[舊車後兜] 稱霸九龍半島的藍三角 (長文, 多圖注意)

(麻帆良市時報記者高坂 穂乃果報導)
隨住上世紀四、五十年代二次大戰結束, 日軍投降香港重光,
同中國國共內戰引發前所未有嘅難民潮, 香港人口日益急劇增長,
市民對公共交通服務嘅需求亦隨之增加,
九巴於是喺 1949 年由英國 Daimler 車廠引入全港首批雙層巴士 --
Daimler CVG5 (九巴內部稱為 "丹拿 A 型"), 以滿足市民需求,
之後九巴亦不斷向 Daimler 引入更多雙層巴士為市民服務,
但係隨住人口不斷膨漲, 以及更多大型公共屋邨相繼落成同入伙,
市民對公共巴士服務嘅需求亦有增無減,
儘管九巴喺 1960 年代初引入 30 呎長嘅 Daimler CVG6 型巴士 (九巴內部稱為 "丹拿 C 型"),
已經係當時九巴車隊中最大型嘅巴士, 但係九巴旋即發現呢批巴士都係無法滿足需求,
因此九巴向 Daimler 車廠提出設計載客量更高嘅巴士嘅構思,
但係由於當時 Daimler 已經忙於設計新式嘅第一代後置引擎巴士 --
Fleetline 嘅研究工作並且進入量產階段, 已經冇多餘嘅資源去兼顧九巴呢個要求,
而且 Daimler 認為呢種巴士唔會喺英國嘅巴士市場起到用家嘅興趣,
長度亦超過當時英國嘅法定標準 (當時 30 呎已經係英國法定巴士最長長度), 捥拒左九巴嘅要求,
於是九巴唯有尋找其他車廠嘅合作, 最後九巴向英國嘅其中一間車廠 --
AEC (Associated Equipment Company) 提出佢地嘅訴求。
呢間同倫敦巴士有著密切關係嘅車廠起初亦發現苦樂參半,
喜嘅固然係因為有來自新客户嘅新車訂單, 但係苦嘅就係當時佢地嘅生產線已經不勝負荷,
因為當時佢地除左要應付來自英國本土各巴士公司嘅新車訂單之外,
更如火如荼地為倫敦趕工製作馳名世界嘅 Routemaster 紅巴士,
但係喺九巴嘅再三要求之下, AEC 終於答應為九巴製作新巴士底盤。
事實上在此之前, AEC 喺 1960 年代曾經生產過一款 Regal 長陣單層巴士底盤,
長度達 34 呎, 主要出口往非洲市場使用, AEC 就以呢款巴士底盤作為藍本作出改良,
改善懸掛系統、轉向系統同改用高承重量嘅尾軸, 使其可以承受雙層巴士嘅重量。
並且命名為 AEC Regent V 型, 當中嘅 V 字, 係羅馬數字 5 嘅意思,
正式型號為 "2D2RA", 當中意思為:

2 -- 巴士採用 AEC AV590 引擎 (最後定案用 AV690 引擎)
D -- 巴士可以配用較重嘅車身, GVW 為 12 噸 (但係喺香港法定許可總重卻高達 16 噸!!)
2 -- 巴士使用 AEC Monocontrol 半自動波箱
R -- 巴士屬於右軚駕駛
A -- 巴士使用全風式制動系統

正如上述, 因為係長度達 34 呎嘅雙層巴士嘅關係,
所以 AEC 特別為呢款 Regent V 巴士配用同廠出品嘅 11.3 公升 AV690 引擎,
原本擁有高逹 175 匹馬力, 後來應九巴要求而將馬力調低至 135 匹,
但係依然比當時九巴車隊所使用嘅 Gardner 5LW 同 6LW 引擎為高,
亦係九巴首次接觸嘅 AEC 引擎。引擎連接同廠出品嘅 Monocontrol 四前速半自動波箱,
亦係九巴車隊中首次出現嘅配搭, 相比當時九巴車隊內嘅巴士,
都係使用非同步嚙合波箱或者先選式波箱, 半自動波箱無須再踩 "極力子" 轉波,
駕駛巴士先至變得比較輕鬆, 而半自動波箱從此亦成為日後九巴新車嘅標準配備,
一直到配置全自動波箱嘅 Dennis Jubilant 同利蘭勝利二型巴士出現為止。

九巴喺 1963 - 1966 年間向 AEC 車廠分批訂購合共 210 架 Regent V 型巴士,
其中首批共 30 部配用由 British Aluminium Company (BACo) 提供嘅車身,
其後嘅新車訂單就改由 Metal Section 提供車身,
34 呎長車身加上雙層巴士嘅設計, 同埋下層以企位為主嘅車廂格局,
令佢地嘅總載客量高達 110 - 120 人, 成為當時九龍半島以至全港載客量最高嘅巴士車款!
由於佢地擁有如此龐大嘅載客量, 甚至經常超載嘅情況之下,
依然可以行走自如, "大水牛" 嘅綽號從此亦不逕而走。
喺投入服務之初，佢地被九巴安排行走九龍半島上高客量嘅路線,
例如 1、1A、6、6B、6C、6D、6F、9、11、13 等。到左八十年代中,
部分晚年翻裝車身嘅 "大水牛" 被調往新界區行走一啲客量唔高嘅路線,
例如荃灣區嘅 36A、39A、沙田區嘅 80K、86K 等。
呢款巴士亦先後經歷過九巴嘅 "一人售票" 同 "一人控制" 時期,
起初投入服務嘅 "大水牛" 巴士除左司機之外, 仲有三位售票員服務。
改為一人售票時, 乘客需要喺前門上車, 後門落車, 而售票員由三人減至一人,
並且擁有自己嘅座位, 巴士車頭亦髹上俗稱 "三劃黃" 嘅黃線標記以資識別,
呢個塗裝亦成為當時九龍半島街道上嘅典型代表,
甚至伴隨呢款 "大水牛" 巴士橫跨整個七十年代。
到左由一人售票改至一人控制, 九巴更喺 1980 年為呢批巴士重建車身,
並且將樓梯移前, 前門改為半闊車門, 後門移至車身中間,
車箱近司機座席安裝錢箱, 車頭同車尾貼上投幣標貼,
乘客需要前門上車, 並須自備輔幣, 不設找贖,
亦即係今時今日搭巴士 "上車比錢" 嘅模式。九巴喺改裝呢批巴士嘅同時,
亦曾經為部份 '大水牛" 更換上九巴當時慣常使用嘅 Gardner 6LX 引擎,
並連帶將車上嘅 AEC 半自動波箱亦改為 Leyland 岀品嘅 GB350 半自動波箱。
因為 Gardner 6LX 引擎嘅體積比 AEC 引擎稍大, 經過呢個改動之後嘅 '大水牛",
車咀亦要作出相應改動, 令車咀顯得格外修長。

踏入 1980 年代, "大水牛" 經歷左近廿年嘅服務生涯,
加上載客量更龐大嘅 12 米三軸巴士嘅引入,
九巴喺1983 年開始將呢款巴士淘汰, 至 1984 年更係 "大水牛" 退役嘅高峰期,
最後喺九巴服役嘅 "大水牛" 巴士, 喺 1987 年正式退役。
雖然大多數 "大水牛" 巴士退役後都難途被肢解拆毁嘅命運,
但係目前仲有三架 "大水牛" 巴士依然生存於世,
其中 A68 (AD4860) 被送往澳洲一家博物館作收藏,
可惜該間博物館後來關閉, 巴士後來輾轉流落到一家酒莊, 作為接載訪客之用,
另外一架 A165 (AD7156) 被一名英國人 John Shearmann 由九巴購入,
並且運回英國收藏, 巴士保留九巴退役前嘅模樣,
經過修復後現存放於位於 Barry 嘅 Western Welsh Bus Depot,
九巴自身亦保留一架 A19 (AD4807), 並且回復至六十年代初投入服務時嘅車身塗裝色彩,
但係未有回復重建車身前嘅車尾樓梯同尾置平台車門嘅原來車身規格。
喺一啲特別嘅場合, 例如九巴嘅傑出車長選舉日,
都會見到呢架 "大水牛" 亮相, 作為展覽品之用。

眼見九巴同 AEC 嘅呢一切舉動, Daimler 亦怕失去九巴呢個重要客户,
於是參照對手嘅底盤設計, 依樣畫葫蘆, 再喺自家出品嘅 CVG6 底盤上加以改良,
成為 Daimler CVG6-34 呎嘅新巴士, 即係後來九巴嘅 Daimler D 型,
以及廣為人知嘅 Daimler E 型 "長牛" 巴士, 以挽回失地同爭取九巴嘅新車訂單,
但係到呢度就已經係另一個故事。"大水牛" 喺九巴車隊中服務九龍半島近四分一世紀,
期間未曾行走過任何一條過海隧道線, 以至元朗同上水嘅新界郊區線,
係名副其實嘅 "九龍巴士"。儘管佢地已經退役多時,
"大水牛" 嘅形象喺佢地退役達三十年後嘅今日,
依然喺唔少老一輩嘅香港人社群中深入民心, 甚至已經成為一個集體回憶。

今日, 麻帆良市隆重歡迎九巴 AEC Regent V "大水牛" 登場!!
呢款當年曾經稱霸九龍半島嘅一代巨巴, 對市長 Super Bus 嚟講,
佢話第一次有印象見過呢款車果陣, 已經係大概兩三歲嘅時候,
當時佢地已經係 "三劃黃" 車身色, 果陣佢亦覺得好奇,
點解呢啲巴士車頭會有三劃黃線呢? 後來上左中學,
喺一次偶然嘅機會睇到 <<車主>> 雜誌嘅巴士迷專欄,
先至知道呢個 "三劃黃" 標記係代表一人售票嘅意思。
不過 Super Bus 對呢款車印象最深嘅要算係佢地喺 80 年代重建車身之後,
上奶黃下紅嘅車身色配搭, 佢話記得果陣细個,
亞嫲帶佢去荔園玩都會先坐 6C, 去美乎嘅荔枝角橋底巴士總站轉車,
而當時 6C 就係以呢啲 "大水牛" 巴士行走,
佢地行車時果把雄渾嘅引擎聲, 到依家依然記憶猶新,
一直到後來載客量更高嘅 12 米 Dennis "巨龍" 入主,
呢批大水牛就靜悄悄地喺呢條路線消聲匿跡。
2001 年九巴曾經推出過呢款 "大水牛" 嘅巴士模型,
但係生性撇扭嘅 Super Bus, 當時依然堅持對任何 "半駕駛艙" 設計嘅巴士一概冇興趣,
所以最後冇入, 事隔十幾年, 或者人有一種懷舊嘅心態,
Super Bus 想再入番呢款車, 但係可惜依家喺市場上已經無從入手,
正當佢埋怨自己嘅性格累事之際, 皇天不負有心人,
喺 ebay 終於揾到呢架模型, 而且仲係全新,
結果呢架 "大水牛" 依家有幸成為 Super Bus 嘅收藏之一,
亦一圓佢擁有 "紅燈籠色大水牛" 嘅心願。
Super Bus 仲話, 雖然呢架 "大水牛" 係十幾年前嘅産物,
同今時今日講究有超精細內籠同高像真度嘅巴士模型相比,
精細度無疑係輸足九條街, 尤其全車使用凹窗嘅倒模設計,
喺今時今日嘅標準已經係完全 Fail! 但係以當時嚟講,
能夠出到一款真正代表香港, 以至香港獨有嘅車款已經實屬難得,
而且當時呢部車亦出左成萬架咁多, 佢唔期望將來會有其他廠家改模,
甚至再起新模出 Retro, 呢架 "大水牛" 亦唔會係單純嘅 "袋住先",
佢仲話, 如果可以嘅話, 會考慮揾埋 "三劃黃" 版,
同呢架 "紅燈籠" 版湊成一對咁話。無論如何,
AEC Regent V "大水牛" 巴士, 都係九巴嘅經典車款之一,
更何況 Super Bus 亦曾經係呢款巴士嘅座上客,
對呢款車有感情實屬理解嘅。

隆重歡迎! 九巴 AEC Regent V "大水牛", 見參!!










證書編號 02794, 全球限量 10000 架


正式落地!!


















有時有一個疑問, 六十年代巴士嘅車尾車牌係用細牌而且又有英文字母開頭嘅話,
係咪真係用好似呢架大水牛模型咁樣嘅格式...


定係好似相中呢架同款巴士使用嘅格式呢...?




九巴六、七十年代嘅巨巴


如果冇 AEC 大水牛, 就唔會有後來嘅丹拿 D、E 型






姊妹車 A19, AD4807 攝於 1994 年九巴傑出車長選舉日,
雖然被九巴保留, 並且回復至六十年代初投入服務時嘅車身塗裝色彩,
但係未有回復重建車身前嘅車尾樓梯同尾置平台車門嘅原來車身規格,
令人有時空交錯嘅感覺




被九巴保留嘅 AD4807, 留意車頭水箱網已經係九巴自行設計嘅式樣,
而唔係原裝嘅 AEC 水箱網設計, 原有 AEC  "藍三角" 嘅位置,
更加只係油上 "AEC" 三個黃字取代, －比人一種 "好 Hea" 嘅感覺




車前留影




裝喺 AEC 巴士水箱網上嘅原裝 AEC 標誌, 亦係該廠另一個別稱 "藍三角" 嘅由來,
留意內裏亦藏住倫敦運輸 London Transport 嘅環狀標誌,
可以睇得出AEC 同倫敦運輸嘅密切關係。
仲記得以前香港消防處使用嘅消防車亦有 AEC 嘅出品嗎?

(網上相片)


Thanks for reading~