石蔭／石籬站應該起喺邊度好？

ricky 發表於 2019-7-18 23:51
老實講，以交通路線的選擇，住大西北好過住象石梨木樹。例如：去觀塘，大西北有全日車，象石梨木樹只有繁 ...

嗯，其實我小時候係住大西北，你講起大西北真係令我有感而發。大西北嘅巴士服務表面上的確比起象石梨木樹優勝，
不過我嘅記憶，大西北搭車出東九龍，一個鐘一定走唔甩，
出上環最快都九個字，去中環以東唔止呢個時間
出尖沙咀好少少，因為一落高速就已經係匯翔道，之後就到尖沙咀一帶。
之但係如果你俾一粒鐘我，由象石梨木樹出發，我保鐵保証可以去到尖咀、觀塘、中區甚至東區有餘了（若無突發事故的話），
但天水圍、元朗呢？住得近西鐵站係無問題嘅，但如果住入邊呢？唔知你有無感受過等架輕鐵都要等6-7分鐘嘅滋味，所憾我以前住嗰度就經常遇到呢個情況。
小時候最記得我最怕係去觀塘，一諗起就驚，因為搭巴士唔塞車都起碼要超過一粒鐘先到啊，搭鐵又要喺美孚行嗰條長長嘅隧道，簡直係我嘅陰影……
呀仲有，如果你唔係住大西北交通最便利嘅地區，一定就陪兜，一係就搭M車去轉車站轉其他車，但要預無位坐……
你諗下屯門寶田/建新出觀塘嗰架258D，又或者天水圍北去沙田究竟點搭車好，相信就會明。

大西北上輕鐵、西鐵唔使迫？非也，一樣咁辛苦。
如果你話住屯門，搭鐵簡直係繞緊大圈，咁即被迫轉巴士，但我想講屯公塞車已成例牌菜（情況於 2012 年後有所改善），相信無幾多個屯門人係從味試過遲到。
如果係咁，點解仲要認為住大西北好過住象石梨木樹呢，除非你係巴士狂迷，朝朝暮暮都要搭程巴士先開心，咁特別嘅個人喜好又真係幾難滿於荃灣半山嘅。

另外，閣下提及到4?X於早上等半小時都上唔到車呢個情況，我諗閣下有所誇大喇，
我自己前排都有一大早過梨木樹搵老人家飲茶，之後七點半至八點左右搭車過大圍/沙田轉鐵，
我想講我從味試過要等車等半粒鐘，絕對唔會。咁多架車只有 48X 係偶爾會頂閘，但一架上唔到，下一架都會上到，因為4?X巴士喺和宜合道沿途都多人落車，有落自然有上。
有時有小巴嚟，咪又搭下，平均早繁去大圍/沙田站，廿分鐘內喇，叫做不過不失。
再唔係，你過對面搭40X/46X/47X，五分鐘就到葵俊苑，過天橋就到葵興站，出港島九龍好快就到，呢個絕對唔會上唔到車，亦無需同班村民去迫36系車。
至於石圍角，選擇反而少咗，因為普遍都係步行去荃灣/大窩口站，或搭312去青衣站轉車，但其實都已比大多數新界地區方便。（呢度都想提下，312小巴早繁班次個人認為嚴重不足，中途站好多居民都上唔到車）
象山交通相對前兩者的確欠奉，但有紅小補救，叫做未衰得晒咁喇。

另外請問大西北有直接車去青衣？有直接車去大圍？有直接車去大埔？其實巴士唔係萬能，俾你若由錦英苑出發去尖東，你會唔會棄鐵搭87D？我唔會。

至於價錢，坦白講都係嗰幾蚊，計到咁盡做咩呢？
你從大西北出市區，俾你有直通車，車費絕對唔會比荃灣東市民轉鐵便宜好多（宜家有月票，係好少少嘅），係味？

所以如果你問我，去觀塘/過海翻工，石圍角/梨木樹同大西北邊度感覺好啲（單純計交通，排除所有周邊因素），我會認為係前者。

PS. 我諗大西北真正嘅優勢，會係八號風球期間先見真章，因為八號下巴士小巴全停但輕鐵唔停，呢個係輕鐵無可否認嘅好處。

keilingha 發表於 2019-7-19 01:38
嗯，其實我小時候係住大西北，你講起大西北真係令我有感而發。大西北嘅巴士服務表面上的確比起象石梨木樹 ...

我的睇法係，盡量有直接車出入，點都好過駁車，就算搭258D去觀塘超過一粒鐘，都好過用九個字搭M車去葵芳轉地鐵去觀塘(繁忙時間都要一粒鐘)，所以我覺得點解屯元天交通好過象石梨，當然交通費貴，屯公或大欖塞車就無計。

咁你堅持要去葵芳轉，唔喺葵興轉，真係幫唔到你喎，我覺得象石梨最大嘅問題未必係交通，而係乘客唔識變通。
另外，有好多直通巴士嘅地方我都唔太睇好，尤其是新界東，眼見人口越嚟越多，大隧、吐露港等主幹塞車越嚟越頻密，將來會比宜家更煩。
點解我話安達安泰等邨交通差，唔係話佢少路線選擇，而係嗰邊塞車已成慣例，你試下繁時多啲過安達安泰，就會體驗到咩叫真正半粒鐘先落到地鐵。
相比嚟講，象石梨情況無咁差。


至於你話叫安達安泰人等鐵路，東九龍線？諗下還可。睇下近年鐵路公司基建搞成點，都唔會再抱大期望。
前排發展策略文件仲講緊東涌東、西兩站會喺 2020-2024 年落成，宜家連政府都收返，東涌西站擱置，逸東人嘅願景再次落空呀！