本帖最後由 VocaloidMikuBus 於 2015-10-3 13:26 編輯
(麻帆良市時報記者鹿目まどか報導)
"為了配合香港未來新市鎮的發展及集體運輸的需求, 本港公共巴士亦要作出轉變;
現時 9.5m 雙層巴士將被調配行走港島區或一些路窄多彎的山路,
及市區內橫街窄巷。而載客需求較大的主要路線, 將由一批新巴士行走,
新巴士有更大的載客量, 全長有 12m, 為避免車軸負荷過重, 新巴士有三條車軸,
多扇車門, 以減少乘客上落車的時間。"
以上嘅一番說話, 係上世紀 80 年代初港英政府時期嘅運輸司,
對未來香港公共巴士服務發出嘅指引, 呢個指引一出兼傳到英國之後,
令英國嘅巴士製造商都感到震驚, 因為呢次係繼九巴 Daimler 34 呎長 CVG 6 (或者丹拿 D 同 E型 "長牛" ),
AEC Regent V 34 呎 "大水牛" 雙層巴士, 以至中巴嘅 36 呎長 Guy Arab V 型 "長龍" 單層巴士之後,
再次要製造超出英國法定長度嘅巴士, 而且由於英國嘅雙層巴士都係以兩軸為主,
各巴士製造商為左要應付香港巴士市場呢個新訴求, 必須各出奇謀,
喺現有嘅兩軸巴士底盤作出改良, 務求要喺最短時間之內,
搶先一步研製出新巴士比香港客户使用,
而呢場市場嘅決戰亦逐漸變成一場科技與時間嘅競賽,
其中位於伯明翰嘅都城嘉慕 Metro-Cammell Weymann (MCW),
喺短短 5 個月時間, 就宣佈成功研製兩部樣辦巴土, 比中巴同九巴使用,
並命名為 Super Metrobus, 使用原廠嘅兩軸 Metrobus 為藍本,
將底盤加長, 再加上俗稱 "假擔" 嘅無動力中軸, 其他機械格局就照兩軸版設計一樣保持不變,
簡單而直接嘅構思造就左呢款 12m 新車嘅誕生, 同時亦證明呢款巴士並冇因為短促嘅研製時間,
而出現任何問題。
中巴嘅首部 Super Metrobus 於 1981 年 4 月同九巴嘅一部同時運抵香港,
而且仲由有關當局安排新聞媒體到葵涌貨櫃碼頭, 見證新車到港嘅歷史性時刻,
中巴首部 Super Metrobus 首先由貨櫃船上卸下, 成為全港首架登陸嘅 Super Metrobus ,
而且仲喺當年 5 月 5 日喺中環愛丁堡廣場舉行新車嘅移交儀式,
兩巴巨頭亦有露面主持呢個歷史性時刻, 當時嘅已故中巴主席顏成坤先生更喺儀式上致辭,
並且為 Super Metrobus 命名為 "巨鷹" (Giant Eagle) 巴士。
中巴嘅 "巨鷹" 巴士同九巴嘅規格唔同, 中巴嘅 "巨鷹" 巴士除左下層車廂格局以企位為主之外,
引擎亦配用有 220 匹馬力嘅 Gardner 6LXCT 引擎, 連接 Voith DIWA D851 三前速全自動波箱,
同九巴配用嘅 Rolls Royce Eagle III 引擎唔同 (不過後來九巴嘅亦改換用 Gardner 引擎以方便維修),
而車身方面, 就同九巴嘅一樣, 配上由 MCW 自家提供嘅 Apollo 車身, 屬雙門設計。
新車被中巴編號為 ML1, 並且喺新車移交儀式過後隨即被派往行走 112 過海隧道線,
以佢擁有高達 170 人嘅高載量, 唔只係高客量嘅海隧線清客嘅好幫手,
甚至連收集車資嘅錢箱都「迫爆」, 需要勞動工程車到場換錢箱!
因為佢嘅運作表現令中巴感到滿意, 於是中巴喺 1982 年開始,
向 MCW 分批訂購合共 82 架 Super Metrobus 新巴士 (ML3 - 84,
ML2 係三門版設計嘅樣辦車, 亦係唯一一架使用三門設計嘅 Super Metrobus,
不過呢個設計不為中巴所採納, 所以亦不計算在內),
並且喺 1983 - 1988 年間投入服務, 因為佢地擁有天生嘅高載量,
佢地除左經常喺過海隧道線行走之外, 亦有喺港島區一啲路線上,
例如 2、8、42、70、97、以至行走東區走廊嘅 780 同 788 等路線出現,
可以話係中巴嘅 "高載巴士" 車隊主力, 一直到中巴喺 1998 年喪失專營權,
呢 84 架超級都城亦被新主人新巴接收, 繼續為新主人效力,
直到新巴訂購嘅新巴士陸續付運到港同投入服務,
呢批巴士亦宣告功成身退, 但係除左有部份被當作廢鐵肢解出售之外,
大部份巴士退役後揾到新主人, 喺英國、澳洲以至西非嘅加納作為市內觀光巴士,
喺英國亦有作為校巴接送學童, 當中 ML1 呢架全球首架三軸 Super Metrobus,
喺澳洲 City Sightseeing 作觀光巴士一段日子之後,
更被當地一名巴士迷購入作私人保留, 並且修復回當年嘅中巴色彩, 喺澳洲安享晚年,
而且仲曾經岀席過幾個公開埸合, 包括 2008 年澳洲國慶作為市內免費穿梭巴士,
同埋 2010 年香港電視台 TVB 嘅嘉年華會接載嘉賓。
時至今日, 呢批落藉異地嘅前中巴 Super Metrobus 依然有少數喺路上活躍中,
只要上車細心留意, 甚至仲可以尋回昔日中巴年代服役時嘅蛛絲馬跡。
今日, 麻帆良市正式歡迎中巴 MCW Super Metrobus "巨鷹" 巴士登場!!
市長 Super Bus 話, 雖然佢身為 "九龍人", 但係亦有唔少機會過對面海,
當年佢住紅磡, 要坐 101、106 同 116 過海, 每逢坐中中巴車都一定坐中呢款 MCW 巴士,
始終 Super Metrobus 都係中巴過海線嘅主力車款之一,
喺港島區, 佢亦坐過呢款車行 70 同 90 入香港仔同鴨脷洲,
Super Bus 話, 呢款 MCW 巴士可以話係佢最鍾愛嘅車款之一,
就連佢嘅引擎聲到左多年後嘅今日依然印象猶新,
佢仲話雖然九巴都有三架同款巴士, 但係就冇再增購同款巴士, 誠為可惜,
不過後來九巴亦有加訂 254 架三軸 Metrobus, 只係長度減少一米成為 11m 車,
亦係 Super Bus 嘅至愛車款, 佢仲話 MCW Metrobus 嘅車身線條比人一種美感,
佢車頭上層頭窗頂形成嘅 "八字眉" 比人一種憂鬱嘅感覺, 更令人 "不可不愛"!
而中巴嘅 ML1 呢架全球首架三軸 12m Metrobus,
更喺袋鼠國得到有心人購入, 並且作悉心翻新,
重現當年中巴色彩, 喺彼岸安享晚年,
Super Bus 概嘆, 香港啲巴士到時候退役之後真係冇幾多可以好似 ML1 咁好彩,
"就連城巴嘅一號仔依家都要賣去比人湯!! 其實好多好有意義嘅巴士真係好值得去保留,
等大家籍住呢啲實體去認識巴士設計同巴士服務由過去到現在一直以來嘅發展歷程,
可惜有心而有力嘅人又唔多, 而且以香港依家呢個環境,
要私人保留一架退役雙層巴士真係殊不容易,
點都唔及喺外國嘅來得咁幸運, 君不見前中巴勝利二型 LV36,
比新巴捐左比蘇格蘭巴士博物館之後, 十幾年之後嘅今日依然仲行得走得!"
Super Bus 仲話希望有一日有機會去澳洲一定要試下揾 ML1
同佢影相之餘亦同呢架曾經喺香港相會過, 依家喺彼方安享晚年嘅老朋友聚舊~!"
隆重歡迎! 中巴 MCW Super Metrobus "巨鷹" 巴士 -- ML3, 見參!!
今日同時到埗 -- 香港消防處 Dennis 流動傷者治療車 MCTC, F82
證書編號 466, 全球限量 900 架
正式落地!! 大道寺知世都嚟影埋一份呢~
隱約可見另一個目的地嘅英文名 -- Quarry Bay 鰂魚涌
同晚輩 ML3 相會
同九巴 M1 (後來改為 3M1 ) 相會
大家同是首批出道嘅三軸 Super Metrobus, 但係命運卻係一天一地,
九巴 3M1 喺 1995 年退役後改裝作訓練巴士, 訓練新進學員熟習12m 三軸巴士嘅操控性能,
最後喺 2001 年退役, 但係並未得到九巴保留, 卻落得被肢解嘅下場
中巴 ML1 搶閘登陸, 成為全港首架三軸 Super Metrobus,
更係全港首架三軸雙層巴士, 風頭一時無倆
重現當年新車交接嘅場景
ML1 退役後喺澳洲被一名熱心巴士迷買入,
並且修復回當年嘅中巴色彩, 喺澳洲安享晚年
同場仲有消防處嘅 Dennis 流動傷者治療車,
消防處喺大約 1993 至 94 年間引入呢架 F82 嘅 MCTC
(Mobile Casualty Treatment Centre, 流動傷者治療車嘅簡稱),
以入替當時由早期 AEC 喉車改裝而成, 年事已高嘅醫療車,
最近由友人得知, 原來呢架 F82 亦已經退役已久,
呢架 F82 記得喺 1995 一次坐巴士喺荔枝角大橋上見到佢對頭經過,
印象中呢架 F82 都好少出動, 不過亦相信冇乜人會希望見到佢出現,
因為一見到佢出埸, 即係表示有大件事發生--
MCTC 係每當有需要四架以上嘅救護車出動嘅事故發生時就會被派往現場支援,
同時亦會由醫院派出一支醫療隊, 喺現場為傷勢較重嘅傷患者進行急救,
或者小手術以控制傷勢。
呢架 Dennis MCTC 本來已經出左好耐, 好似係 2008 年出,
但係我當時竟然完全唔知有呢架模型出過,
不過幸好依家仲入到佢, 雖然有人可能會話:
"我啋! 好入唔入竟然入呢架白車真係大吉利是!!"
但係呢架始終都係全球只此一架嘅特別用途車輛,
所以個人覺得都係值得一入嘅~
證書編號 0122, 全球限量 300 架
貼好消防處 Logo, 正式 On run!!
寫到呢度, 頓然有一番感觸, 曾經原本喺身邊經常見到接觸到嘅事物,
今日就已經消聲匿跡, 中巴喺 1998 年喪失專営權之後,
以非專利巴士嘅身份, 喺午飯時間行走前身為中華巴士北角車廠,
依家係中巴旗下發展嘅港運城同北角政府合署穿梭巴士路線,
但係隨住中巴喺今年七月一日停止營運呢條最後路線,
中巴嘅巴士業務亦正式劃上句號, 中巴過往嘅輝煌時代,
或者對中巴過往服務嘅愛與恨, 依家亦只有成為追憶,
或者秋官嘅一首 "歲月無情" 最能表達在下現在嘅心情...
https://www.youtube.com/watch?v=JbLjUWup-Vg
借此篇文章向中巴說一聲正式的再見
Thanks for reading~ |
