hkitalk.net 香港交通資訊網

標題: 港鐵有Ｄ咩車站係設計失誤? [打印本頁]

作者: timewater 時間: 2023-5-23 10:20
標題: 港鐵有Ｄ咩車站係設計失誤?
土瓜灣站
土瓜灣站是新車站，亦位於老人區。但車站完全對社區不友善，例如所有車站出口均沒有下行電梯從地面到大堂。而月台來往大堂的電梯亦不足，如果其中一條電梯故障/維修，乘客往往都要由車頭行去車尾搵電梯離開月台。
好明顯而家每個月台只有２條扶手電梯離開月台並不足夠，而由大堂往月台的電梯更只有１條，完全令乘客不便。

本人認為有關顧問公司低估乘客要求，車站設計失誤。空間不夠其實唔係籍口, 例如往屯門方向第1卡既樓梯好闊, 加多條電梯我睇唔到有技術困難

葵興站
往荃灣月台每個方向只有一條扶手電梯喺今時今日係未夠嘅

太子、油麻地站
往每個月台嘅扶手電梯只有一條，喺今時今日係未夠嘅
不過要讚既就係太子、旺角都可以往對面月台轉車，唔使乘客左搵右搵，好過美孚、鑽石山、鰂魚涌、何文田轉車站

點評: 港鐵未來起車站應該要參考太子-旺角、中環-金鐘同油塘-調景嶺嘅轉車模式, 俾乘客可以舒服咁轉車, 唔使搵餐矇。避免再起何文田一類設計失誤既車站
港鐵同工程顧問公司應該為乘客想多一步, 嘗試解決技術困難。如果顧問公司諗唔到, 可以開放俾大眾集思廣益, 共建「我們的車站」,而唔係「顧問公司的車站」

作者: Ricky403 時間: 2023-5-23 10:25
行動不便或拖篋咪去搭𨋢，又唔係啲𨋢要例牌排第二轉先入到咁嘅情況
鼓勵行得走得嘅行樓梯，應該都會係將來趨勢

作者: kei_hk 時間: 2023-5-23 10:38

點評: 港鐵未來起車站應該要參考太子-旺角、中環-金鐘同油塘-調景嶺嘅轉車模式, 俾乘客可以舒服咁轉車, 唔使搵餐矇。避免再起何文田一類設計失誤既車站港鐵同工程顧問公司應該為乘客想多一步, 嘗試解決技術困難。如果顧問公司諗唔到, 可以開放俾大眾集思廣益, 共建「我們的車站」,而唔係「顧問公司的車站」

對於何文田站﹐點去做轉乘設計﹐你有何高見?
2條線係「十字形」走向﹐基本上都唔會有好結果。
同樣例子﹐更早已經出現在鰂魚涌站。

作者: sunhoo 時間: 2023-5-23 11:41
連何文田都設計失誤？你話大陸果堆無轉換層嘅島-側十字型車站係失誤還差唔多

作者: 1372mm 時間: 2023-5-23 12:40
欣澳站

欣澳站出口太細，又冇商店，對轉巴士乘客唔方便

作者: charlesli0104 時間: 2023-5-23 12:51

土瓜灣站所有車站出口均沒有下行電梯從地面到大堂

但係有3個出口有lift搭

葵興站往荃灣月台每個方向只有一條扶手電梯喺今時今日係未夠嘅l

本來月台唔闊，仲有咩位置可以加扶手電梯？

太子、油麻地站往每個月台嘅扶手電梯只有一條

本身2個站有2層4個月台，可以起扶手電梯嘅位幾乎都起曬

喺今時今日係未夠

設計失誤係起左出黎即時可以發現嘅問題，40年前冇起到係因為當時需求冇咁高，最多只係冇遠見，但係以當時嘅環境黎講唔係大問題

作者: Ohm 時間: 2023-5-23 14:24
何文田站設計失誤喺啲升降機到
站內站外嘅升降機服務都唔夠

作者: JX9097 時間: 2023-5-23 14:28
寶琳
雙月台變單月台
搞到繁時出入都「塞車」
亦間接令到成條將軍澳線效益降低

作者: Ricky403 時間: 2023-5-23 15:16
不如諗下點解香港站月台得呢個闊度，成個月台都係人水洩不通咁都未完全塞滿一部車
而駁通北港島綫嘅延誤年期，可以拍得住沙田線變東九龍線再變沙中線嘅程度，前者估計由提出到建成都有30-40年，後者就直頭由1970年搞到2022年先搞掂

作者: HU6455 時間: 2023-5-23 15:56
有D車站設計果時未必係失誤,但係社區/人口不斷有變化下都吾去改善,先係更加有問題！

作者: 天空之神 時間: 2023-5-23 17:10
本帖最後由天空之神於 2023-5-23 17:12 編輯

Ricky403 發表於 2023-5-23 15:16
不如諗下點解香港站月台得呢個闊度，成個月台都係人水洩不通咁都未完全塞滿一部車
而駁通北港島綫嘅延誤年 ...

北港島線遲遲唔起先顯得香港站細姐呢個

最失敗係南晶？屯碼去烏溪沙/屯門方向反轉，咪至少有一邊唔使落地底
又可以唔使土瓜灣起交叉

作者: eternalflame 時間: 2023-5-23 17:30
樓主又黎三幅被

6/4/2022
新建成鐵路車站應否加入更多便民元素？
https://www.hkitalk.net/HKiTalk2/thread-2138047-1-1.html

6/9/2021
點解全球咁多地鐵都唔會有大量扶手電梯來往大堂同月台?
https://www.hkitalk.net/HKiTalk2/thread-2121216-1-1.html

4/8/2021
一人幾個港鐵可以更加人性化既建議
https://www.hkitalk.net/HKiTalk2/thread-2118406-1-1.html

27/6/2021
點解車站設計唔做下公眾諮詢？
https://www.hkitalk.net/HKiTalk2/thread-2115431-1-1.html

作者: EX-TL 時間: 2023-5-23 19:58
觀塘站

由整座建築設計至內部細節, 通通唔掂!

架空座落在繁忙的觀塘道和開源道交界, 以致未能改建任何鐵路和道路建設, 連接大堂與地面只有樓梯, 完全沒有扶手電梯, 商貿區要完全依賴apm才有升降機.

大堂需處理乘車和橫過迴旋處的人流, 多個方向人流在車站控制室形成樽頸和容易發生碰撞.

店舖位置在最近一次大遷移後, 令行人通道變得曲折.

市中心重建令美沙酮診所依附於地鐵站外側, 比週邊任何寫字樓商場住宅交通設施都要便利, 亦衍生出治安和衛生問題, 導致市民對C3出口避之則吉.

整座建築使用近50年, 仍未有重建時間表, 反而未來會加裝升降機等設施, 加重車站負擔.

月台設計彎曲, 部份位置與列車有較大的空隙和高低差.

大堂空調不足, 加上戶外候車, 及利用樓梯進出車站, 夏天汗流浹背, 酷熱難耐.

設施陳舊, 感覺差劣, 這就是觀塘站.

作者: JR5204@26M 時間: 2023-5-23 20:10

EX-TL 發表於 2023-5-23 19:58
觀塘站

由整座建築設計至內部細節, 通通唔掂!

【01獨家】市建局擴闊觀塘站方案首曝光　港鐵反對掀暗戰 (hk01.com)
市建局係16年送埋塊地比港鐵，但港鐵死都唔肯擴建觀塘站

立法會十八題：港鐵觀塘線及將軍澳線 (info.gov.hk)

至於擴建港鐵觀塘站月台的建議，根據港鐵公司的評估，現有港鐵觀塘站月台的容量足以應付未來的預測載客量，而擴闊月台的建議會影響現有車站的運作，為行車服務及安全帶來風險。

21年港鐵好有自信地話無野，等睇成個觀塘市中心重建完成後，觀塘站肯定陸沉

作者: rickywk 時間: 2023-5-23 21:20

Ricky403 發表於 2023-5-23 15:16
不如諗下點解香港站月台得呢個闊度，成個月台都係人水洩不通咁都未完全塞滿一部車
而駁通北港島綫嘅延誤年 ...

仲話要直通運轉，真係無眼睇

作者: 梓淵 時間: 2023-5-24 00:53
本帖最後由梓淵於 2023-5-24 01:00 編輯

土瓜灣站作為新新車站的確係好差..

已經唔只一次長封一兩星期連接下層月台既電梯做維修
每次只要其一條一維修, 就會得返一條下行電梯, 上行電梯要行到去車頭要經L2再轉
結果要長期企嗰人喺度教人去由車尾行去車頭
一係就要一大班人等車尾唯一既一部LIFT

另外AB出口嗰邊連出入閘機都唔夠繁忙時間排長龍
而家直頭要出動到臨時八達通機, 搵幾個職員企喺度

成日慳埋慳埋啲錢, 結果人手又要多左, 搭客又不便

作者: Kelvin15190 時間: 2023-5-24 02:20

天空之神發表於 2023-5-23 17:10
北港島線遲遲唔起先顯得香港站細姐呢個

最失敗係南晶？屯碼去烏溪沙/屯門方向反轉，咪至少有一邊唔使落地 ...

仲要飛埋土瓜灣先可以唔起交叉。的確，交差設計都有份造成屯馬綫東九龍段成全綫樽頸位，太多急彎。

作者: teddybus 時間: 2023-5-24 05:14
本帖最後由 teddybus 於 2023-5-24 05:16 編輯

eternalflame 發表於 2023-5-23 17:30
樓主又黎三幅被

6/4/2022

樓主都loop咗幾年嘞
港鐵仲未請佢做顧問咩？
請埋架前過檔躉嘛

作者: chikng2227 時間: 2023-5-24 09:15
西灣河站，兩個出入口同一個出入口無分別。咁大個站，咁長的月台，出入口卻基本上只有一個。

月台仲要分兩層，但是之前的太古站和之後的筲箕灣站都係同層月台。

作者: kei_hk 時間: 2023-5-24 10:02

Kelvin15190 發表於 2023-5-24 02:20
仲要飛埋土瓜灣先可以唔起交叉。的確，交差設計都有份造成屯馬綫東九龍段成全綫樽頸位，太多急彎。 ...

其實南昌站唔見得轉乘問題係設計失誤﹐只係發生了一些設計時無預計的事情。

如果唔係有 "兩鐵合併" 這件事﹐大家今天仲係係落番大堂﹐做一次過閘機/出閘再入閘﹐才做到轉車。

在興建當日﹐邊有人估到會有 "兩鐵合併" ?
如果有預計﹐那些年就應該在美孚至南昌一段﹐已經做左反轉2邊行車方向 (唔係用渡軌方法)。
同一時間﹐前九鐵及前地鐵的月台﹐亦唔應該有水平高度差異。

作者: hellomato 時間: 2023-5-24 10:28
本帖最後由 hellomato 於 2023-5-24 10:29 編輯

chikng2227 發表於 2023-5-24 09:15
西灣河站，兩個出入口同一個出入口無分別。咁大個站，咁長的月台，出入口卻基本上只有一個。

月台仲要分兩 ...

西灣河站確實唔起眼到一個點，一過西灣河街市就無咗個站；而周邊一啲都唔差，足以擴建——
向北可以拉出愛秩序灣（雖然係西灣河站起好超過10年後先有發展）
向南可以上耀東山——雖然已經有天橋到山腳，也體諒當年技術和成本所限，沒有進一步整上山電梯。
不過而家應該可以整，尤其耀東邨人口老化；並借鑒之前整鑽石山站上慈雲山電梯嘅經驗。

作者: JX9097 時間: 2023-5-24 11:20

chikng2227 發表於 2023-5-24 09:15
西灣河站，兩個出入口同一個出入口無分別。咁大個站，咁長的月台，出入口卻基本上只有一個。

月台仲要分兩 ...

炮台山站都係類似
全部集中哂喺一組扶手梯上落，一組出入閘機

作者: JX9097 時間: 2023-5-24 11:22

hellomato 發表於 2023-5-24 10:28
西灣河站確實唔起眼到一個點，一過西灣河街市就無咗個站；而周邊一啲都唔差，足以擴建——
向北可以拉出愛 ...

黨鐵點會主動整呢啲利民嘅嘢
慈雲山會大搞係因為冇咗「慈雲山站」

作者: DIH 時間: 2023-5-24 13:08

hellomato 發表於 2023-5-24 10:28
西灣河站確實唔起眼到一個點，一過西灣河街市就無咗個站；而周邊一啲都唔差，足以擴建——
向北可以拉出愛 ...

鑽石山冇電梯上慈雲山，只係在部分露天行人路加蓋（都遮唔晒），真正大project係連接慈中至正暉樓的天橋，但整條橋都在慈雲山。其他大部分天橋都係鳳德邨興建／慈雲山重建時已經有。套用在西灣河，等於半條成安街行人路加半個蓋。

作者: eternalflame 時間: 2023-5-24 16:07

chikng2227 發表於 2023-5-24 09:15
西灣河站，兩個出入口同一個出入口無分別。咁大個站，咁長的月台，出入口卻基本上只有一個。

月台仲要分兩 ...

港島線興建時要避開上面電車路同密集建築物
所以用左鑽挖興建，令車站深入地底同埋用側式月台
車站出入口或者通風樓就係起個時嘅豎井

你留意返你提個幾個站係起地鐵之前地面係咩
就會知道點解佢地係島式同側式月台

作者: eternalflame 時間: 2023-5-24 16:13

hellomato 發表於 2023-5-24 10:28
西灣河站確實唔起眼到一個點，一過西灣河街市就無咗個站；而周邊一啲都唔差，足以擴建——
向北可以拉出愛 ...

出口一轉右地面就出到去鯉景灣，拉過去極其量只係省略左過東廊橋底個燈位，我覺得好無謂
至於耀東邨，起地鐵個陣仲係寮屋區。你講緊鑽石山上慈雲山個條？起完一大輪係咪吸引到人去用先？

作者: EX-TL 時間: 2023-5-24 16:50

JX9097 發表於 2023-5-24 11:20
炮台山站都係類似
全部集中哂喺一組扶手梯上落，一組出入閘機

講起炮台山站, 同香港站有樣野好似, 就係無障礙通道.

炮台山站還好, 只有一個出入口, 唔想打搞到車站助理, 可以一早決定北角站上落, 天后站有左升降台有多一個選擇.

香港站, 真係沒有最落後, 香港站鬼咁大, 自己D指示已經很不足, 好多時要連同ifc mall一齊睇, 可惜有升降機的位置, 出到去想過馬路係過唔到, 想去的位置就沒有升降機, 入番站由頭來過唔係話咁易.

一係因為車站大堂建於離地面幾級樓梯, 沒有斜道, 想離開車站也不易, 結果每次推輪椅行香港站火都嚟埋, 行半個鐘走來走去都搵唔到正路.

基本上, 除左行怡和大廈-天星碼頭條天橋(要經中環站及環球近干諾道中升降機), 或者穿ifc mall去4號碼頭, 去其他地方都要兜餐懵, 上次真係嬲到行馬路算.

作者: HU6455 時間: 2023-5-24 19:50

JR5204@26M 發表於 2023-5-23 20:10
【01獨家】市建局擴闊觀塘站方案首曝光　港鐵反對掀暗戰 (hk01.com)
市建局係16年送埋塊地比港鐵，但港鐵 ...

基本上港鐵認為,尾車前接得晒班客,就無問題！又話者，車站如果太迫,鎖下閘機就解決到,甘又省番一筆！

作者: 3asv@59x 時間: 2023-5-24 22:33
牛頭角站, 佢其實有空間可以塞多一條扶手電梯，但到而家佢都未咁樣做，其實好多商業大廈落成呢個站根本就好迫

作者: chikng2227 時間: 2023-5-25 09:13
本帖最後由 chikng2227 於 2023-5-25 09:23 編輯

eternalflame 發表於 2023-5-24 16:13
出口一轉右地面就出到去鯉景灣，拉過去極其量只係省略左過東廊橋底個燈位，我覺得好無謂
至於耀東邨，起 ...

西灣河基本上只係起左半個站就算。如果當日有公眾資詢，肯定過唔到。西面(太安樓以西)完全無出入口。但係月台其實就正正在下面。好明顯係縮皮，唔想好似上環和鰂魚涌站咁起多個大堂。

炮台山站一樣，西面一個出入口都無。所有人出入大堂差不多靠晒四條扶手電梯。老麥旁邊的𨋢又落唔到車站大堂，最後而家要開工再起新𨋢，不知所謂。

作者: JX9097 時間: 2023-5-25 09:36

HU6455 發表於 2023-5-24 19:50
基本上港鐵認為,尾車前接得晒班客,就無問題！又話者，車站如果太迫,鎖下閘機就解決到,甘又省番一筆！ ...

鎖閘機？
早幾年都玩過啦
企喺月台睇...爽哂

作者: JX9097 時間: 2023-5-25 09:39

3asv@59x 發表於 2023-5-24 22:33
牛頭角站, 佢其實有空間可以塞多一條扶手電梯，但到而家佢都未咁樣做，其實好多商業大廈落成呢個站根本就好 ...

其實牛頭角站對於觀塘道以南嘅客係零方便
明明個站喺對面
先要落隧道橫過觀塘道
上番地面之後入站再上月台
過條馬路去搭車搞成5分鐘

作者: JX9097 時間: 2023-5-25 09:41

chikng2227 發表於 2023-5-25 09:13
西灣河基本上只係起左半個站就算。如果當日有公眾資詢，肯定過唔到。西面(太安樓以西)完全無出入口。但係 ...

西灣河若果有西出口
其實都方便唔少人
尤其是依家翠湖台/ 太康/ 太祥一帶去太古站/ 西灣河站都唔算方便
西灣河站有西出口的話，至少都方便到佢哋

至於炮台山站
黨鐵擺明就唔想起西大堂
預留位一早都有

作者: eternalflame 時間: 2023-5-25 15:24

chikng2227 發表於 2023-5-25 09:13
西灣河基本上只係起左半個站就算。如果當日有公眾資詢，肯定過唔到。西面(太安樓以西)完全無出入口。但係 ...

我又想問下點證明到係縮皮？唔通你有歷史檔案館入面嘅決策經過？
太安樓以西多係唐樓，加上太古城嘅某一期
係去到近年先有個新盤，對於康山上面樓盤亦有高度落差

加上成個社區脈落就係以西灣河文娛中心同市政大廈為中心
亦非唔合理步程範圍，所以點變個西面大堂同出口係唔會點增加到個catchment
有月台亦唔代表佢上面有任何空間可以起大堂同出口

作者: eternalflame 時間: 2023-5-25 15:40

JX9097 發表於 2023-5-25 09:39
其實牛頭角站對於觀塘道以南嘅客係零方便
明明個站喺對面
先要落隧道橫過觀塘道

客觀環境限制左通達程度
除非幾十年前無起啟福道天橋
而觀塘道以南美亞個堆可以拆卸重建
咁先可以起多條類似創紀二期嘅行人天橋出黎

地鐵已經通車接近50年
以前嘅規劃一定追唔上宜家嘅需求量
亦多左好多制肘（建築物、管線等）去增加通達度
所以只能夠係車站周圍有重建計劃
先可以考慮將車站出入口同建築物共構

作者: JX9097 時間: 2023-5-25 15:57
本帖最後由 JX9097 於 2023-5-25 15:58 編輯

eternalflame 發表於 2023-5-25 15:40
客觀環境限制左通達程度
除非幾十年前無起啟福道天橋
而觀塘道以南美亞個堆可以拆卸重建

其實牛頭角站條行人隧道某程度上都頂住咗觀塘道B5/ B6出口頂住咗觀塘道左轉勵業街行車線，搞到同觀塘道直去打交
（配合埋快線可能畀u-turn嘅車倒灌）
車流量其實低咗唔少
若果可以重建出入口release到畀觀塘道左轉勵業街有自己一條線
咁就起碼確保到觀塘道有一條線唔會受阻

至於擴建/ 重建...諗下好喇
黨鐵早幾年都turn down觀塘站稍稍北移兼擴建
點會「嘥錢」做呢啲嘢

作者: 天空之神 時間: 2023-5-25 16:18

JX9097 發表於 2023-5-25 09:41
西灣河若果有西出口
其實都方便唔少人
尤其是依家翠湖台/ 太康/ 太祥一帶去太古站/ 西灣河站都唔算方便

北港島線起之時可能會翻生呢

作者: cx838 時間: 2023-5-25 17:31

JX9097 發表於 2023-5-23 14:28
寶琳
雙月台變單月台
搞到繁時出入都「塞車」

好簡單，改為康城直達北角，寶琳支線開6分鐘一班，提供寶琳往返調景嶺服務。本來的設計就應該係咁

作者: Kelvin15190 時間: 2023-5-25 20:13

cx838 發表於 2023-5-25 17:31
好簡單，改為康城直達北角，寶琳支線開6分鐘一班，提供寶琳往返調景嶺服務。本來的設計就應該係咁 ...

東將直通後，實同你康城：寶琳：2：1，條綫少少延誤都好大問題。

作者: siupy 時間: 2023-5-25 20:45

Ohm 發表於 2023-5-23 14:24
何文田站設計失誤喺啲升降機到
站內站外嘅升降機服務都唔夠

何文田站設計最失敗係近B出口
扶手電梯有上無落
乘客想B出口去觀塘綫出旺角
要行到A出口果邊先有電梯落
落屯馬綫再落轉車大堂再落先到1號月台
唔想行的唯有搭升降機
結果長期排長龍

作者: JX9097 時間: 2023-5-25 21:43

cx838 發表於 2023-5-25 17:31
好簡單，改為康城直達北角，寶琳支線開6分鐘一班，提供寶琳往返調景嶺服務。本來的設計就應該係咁 ...

將北減完巴士再減鐵，多美

作者: groom1002 時間: 2023-5-25 23:13
屯門輕鐵站沒有行人過路處,1號月台乘客轉屯馬線要行上行落

作者: Man@MFHK 時間: 2023-5-26 00:25
土瓜灣站月台至大堂層係需要多一兩部升降機多過扶手梯啦！依家得中間一部根本唔夠用！

何文田站最失敗就係個轉車大堂，要人行餐矇搵餐矇，根本無需要開多層做轉車大堂！十字交匯車站轉乘好應該參考廣州地鐵公園前站個設計。

作者: AtrHenu 時間: 2023-5-26 00:42

Man@MFHK 發表於 2023-5-26 00:25
土瓜灣站月台至大堂層係需要多一兩部升降機多過扶手梯啦！依家得中間一部根本唔夠用！

何文田站最失敗就係 ...

據了解何文田站個轉乘設計係打算分返開K記,M記管轄先致有呢失敗設計,但我認為應該係轉車整個細廁所會仲好.(因為由月台行上個大堂痌尿又真長到無人接受到)

作者: Man@MFHK 時間: 2023-5-26 07:12

AtrHenu 發表於 2023-5-26 00:42
據了解何文田站個轉乘設計係打算分返開K記,M記管轄先致有呢失敗設計,但我認為應該係轉車整個細廁所會仲好 ...

荒謬，要分開管理本身已經係兩層樓，仲分得唔夠清楚？

作者: 1231313 時間: 2023-5-27 01:40
何文田站其實有無人出入閘用?定係整黎用黎轉線用?

作者: tonyng 時間: 2023-5-27 03:02

AtrHenu 發表於 2023-5-26 00:42
據了解何文田站個轉乘設計係打算分返開K記,M記管轄先致有呢失敗設計,但我認為應該係轉車整個細廁所會仲好 ...

冇咁嘅事。

作者: tonyng 時間: 2023-5-27 03:10

Man@MFHK 發表於 2023-5-26 00:25
土瓜灣站月台至大堂層係需要多一兩部升降機多過扶手梯啦！依家得中間一部根本唔夠用！

何文田站最失敗就係 ...

何文田站冇轉車層，先撇除TML月台層要起闊10米，乘客首先要在TML搵返正確的電梯，然後落到KTL月台之後要U turn，大部分乘客逼晒去中間位置，只有少數有心人先會慢慢行返去finger度，係咪一定方便過宜家真係見仁見智：

作者: cky 時間: 2023-5-27 05:59

groom1002 發表於 2023-5-25 23:13
屯門輕鐵站沒有行人過路處,1號月台乘客轉屯馬線要行上行落

向警署那邊有盲點，由河田轉入去係急彎，如果呢邊起過路處，2 號過 1 號就會非常危險。

至於屯中那邊，相對兩邊月台都容易睇到列車進出，以宜家4卡位只用2卡，加唔係唔得，不過我諗當年九鐵考慮咁到多人使用嚟轉車，不斷有人橫過路軌只會影響輕鐵出入站，所以先唔整。

作者: cky 時間: 2023-5-27 06:21

eternalflame 發表於 2023-5-25 15:24
我又想問下點證明到係縮皮？唔通你有歷史檔案館入面嘅決策經過？
太安樓以西多係唐樓，加上太古城嘅某一 ...

其實一睇佈局都知
所謂西面咪正正係太安樓下面
當年邊會要人封咗個商場再掘地底整個出入口？
地鐵肯太安樓都唔肯啦

再加上鯉景灣又未起
未有因由好似北角站咁
起條長隧道通去渣華道咁解

當然
用筲箕灣站做例子
愛秩序灣建成後
港鐵都加咗通道過去邊皮位
照理鯉景灣或者逸濤灣要加建新地下通道唔係唔得
不過我唔會覺得宜家港鐵有意慾會起囉

作者: groom1002 時間: 2023-5-27 11:09

cky 發表於 2023-5-27 05:59
向警署那邊有盲點，由河田轉入去係急彎，如果呢邊起過路處，2 號過 1 號就會非常危險。

至於屯中那邊， ...

輕鐵唔係有過路優先權?

作者: teddybus 時間: 2023-5-27 11:42

cky 發表於 2023-5-27 05:59
向警署那邊有盲點，由河田轉入去係急彎，如果呢邊起過路處，2 號過 1 號就會非常危險。

至於屯中那邊， ...

可能當初西鐵月台延過去輕鐵1號月台
再喺嗰邊整個入口閘機會好啲
不過厹鉄設計嘅係咁上下

作者: Man@MFHK 時間: 2023-5-27 13:52

tonyng 發表於 2023-5-27 03:10
何文田站冇轉車層，先撇除TML月台層要起闊10米，乘客首先要在TML搵返正確的電梯，然後落到KTL月台之後要U ...

依家就係將「搵正確電梯」呢個動作搬左去轉車層，結果都係要班客去搵。
個轉車層失敗在於大而無當，依家大到根本就係東九龍綫預留位咁樣。
一個設計理想既轉車大堂理應係有一個最直接而單一既路線俾班客去轉車，而唔係何文田咁電梯同樓梯落到去既位置完全唔同，搵餐死。

作者: ytxmobile 時間: 2023-5-27 14:28

Man@MFHK 發表於 2023-5-26 00:25
土瓜灣站月台至大堂層係需要多一兩部升降機多過扶手梯啦！依家得中間一部根本唔夠用！

何文田站最失敗就係 ...

公園前1、2號線分開入閘噶。
何文田站出入觀塘線一定要經過屯馬線月台。
根本冇可比性。

作者: cky 時間: 2023-5-27 14:33

groom1002 發表於 2023-5-27 11:09
輕鐵唔係有過路優先權?

有優先權與設計安不安全沒有關係

作者: Quanta 時間: 2023-5-27 15:09

JX9097 發表於 2023-5-25 09:39
其實牛頭角站對於觀塘道以南嘅客係零方便
明明個站喺對面
先要落隧道橫過觀塘道

如果去恒業街大業街嗰邊仲要等燈過馬路先落到地底
條隧道又只得樓梯去部分出口仲要地底再行多啲梯級落完再上

作者: Quanta 時間: 2023-5-27 15:16

Man@MFHK 發表於 2023-5-27 13:52
依家就係將「搵正確電梯」呢個動作搬左去轉車層，結果都係要班客去搵。
個轉車層失敗在於大而無當，依家 ...

站內空間起大啲更可能係為咗日後加舖位

作者: groom1002 時間: 2023-5-27 16:53
本帖最後由 groom1002 於 2023-5-27 16:56 編輯

ytxmobile 發表於 2023-5-27 14:28
公園前1、2號線分開入閘噶。
何文田站出入觀塘線一定要經過屯馬線月台。
根本冇可比性。

何文田站觀塘線月台沒直上大堂電梯

作者: JX9097 時間: 2023-5-27 17:15

Quanta 發表於 2023-5-27 15:09
如果去恒業街大業街嗰邊仲要等燈過馬路先落到地底
條隧道又只得樓梯去部分出口仲要地底再行多啲梯級落完 ...

冇錯
去大業街嗰邊行完樓梯又要屈番轉頭等紅綠燈
成件事係令人好炆憎

作者: tonyng 時間: 2023-5-27 17:53

Man@MFHK 發表於 2023-5-27 13:52
依家就係將「搵正確電梯」呢個動作搬左去轉車層，結果都係要班客去搵。
個轉車層失敗在於大而無當，依家 ...

其實問題在於電梯太少（轉車層有幾個位都只有樓梯)，又或者只有一條電梯（例如烏溪沙方向車尾），而等嗰部𨋢就更加係慢到懷疑人生。

作者: Man@MFHK 時間: 2023-5-27 19:25

tonyng 發表於 2023-5-27 17:53
其實問題在於電梯太少（轉車層有幾個位都只有樓梯)，又或者只有一條電梯（例如烏溪沙方向車尾），而等嗰 ...

其實我唔反對用樓梯代替部份電梯，但前題係條樓梯應該盡量造返直上直落，而唔係要轉幾個圈先去到上下層，仲要何文田站既樓梯又窄過人，仲要係中間裝扶手阻住條路。

作者: cky 時間: 2023-5-27 19:47

Man@MFHK 發表於 2023-5-27 19:25
其實我唔反對用樓梯代替部份電梯，但前題係條樓梯應該盡量造返直上直落，而唔係要轉幾個圈先去到上下層， ...

屯馬線中間扶手梯落去轉車層，旁邊條樓梯咪超寬咯

作者: Man@MFHK 時間: 2023-5-28 13:36

cky 發表於 2023-5-27 19:47
屯馬線中間扶手梯落去轉車層，旁邊條樓梯咪超寬咯

得一條咁大把？
其他全部被扶手中間分界完每邊只可以容納到一個人行

作者: jpoon 時間: 2023-5-29 05:27

tonyng 發表於 2023-5-27 03:10
何文田站冇轉車層，先撇除TML月台層要起闊10米，乘客首先要在TML搵返正確的電梯，然後落到KTL月台之後要U ...

而家屯馬落觀塘，咪又係一樣迫晒去中間一條下行扶手梯
想搭升降機但本身因為得一條下行，唔少Ｂ出口入站嘅人都排隊搭升降機，結果屯馬大堂可以搭到嘅人咪少咗囉

作者: jpoon 時間: 2023-5-29 15:08

Man@MFHK 發表於 2023-5-27 19:25
其實我唔反對用樓梯代替部份電梯，但前題係條樓梯應該盡量造返直上直落，而唔係要轉幾個圈先去到上下層， ...

土瓜灣站咪一樣係咁
C D出口果邊，行到老遠先有扶手梯落去，反而閘口旁就有樓落去，但唔係用較剪梯設計，月台又唔係闊，一人多就塞住晒

作者: Man@MFHK 時間: 2023-5-29 23:48

jpoon 發表於 2023-5-29 15:08
土瓜灣站咪一樣係咁
C D出口果邊，行到老遠先有扶手梯落去，反而閘口旁就有樓落去，但唔係用較剪梯設計， ...

土瓜灣係樓梯超闊，但偏偏就唔用半條樓梯既闊度加多幾條扶手梯。
升降機直頭係唔夠，得一部係中間，個站又唔係少人用，根本就唔夠用。
仲有閘機又係少，搞到繁時要搬流動八仔機俾客拍卡由職員閘門走。
講起閘機少，紅磡站又係一絕，明明大堂依家咁多位，點解唔加多幾部閘機？又係長擺兩部流動八仔日日繁時要開職員閘俾人出入。

作者: eternalflame 時間: 2023-5-30 07:50

Man@MFHK 發表於 2023-5-29 23:48
土瓜灣係樓梯超闊，但偏偏就唔用半條樓梯既闊度加多幾條扶手梯。
升降機直頭係唔夠，得一部係中間，個站 ...

樓梯要闊會唔會係消防要求？
土瓜灣站要係馬頭圍道下面起，個闊度本身都唔多夠

歡迎光臨 hkitalk.net 香港交通資訊網 (https://www.hkitalk.net/HKiTalk2/)