾架分別上左加菲貓, 藍精靈, Betty Boop,
同 KeroKeroKeroppi 等卡通人物圖案, 為希望工程義載籌款嘅開頂卡通巴士嗎?
九巴喺 2012 年, 亦將原本用嚟搭載聰明巴士嘅 "巴士博士" 再度修復,
成為退後前嘅模樣, 並且喺海洋公園內展示,
有機會去海洋公園玩嘅朋友, 大家不妨留意下啦~
隆重歡迎! 九巴丹拿 E 型長牛, 參上!!
證書編號 1284, 全球限量 1500 架
正式落地!! 魔法使雪ミク亦到埗冇幾耐, 就比佢同長牛來個 "世紀合照" 啦~
想當年細個見到九巴尐巴士車身上大大個 K M B 三個大字 Logo, 不其然有一種不自然嘅感覺,
或者應該話有一種壓迫感, "洗唔洗咁大個 KMB 大字呀...?" 但係後來嘅 "九巴服務 日日進步",
我又反而冇呢種感覺, 好奇怪...
同舊色長牛合照, 雖然車身色彩隨住時代唔同,
但係佢地都曾經喺過海隧道路線上扮演過吃重嘅角色
同 Leyland Olympian "大口蘭" 合照
唔同嘅車型, 但係同樣行走 111 號海隧線,
同時亦見證左巴士服務隨住時代唔同而出現嘅改變
真車相片
或者有少少遺憾, 模型嘅司機位 Half-cab 車窗同真車係有出入...
另加 -- Comic-Con 入手模型車兩架,
分別係來自電影 "Batman The Dark Knight Rises" 嘅林寶堅尼 Aventador,
同回到未來嘅 DMC 改裝 Time mechine, Comic-Con 過左三個禮拜,
到今日長牛到手, 終於決定順道開盒 Share 下,
遺憾地想入埋架蝙蝠車結果錯過左, 不過呢兩架車確實係值得一入嘅~
小劇場~~~ XDDD
市長 Super Bus 呢排唔知點解入少左好多巴士, 就連最新推出嘅 Scania 香港飛龍巴士都話冇興趣入,
聽講市長正物色一套新 Cosplay 衫, 喺嚟緊嘅 Halloween 著出街玩下喎,
不過今日來左呢架長牛, 悶到發慌嘅初音總算有尐野可以活動下~
(初音) 少有啵, 今次竟然嚟左一架咸豐年嘅舊車款 (Super Bus 按: 咸豐年?? 有冇咁誇張?!! =A= )
乜 Super Bus 唔係對呢尐舊車嘅咩...?
呢個時候, 鹿目まどか同キュゥべえ踩場...
(鹿目) 哈囉初音好耐冇見啦~~~ XDD
(初音) WTX 又係你呢個乜鬼廢怯少女呀?!! 又嚟做乜呀!?
(鹿目) 做乜咁 Mean 啵, 人地好耐冇嚟玩咪走嚟玩下順道同妳 Say hi 之嘛,
同埋我喺魔法少女唔係乜鬼廢怯少女呀~ (汗)
言訖, まどか就走埋架巴士度...
(鹿目) 咦, 呢架就係今日新到嘅巴士嗱, 做乜個樣咁舊嘅?
個司機位仲要係凹左入去添, 睇落好怪相喔...
(キュゥべえ) 呢架係英國丹拿車廠喺 1970 年代初出廠嘅 CVG6 - 34 呎巴士,
九巴叫丹拿E型, 又有個花名叫長牛, 係丹拿 CV 系列停產之前嘅末世作品之一嚟o架~
(鹿目) 長牛...但係架車個樣感覺好怪喔......
睇住まどか同キュゥべえ係咁對住架巴士指指點, 初音都感到唔耐煩...
(初音) 喂喂, 你兩個到底講完未呀?? 我要同呢架車開工o架!!
(鹿目) 初音姐姐稍安無燥, 不如就等我同我將呢架老牛來個大翻新啦~!!
(キュゥべえ) まどか, 咁我要睇妳表演啦~~
言訖, まどか挽弓瞄準...
(鹿目) 魔法! 光の矢!!
中!!
Moment later......
鏘! 鏘!! 鏘!!! 鏘!!!
Tadaaa~~~~~~!!!
(鹿目) See~~~依家當堂成架型仔哂!!
(初音) 喂, 妳個死妹釘因住一陣間 Super Bus 知道揾妳算賬呀!!
(鹿目) 係咩? Super Bus 同我都玩得不知幾埋呀, 佢會揾我算賬? 哈哈哈~~~ XDD
Thanks for reading~ |
|
|
|
|
|
|
|
|
|
Advertisement
Advertisement
Advertisement
Advertisement
Advertisement
|
