[US］山旮旯益鐵記之 沙漠中徘徊的台鐵近親

上年9月由紐約搬咗去哥羅拉多州丹佛，啱啱考咗車，就嚟一次長途自駕遊去影鐵。

全美國現時有好幾個電氣化重型鐵路系統，例如Amtrak嘅Northeast Corridor同周邊嘅通勤鐵路網絡，或者最近電氣化嘅舊金山近郊鐵路Caltrain。丹佛嘅近郊鐵路都係近呢十年全新建造，全綫電氣化，冇同貨運鐵路共用路軌，喺北美嚟講算非常罕有
不過，今次唔係講客運鐵路，而係講貨運
全北美稱霸全世界，四通八達嘅貨運鐵路系統，2025年只係有
「兩段」
依然使用電氣發動。
其中一段位於愛荷華州(Iowa)北部Mason City嘅Iowa Traction Railway，係當年城際電鐵 (interurban)殘留落嚟嘅產物，現時仍然使用四兩1910-1920年代Baldwin-Westinghouse製造嘅Steeplecab Locomotive，熟悉日本鐵路嘅師兄一睇就會知係同國鐵/三岐/弘南ED22型同秩父鐵路DeKi1型係完全同型車。小弟2021年依然在住東岸康州時，遠道而嚟去過， 遲啲有機會分享畀大家。

今次嘅目標，就係跨越哥羅拉多州、猶他州邊境嘅Deseret Power Railway。呢條運煤鐵路1983年啓用，全長53公里，完全冇同其它鐵路連接。哥羅拉多嘅一邊係煤礦，猶他嘅一邊係發電廠，途中係沙漠嘅無人地帶，路軌喺兩端都設有迴圈，列車可以循環運行。其實比如鐵路，當佢係工業機關仲更加適切。
每日嘅列車由45卡運煤車組成，途中嘅路程有持續嘅2%斜坡，作爲發電廠鐵路，當然用電氣發動最適當。DPR使用極之罕有(全球唯一)嘅50000V 60Hz電化。其實15年前喺美國西南部有三條相似嘅鐵路 (Navajo Mine Railroad, Black Mesa & Lake Powell Railroad, Martin Lake Line)，但係近年陸續柴油化或者荒廢。Deseret Power亦都不免有同樣嘅落場，偕因發電廠將會喺2030年停用。
Deseret Power現時擁有8輛80年代製造嘅GE E60C電氣機關車，其中4輪可以使用，其餘爲零件車。當然E代表電動，而60代表6000匹馬力，C代表Co-Co。DPR擁有嘅頭2輪爲一手鐵路建造時買取，其餘均爲二手從墨西哥國鐵(Ferocarilles Nacionales de Mexico, NdeM)買入。（注：墨西哥國鐵嘅電氣化計劃最後失敗告吹，私營化後客運鐵路網絡已經喺90年代尾2000年代頭完全廢止，情況比美加坎坷得多)
70-80年代當年，GE E60系喺美國比較常見，甚至一段時間作爲Amtrak Northeast Corridor嘅主力車種。現時，DPR已經成爲E60系僅有嘅舞台。當然，派生嘅車輛包括台鐵嘅E200-E400電機，廠方形式代號係E42C，其實係E60系嘅低馬力窄軌版。 睇外型都知道係同一個家族嘅產品。
每日嘅運煤列車需要三重連，每輛6000匹馬力，總共18000匹馬力嘅機關車先可以順利以25-35mph速度挑戰2%嘅斜坡。
小弟山長水遠揸5個半小時車，到達一個人口2200人嘅小市鎮Rangely做基地，之後25/2/2025全日都冇見任何列車。DPR有時會全日停駛，進行工程。
之後星期三等咗成朝，終於有班西行嘅列車，有一個近州境嘅部分，路軌係南北行嘅，全綫只有呢處可以朝早有正光相。編組爲DPR1+DPR2+DPR4+45 loaded coal hoppers，其中DPR1/2係一手車，DPR4係前NdeM車。

過咗3個鐘，列車喺發電站慢慢卸下所有貨物，回程列車慢慢駛回哥州嘅礦場。兩邊有迴圈，列車編組同西行一樣。

下午，比較容易正光拍攝嘅第二班西行列車，呢日冇開。
=======================================
呢次唔係太成功嘅行程，好在有安慰獎。哥羅拉多州西部，其實係世界首屈一指嘅温泉集中地，離Rangely兩小時車程係有名嘅滑雪同温泉渡假地Steamboat Springs，有兩個温泉設施使用頂級嘅温泉水。同大部分其它哥州嘅温泉唔同，Steamboat Springs 係鹼性單純泉，介乎冇硫磺味。
其中Strawberry Park Hot Springs位於一個遠離市鎮嘅山谷，用4x4途經時常會積雪嘅泥路先可以到達(冇嘅話可以使用穿梭巴士)。泉質非常優秀，唔同好多歐洲嘅温泉，冇進行氯氣消毒，亦使用比較熱嘅温度。極力推薦。

另一個設施係顧名思義位於市中心嘅Old Town Hot Springs，有水上樂園嘅感覺，甚至有温泉滑水梯，大部份温泉池都有進行氯氣消毒，小弟就冇乜興趣。不過其中有過百年歷史嘅温泉池Heart Spring就竟然保持全天然嘅優質泉質。

回程錄咗片，可以聽到響亮嘅Nathan P5警笛，其中一下係司機同我打招呼
有別於北美出名超嘈嘅柴油機關車，當然電機本身冇引擎，自然比較靜，考慮到呢樣嘢，警笛就tune得比較嘈，喺荒蕪嘅沙漠風景底下都幾有情調。

https://youtu.be/inWYM4NWSa4

樓主肯定用左好多心機去影

話時話，你而家住 Colorado，有無諗住搵機會坐果幾條 scenic railways？記得有 Youtubers 介紹過當中起碼兩條，景色真係好靚

CO係好多窄軌觀光鐵路，例如Durango & Silverton, Cumbres & Toltec, Georgetown Loop，全部都好出名，值得探訪
Pike's Peak Cog Railway 更係北美鐵路最高點，亦係三條齒軌鐵路其中一條
只係呢次係趁平日有假期去影貨運鐵路，觀光鐵路可以週末去搭

臨離開美國之前，小弟啱啱 (29/5) 趁有公娛時間去咗多一次Deseret Power Railway，今次花咗一日時間探訪
列車編組同上次差唔多，依舊係DPR-1帶頭，不過後面嘅兩部係DPR-2+DPR-3，總算聯同上次嚟計，影過晒車隊裏面嘅四部
因爲呢日有兩班車運行，順光相就比較易影
晚朝，差唔多到中午時間，三部GE E60C電機正拖着45卡coal hopper empties離開猶他州的Bonanza Power Plant，發電廠嘅煙囪遠處可見。呢度人跡罕至，四州圍都係荒漠嘅沙漠。付近最近都有落雨，但係呢度沙漠地帶完全冇波及，依然有燦爛嘅陽光。


四個鐘後，列車返到去哥羅拉多州嘅一端嘅煤礦，入滿煤後整裝待發，再次踏上53公里嘅行程。
差唔多到達猶他州嘅邊境，列車用全18000匹馬力，途經2%(噉重型嘅鐵路嚟講已經算比較誇張嘅)急斜，登上乾旱嘅Coyote Basin盤地。

等多三個鐘，微雨下45兩空載煤斗徐徐從沿途最高點嘅Holum Pass駛下，五分鐘後將會再次抵達東端嘅煤礦。

====================================

是次嘅番外編有兩個
首先係沿途到訪嘅美國最馳名温泉地之一，Glenwood Springs
呢個小鎮度假氣色濃厚，係過百年歷史嘅温泉地
洲際公路I-70沿途風景優美，橫過洛磯山脈、北美大陸中央分水嶺時途經全美國洲際公路(Interstate)網絡最高點，亦係全世界最高嘅公路隧道，海拔11158尺(3.4km)嘅Eisenhower Tunnel。接近Glenwood Springs時，公路連同UP鐵路進入Glenwood Canyon峽谷。

總統羅斯福(Theodore Roosevelt)曾經下榻嘅Hotel Colorado，據說Teddy bear係喺酒店職員作為送畀羅斯福嘅紀念品而發明。

全世界最大嘅温泉泳池，當日洗池冇晒水。呢個係全北美最有歷史嘅温泉設施之一，只不過聽講因爲呢度比較family-friendly，多兒童，泉水有進行化學消毒。

但係最值得探訪嘅，係沿Colorado River而建（當日可以望到Rocky Mountaineer豪華觀光火車停泊嘅側綫，同埋Amtrak，UP/BNSF嘅貨運列車) 嘅Iron Mountain Hot Springs，可以充份享受到鹽分超高，有少少硫磺味嘅全天然温泉。


====================================
DPRR付近嘅小市鎮 Dinosaur, Colorado，人口只有三百幾，全市鎮嘅街道以恐龍命名，幾可愛


顧名思義，付近係好多恐龍出土嘅地域，過咗猶他州境可以探訪Dinosaur National Monument
裡面嘅Fossil Quarry展館完全有別於普通博物館，展出嘅唔係出咗土嘅化石，而係原封不動喺座山入面嘅恐龍化石
冇錯，成坐山全部凹凹凸凸都係恐龍骨，頗為壯觀
當中有比較完整嘅Stegosaurus與不止完整，而係全部骨都喺地入面依然連埋一齊嘅Camarasaurus