熱帶低氣壓02w

原帖由 limited 於 2006-5-18 04:50 發表
天文台 04:30 取消所有熱帶氣旋訊號

珍珠凌晨已登陸南澳, 並移向福建一帶及減弱

颱風珍珠掠過香港既總結：

颱風珍珠係五十七年來五月份吹襲廣東最強既颱風，佢o係橫掃菲律賓中部後進入南中國海中部，初時多個氣象台(包括香港天文台、JTWC、JMA)都預計珍珠會o係香港以東附近登陸，如果按照當時既預測途徑，八號熱帶氣旋警告訊號發出既機會就真係大喇。不過珍珠o係進入南海之後逐漸採取較為偏東既方向移動，吹向廣東至福建沿海地區，令到天文台發出八號熱帶氣旋警告訊號既機會減低左喇，咁亦都令到部份板友感到失望，因為冇八號熱帶氣旋警告訊號，就冇得早放學早放工．．．．．．

珍珠o係5月9日上午o係雅蒲島西南偏西由一個熱帶擾動發展成為熱帶低氣壓，並於翌日(即5月10日)凌晨增強為一熱帶風暴，再o係當晚進一步增強為強烈熱帶風暴。珍珠o係5月12日以每小時103公里既風力橫掃菲律賓中部，使該處廣泛地區出現嚴重水浸及山泥傾瀉，並造成37人死亡，多人失蹤，多艘船隻沉沒，6000人需要緊急疏散。珍珠o係橫過菲律賓中部後進入南中國海中部並於5月13日下午增強成颱風。珍珠o係進入南海中部後採取西北方向移動，後來o係5月14日改以偏北既方向移動趨向華南海岸，其間佢o係南海海面上曾錄得最大中心風力14級，達每小時170公里。珍珠o係5月17日改以東北偏北方向移動並移近廣東東部沿岸，並於5月18日清晨o係汕尾以東附近登陸，正面吹襲汕頭市，冇幾耐就減弱成強烈熱帶風暴。珍珠登陸廣東東部沿岸後橫過福建省並再減弱成熱帶風暴，並o係當日下午o係浙江省境內減弱為熱帶低氣壓。珍珠最終o係5月19日清晨變為溫帶氣旋。珍珠相關既特強降雨天氣o係廣東及福建兩省共造成十六人死亡，四人失蹤，一百萬人需要緊急撤離，廣泛地區既電力同通訊一度中斷，並出現嚴重水浸及山泥傾瀉。o係廣東以潮州市既災情尤其嚴重，據民政、電力部門初步統計，全市受災人口達88萬人，超過3000間房屋倒塌或損毀。而係福建省，受災人口達315萬人，直接經濟損失約為33億人民幣。珍珠掠過台灣期間帶來強風暴雨，有兩姊妹被暴漲既溪水沖走死亡。珍珠亦為浙江、江西、安徽和上海市帶來暴雨。

隨住珍珠進入本港八百公里警戒範圍，香港天文台o係5月15日晚上九點四十分發出今年首個一號戒備訊號，當時珍珠位於香港以南約750公里。隨住珍珠逐漸移近本港，影響本港既東北風o係5月15日接近午夜開始逐漸增強，離岸及高地既風力更o係5月17日清晨間中達到烈風程度，三號強風訊號o係當日上午七點十五分發出。珍珠o係下午最接近本港，當時珍珠o係本港東南偏東約200公里。受珍珠影響，橫瀾島錄得最高十分鐘平均風速為每小時89公里，長洲則為每小時65公里。香港天文台總部o係約下午三點二十分至四點錄得每小時最低海平面氣壓為約997百帕斯卡。(以上資料只係本人估計所得)當珍珠掠過本港後，本港普遍轉吹西北風。

珍珠o係黃昏過後逐漸遠離本港，使到影響本港既西北強風有所減弱，三號強風訊號於5月17日晚上九點十五分被一號戒備訊號取代。隨住珍珠於5月18日清晨o係汕頭以東附近登陸，對本港既威脅完全解除，所有熱帶氣旋警告訊號o係當日清晨四點四十分取消。

珍珠既螺旋雨帶為本港帶來狂風驟雨，普遍地區錄得十多毫米既雨量，其中大澳、荃灣同埋大埔更錄得四十毫米既雨量。

珍珠掠過本港期間最少造成五人受傷，全港共有九宗樹木倒塌報告及三十多宗招牌墮下及棚架倒塌既報告。珍珠掠過本港期間亦導致海上及航空交通受到影響，機場於5月17日共有六十七班抵港及離港既航班需要取消，另有十四班需要延誤。另有十多條前往離島同埋珠江三角洲地區既海上航線需要暫停服務。

[ 本帖最後由 3AD172004 於 2006-5-20 19:50 編輯 ]