[翻炒冷飯] 全日本空輸 香港<>東京 NH822/811 經濟艙體驗 日期:08JAN2019 時間:0050-0530 航班:NH822 機型:Boeing 767-300ER
對上一次坐ANA已經係17年5月,已經深深感受到日籍航空公司嘅服務質素,但從未成為我個人飛日本嘅首選,一來近年全日空機票價格對比日航同國泰未見有太大優勢,二來執飛嘅767比國泰嘅333/773更舊實在有些少無法接受,如果嗰次唔係同行友人指定要坐ANA我應該都唔會選擇坐。今次原先預定國泰凌晨機飛成田,但見燃油附加費徴收前ANA再減到$3000/人嘅心理關口,$3008全包其實未算減得好勁,不過就成功說服只係坐過廉航嘅同事落坑,今次我就可以同日航喺服務上作出比較啦
今次去程係NH822凌晨機,不幸嘅係18年12月已經由788變返做763,值得安慰嘅係安排咗202座嘅763執飛本次NH822航班,呢批763座位比較新同有inflight WiFi,咁計就好過214座763。個人而言最喜歡全日空登機時機艙播放嘅音樂~Another Sky,有種令乘客放鬆同保持愉快心情嘅作用,暫時對比喺坐過嘅航空公司中呢首歌係最好。 座位用返ANA代表色藍色為主調,座位同國泰hardshell 一樣調整角度唔會影響後方乘客,呢啲對後面乘客固然係好但就會壓縮自己嘅腿部空間,有辣有唔辣。 椅背有個杯架係相當貼心嘅設計,打開餐檯後都會有一個,個設計考慮得幾周全,相比之下我比較喜歡國泰新座位上整合杯架同電子產品嘅架 娛樂系統有一個9吋LCD屏幕,解像度就算係1080p都會係浪費,遙控就放喺屏幕隔離令屏幕位置未能置中,啲戲都好貼近戲院落畫但內容依然係少,下方有USB充電插位但唔好旨意差得快,最慘係我個位個USB位係壞嘅 恰好遇上ANA飛行安全影片改朝換代嘅時候, 舊嘅其實都係一般般無乜特色同吸引之處,新嘅就以歌舞伎為主題,未至於好似長榮咁奇怪 食物方面由國泰航饍提供,ANA機上餐飲基本上我仲係有信心,今次一樣揀B餐西式餐,主食係白汁魚柳配茄汁螺絲粉,副食有冷麵、涼拌雞肉木耳及水果盒,味道真係唔錯可以再追多個,餐包雖然凍但唔會好乾好難吞
回程
日期:12JAN2019 時間:1825-2240 航班:NH811 機型:Boeing 767-300ER
回程好多時都係可寫可唔寫,尢其係一早收到ANA電郵通知機型變更一事。當以為係由214座767改為夢寐以求嘅787時,實際上都係用返767,不過就係同去程一樣用202座嘅767,都係不幸中嘅大幸。
呢part集中喺膳食嗰度,其他唔再重覆啦 上到天就派米菓同飲品 一樣係提供日式西式選擇 回程嘅餐飲質素都OK嘅
小結
咁耐無坐ANA再坐返有冇唔同咗?明顯地空中服務員嘅笑容開始拍得住國泰,但不失其專業態度都仲係抵讚,同埋話就話202座新些少但舒適度都唔係有好明顯改善,但如果通關之後我相信ANA會繼續係我飛日本嘅次選
|