[Reading, UK] (31/12/2016) 告別非低地台巴士+Reading雜攝 [81pic+9vid]

英國近年逐步將常規巴士服務低地台化，首先由2015年開始，所有小型巴士都要係低地台，2016年到7.5噸以上嘅單層巴士，今年就輪到雙層巴士，代表英國所有常規巴士服務都已經係wheelchair accessible，2020年連客車都要上到輪椅。即係話，2016年12月31號，係英國非低地台巴士行走常規路線嘅最後一日

如果冇理解錯，法例只係要求wheelchair accessible，唔一定要低地台，有輪椅升降台都得。不過非低地台巴士至少有十幾廿年車齡，換新/二手低地台巴士更化算，所以基本上一般嘅巴士服務已經完全低地台化。但係倫敦而家仍有Routemaster行15號線，唔知係唔係只要有低地台替代服務就得。有一個已知嘅例外，係如果部車已有20年車齡，咁佢就可以喺一年入面行20日一般路線/有時間表嘅巴士路線，即係running day呢類特別活動唔受影響

講返今次呢個活動，Mortons Travel係一間位於Hampshire北部嘅旅遊巴公司，有時South West Trains需要rail replacement巴士時，亦會見到Mortons嘅車。Mortons喺Reading同南邊嘅Tadley之間，開咗條TR1線，包裝為TadRed (即兩邊目的地名縮寫)，主要用富豪B10BLE。呢個running day嘅路線，就係圍繞住呢條TR1線嘅服務範圍嚟開，有112、142、143三條已取消路線，加埋TR1，時間表如下：
http://www.tadred.com/running-day

至於用車，原本計劃有12部車，其中9部來自Mortons自己嘅車隊，其餘3部係其他人收藏：
https://www.facebook.com/1620232 ... 18256499979/?type=3
不過部利蘭Lynx G215KRN因為尾軸問題而中途退出，由後備車富豪B10M SJI1960代替，B10M本身就由平時用嘅B10BLE R27RED頂上。
13部車入面搭到11部，而且拍咗9段片，真係超額完成

全日係咁影相同拍片，用盡兩嚿相機電，再要出動埋後備SD卡，唔覺意整咗件咁長篇嘅「大製作」，希望大家唔好嫌我長氣

一出Reading火車站就見到前中電309，二話不說即刻上車搭到尾站Riseley。現任車主Mortons Travel喺2013年買咗佢，有時會做rail replacement服務，而家放售緊：

意外地見到部冷氣機仍然喺度：

前任車主Kinch of Minety換咗呢個騎呢車咀上去：

駕駛室睇落好原裝，錶板上面重寫住309同FC8342：

Denso冷氣掣亦都喺度，夏天時應該可以開：

全車拆晒窗簾，地板同凳都換過晒，所有凳都有三點式安全帶。另外，應該係headroom問題，下層拆咗手提行李架：

上層仍有手提行李架，不過轉咗隻色之後冇晒原本嘅氣氛：

雖然部車個樣唔同晒，但一上車就聞到陣好熟悉嘅城巴蘭味
空轉同一、二波把聲都同城巴12米單門蘭幾似，但總係覺得爭少少嘢，或者係太凍唔使著水箱風扇？可惜部車一路要跟住前車，冇機會發揮性能。另外，有把好鬼煩嘅震動聲，一爆完風就會收聲，似係「爆風缸」附近有啲嘢鬆咗。如果唔想睇市區入面行吓停吓，可以直接飛到12:30：
https://www.youtube.com/watch?v=N-W1WiTNpFM&index=8&list=PL-j4RThTgwUfmI_DmdoEsf1WvZu-s6Akq

回程時搭咗前車，係Mortons Travel旗下古典巴士之一，ECW矮車身9.6米利蘭奧林，配上吉拿6LXB引擎同利蘭Hydracyclic五前速半自動波箱。部車原屬West Yorkshire Road Car嘅York分部，車上貼住「Hampshire Bus」字樣只係因為Mortons位於Hampshire而自己加上去：

部車1984年出廠，當年嘅ECW車身相比早期型(例如中巴BR)已有改良，包括上層尾窗變成無框，引擎入風口佈置亦更整齊。另外，尾轆前面個蓋唔係入AdBlue，而係入Auto Lub，即係底盤自動潤滑系統嘅油：

早期利蘭奧林嘅駕駛室，仍然係用牛角軚，而手掣對上嘅係Hydracyclic五前速半自動波箱嘅波掣：

駕駛室上面寫住底盤編號ON1137 (ON1001前係Bristol造)，ECW塊牌就刻上車身編號25856。左邊嘅「IP 12 83」可能係指部車1983年12月裝好車身？

A686MWX下層車廂：

樓梯後面有一張倒頭雙人位，因為樓梯係由前向後上(應該唔係標準)，所以樓梯後面有空位，但嗰度要放右前轆嘅懸掛氣袋而要升高一級，於是只能裝倒頭位：

6LXB引擎同Hydracyclic波箱之間，用一個19吋直徑液壓飛輪連接，冇任何形式嘅lock-up clutch，任何時間都係100%油壓傳動。同珍寶年代嘅液壓飛輪唔同，Hydracyclic個飛輪係同波箱本身用同一組油路，波箱油經過filter之後，首先泵入去個飛輪，再「漏」去波箱入面，所以成組嘢入面嘅溫度分佈比較平均，冇咁易過熱。而個飛輪入面永遠充滿油，可以減少輸入同輸出嘅轉速差，令個飛輪「實」啲，提升效率，不過片入面明顯聽到踩油同鬆油嘅引擎轉數係有啲分別，就算喺高轉都係咁，呢個或者就係液壓飛輪嘅先天不足，冇咁chok但犧牲咗少少效率：
https://www.youtube.com/watch?v=u1ChqhFJOlU&index=6&list=PL-j4RThTgwUfmI_DmdoEsf1WvZu-s6Akq

喺Mereoak轉車站落車後，同另一方向嘅兩部Stagecoach矮身長陣吉蘭合照：

被私人收藏嘅前倫敦都城M1069，1984年出廠，當時只得倫敦運輸局堅持要Mk1車身：

右邊引擎蓋上有引擎機油冷卻器吸氣口，代表佢係用改良版引擎散熱系統，1981年中已經出現，同ML1差唔多時候，但當年本土Mk2車身仍未推出：

由Mereoak搭返Riseley，行同一段路明顯覺得都城嘅避震比奧林軟好多。典型嘅6LXB都城聲幾好聽，不過總係爭咁啲嘢，冇嗰把好獨特嘅angle drive聲，好似淨係康都同港版吉都先會咁響：
https://www.youtube.com/watch?v=Ca7MHq7KLxI&index=1&list=PL-j4RThTgwUfmI_DmdoEsf1WvZu-s6Akq

另一部被私人收藏嘅巴士，前Reading Transport嘅AEC Regent III，配上Park Royal矮車身：

同前面部都城拍埋一比，明顯見到個Park Royal矮車身有幾矮：

車上貼住嘅簡介，可以見到部車係尾二部出廠嘅AEC Regent III，而且1957年投入服務之後，去到1987年先至正式退役。而型號入面細分嘅6812A，就代表底盤長27呎、配AEC A173 7.7公升引擎、四前速非同步嚙合手波同真空輔助液壓迫力：

樓梯上面嘅Park Royal水牌：

車尾太平門同電動摺門：

矮身Regent III下層車廂，上層沉降式走廊佔用咗唔少headroom：

車頂比一般雙層巴士扁平，沉降式走廊去到車頭升高一級遷就司機位，而四人座位佈置實在唔多適合繁忙路線：

Regent III喺1947年推出時，已經有9.6公升引擎、四前速先選式波箱同風迫力畀人揀。呢部作為尾二部出廠嘅Regent III，仍然係用最原始嘅配搭，甚至連1950年起可以揀嘅同步嚙合手波都冇用，只能話當年Reading Transport保守咗啲。第一次搭手波(先選式係另一樣嘢)雙層巴士，真係被佢起步嘅表現嚇親，唔知係極力子唔靚定係點，起步捽捽吓非常chok，一波起步時更甚(5:43)。我終於明白當先選式波箱+液壓飛輪呢個組合1930年出現喺巴士上時，係一個幾咁突破性嘅飛躍進步，因為液壓飛輪起步嘅順滑真係冇得彈，比當時普遍用緊嘅非同步嚙合手波高唔知幾多班：
https://www.youtube.com/watch?v=N85v_wb13AE&index=9&list=PL-j4RThTgwUfmI_DmdoEsf1WvZu-s6Akq

Mereoak轉車站嘅各種利蘭：

前Preston Bus嘅利蘭Lynx，喺呢個running day前個幾星期先至由Mortons Travel買入收藏，並驗車續牌。部車1989年出廠，屬第一代Lynx (第二代個車咀向前凸出)。雖然係傳統嘅獨立底盤設計，但絕大部份Lynx都係由利蘭自己喺Workington廠房砌埋車身，外觀上最大特色當然係斜入去嘅擋風玻璃：

尾軸用hub reduction設計，差速器算矮，車尾只需要上多一級：

置中嘅燈箱照明設計，乃係繼承自利蘭National。有一點我唔係好明，英國有唔少90年代左右嘅巴士都喺扶手柱上面包上大大嚿膠，有時凳背扶手都係咁做，通常全車啲凳都裝埋安全帶，或者係可以做校巴。我當佢係為咗防撞，但條柱咁粗，一隻手根本揸唔實，咁做真係會安全啲？

全車都用有安全帶嘅Fainsa Cosmic凳，應該係後來換：

之前搭艾莎B55 Mk1，以為佢條hub reduction U形尾軸係巴士之中最響嘅尾軸，點知呢部Lynx都唔差，只係比艾莎細聲少少。不過佢把尾軸聲聽落好「乾」，唔多正常，稍後部車亦因為尾軸漏油而中途退出，由後備車富豪B10M代替。部車出廠時，利蘭巴士部已經賣咗畀富豪，TL11引擎同Hydracyclic波箱都已停產，所以標準動力配搭係平臥版康明斯LT10同ZF 4HP500，聲同表現都幾唔錯：
https://www.youtube.com/watch?v=ureHo7vu1Uo&list=PL-j4RThTgwUfmI_DmdoEsf1WvZu-s6Akq&index=4

Optare Vecta車身MAN 11.190，1995年出廠，本來被Optare用嚟做樣辦車，後來賣畀Reading Buses，輾轉喺2013年由Mortons Travel買入收藏，再髹上呢隻模仿90年代Reading Buses標準色設計，但改用Mortons自己配色嘅塗裝：

尾窗上標榜部車屬於低排放，以當年計大概係歐二，引擎相信係MAN D0826LOH：

一開門嗰下又嚇一嚇，當飛鏢已經出咗六年之後，一部後置引擎細轆中型單層巴士嘅上車門竟然仍有兩級，我諗隻底盤本來其實係用嚟做客車而唔係巴士：

非常標準嘅MAN巴士錶板：

車頭上再兩級，車尾重有兩級，尾排似乎係直接踩喺引擎上面。隻凳有啲似Trend-Tex，背面似正面唔似，軟腍腍幾好坐，上面冇寫係乜嘢牌子，咁多位有冇頭緒？

車廂空間感幾好，天花兩邊設計唔錯，簡單得嚟又唔悶：

由Mortimer搭返出Reading，覺得佢嘅保養相當良好，車身冇雜聲，氣墊懸掛幾舒服，引擎唔係靜但唔會打冷震，ZF 4HP500波箱又順，完全唔似超過廿年車齡：
https://www.youtube.com/watch?v=ZB_0gMJdaZE&index=5&list=PL-j4RThTgwUfmI_DmdoEsf1WvZu-s6Akq

仍然待命中嘅後備車，前Stagecoach富豪B10M，1994年出廠，原車牌L338KCK：

同當年捷達巴士嗰「三長兩短」唔同，呢部B10M係Mk4，將散熱水箱放喺左前轆後，唔再擺喺車頭中間。查過部車係B10M-55，即軸距5.5米，喺相上面略為度過之後，計到全車大約長11.2米：

因為係中置引擎，車尾比同樣用亞歷山大PS車身嘅九巴長矛企理好多：

前Stagecoach矮身10.3米豪，1998年出廠，曾經係Stagecoach Manchester嘅16778，2016年7月退役後，主要被Mortons Travel用嚟做校巴同rail replacement。車身外型同Stagecoach吉蘭差唔多，只得擋風玻璃同車咀唔同，而車身仍然係用拉釘接合：

車尾就似老虎蘭/豪個年代：

印象中喺早期城巴1xx蘭之後，尾排地板上面就已經冇咗嗰個凸起嘅半圓形，但呢部98年出廠嘅豪竟然重有，睇怕成個車身嘅spec都係「十年如一日」，同88年嘅吉蘭唔爭幾遠：

因為要做校巴，所以全部扶手柱都包咗一層好厚嘅膠，所有位都有裝安全帶：

去到歐二年代，引擎只可以用D10A，波箱就揀咗D863.3，把聲都係同熟悉嘅城巴豪聲唔同：
https://www.youtube.com/watch?v=XmIubdBeesk&index=2&list=PL-j4RThTgwUfmI_DmdoEsf1WvZu-s6Akq

又入到去Mortimer，兩部Stagecoach矮身長陣吉蘭準備開出：

前面呢架喺1990年出廠，原本屬於Stagecoach旗下United Counties，係呢間公司最後一部長陣利蘭奧林。現任車主Mortons Travel喺2010年開始用佢行rail replacement，2016年中就撥入古典巴士車隊，修復成90年代嘅Stagecoach樣，可惜頭燈唔係原裝。同之前提過嗰部ECW奧林一樣，「Hampshire Bus」字樣只係因為Mortons位於Hampshire而自己加上去：

亞歷山大RL型矮車身高4.19米，上下層車窗一齊變矮，令10.3米車身睇落更修長：

軚盤上仍有利蘭旋風標誌，個人認為呢隻係最靚嘅巴士錶板同軚盤：

座位同儲物空間嘅妥協，各佔半個輪拱，另外前門後面塊板亦同城巴蘭一樣裝有窗簾：

因為係矮車身，所以樓梯比一般R型少一級，只得七級，下層樓梯口亦比較前。另外留意全車可以坐87個人，上層51個，下層36個：

矮身版樓梯短咗，於是梯後面有位放多一張二人位，但我諗因為被個懸掛氣袋頂住，所以要升高一級，好似裝倒頭位會冇咁怪相。而呢兩個位，加埋上層樓梯後面嗰兩個位，就令到矮身版反而比標準高度R型坐得多幾個人：

呢隻咁好手感嘅鐘掣，相信大家都唔會覺得陌生，不過比較特別嘅係全部鐘掣都斜向走廊：

6LXB配4HP500，應該係奧林咁多隻動力組合之中最慳油嗰隻，不過就冇LT10嗰種澎湃，而波箱個lock up clutch亦好似有啲咬唔實：
https://www.youtube.com/watch?v=BsP92lOCIxA&list=PL-j4RThTgwUfmI_DmdoEsf1WvZu-s6Akq&index=7

另一部Stagecoach矮身長陣吉蘭，由Stagecoach South保留嘅F601MSL，1988年出廠，係第一部配6LXB+4HP500嘅10.3米蘭：

兩代車尾對比，新啲嘅H654VVV已經冇咗嗰對「吉蘭」款引擎吸風口：

好快又有一部蘭，23號先喺Preston Bus退役，28號賣畀Mortons Travel，屬於出租車隊：

車身同ECW有九成九似，但其實係利蘭喺Workington廠房度砌嘅自家車身，車咀係「豪華」款式：

呢隻車身又係「十年如一日」，由80年奧林推出以嚟，就基本冇變，只係改過上層尾窗同引擎吸風口，唔睇車牌真係估唔到部車91年先出廠，聽到把LT10聲更加覺得格格不入：

另一樣格格不入嘅嘢，係錶板旁邊個咁新款嘅售票機：

呢隻軟腍腍幾好坐嘅高背凳，其實都係當年利蘭車身奧林為數唔多嘅選項之一：

88年開始，因為利蘭唔再出自已嘅TL11引擎同Hydracyclic波箱，奧林嘅標準配備就變咗LT10+4HP500。值得一提，由管理層私有化嘅利蘭巴士部喺87年同ZF簽約，獲授權喺自己嘅Farington廠房整ZF零件，而且可以自己砌波箱，但同時要將Ecomat波箱定為標準配置。聽住把咁標準嘅康偈蘭聲，但坐喺個「ECW款式」車廂入面，感覺好奇怪：
https://www.youtube.com/watch?v=8LlvVOO8Sj8&index=3&list=PL-j4RThTgwUfmI_DmdoEsf1WvZu-s6Akq

由Mortons Travel保留嘅利蘭National Mk1，1975年出廠，原屬Alder Valley，據聞係英國僅有嘅三部有牌可以收車費載客嘅National Mk1之一：

所有長窗都一樣長，表示佢係長陣版National，長11.3米：

National Mk1引擎散熱水箱放喺車尾右邊，但只係得車尾有網，側邊就冇，大概係喺車底吸風。車頂上面係National Mk1嘅標準、Mk2嘅option，暖氣加風機，車廂裏面冇傳統沿住牆腳行嘅暖水喉：

車頭指揮燈同邊燈係Lucas L896：

車側指揮燈係Lucas L898，泰坦B15都係用呢隻：

駕駛室係當年利蘭嘅「人體工學」設計，已經有奧林嘅雛型，右邊更加係一模一樣。五前速半自動波嘅波掣係CAV487型，要推落左下角先可以撻車：

車廂前部空間感唔錯，留意右前轆上面張長凳係直接裝喺地台上，唔使再上一級。呢樣嘢真係有啲出奇，因為佢無論係登車梯級定地台離地都幾矮，車胎都只係275/70R22.5，當年算薄但而家唔算特別薄，而張凳又唔係吊腳，唯一解釋係輪拱偷位偷得好盡：

車廂地台算低，去到尾排都只係要上多一級，平臥縱置嘅利蘭O.510引擎完全收晒喺地台底：

唔知點解，車廂入面唔多似其他巴士，特別係置中而連貫嘅照明燈箱、車廂中間一對玻璃屏風同一大排扶手吊環，反而似火車/地鐵多啲：

相機電就快用盡，所以冇拍到片，改為分享1970年利蘭推出National時，《Commercial Motor》雜誌嘅介紹：
http://commercial-motor.cdn.netc ... 5d65b033af018cc9b03
http://commercial-motor.cdn.netc ... fb1bdbb307e7b5e0261
http://commercial-motor.cdn.netc ... be83c2b23629a0b4943
http://commercial-motor.cdn.netc ... 4db5d2c893d210a85d7
雖然National係整體構造(integral construction)，但仍有一條相對傳統(唔係牙籤陣)嘅底盤。另外，入面亦有幅圖show到尾軸、傳動系統同懸掛，比較有趣嘅係佢條直霎首先經過一組減速齒輪再入尾牙，令個尾牙可以做得細啲，車尾地台先可以整得咁低。

前面提過部Lynx因為尾軸問題而收車，由士啤B10M代替，當日搭嘅最後一程就係搭部B10M返Reading：

中置引擎巴士最大優點，就係車廂空間見使，啲凳可以一路排到最尾：

又係用一隻似Trend-Tex嘅凳，但今次係正面似背面唔似，唔係前面部Vecta用嗰隻，咁多位有冇頭緒？


+Reading火車站附近雜攝+

三尖八角車身Wright StreetDeck，只有三個月車齡，不過咁污糟嘅Alcoa合金軨都係第一次見：

樓梯唔只有窗，每級亦有一條LED。車入面嘅高背凳係Lazzerini Ethos，比Pratico更薄更輕。另外，上層樓梯隔籬有卡位同梳化，真係虧佢諗得出：

East Lancs Olympus車身Scania N230UD，車廂入面嘅光管形狀係呢隻車身嘅特色之一：

同倫敦巴士嘅清一色全紅車身+黑底黃/白布牌比較，Reading Buses完全係另一個極端，每組路線都有自己嘅顏色，電牌甚至有雙色LED：

用酒紅色車身嘅，係全天侯來往市中心同大學嘅21號線，車上有免費WiFi：

長陣柴油版E400MMC嘅車尾，好似咁寫滿嘢之後，終於變得順眼啲：

另一隻顏色 - 綠寶石系列，除咗全天侯服務同免費WiFi，重有USB叉電插頭：

綠寶石系列重包括6號線，車內嘅凳都變埋綠色：

車尾嘅The Grand Tour廣告 -「Caution: prone to stopping frequently, driving around in circles and picking up unnecessary passengers.」：

由牛津揸到Reading嘅Mercedes-Benz Citaro，屬於Thames Travel：

第二款The Grand Tour廣告 -「This is the slowest we've travelled in weeks. Apart from James obviously.」(in Clarkson's voice)：

Reading Buses普通色嘅長陣E400，似係矮身曲梯版：

黃色系嘅長陣E400，唔明點解中間隻窗要分做兩隻細窗：

其實重有幾隻色，例如Jet Black、Royal Blue、豹紋等，不過可惜相機冇晒電影唔到

多謝各位咁有耐性睇完篇文，歡迎討論

How about Heritage Route 15? Will it be stopped?

LRT610-1092 發表於 2017-3-16 19:11
How about Heritage Route 15? Will it be stopped?

Those Routemasters are still running on route 15 between Trafalgar Square and Tower Hill.