俾紅小搵咗笨

我頭先喺大口環（近沙灣徑）想返旺角朗豪坊，一去到碧荔道巴士站就見到有部紅小喺道，車頭出旺角朗豪坊，$20一位。我問清楚係唔係直返朗豪坊，司機話係於是我上咗車，之後16：32小巴開車，停咗喺美景臺個站等客。等客期間有部971R上晒客開走，之後再多部971。部小巴等咗大約15分鐘都唔滿，照開車，喺堅尼地城上咗4號幹線。

就係之後全車客就被搵笨啦，上咗橋之後部小巴無轉入西隧，反而走咗去中環。停燈位嗰陣我問司機唔係返旺角咩？但佢又話係返旺角朗豪坊喎。之後部小巴繼續遊花園，喺郵局轉咗出夏慤道，然後就跟104行法返朗豪坊。

我之後開返新巴ETA睇返班971R，我搭部小巴去到拔萃女書院嗰陣部971R已經返到弼街，之後去到山東街嗰陣過返頭先等客嗰陣見到嗰部971。最後17：20先喺朗豪坊落到車，完全係正一被搵笨，紅小又唔似得真正嘅的士咁禁止兜路。如果換轉係紅的，咁樣兜法肯定告得入，但係呢啲「合法泥鯭的」，唔係喺車上都唔知會被搵笨。

紅小呢啲第三世界交通，佢可以隨意改道嘅特性，即係可以隨意搵客笨。我以後都唔會再見到紅小就上車，乖乖地搭返有固定路線嘅交通工具好過。

所以政府N年前已經想 「紅轉綠」去取締﹐只係一直以來都係做唔到。

上車俾哂錢都係焗搭，駛鬼同你行咁貴西隧

你自己傻仔啫, 有971R唔坐.

其實司機一直只說是直去旺角，你憑甚麼覺得一定行西隧？

ML29 發表於 2019-4-6 20:20
其實司機一直只說是直去旺角，你憑甚麼覺得一定行西隧？

大口環／西環去旺角朗豪坊唯一合理直接方法，而紅小又行得嘅，係西營盤入窿，油麻地交匯處出。嗰日司機兜中環灣仔係兜多成5公里。

點先叫唯一合理先. 西隧收緊幾錢紅隧收緊幾錢 行少左路但係比多左隧道費仲多過d油費

有錄音嘅咪試吓用商品說明條例投訴

紅小就係咁嫁啦，淨係等客呢個point已經拜拜。
我寧願o係巴士站等15分鐘有車，都好過上左車行左一段路被逼等15分鐘先開車。

miklcct 發表於 2019-4-8 10:27
大口環／西環去旺角朗豪坊唯一合理直接方法，而紅小又行得嘅，係西營盤入窿，油麻地交匯處出。嗰日司機兜 ...

我不知道「唯一合理」的定義是甚麼，只看到閣下與司機溝通過程辭不達意，問不到你想得到的資料。
閣下好像仍在大學讀書？建議你可以爭取機會多修讀語文中心的課程進修一下。