當年西鐵劣評如潮, 一定唔止鐵路迷記得, 客量非常不濟, 新界西居民用行動支持大白象論調, 有番咁上下年紀都會記得.
只係之後香港市道從沙士後走出谷底, 經濟發展越來越好, 西鐵亦有推出同優化配套措施去吸引乘客, 先有今日成績.
元朗區人口年輕, 近年好多人新婚後搬入去住, 或者原區建立分支家庭, 當年嘅大白象論調佢地未必聽過/感受過, 眼下西鐵(配套)嘅方便, 仲有月票加強版嘅無敵, 對佢地嚟講係一落地就有, 但對上一輩嚟講, 呢一切只係洗走以前負評嘅技倆.
咁當然, 純用而家眼光去睇, 西鐵綫係好嘢嚟, 但係咪代表當年啲人冇遠見呢, 我會話如果經濟過左沙士之後一沉不起, 繼而出現大衰退, 民不聊生, 西鐵無可否認係一隻巨型大白象.
換句話講, 當年呢隻「大白象」有啲生不逢時, 佢喺一個近代最壞嘅時間同大家見面, 當人人都擔心緊搵朝唔得晏, 返工隨時收大信封, 減人工, 失業率越來越高, 經濟前景極不明朗嘅時候, 政府興高采烈同大家講西鐵通車, 市民可以俾嘅反映, 就係當年大家見到嘅.
今時今日講呢啲, 唔好話西鐵係大白象, 叫人諗下失業率高企係一個點樣嘅概念, 整個社會氛圍會變成點, 睇怕都有難度. |
