Nottingham - London St. Pancras East Midlands Trains 頭等座體驗

之前小弟安排緊十二月中由 Nottingham 返港既交通時, 小弟睇緊 Nottingham 去 Heathrow 程車既 Coach 同火車飛。 適逢小弟見呢班車既頭等座價錢只係貴普通座大約 £4 左右, 小弟最終就買左呢班包早餐既 Advance Single First。順帶一提, 呢個 Service 亦係英國係周末少數提供熱餐既服務之一 - 就算係 LNER (國營版 Virgin Trains East Coast) 同 Virgin Trains 周末既頭等座都只係會提供一個 Cold Sandwich 同茶水。

---Trip Info---
[0634 Leeds]
0845 Nottingham
0856 East Midlands Parkway
0913 (0917) Leicester
0926 (0933) Market Harborough
1025 (1038) London St. Pancras

---Onboard---

今日班車係由 Leeds 起載, 停 Wakefield 同 Sheffield 等中大型站之後便取道 Midland Main Line 南行往倫敦。 今日既行車時間為 1h40, 而會停靠 East Midlands Parkway, Leicester, 及 Market Harborough 三個站。此班次亦係少數由 East Midlands Trains 營運既 Leeds - London 服務之一。 (大部份 Leeds - London 班次都係由 London & North Eastern Railway 營運, 並取道 East Coast Main Line)

East Midlands Trains 既頭等座係用一個 1+2 既排位, 而佢既經濟艙係用一個 2+2 既排位。 小弟係 Nottingham 登車既時候, 頭等卡已經係半滿, 而餘下既位則被 Leicester 上車既乘客填滿。 雖然當日頭等座係滿曬, 不過由於本身頭等卡個設計係好闊落, 因此就算頭等車廂係坐滿曬, 個感覺依然係好舒適。 另外, 係英國買飛係無得揀位而只可以留位 - 一般情況下火車公司係會俾乘客選擇要窗口位定要走廊位, 唯個位是否面向行車方向呢點就真係有少少睇彩數~~

順帶一提, East Midlands Trains 係 Nottingham 同其他大站都設有First Class Lounge, 唯此候車室只會係星期一至五開放。 雖然 Nott'm 既頭等候車室設備一般, 不過佢係有提供茶啡同餅乾, 都算係可以過下口隱 (其實 Nottingham - London 平日係每小時兩班車, 因此實際上對候車室既需求其實唔係咁大; 星期六日早晚時段班次為一兩小時一班, 唯候車室係星期六日係並不開放既)

今日既用車為一 set Intercity 125 HST - 車頭同尾有一部 Class 43 柴油機, 而車卡則有八卡 Mark III Coach (五卡二等, 兩卡頭等同一卡餐卡)。 由於 Traction 只係由頭尾兩部 Class 43 提供, 客卡係聽唔到摩打聲既。 唯高速行駛時, 抽車係有少少"朗"既。

上車後, 小弟便係獲篇配既座位坐低, 小弟今日係坐 Coach G 既 Seat 40, 係一個單人位。 檯面已經預先舖好, 茄汁, Brown Sauce 等調味料都有提供。 停靠 East Midlands Parkway 後, Onboard Catering 既 Staff 就開始接單。 當日車上係有得揀 "Great English Breakfast" 或 Vegetarian Breakfast, 而 English Breakfast 則有豬肉腸, 煙肉, 煎蛋, 蕃茄, 蘑菇, 薯餅及英式鬆餅。 除左個急凍 Hash Brown 係好散之外, 個餐係幾好食既。 雖然車上既咖啡係沖得好淡, 不過佢既英式茶係幾好飲。 同時, 今日係有四位職員負責服務頭等車廂, 而車上既職員都好密咁巡個車廂 , 而每次經過佢地都會好殷勤咁問你需唔需要茶啡。 (註: EMT 既早餐係即叫即整 - 係 Leeds 同 Sheffield 上車既乘客係到 Nottingham 之前已經食曬早餐並收好碟, 而後來於 Leicester 登車既乘客則係火車經過 Market Harborough 之後獲派餐。 同時, 就算乘客唔係搭足全程, 例如 Meadowhall 去 Leicester 等, 職員都係會提供早餐既。)

Mark III Coach 其中一個特別之處就係佢既門柄設計 - 佢只有一把門柄, 並設於車廂外 - 如果乘客要落車既話, 乘客係要先把窗口拉下, 並伸手拉下車廂外的門柄。 車廂其餘既設備都算係標準嘢 - 個 Charge Point 個電流輸出都幾高, 就算當日我部手機一邊用一邊叉電, 半個鐘已經叉多左20%。 同時, 頭等既免費 Wifi 都算快, 播 Youtube 既片 720p 都播得順~~ (East Midlands Trains 既二等座都有免費 Wifi, 唯佢係限時十五分鐘)

唔知點解今日火車過左 Bedford 之後用左 Thameslink 用既路軌, Bedford 至 Luton 既路段都係以 50mph 慢駛, 過左 Luton 之後火車就行翻正常路軌, 最後今日班次係延誤十三分鐘到達 London St. Pancras 既。

---Verdict---

講翻呢張飛既價錢 - 小弟用左 £21.45 購買呢程 "Advance Single First" (呢個價係折後 - 由於小弟有張 16-25 Railcard, 呢個價係打左 67折)。 英國大部份長途路線皆可以買 "Advance Single" 既飛, 而車飛價格則同買機票既原理差唔多, 都係越早買張飛就越平, 不過張飛既彈性就越低~~

雖然今日行車時間為 1h40, 不過如果計埋由 St. Pancras 去 Heathrow 既時間 (迫 Picc 既話其實係要大約 55 分鐘), 小弟總共係用左兩個半小時左右。 相比搭 National Express 既長途巴士, 搭火車轉 London Underground 既車程係快 National Express大約一小時。 當然, 如果閣下係有多件行李既話, 搭 National Express 係會方便少少, 始終 London Underground 車廂空間有限, 攞超過兩件行李上 Tube 係有難度, 唯唔係班班 Coach 都停 T4 - 閣下去到 T23/T5 之後可能要自行駁 T5-T4 既免費 Shuttle。

總括呢個經驗, 呢程頭等座都算係物有所值 - 雖然小弟最後花左 £23.50 由 Nott'm 去 LHR, 不過其實搭 National Express 都係呢個價左右 - 又有早餐食又唔駛驚 M25 塞車, 其實呢個價都算係幾抵。 當然, 係英國既 Intercity Travel 始終都離不開 National Rail, National Express 或 Megabus 呢三個選項, 而係一個缺乏競爭及政府補貼既情況之下, 英國既 Intercity Travel 價格係比歐洲既昂貴。



小弟係非常欣賞 Nottingham Station 既 Architecture

小弟係幾個月前入過 Nottingham 既 First Class Lounge - 雖然入面只係有十幾張櫈同一部咖啡機, 不過整翻杯茶之後先上車都係一件幾開心既事黎

今日小弟既座位 - 小弟既位係一個對住個行李架 面壁思過既窗口位黎

小弟今日既車飛 - 平時車務人員會係查飛後係張飛上打窿或打日期上去, 不過近期 EMT 大部份 Train Manager 都係用原子筆求奇劃個圈就算~~

當然, BR Mark III Coach 於行車時可以開窗呢個設計係有個明顯既安全隱患係度, 多年黎亦有多宗因為乘客於行車時把手或身體伸出窗外而導致既事故。

把身體伸出窗外示意圖.jpg
P.S. Sorry for 賣隊友

今日既 "Great British Breakfast" - 其實火車公司一直都討論緊呢個 Breakfast Service 既去留 - 由於車上既廚房只係一日用一兩次, 對於個 Train Operating Company 黎講呢個廚房卡只係一個又重又載唔到人既車卡黎。

East Midlands Trains 既 BR Mark III Coach 既二等車卡 - 雖然佢保留左舊式既座椅設計, 不過佢既闊度同座距係比 LNER, GWR 採用既新設計闊。

傳統上, 來往倫敦既火車既頭等車卡係設係倫敦方向既車頭, 呢個設計亦令頭等乘客係落車時會最接近車站出口, 唯有時候基於走線需要, 呢個安排係會倒轉黎行。 以當日班次為例 - 車組由 Sheffield 方向進入 Nottingham 之後係倒出站往 Loughborough 方向既 - 所以係 Leeds - Nott'm 路段, 頭等車廂係係車尾, 而係 Nott'm - London 路段上, 頭等車卡係係車頭

On Approach to St. Pancras - 左邊為 Southeastern 既 High Speed "Javelin" Service, 中間為 Eurostar 專用既月台, 而右邊則為 East Midlands Trains 及少量 Thameslink 使用既 Platform 1~4.

黎到一個充滿節日氣氛既 London St. Pancras

黎到 Heathrow T4 - KGX/STP 去 Heathrow 正常 Oyster/Contactless Fare 係收 £3.10, 而如果閣下係有 Railcard 既話, 係 Off Peak Times 呢程車既車資係有六七折, i.e. £2.05.

多謝分享，樓主既相片勾起我接近三年前去倫敦一星期既回憶

呢班車好似乘載率麻麻地？

廿鎊出頭就坐到，我就覺得真係好抵，我去德國坐 Deutsche Bahn 中長途
一程最低消費 19.9 歐元，又係手快有手慢無

就咁睇 East Midlands 無論服務定車廂打理都相當唔錯，絕對同我坐過既其他歐洲鐵路有得揮

del sorry

我見有人 blog 過自己點樣搭一程只需六鎊嘅慢~~ 車返倫敦，不過呢班車已於今年五月縮短：
http://diamondgeezer.blogspot.co ... ffectual-train.html

好詳細的post, 不過小弟對EMT頭等就唔係咁睇好喇。曾經都係星期六呢班0634既坐上客（而且係Leeds開始坐，當時因為VTEC advance已經賣到頗貴而EMT頭等仍然有23鎊頭等，所以就試下。一上車對個服務觀感就好唔同，因為抽車係剛剛廠出所以部車係邊行邊派餐具，醬料等），而且一上車職員已經表示要到Sheffield先開始有野食/野飲派，因為廚師未上車。(Leeds 至Sheffield 之間有大概1個鐘車程)  再者可能我果日臨近聖誕坐，full-loaded compartment 令到佢地忙到根本無空閒行過黎沖茶/啡等等。車廂內籠方面，依然比較殘舊，同佢競爭既VTEC真係無得比。
曾經有幸係VTEC做特價時體驗佢個1st class, 感覺截然不同 - 例如短短Leeds 去York既20分鐘車程已經派齊熱飲，臨近退役既Mk3 coach 都翻新得好豪華既內籠等等，都真係會將EMT比下去。我就覺得試過就算，但EMT就唔係我心目中operate得最好既first class。

小弟都試過搭 VTEC (LNER) First Class 由 KGX 搭上 GRA 再轉 EMT Sprinter 去 NOT, 個程俾左大約 25 左右, 而個服務小弟都覺得做得幾好 (註: EMT Class 156 係只有  Standard Class Seating) 雖然當日係週末 不過佢派既凍煙三文魚三文治係非常好食 而當日就算對面既乘客係去 Stevenage 火車職員都係照派餐 同埋 KGX 有得入 Lounge 係幾開心既

喺Bath讀書嘅我表示出倫敦都係National Express最平 GWR Bristol至London線收到天價咁貴 嚟緊2019年Bath去 London Paddington年最平Standard Advance要£10.25(66%) 最平First Advance要£23.45(66%) 同Nottingham出發差唔多時間 只係個半鐘
National Express早買最平可以£5搞掂 就算遲買都係NX平D 火車太貴

以舒適度嚟計 NX都係贏GWR HST同800s 呢條火車線經常爆棚出入London 火車會坐得好迫 Coach相對嚟講闊落好多

原來Virgin Train 周末唔提供熱早餐，唔怪得上次搭冇啦
想請教下係咪大部分英國列車服務係周末都冇得入lounge？同埋除左早餐之外，其他時段係冇熱食架？

CRH5 發表於 2018-12-28 02:59
原來Virgin Train 周末唔提供熱早餐，唔怪得上次搭冇啦
想請教下係咪大部分英國列車服務係周末都冇得入 ...

關於 First Class Dining Service:
Virgin Trains, LNER & Hull Trains 係平日全天候有熱食提供， 而週末只係有 Sandwich & Drink
East Midlands Trains 係 每日 有幾班包 Breakfast Service 既倫敦班次， 而其他班次只係有 Complimentary Snack & Drink
CrossCountry 係平日有多班包 Hot Meal 既班次，而其餘班次則有 Sandwich & Drink
Transport for Wales 係平日有一班來往 Cardiff & Anglesey 既服務提供 First Class，而呢班車係送一個 Three-Course Dinner/English Breakfast，而其餘班次則只有 Standard Class
而其餘既 Train Operating Companies 大多都只係提供免費茶水同餅乾
(註: 有部分有頭等座既通勤班次係無免費茶水既，例如 Thameslink, West Midlands 等)

Lounge Access 呢方面其實係有少少睇火車公司
In General, 只有係 East Coast Main Line & West Coast Main Line 上同部分倫敦既 Termini 既 Lounge 係會開足七日， 其餘大部分 First Class Lounge 都係只係開平日

william970216 發表於 2018-12-27 20:21
喺Bath讀書嘅我表示出倫敦都係National Express最平 GWR Bristol至London線收到天價咁貴 嚟緊2019年Bath去  ...

小弟反而有少少好奇你個價係 Bath 去 Victoria 定 Heathrow... 小弟平時買 NX Nott'm - London Vic 既飛有時都間中見到有單位數既價格，唯如果小弟買 NX Nott'm - Heathrow 既話張飛係 25 鎊起跳