大家都知道,城巴上年打正旗號,想做大20A,衝住1A來打,話要食盡紅鬼,結果九巴絲毫無損,但城巴卻元氣大傷.因此,本人想在此分析20A有以下問題:
1/ 需求太低
- 1A主要客源,係觀塘來往太子道,20A食唔正呢一段. 而20A想食既係太子道至尖咀一段,呢段就算冇1A,都仲有1,95等線搶客,所以搶食成功率有限.
2/ 班次疏,而且不是全日
- 人地1A開7-10分,仲要開全日,收得貴但密密開,反而收得平既就越開越疏,就算20A平過1A,但人地仲有一抽收得平既同你玩,你可以玩到幾多?再者,20A唔係開全日,班客鬼記得? 就算記得都唔會擺20A係首位啦.
3/ 彌敦道同1A唔同站
- 又話要食紅鬼,彌敦道北行20A是跟1A唔同站,咁點搶? 即係各有各做啦. 就算我等緊1A,有部20A來到但冇站,我都唔會幫襯啦.
4/ 落唔到美麗華清真寺
- 人地1A其中一個食糊位係彌敦道清真寺,條20A就佐敦道走人,雖然大家都知道城仔好想落到底,但九巴擺明會反對,所以唔敢開落底,走去廣東道自轉. 即係睇王晶既2B級片咁,永遠到喉唔到肺. 條20A想各有各做又冇能力,想搶1A又唔敢擺明搶人地食糊站,同樣情況出現係前300總站呢個食糊位.
5/ 規劃部門問題
- 想搶人客又唔夠膽,走去陰D陰D,食得一個得一個,但一個先收得五六蚊,十個都唔夠俾車長時薪,但架車行左一個鐘都唔夠十個,咁同乞食有乜分別?
6/ 學曾志偉
- 以前李亞爺用車海去做大5B打殘中巴10,就以為流水線平價車海就可以應用於今天. 可是,油價貴左,人工高左,車價高左,平價流水線在香港已經冇生存空間,開一條衰一條,今時唔同往日. 如果仲用以前成功既一套去擺落今天,必死. 希望管理層睇到牛經理點做起930系,去諗下乜野線應該救,乜野線唔應該救吧.
其實我係支持城巴來九龍新界搶市場,但更有效既方法好多,唔能夠行錯每一步棋. 例如日出康城係一個好好既地方吸客,收費貴,車程適中,需求大,但唔係拎多十架車去搞乜鬼793,795X呢D物體,反而我認為應集中做大795P,搞一條康城直出旺角深水埗全日車,好過793+795X累鬥累唔知想點,兩條都要將南自轉.
大家又點睇?
|
樓主
