【資訊】東九龍線計劃的最新消息

巴士的膠 發表於 2020-4-8 11:05
要連接寶琳現有月台，基本上月台都會係靠新都城一段，高度好可能只係與新都城平台相約，因為再高有將隧公路，新綫受制於公路路基，唔會高得太跨張。

而怡心園、旭輝臺、新都城都有平台，寶儉樓係單向內園，剩返真係大影響只有欣明同英明部分單位，但情況其實同馬鐵沿線分別不大。反而政府應該係諗緊點借東九龍綫向山上塞更多人口。

但新都城條行人天橋本身都唔低喎，你要諗下新都城二樓係巴士總站上面，條橋最少都高5米啦，條橋仲要係斜嘅，中間又冇柱，未必用得返嚟接駁車站大堂，你要諗埋大堂放邊，呢個架空大堂又會唔會影響周邊大廈景觀
仲有就係路軌點都高過大堂，咁旭輝台、怡沁園又點呢？
你話要避將隧公路，咁一條咁嘅架空軌道，點樣避？下穿定大急彎？

彩虹道方面如果搬設施，都係可以克服嘅問題，大磡邨同彩虹道之間應該有位做臨時改道。

講緊東頭邨對出嘅啟德河喎，同埋你講嘅一段而家起緊樓啦，有冇咁多位做臨時改道呢？

巴士的膠 發表於 2020-4-8 10:44
兩邊（康翠、科大）都係山上，寶琳高架可以減少爬坡，主要影響應該只有低層單位嘅景觀，睇佢地想要多條路 ...

條橋唔低得去邊
同埋條路唔算闊，邊有位擺橋墩？

如果將寶林站set佳景路又可唔可行?
一嚟冇橋位限制
二嚟景林邨邨口有一排樹, 可以當"屏障"
三嚟可以用依家"景林邨出口"平台做車站大堂, 反正嗰個位起唔到樓

jpoon 發表於 2020-4-8 17:32
但新都城條行人天橋本身都唔低喎，你要諗下新都城二樓係巴士總站上面，條橋最少都高5米啦，條橋仲要係斜嘅 ...

可以參考馬鞍山站個設計，馬市都係下層總站，上層商場，而商場可以連接大堂，唔搭車嘅市民亦可以穿過大堂過馬路。

而因為寶豐路兩邊仲有花槽、單車徑。來回兩線中間有條壆，用翻觀塘站嘅椿柱排列已經ok，兩邊都有位可以起出口。甚至將來加條橋喺行車線下面，接駁埋怡心園、㞁輝臺同將軍澳村都得。

行車綫應該下穿將隧公路入山就得。

至於大磡段，一期鑽石山連overrun已經到蒲崗村道路口。

巴士的膠 發表於 2020-4-9 10:59
可以參考馬鞍山站個設計，馬市都係下層總站，上層商場，而商場可以連接大堂，唔搭車嘅市民亦可以穿過大堂 ...

首先，西沙路有預留位，可以響路中間起車站，寶豐路冇
第二，唔明你講馬鞍山站設計，馬鞍山站係地面（西沙路中間）機電，上一層係車站大堂同連接兩邊商場嘅天橋，再上一層係軌道，唔係咩總站同商場。馬鞍山站最初開嘅時候車站兩邊出入口唔通嘅。但點都好，本身新都城接駁寶林邨條天橋好高，你起架空嘅，軌道一定要高過呢條行人天橋。條橋本身都起碼離地5米，加埋上蓋同冷氣、電綫管道，軌道最少都高7.5米啦。所以我就唔明點解一定要架空，走地底咪仲好

至於大磡段，一期鑽石山連overrun已經到蒲崗村道路口。

我一路都講緊東頭喎
同埋你話overrun同有位做改道有乜關係？

jpoon 發表於 2020-4-9 21:19
首先，西沙路有預留位，可以響路中間起車站，寶豐路冇
第二，唔明你講馬鞍山站設計，馬鞍山站係地面（西沙 ...

寶琳兩邊（康翠、科大）都係山入面，做地底咪要爬升幅度更高又或者令前後車站更深，增加難度同成本。寶豐路又唔見得好繁忙，怡心園對面亦有空間做工地。真係唔明白有乜咁困難。

彩虹道個情況同寶豐路差不多，舊四美街總站搬完又可以做工地，向西延一樣有彩虹道遊樂場。

巴士的膠 發表於 2020-4-10 10:51
寶琳兩邊（康翠、科大）都係山入面，做地底咪要爬升幅度更高又或者令前後車站更深，增加難度同成本。寶豐路又唔見得好繁忙，怡心園對面亦有空間做工地。真係唔明白有乜咁困難。

有位做工地同係咪架空冇關係喎

彩虹道個情況同寶豐路差不多，舊四美街總站搬完又可以做工地，向西延一樣有彩虹道遊樂場。

其實係你唔知定係理解有問題
我一路都講緊東頭，你講四美街同彩虹道遊樂場做乜
唔明就睇地圖先啦

jpoon 發表於 2020-4-10 16:12
有位做工地同係咪架空冇關係喎

東頭我個方案係衙前圍舊址，同東隆道一帶，前者係塊空地，後者係條流量甚低嘅街，
至於橫越啟德明渠，屯馬線啟德車站直情貼實明渠，亦規劃有地下街。

巴士的膠 發表於 2020-4-11 00:06
東頭我個方案係衙前圍舊址，同東隆道一帶，前者係塊空地，後者係條流量甚低嘅街，
至於橫越啟德明渠，屯馬 ...

其實你知唔知衙前圍村塊地畀長實買咗
另外你有冇諗過橫越一條河難起Ｄ定係沿河起難Ｄ
仲有我真係唔知關東隆道咩事

JX9097 發表於 2020-4-8 19:09
如果將寶林站set佳景路又可唔可行?
一嚟冇橋位限制
二嚟景林邨邨口有一排樹, 可以當"屏障"

佳景路冇橋，呢個方向去科大一邊冇樓，好過行魷魚灣村果邊又要避魷魚灣村又要避政府宿舍，但係另一邊運亨路有橋呢，路軌仲要跨過寶琳站喎，起嘅時候仲要諗埋會唔會阻住巴士入去寶林巴士總站同停車場出入，同埋要諗埋點樣整轉乘通道
另一個問題係可能要穿過將軍澳隧道公路一次，再穿過將軍澳隧道一次