浸鹹水遇溺記 第三十回 LM711 The World’s Shortest Flight

"唔好意思呀，關於兩日後既 Puffin Tour 呢，因為個島爆發禽流感，所以當局唔會俾遊客登島參觀 - 唔知你有無興趣改期或者取消?"

就係呢一個電話既緣故，小弟係一個風和日麗既八月天發現自己身處一個蘇格蘭北部既島嶼上，食住大西洋既海風，望住一個空無一船既避風塘。

昔日，英國皇家海軍會將大英帝國最頂尖既艦隻派駐此處，準備隨時出航 保護大英帝國 - 相隔半世紀，各航空母艦同戰列艦早已離去，而呢個曾經水泄不通既行動基地只餘下漁船一兩隻 以及間中於天空劃過既海鷗 - 呢個就係位於 Orkney Islands 既 Scapa Flow。

-- Flight Info --

LM711 KOI - PPW - WRY - KOI
Britten Norman BN-2 Islander G-BLDV
KOI dep. 1630
PPW arr. 1645
PPW dep. 1652
WRY arr. 1654
WRY dep. 1701
KOI arr. 1716

-- Orkney Islands --

Orkney Islands 為蘇格蘭以北既群島之一 - 由於其位置鄰近位於北海既再生能源及油田，佢係有唔少設施支持英國北部既能源產業，同時間佢亦有唔少郵輪定期拜訪。

Orkney Islands 整個群島人口只有兩萬餘人，而當中只有一萬七千人居住於 Mainland, 其餘三千人則分散於群島既各個島嶼上。 Orkney Islands 有約二十個有島民定居既島嶼，而大部份島嶼皆有公共交通連結各島嶼同 Mainland。

多虧當地 local council 既支持，呢個 Inter-Island 既交通網絡係非常完善 - 即使有島嶼人口只有二十餘人，該島嶼都會有每日兩三班既汽車渡輪服務，為該島上既島民帶黎物資同遊客。同時，六個外島上亦有機場，並由 Loganair 提供一日一兩班既航班連接該島同 Kirkwall。

既然小弟山長水遠黎到呢度，小弟亦善用呢個機會拜訪兩個島嶼 - Westray & Papa Westray。準確少少講，小弟唔係拜訪呢兩個島嶼 (儘管 Westray 同 Papa Westray 島上各有值得去既景點同幾間好既民宿)，而係乘飛機於 Westray & Papa Westray 呢兩個島嶼之間穿梭 - 呢個就係 歷時兩分鐘，航程三公里 既世界上最短商業航班。

-- The Inter-Islander --

正如上文提到，呢個 Inter-Island Network 既主要目的係為左盡量提高離島既同本島之間既交通，因此呢個網路係用一個  A-B-C-A triangle route 既形式運作 - 佢會將兩個相鄰既外島組起 - 早上班次係  A-B-C-A，下午班次係 A-C-B-A 既形式運作。因此，雖然會有乘客係真係於 Westray 同 Papa Westray 兩個島嶼之間穿梭，不過搭上 PPW-WRY 呢兩分鐘既乘客應該大多係來往 Mainland，不過需要途徑另一個島嶼咁解~~

同時，雖然做第二係無獎拎，不過另一個 flight pair - Kirkwall - Stronsay & Sanday 既 SOY-NDY 段亦同樣簡短 - 時間表上 呢個航班係係只需五分鐘 (而飛行時間往往係更加短) 因此該航班亦被當地職員稱為全世界第二短航班~~

不過要成功坐上呢個航班都有少少彩數成份 - 同島上其他 Inter-Island 服務一樣，呢個航班係按需求營運既，而職員會於起飛前一小時才確認航班是否會如期營運。(好似小弟呢啲遊機河既 當然唔會被當作 ‘有需求’ 啦) 雖然今日航班上並沒有人來往 Westray，不過由於島上有醫療物資需要轉送 Mainland 處理，因此今日航班係會飛足 full schedule - 先往北飛十五分鐘到達 Papa Westray， 往西飛兩分鐘到達 Westray，再飛十五分鐘回到 Kirkwall。



預辦登機程序係相當簡單 - 唔似得一般國際航班 需要預早兩小時到達機場，小弟早半小時到達機場於櫃檯報到時 講出名字同簡單核對證件即可。


今日既飛機係一部 Britten Norman BN-2B Islander - 呢部飛機於英國南部 Isle of Wight 生產，並由兩部 Lycoming 活塞引擎推動。呢部飛機擁有非常好既短跑道升降表現，因此非常適合服務偏遠地區~~


飛行除左講求天時地利人和之外，亦會講求重量同平衡 - 乘客係到達停機坪後才會被機長安排座位，以確保飛機既重心係位於一個可接受既範圍內。


呢部 BN Islander 一般會搭載八名乘客，並以每排兩個座位，一共四排既方式排列。雖然飛機客艙唔係大，不過整個感覺係非常 communal - 值得留意既係最後兩排係沒有門口，而乘客係需要踏過前面兩排座位進出。


機長旁都有一個座位可供使用，不過一般情況下呢個座位係會騰空~~


今日既航班係一個輕鬆既氣氛下起飛 - 第一段 Kirkwall - Papa Westray 係有六位座上客 - 有四位前往 Papa Westray 渡假既遊客，有一位島民以及遊機河既小弟~~


呢種飛機上當然沒有機上娛樂系統同 Moving Map 啦 - 不過當窗外景色如此怡人既時候 呢點又有咩所謂呢~~


此航班為禁煙航班，在機艙任何地方吸煙或使用電子煙都屬於違法。請依指示扣好或者解開安全帶。需要調較的時候，可以將安全帶拉緊。當扣上安全帶的燈號亮起，請必須扣好安全帶。即使燈號熄滅，我們亦建議閣下繼續扣好。


由於飛機無機艙加壓既關係，呢部 Britten Norman Islander 只係會於 ~1500ft 既高度飛行。圖中為 Rousay & Egilsay


//放手做個野孩子
看天下那以為對的事
痛快故事 改寫滿意//
per se 《鬥快 》


抵達 Papa Westray 機場後，有兩個消防員出來迎接航班 - 雖然島上居民只有一百餘人，不過各島民係有唔少人會兼任機場既各個崗位，以確保航班能順利升降及維持島嶼對外既 airlink。前往 Papa Westray 既五位乘客落機後，有四位前往 Kirkwall 既乘客登上飛機 - 有兩位係島民，而另外兩位乘客則為黎自英格蘭既遊客。


Papa Westray 既客運大樓 - 呢個機場既所有營運設施 除左消防設備之外 基本上全部都位於呢個屋仔入面~~


Youtube Link



航班到達 Westray 機場時 同樣都係有兩個兼任消防員既島民迎接。接過醫療樣品後，飛機就沿礫石跑道滑行及起飛，並向 Kirkwall 進發。


回程風景同樣怡人 - 航班飛越 Rousay 時 經過一個三文魚農場


小弟同其他乘客閒談得知 原來兩位島民都係住 Kirkwall，並趁天氣晴朗之際 乘飛機到 Papa Westray day trip - 雖然小弟當日都係從愛丁堡搭飛機 day trip 緊 Orkney Islands，不過日日都可以搭飛機 day trip 真係非常幸福既一件事~~


於空中俯望 Kirkwall Town - 上文提到既郵輪已經離去，而相信城內各個大街小巷已經回覆平日既寧靜。


Kirkwall Airport 呢個三跑道設計係一個典型二戰 RAF 基地既機場設計 - 為確保基地不論風向都有適當既跑道使用，基地會鋪設三條跑道，每條既 heading 相隔 60deg 而已。現時 KOI 有兩條 Active Runway - 已被增長，可供 Saab 340, ATR 等機種使用既 09/27 跑道，以及今日LM711 使用既 14/32 跑道。


轉個彎到 (literally)


經過四十五分鐘，九十公里既航程 同埋三次起飛降落之後，小弟回到 Kirkwall Airport ，為呢個旅途作結。小弟該日亦乘 Loganair 航班 LM398 由 Kirkwall 回到 Edinburgh - 如果有興趣既 閣下可以睇埋上回飛行報告~~


到達 Kirkwall 後，正當小弟準備辦理搭乘 LM398 回愛丁堡既登機手續時，地勤人員竟然俾左張證書小弟，並邀請到今日既機師簽名作實 證明小弟曾經飛過世界上最短既商業航班 - To the ground staff at Kirkwall - Thank you!

And that’s it! 小弟非常開心可以係飛到呢個全球最短商業航班，並係小弟既 bucket list 上面劃走呢個 item - 希望日後可以有更加多航空相關既旅途可以同大家分享啦~~

-- End --

小弟開咗個 IG 專頁啊~~ Follow along my adventures at @bombe_de_terre

如果閣下鐘意小弟既飛行報告既話, 不妨睇埋之前寫落既其他旅行報告~~

一個重逢 Jetstream 41 的故事

• 浸鹹水遇溺記 第十三回 flyBE (Opby. Eastern Airways) BE7615 VLY-CWL
  

一個蘇格蘭島嶼, 兩個汽車渡輪既故事

• MV Glenachulish & CalMac MV Loch Fyne
  

A Study of Tartans

• 浸鹹水遇溺記 第二十九回 LM391 LM398 EDI-KOI-EDI
  

搭到全世界最短航班，相信係一個非常特別的體驗~

唔係好明 "按需要營運" 係如何操作，如果單純遊飛機河係唔計，咁想搭飛機前往兩個島旅遊，又會唔會當 "有需要"？
唔知呢幾程機機票係咪一早買定，如果買咗機票但最後航班因 "需求不足" 取消，其實會好影響旅客行程安排...

另外機上只有一位機師，而且駕駛艙同客艙毫無分隔，呢個安排聽落並唔符合現今民航安全準則 (?

據小弟理解，由於呢個係個 PSO 服務，航班只要有任何貨物/乘客就會營運 - 如果當日 Westray 島上沒有醫療物資要送遞 Kirkwall，咁航班就會直接飛 KOI-PPW-KOI，而跳過 WRY 機場~~