本帖最後由 smartboy 於 2020-7-7 21:55 編輯
終於有版友講起呢個我研究過好一陣子嘅問題。
根據我呢位半山地頭蟲嘅研究，對比返網上資料，發覺多年黎關於羅便臣道交通嘅討論都有兩個盲點： 1. 1973年半山巴士線專線研究工作進行期間，其實中巴同當年嘅運輸科都未有放棄維持羅便臣道西行巴士服務，所以從來都唔係話東西行一定要行死某路段（13自開辦就途經一段堅道東行，而且實行左一個月都無就已經因為用車問題而比103行返全段堅道東行）只係定線傾向行經相關路段。如果當年政府向中巴方面建議最終實行左的話，13線嘅現有角色係可以近乎完全由更改走線後嘅12線取代。亦即表示13呢條線好大機會無須開辦。 （中環 → 羅便臣道西行 → 旭龢道掉頭 → 跟13線落山，但直行羅便臣道折返中環）
少少題外話，當年半山巴士專線籌備期間，中巴曾經打算係巴丙頓道試車，但被運輸科當局拒絕。 
2. 而其實以上建議路線係專線實施23年後，即係97年城巴接辦3號線（3B）之後曾經被重新提出（相信係唔希望同3B過份重疊以及搶13線嘅客），同當年政府建議嘅唯一分別就係唔經旭龢道，羅便臣道尾直接轉落屋蘭士街。呢一年可謂專線成立以黎羅便臣道西行最接近重新有巴士服務嘅時候。據當年住係附近嘅街坊講，乘客通告同站牌通通搞掂，亦都解釋到點解城記會零零舍舍有「列堤頓道」嘅布牌。準備功夫充足到近乎開新線嘅程度，可惜嘅係最後依然係不了了之。最奇怪嘅係，咁大幅度嘅改動，我暫時都只係響HKBDB嘅舊文庫度揾到相關討論，連巴典同wiki都無相關紀載。
之後分別就係03同08年，曾經提出過嘅3B+12→新3號 / 12+13 → 西摩道版13。前者聽聞就係為左兼顧西摩道變得太過兜而擱置，後者就係因為區會反對般咸道柏道無車去旭龢道。其實我覺得兩者都係可行，但前提係23A要存在。而係3B都已經不復存在嘅年代，半山電梯三寶（12,12M,13）係唔洗旨意郁住。唯一仲可以郁到而有潛力做大塊餅嘅, 就只有樓主所講嘅40/40M呢一pair。
至於唯一解釋到巴士公司無考慮擺線上西行嘅原因就得重量限制，但所謂嘅5.5公噸重量限制，其實只係一至六繁時，上下午一共4個鐘頭實施。 | 
