上傳
點擊文件名下載附件
但係喺美國嘅鐵路黎明期當時，全國曾經試過建造過15000英里嘅電氣化城際客運鐵路 (interurban)，貫通各大少城鎮。1900-10年代市内電車喺各地發展逢渤，各個路面電車公司慢慢將網絡延伸到隔籬嘅城鎮，將鄰近嘅路面電車網絡連結起嚟。呢啲路綫比較長，開始咗使用比較大型嘅多卡電聯車，逐漸邁向高速化。高峰時期，由紐約市轉幾次電車就可以到達200幾英里外嘅波士頓，完全唔洗搭火車。城際電鐵亦都為中西部(Midwest)嘅發展起咗重大嘅作用，始終地勢平坦，啱啱先開始發展同埋引入大量人士定居，用當時最新嘅科技 — 電氣化鐵路 — 就適合不過。電鐵公司甚至利用佢哋嘅鐵路網絡，發展沿線嘅地產同觀光事業，性質同港鐵同埋日本各大私鐵完全可以相題並論。其中印第安納波利斯市當年係電鐵嘅重要結節點，市中心建造咗一個齊集咗7間城際電鐵公司嘅Indianapolis Traction Terminal，每日有500班來往各個鄰近城鎮嘅列車，可以想像當年場面有幾墟冚。
(資料圖片)1920-30年代，城際電鐵公司更加邁向高速化嘅里程，而開始有部份路段出現高架化同地下化嘅鐵路，慢慢將路面拼用嘅路段荒廢，開始開發高性能嘅流線型列車。呢段相當有趣同埋影響深遠(吓？？點解喺眼角出現咗架新幹線0系嘅？？)嘅歷史就遲啲先詳細討論。不過，之所以有呢啲發展，無非都係因爲呢啲電鐵路綫雖然好多都係開咗10幾20年都冇，話咁快就要承受生命威脅，要急急腳尋找方法保持競爭力。呢個生命威脅，無非就係巴士同埋汽車。最後，電鐵敵不過時代嘅巨輪 (當中其實有電鐵由汽車公司逐間逐間噉買返嚟，然後刻意由汽車公司手下廢綫，用佢哋製造嘅巴士代替，之後仲索性削減班次，強迫乘客買佢哋生產嘅私家車、等等嘅醜聞)，各個城際電車公司去到40、50年代一個一個噉倒閉。Interurban Age 去到60年代前已經無疾而終，由開始到結束短短用咗唔夠半個世紀嘅時間。
當然，呢段奇豔嘅歷史唔係就噉就完。喺遠遠嘅日本，大正同昭和初期，大量私人公司已經仿傚美國，喺各個城鎮展開城際電鐵嘅網絡，而正正因爲汽車工業趕唔上美國，所以各個城際電鐵公司戰後都有生存機會，甚至逐漸高速化、現代化，最後同重型通勤鐵路無異。冇錯，香港鐵路迷冇個唔識嘅東急、京急、小田急、阪急、阪神 etc etc etc 完全就係呢段美鐵歷史嘅延伸，日本去到今時今日仍然處於Interurban Age！
上傳
點擊文件名下載附件
不過，今時今日喺美國要搵返呢個時代嘅蹤影，已經唔係容易嘅事。呢個系列會介紹2020-22年期間筆者親自訪問、個人認爲最具代表性嘅Interurban Age遺產，當中當然不乏林林總總似曾相識嘅東西，事不延遲，馬上開始第一章！！
=========================================================
2021年8月10號清晨，小弟由密蘇里州堪薩斯城(Kansas City, Missouri) 登上咗城際巴士，慢慢向以大量生產粟米同大豆而聞名嘅愛荷華州 (Iowa) 出發，5個鐘頭後喺坐落於呢個州嘅北部，人口有26000人嘅小城鎮Mason City落車。落車點係呢個城鎮嘅機場，每日只有一個United Express航班來往芝加哥O'Hare機場，客運大樓依然保持住50年代嘅特色。
上傳
點擊文件名下載附件
呢個城鎮訪問時仍然完全冇Uber、Lift等等嘅蹤影，小弟花咗少少時間同彈藥電召咗架傳統的士去酒店。
第二日朝早，由下榻嘅汽車旅館步行咗20分鐘，就到達咗一個沿馬路而建嘅電氣化鐵路。
上傳
點擊文件名下載附件
凸凹不平嘅鐵路路軌上雜草叢生，電綫桿雜亂無章，雖然都算係城鎮嘅範圍内，但係四周都完全荒蕪，只有一條大馬路同埋一間龐大嘅大豆處理廠，同埋一望無際嘅粟米田、大豆田
呢條鐵路，就係全美國僅餘嘅公共載貨電氣化鐵路，愛荷華牽引鐵路 Iowa Traction Railway。
吓？明明上次都介紹過美國嘅電氣化載貨鐵路喎！ 不過，今次嘅係公共嘅鐵路 (common carrier)，可以同任何沿線嘅公司進行交易、連接全國嘅鐵路網絡，之前介紹過、完全同其它鐵路同設施冇聯繋嘅Deseret Power Railroad就完全係另一件事。(唔係車大炮，因爲探訪曬兩邊鐵路唔係太難嘅事 — 不過小弟好可能成爲咗全亞洲第一個探訪過全美國僅餘兩個貨運電氣化鐵路嘅鐵路迷...)
呢個Iowa Traction Railway (IATR)，全長10.67英里(16.7公里)，全綫電化，由Mason City延伸到鄰近嘅小市鎮Clear Lake。呢條里程比較短嘅Class III 鐵路喺東面嘅Mason City一端會同兩個Class I鐵路網絡 — Union Pacific同埋Canadian Pacific — 交會。其中只有Mason City市内嘅3.5英里(包括交會點同埋車廠)日常有列車運行，其餘路段已經進入半荒廢嘅狀態。呢條鐵路嘅前身，就正正係1897年開幕嘅城際電鐵，Mason City and Clear Lake Railway。類似當年使用，但係來自另一條鐵路嘅重型電車，仍然保留咗喺車廠入面，但係小弟當時冇揸車，就無緣探訪啦
上傳
點擊文件名下載附件
(資料圖片，來源 http://www.trainweb.org/twerhs/iowatraction.html )呢條路綫，電鐵嚟講算比較特別，因爲由始至中，主要客源並唔係客運，而係貨運。客運列車班次一直都比較疏漏，而早早喺1937年，客運服務已經被巴士取代。不過，鑒於愛荷華州嘅農業一直都非常繁盛，貨運服務一直都爲呢條小鐵路帶嚟可觀嘅收入，而正正因爲鐵路嘅路綫距離比較短，電氣化系統一直都冇備取代。
而去都而家，呢條鐵路嘅主力，就係呢四部，來源不一但係設計相同、由Baldwin-Westinghouse建造嘅 百年歷史電氣機關車喇。
50.............1920 Baldwin.............Steeplecab. ex-W&OD, CRANDIC, KC&KV
51.............1921 Baldwin.............Steeplecab. ex-Northeastern Oklahoma, CRANDIC, KC&KV
54.............1923 Baldwin.............Steeplecab. ex-Southern Iowa Railway
60.............1917 Baldwin.............Steeplecab. ex-MC&CL
僅餘嘅一手機、完全未離開過呢條綫嘅60號機好大可能係全北美最舊、依然日常服役嘅機關車。但係今次就無緣見面喇。
上傳
點擊文件名下載附件
而熟悉日本鐵路嘅版友會話，呢款電頭咁熟口面嘅？
冇錯，其實日本鐵路有完全同型、同廠，由美國進口嘅電機。國鐵當年由私鐵、信濃電鐵買入嘅ED22型(之後由三伎鐵道同弘南鐵道買入，弘南鐵道大愕綫休止前仍然充當保綫作業！)同埋秩父鐵道DeKi 1型 應該係當中比較廣爲人知。呢啲大正年代嘅古董電機，今時今日喺佢哋地球另一邊嘅老鄉仍然恆常行駛，簡直係神跡！
呢種小型電機，喺日本一般稱呼為「凸型電機」，喺美國就叫做steeplecab electric (steeple 係指鐘樓或者高塔，因爲駕駛室置中，大大高於兩邊嘅增壓器)。而由Baldwin生產轉向架同負責組裝、Westinghouse生產電氣系統同摩打嘅呢款型號，喺美國各個電鐵網絡當年都好容易搵到佢嘅蹤影。
等咗冇幾耐，由54號帶頭、50號尾隨嘅列車由車廠緩緩噉慢駛。兩邊嘅車頭都喺度開動，呢個推拉式編組都幾有JR貨物M250系佐川急便嘅味道
上傳
點擊文件名下載附件
不過，當然係原始版...聯控系統當然係冇啦，兩邊嘅乘務員用對講機溝通。
(可以見到兩邊機車嘅集電桿都升起咗。呢條鐵路使用舊式嘅電車式集電桿，每次轉方向都要人手移動，都幾徙功夫。)
佢哋嘅目的地就係沿Union Pacific嘅小貨場，離開嘅途中就有UP嘅列車駛過，準備送走呢十輛油卡，同埋入手幾卡箱車。
上傳
點擊文件名下載附件
上傳
點擊文件名下載附件
上傳
點擊文件名下載附件
UP嘅列車駛過交會點
上傳
點擊文件名下載附件
之後嘅一個鐘咁上下，兩部古董電頭合力為馬路兩邊嘅大小企業進行收貨同調車嘅作業，馬路非常繁忙，每次駛出駛入，又要人手掉換電綫桿嘅方向，都幾費時，馬路上總會出現短短嘅一條小車龍。最大嘅客源，就係呢間大豆處理廠，空氣彌漫住一陣好似維他奶噉嘅大豆味。
上傳
點擊文件名下載附件
上傳
點擊文件名下載附件
上傳
點擊文件名下載附件
上傳
點擊文件名下載附件
上傳
點擊文件名下載附件
IATR一至五朝早會行駛，出車率好穩定，睇嚟業績唔差。雖然最近畀大集團Progress Rail收購咗，佢哋完全冇意圖將電頭以柴頭代替，莫講話將成條鐵路廢止。2030年後，隨着之前介紹嘅Deseret Power Railway廢止，IATR將會成爲美國唯一嘅電氣化貨運鐵路。
第二日，只有50號出車，而冇同UP交會，只喺客戶度進行調度同埋收貨。順帶一題，四部電頭外觀上有微微嘅分別，喺頭燈嘅位置同埋泵把嘅外形可以睇得出。但係内部結構就四架都大致上一模一樣。最後收工時乘務員為增壓箱放氣，之後放車輪阻。
上傳
點擊文件名下載附件
上傳
點擊文件名下載附件
上傳
點擊文件名下載附件
上傳
點擊文件名下載附件
付特寫幾張。
上傳
點擊文件名下載附件
上傳
點擊文件名下載附件
上傳
點擊文件名下載附件
上傳
點擊文件名下載附件
=================================================
加返個番外編先
Mason City作爲一個農業地帶嘅小城鎮，除非住喺鄰近嘅州分(或者係鐵膠)應該大至上冇人聽過呢個地方。
不過，呢個毫不起眼嘅地方，其實有唔少有趣嘅嘢睇。
對懷舊Broadway音樂劇有興趣嘅朋友，應該會聽過Mason City嘅花名 — River City。50年代嘅第一代音樂劇、歡樂音樂妙無窮 (The Music Man)嘅地點設定，就係呢個當時被人認爲係「鄉里」、當地人純樸、天真但非常固執嘅River City，而呢套劇嘅編劇、Meredith Willson亦都係呢度出身。
上傳
點擊文件名下載附件
Mason City同日本嘅淵源其實唔單止喺鐵路嘅車型。著名美國建築家Frank Lloyd Wright，曾經設計過東京嘅帝國大酒店，格局宏偉、帶有少少神秘感。可惜60年代日本經濟火速發展，最後呢個經歷過地震、大火、戰火嘅建築大作不惜被拆卸重建。
上傳
點擊文件名下載附件
Frank Lloyd Wright設計、現存嘅唯一一棟酒店，就係處於Mason City嘅Park Inn Hotel。1910年建造嘅呢棟5星級酒店，受歐洲、印第安人同日本嘅傳統藝術影響嘅内籠同埋外牆設計充份噉可以體驗到呢個神秘但係優雅嘅「草原派」(Prairie School)大作嘅魅力。
上傳
點擊文件名下載附件
上傳
點擊文件名下載附件
上傳
點擊文件名下載附件
上傳
點擊文件名下載附件
Mason City竟然有另一個Frank Lloyd Wright嘅作品、1908年建造嘅Dr. G. C. Stockman House。呢個作品係Prairie School嘅獨立屋嘅典範，利用愛荷華州等等嘅草原州份充份日照同埋地大物博嘅特質。
上傳
點擊文件名下載附件
上傳
點擊文件名下載附件
--完--
Ted's Train Travel Tales
[US] 城際電鐵三部曲之 送別馬路上的不銹鋼列車
https://www.hkitalk.net/HKiTalk2/thread-2238951-1-1.html
[US] 城際電鐵三步曲之 尋找「子彈火車」的故鄉
https://www.hkitalk.net/HKiTalk2/thread-2233716-1-1.html
[US] 城際電鐵三部曲之 大草原上的百年凸型電機 (日本同款)
https://www.hkitalk.net/HKiTalk2/thread-2232347-1-1.html
[US］山旮旯益鐵記之 沙漠中徘徊的台鐵近親
https://www.hkitalk.net/HKiTalk2/thread-2211819-1-1.html
[CA] '20 北美獨遊記之 雪國通勤電鐵的最後寒冬
https://www.hkitalk.net/HKiTalk2/thread-1170656-1-1.html
[UK] '18歐州漂流記之 拖拉機的怒吼+臥舗列車上的夜曲
https://www.hkitalk.net/HKiTalk2/thread-1111306-1-1.html
[BE] '18歐州漂流記之 搭比利時古典電車去浸温泉
https://www.hkitalk.net/HKiTalk2/thread-1128847-1-1.html
[US/CA] '17 北美國際列車初體驗 — 東岸最靚嘅車窗
https://www.hkitalk.net/HKiTalk2/thread-1128791-1-1.html
作者: DIH 時間: 2025-10-11 16:20
兩輯活古董，唔係樓主介紹都真係完全唔知，多謝分享。
作者: S3BL100 時間: 2025-10-11 22:09
多謝分享。唔講唔知美國原來仲有公用電氣化貨運鐵路
但雖然係公用，實際都係私人擁有。美國大部分貨運鐵路都係，甚至乎 Amtrak 行既大部分客運路段都係貨運公司持有，於是 Amtrak 無優先路權，要向貨運列車讓路，係美國客運鐵路慢兼唔可靠既主要原因，嚴重窒礙近年客運鐵路發展
當然師兄提到汽車生產商財閥因為既得利益而阻礙客運路線甚至巿內電車運作，搞到上世紀幾十年間大量廢線，亦係歷史上導致美國客運鐵路唔發達主因。就好似我而家住緊果頭 (Knoxville, TN) 巿內電車 1947 年已廢線，而最後巿際客運服務亦於 1970 年停止運作。巿內大大個車站就仲晌度，巿區甚至可以搵到唔少平交道同重鐵路線，但全部都係用來運貨，間唔中半夜三更都會聽到火車嗚嗚叫。因為呢堆平交道，平時揸車都要打醒十二分精神
不過因為成日見，習以為常，又無巿際客運列車，我一直懶得去影
我有得揀都唔想成日揸車，我成日幻想緊有可以開條鐵路去 Nashville 同 Memphis，再開多條落 Atlanta
美國鐵路真係用來運貨，唔係載人
作者: theodore.c 時間: 2025-10-11 23:14
本帖最後由 theodore.c 於 2025-10-12 03:59 編輯
DIH 發表於 2025-10-11 16:20
兩輯活古董，唔係樓主介紹都真係完全唔知，多謝分享。
多謝ching支持！
呢種鐵路其實美國嘅鐵路迷都未必會知道佢存在😅😅
因爲當地嘅鐵路迷大多都係興趣比較單純，偏向鍾意蒸氣火車同埋Class I嘅長途貨運列車
不過對於我哋外國嚟嘅鐵路迷，反而呢啲奇怪嘢好似啱啲我哋口味
作者: theodore.c 時間: 2025-10-12 02:39
本帖最後由 theodore.c 於 2025-10-14 01:41 編輯
S3BL100 發表於 2025-10-11 22:09
多謝分享。唔講唔知美國原來仲有公用電氣化貨運鐵路
但雖然係公用，實際都係私人擁有。美國大部分貨運鐵路 ...
多謝ching支持。Knoxville好似係全美國其中一個最大、但係冇客運鐵路覆蓋嘅城市😥落去亞特蘭大呢個corridor都講過起客運鐵路講咗好耐，但係美國好多project都好似係停留喺提出大捨公帑直情起條高鐵出嚟，但係因爲起高鐵太大開支，最後傾傾下都最後尾冇咗件事噉。而完全冇人題過可人用比較相宜嘅價錢起條普速嘅單綫非電化客運專線🤐
當然喺美國鐵路就＝貨運，其實美國嘅鐵路唔係過時、慢、冇効率，而係完全optimise咗可以用最高嘅効率去載貨，長距離嘅貨運交通其實近乎係畀鐵路壟斷。Class I嚟講，好多時都係爲咗做到最efficient嘅物流網絡，所以使用最新嘅柴頭，最滑暢嘅編配，透過合拼而家全北美(美加墨三國)只有7間Class I貨運鐵路公司，成功造就economies of scale。
電氣化鐵路當然美國話多就唔多，但係話少都唔少，喺小弟以前在住嘅東岸，有大量電氣化嘅近郊鐵路同埋Amtrak Northeast Corridor，使用電聯車或者電頭嘅通勤鐵路班距十分鐘以内都係正常不過嘅事，而呢啲大型嘅鐵路網絡全部都係公營。當然呢啲通勤鐵路當年之所以畀咗市/州政府接管都係因爲私有鐵路做唔掂。
不過，呢啲鐵路係傳統電氣化重鐵，而唔係城際電鐵。用返大家可能熟悉啲嘅日本嚟講，就係JR/西武/東武，同埋京急/京成/阪急嘅分別。Interurban時代遺留落嚟嘅電氣化鐵路喺北美州而家所剩冇幾，同頂峰時期嘅差別非常大，甚至比長距離客運列車同埋市内路面電車嘅沒落更加顯著。(畢竟Amtrak/Via Rail依然好多地方可以去到，去到而家都仲有多倫多、新奧爾良、三藩市等等覆蓋率幾高嘅市内電車網絡。)不過喺美國，載客嘅城際電鐵其實而家仲有三四條綫(睇你點計)散落喺全國，下次會介紹吓(ching應該知道我會講邊度😅)
Iowa Traction嘅獨特之處，反而唔係佢當年搵重型電車載過客，而係佢係載貨嘅(況且佢咁多年嚟都唔係主打載客)。2025年今日，呢個「電頭+貨物列車」嘅組合，喺美國只有佢同上次介紹嘅Deseret Power兩個地方咁大吧。(美國鐵路黎明期有幾個成功嘅重鐵電氣化例子，例如Great Northern同埋Virginian Railways嘅登山路段，客列貨列都係搵電頭拖，但係後來柴頭代替馬力比較低嘅蒸機之後，電頭冇晒佢嘅用武之地，電化設施全部被拆毀。甚至去到90年代初，東岸嘅大手私鐵Pennsylvania RR同埋佢繼承嘅Penn Central同Conrail都有好多貨運列車係搵電頭拖，例如載貨專用嘅GE E44，但係隨住東岸嘅鐵路貨運沒落之後連啱啱成立嘅Conrail都破埋產etc，同時間好似DPR噉嘅發電廠鐵路續條續條噉廢綫，先搞到美國呢個貨運鐵路大國雖然有唔少載客嘅電氣化火車，竟然完全冇電氣化貨運列車咁滞呢個奇怪局面)
| 歡迎光臨 hkitalk.net 香港交通資訊網 (https://www.hkitalk.net/HKiTalk2/) | Powered by Discuz! X3.4 |