本帖最後由 Kit2030 於 2017-5-30 17:46 編輯
基本上對於原本佢嘅建議，我加多咗些少修改，歡迎大家討論。 因為我唔係太熟悉深井段嘅人口分佈，所以依個回應都主要集中喺市區。
首先，屯荃鐵路原本建議路線到達荃灣區後就會連接荃灣西鐵路站，不過我覺得如果連接去荃灣西嘅話，令到由港島或九龍嘅乘客都會集中曬喺美孚站轉西鐵路或西鐵線，令到美孚站就好似三線轉乘既金鐘站咁，一樣咁擠迫。所以我建議延伸荃灣線到沙咀道同青山公路荃灣段嘅交界， 並同新起嘅鐵路喺依度設站轉乘， 而設計就好似中環站咁。不過如果真係要設站，就要延伸荃灣綫，成本可能較高，而且影響到荃灣線現有嘅鐵路服務。
使用荃灣綫(荔景至荃灣角站)往西北嘅乘客就可以選擇喺美孚站轉乘西鐵線前往錦上路至天水圍一帶，而喺新起嘅柴灣角站轉乘新線前往屯門、兆康站，避免乘客集中咗喺美孚站轉車。 而且新站可以好似尖沙咀同尖東站咁興建地底行人隧道接通新站同荃灣西站，加強路線連接度， 方便乘客轉乘不同嘅路線。
當離開柴灣角站後，就沿沙咀道繼續前行往葵盛西邨地底，並且喺此處設站服務喺山上邊嘅多條屋邨居民。而葵盛邨站可以嘗試好似何文田站咁，設立一個十字型嘅車站以預留連接 其他路線嘅條件(例如有人提議嘅由沙田經石蔭石籬等到葵涌嘅路線建議)。
當列車離開咗葵盛邨站之後，就選擇喺荔枝角站嘅附近設站。就好似之前咁，講如果路線過份集中喺美孚嘅話，會有好多嘅人流造成擠迫， 所以如果可行嘅可以喺荔枝角站進行轉乘，方便由深水埗至長沙灣站嘅乘客經由荔枝角站或美孚站前行往新界西北。
喺荔枝角站之後新路線就好似建議咁前往南昌站。南昌站作為東西線同東涌線嘅轉乘站，如果加埋新路線嘅連接，就可以方便港島 (需要等待北港島綫完成後以增強路線轉乘效益) 同埋西鐵線紅磡站至柯士甸站沿途嘅乘客喺南昌站選擇前往乘搭新線前往屯門、兆康站或者西鐵線前往錦上路至天水圍站。
當列車過咗南昌站之後，就會前往旺角站。旺角站作為九龍區入面最繁忙嘅車站一直只有兩條路線可以選擇，所以去九龍西嘅乘客只可以依靠荃灣線，而往九龍東嘅乘客就只可以依靠觀塘線。但就好似上次觀塘線電纜故障事件咁，當觀塘線部分路段停駛後就令到乘客冇辦法從其他路線簡單咁前往九龍東。所以我就建議新路線設站於旺角並繼續延伸去九龍東，已 建造一條平行路線接通九龍東西避免好似上次試過咁一到故障就令到大批嘅乘客需要轉搭其他交通工具， 而係可以使用新路線繼續佢嘅路程。
當新路線到達旺角站後，將會有南北兩段路線 嘅方案。
北面路線方案(黃色線)：
喺旺角站之後新路線就會去到九龍城，並喺九龍寨城公園附近設站，然後就會繼續前行去到鑽石山站連接建議中嘅東九龍線。呢個方案就會令到鑽石山站成為三線轉乘站，方便乘客經由東西線前往新界東北或者轉乘觀塘線。 不過呢個方案需要再次更動鑽石山站嘅車站結構，而且仲同現有嘅觀塘線以及東西線結構成一個『X』狀，所以建造上同乘客轉乘方面會有些小複雜。 南邊路線方案(橙色線)：
當列車經過旺角站之後會沿著新路線繼續前往 興建中嘅東西線啟德站，並且可以轉乘計劃中嘅啟德單軌鐵路。呢個方案去到啟德站之後可建造一個平衡嘅車站唔似鑽石山站咁要興建一個『X』狀嘅車站，而且乘客可以經過計劃中嘅單軌鐵路前往九龍灣至觀塘一帶。 不過呢個方案就令到乘客比較難以轉乘觀塘線，而且使用單軌鐵路轉乘需時，令到呢條新路線未能符合市民嘅期望方便連接現有嘅觀塘線。
最後淨返嘅路線就簡單咁講番啦，新路線經過鑽石山或啟德站之後就會繼續前往彩雲、順天、秀茂坪、馬游塘一帶設站，最後喺寶豐路地底附近設站連接將軍澳線嘅寶琳站，避免好似上次將軍澳線嚴重癱瘓嘅事件咁，習慣使用鐵路嘅乘客就冇其他替代嘅鐵路路線可以離開將軍澳區。
睇到依度，終於全篇長文完啦，浪費咗大家咁多時間添 。唔知大家睇完之後有乜嘢意見呢？歡迎討論！
下面幅圖片唔係嘅，所以大家可以忽略佢。
| 
