九巴經營老化問題

紅公司嘅營運手法好似完全跟唔上時代嘅步伐，顯得過時，間接降低左競爭力

唔知大家有冇發覺紅公司嘅路線好多時都冇改道嘅彈性，有啲路線嘅站同站之間其實有幾條路線可以選擇，但係偏偏公司就限死啲司機一定要行其中某一條路，變相拖慢咗行車時間，例如948，968，明明停完永吉街其實直接可以行永和街甚至係禧利街出去皇后街，960/961/978 亦都可以行禧利街出去皇后街，但係偏偏公司就一定要啲車行晒西港城，然後繁忙時間一多車埋急庇利街個站(尤其係九字頭車上客時間長)，就頂死晒啲巴士，條龍可以排到去上環站，結果啲968 塞起上嚟由永吉街去皇后街都要12分鐘先到，人哋969 行永和街5-7分鐘就已經去到皇后街，其實九巴可以用返博愛迴旋處嗰招，向運輸署申請將永和街同埋禧利街納入巴士的替代路線，然後再喺站頭出通告叫班卡佬一到繁忙時間指定要用永和街出(948/968)同埋禧利街/摩利臣街出(934/936/960/961/978)，減少返行車時間，起碼啲車冇咁易過鐘，亦都唔使搞到上環段咁趕客先

另外紅公司好多時反應都好慢，唔能夠因應乘客需求而變陣，例如某部份路線繁時跌哂客都可以唔減班(373,681)，反而部份有潛力嘅路線就郁都唔郁，例如934A 回程頭班開得太遲，去到上環都6:30，但都可以企十幾個返荃灣，證明下繁直入荃富街同埋眾安街係有客，咁九巴就應該開多幾班，將頭班提早到去17:30啦，明明呢條線係可以比934更直接同930X競爭，而 934A其實贏面唔係細，只係暫時輸在知名度，對家930X 下繁越做越旺，由幾年前20分鐘一班冇客做到而家私下加到去9分鐘部，但都班班企人返荃灣，紅色鬼其實有張好牌喺手，既然咁想追住黃色鬼去打，點解唔將934A發大嚟做？另外249X 都係一樣，最近條線俾人篤爆上繁7:00-8:00 基本上所有班次全部都頂哂閘出青衣，某幾個班次直情要靠後門先上到車，車上逼到傻，但係九巴都側側膊唔加班，其實呢條線繁忙時間好應該加到去15分鐘一班

仲有九巴應該搞下啲站位問題，好多地方啲巴士站都黐埋一舊，一去到繁忙時間啲巴士就排晒長龍，典型例子一定係創紀之城，荃葵青線，元天線，上水線全部塞晒喺唔夠20米嘅距離，結果啲巴士淨係排隊埋站都排幾分鐘，但明明前面30-40米係可以擺多幾個站。仲要唔止一個站係咁，成條觀塘道加加埋埋不知幾多站都係黐埋一舊，一到繁忙時間啲車都唔知浪費咗幾多時間排隊埋站，咁搞法其實係巴士公司自己玩死自己，其實好趕客，亦都降低左自己嘅競爭力。例子多到數唔晒，菲林明道，太古廣場，西隧北行，荔枝角站全部都係啲巴士站位全部黐埋一舊，但明明前面仲有好多位可以放站柱，點解唔可以盡量拉闊站入面每條線上客位置嘅距離？咁就唔使啲巴士浪費咁多時間去排隊埋站

九巴經營冇老化，係老化就唔會巴士由10-15減到20-25加收車。

淨係加士居道上唔上橋已經分到兩間公司

我只講你第一點
如果你覺得行禧利街好好實在太天真
個垃圾燈位分分鐘直行到西港城都快過等

同一位置不乏有車長自由發揮

都要運吉比唔比改

好似城巴
如果當年投到290 安達臣
今日可能都唔駛蝕大本
所以運吉係有能力決定間公司命運

創紀之城個站位再擺前，cut線落隧道會有難度觀塘堆站係咁集中既就唔使分咁多月台

九龍公司行ISO，有好多走盞位佢地都唔會博，公司話乜就乜。

運輸署唔比做嘅話講咩都無用
而家下繁唔少 934 935 960 961 968 已經用永和街 / 禧利街出干諾道

至於咩巴士站問題 , 對面海公司一樣災難 , 英皇道沿線好多線都係放埋一齊求其停就算
係近期七海同電廠街終於重組 , 但其餘站都係塞埋一舊

繁時特別線唔係無加班，只係睇地區

好似 960B 可以兩年間由 4 班加到 8 班，打到 962C 應一應