[Delay 有好有唔好] CX806 UA5713 HKG > ORD > ICT

話說小弟四月就跟咗學校去參加美國航空航天學會 (AIAA) 舉辦的「第28屆設計/建造/飛行比賽」 (28th Annual Design/Build/Fly Competition)，而舉辦地點就係堪薩斯州威奇托市 (Wichita, Kansas)。呢個咁偏僻嘅地方香港當然冇直航機去，喺考慮轉機次數最少嘅情況下，結果試到上年10月先開返嘅香港來往芝加哥航線，去到芝加哥再轉多一程機去威奇托。

日期：16/04/2024

航班：CX806 [Hong Kong International Airport (HKG) > Chicago O'Hare International Airport (ORD)]

表定時間：12:30 (GMT+8) - 14:25 (GMT-5)

實際時間：12:34 (GMT+8) - 14:37 (GMT-5)

機型：A350-1041 (BLXI)

嗰日使用嘅閘口係3號，結果影唔到成架飛機。。。

起飛大約兩個鐘之後就開始派午餐，小弟揀咗古法鹽焗雞、小棠菜及絲苗飯，用飛機餐嘅Standard嚟講算係唔錯。

食完第一餐之後過多一陣就開始日落，然後就入夜，喺橫跨太平洋嘅過程嘅時候有好靚嘅星空！

長途機有唔同嘢食，小弟就揀咗蛋撻做宵夜，亦都係第一次搭飛機有蛋撻食！

大概時間橫跨太平洋之後就開始派早餐，小弟揀咗蘑菇奄列、雞肉腸、車厘茄、牛油馬鈴薯做早餐，中規中矩冇乜太特別，都係常見嘅早餐。 (唔知點解上載圖片調轉咗)

經過咗15個鐘頭嘅航程之後，終於抵達芝加哥，亦都係小弟事隔九年再一次踏足美國！

呢15個鐘其實每隔兩三個鐘就會突然之間有幾分鐘嘅氣流，完全唔知點解，結果成程機都唔係瞓得好舒服，同埋國泰通常飛芝加哥都係大概14個鐘，唔知點解嗰日要15個鐘，可能係風向問題？

————————

日期：16/04/24

航班：UA5713 [Chicago O'Hare International Airport (ORD) > Wichita Dwight D. Eisenhower National Airport (ICT)]

表定時間：16:59 (GMT-5) - 19:09 (GMT-5)

實際時間：18:06 (GMT-5) - 20:48 (GMT-5)

機型：CRJ-200LR (N956SW)

雖然今次預留轉機時間大概有兩個半鐘，但係要喺芝加哥清關攞行李再轉 Terminal，時間上實在唔太充裕，再加上小弟一行人有啲人比美國海關扣查咗一段時間(唔知點解)，結果攞完行李嘅時候已經係呢班機原定準備 boarding 嘅時候，幸好佢最後 delay 咗先趕得切。啱啱上一程機落機係喺 Terminal 5，落機之後要先入境清關攞行李，然後再轉捷運去 Terminal 2，幸好 Terminal 5 已經可以寄定行李，然後可以兩手空空去 Terminal 2。

喺 Terminal 2 入閘之後見到要 delay 一個鐘就走去買啲嘢填飽肚先，食飽然後再上飛機。

執飛呢條航線嘅係 CRJ-200LR，亦都係小弟坐過目前最細嘅一款飛機，成架機淨係載到 50人，所以好快 boarding 完就可以準備起飛。

唔知係機場太大定係太繁忙，結果 taxi 咗多過半個鐘先起飛。。。

起飛不久小弟就已經倒頭大睡，直到降落先起身，經歷咗一共19個鐘有多嘅旅程，終於嚟到威其托！

—(暫告一段落)—

原來有蛋撻，係唔知味道如何🤭

估唔到魚翅而家會提供鹽焗雞作飛機餐，都真係好勇

蛋撻睇落幾靚，唔知味道如何？曲奇皮定酥皮？

唔知樓主張 CX -> UA 機票係分開買定係同一張機票但 interline？international 轉 domestic 中間編定轉機時間唔夠三粒鐘，風險極高。我不嬲畀朋友建議係，除非揸美國護照，否則至少要預返三粒鐘，最好就四粒鐘，因為無人知道入境要排幾耐

如果係 ORD 就更加，因為 international 全部係 T5 入，轉返 UA 要去 T1/2，就算揸美國護照都最好預返三粒鐘。我自己無試過 ORD 入，但網上聽過唔少劣評同 horror stories

如果係拆開兩張機票，最好預再耐少少，因為第二間航空公司無責任因為第一間航空公司 delay 而 protect 你個行程

S3BL100 發表於 2024-6-25 21:25
估唔到魚翅而家會提供鹽焗雞作飛機餐，都真係好勇

蛋撻睇落幾靚，唔知味道如何？曲奇皮定酥皮？

冇記錯嘅話個蛋撻係曲奇皮，味道不錯，熱得來都keep到鬆脆，冇話因為翻熱而淋晒

CX 同 UA 兩張機票係分開買嘅，買嗰陣時預時間冇考慮過要轉terminal，另外飛去嗰個城市嘅機唔多，一行人唔想浪費太多時間轉機，所以先出現呢個情況。幸好係當日其實過海關條龍唔算好長，所以先趕得切，如果有下次都真係要預鬆啲，寧願喺機場等多陣

MA4745@85A 發表於 2024-6-25 22:29
冇記錯嘅話個蛋撻係曲奇皮，味道不錯，熱得來都keep到鬆脆，冇話因為翻熱而淋晒

CX 同 UA 兩張機票係分 ...

反而用酥皮先難keep到脆，由航膳整好到上機，隨時要成7-8個鐘先俾到客食，啲酥皮一早已經塌晒了

ORD 只預 2.5 hr 國際轉內陸，就算係公民都係高風險操作，好大機會走飛機
個牛油皮蛋塔幾吸引
HKG-ORD 飛十六個鐘係正常的

MA4745@85A 發表於 2024-6-25 22:29
冇記錯嘅話個蛋撻係曲奇皮，味道不錯，熱得來都keep到鬆脆，冇話因為翻熱而淋晒

CX 同 UA 兩張機票係分 ...

兩張機票分開買，都夠膽 2.5 小時轉機，你地真係好大膽

咁當然有好多野係做左一次之後先知既，今次你地趕得上都算好彩。好多年前我試過一次 self-connect WN ABQ-LAX + AA LAX-HKG（講緊條線未摺果陣），印象中兩個方向都預左至少五粒鐘時間。當然 LAX 都係要轉 terminal 而且兩間航空公司無 interline，但 terminals 之間至少可以行路往來。果次咁做因為價錢實在差太遠，但呢次之後我都無再試過咁大膽 self-connect

我唔清楚樓主你張 ORD-ICT 機票買左幾多錢，但美國內陸計，呢類 small city 往來 hub 航班，通常反而賣得貴過往來大城巿之間航班好多；但調返轉如果係作為同一張機票行程一部分，因為反正呢類短途航班主要都係預人轉機用，價錢有時唔一定貴過拆開買，反而可能仲平少少

呢幾年最大問題係美國航空公司唔可以飛俄羅斯領空，亦唔可以同其他航空公司飛俄羅斯領空航班 codeshare，AA DFW-HKG 又摺左線，於是香港往來美國唔少 Rocky mountains 以東小型城巿，都要轉至少兩次機，至少我而家果度都係。但飛得咁遠，個人愚見認為可靠度、穩定性比起轉幾多次機、行程總時間更重要

ORD-ICT，AA都有航班。國泰同AA都有賣HKG-ORD-ICT聯程機票。無必要self-connection。

S3BL100 發表於 2024-6-26 09:46
兩張機票分開買，都夠膽 2.5 小時轉機，你地真係好大膽

咁當然有好多野係做左一次之後先知既，今次你地 ...

試咗一次先知原來美國 self connect 預咁少時間真係有機會趕唔切，諗住同歐洲轉機一樣，預三個鐘應該足夠，真係希望唔好有下次。本身CX班機係早多半個鐘出發，臨出發前兩個禮拜先突然time change，同埋check過平時CX飛ORD通常都會比預期早一個鐘（甚至更多）到，所以一開始預大概有三至四個鐘轉機，估唔到咁啱嗰日飛足15個鐘，結果差啲出事

另外喺度解釋一下，因為本身CX張機票係sponsor ticket，所以要另外再買內陸機票，再加上比完賽去LA玩，所以一次過搵 Multi City 機票，結果出嚟最平UA就揀咗佢，ORD＞ICT同ICT＞LAX加埋都要三千幾HKD，都唔算係一個好平嘅選擇，不過冇得揀先會出現呢個情況。

其實去ICT最密機係飛DFW，如果HKG<>DFW條線仲喺度，應該點都係比ORD更好嘅選擇，只係可惜而家冇咗直航，喺轉機次數最少下一定要飛ORD。CX開返ORD已經算係咁，如果唔係香港出發一定要轉兩次機。

MA4745@85A 發表於 2024-6-26 16:59
本身CX張機票係sponsor ticket

唔難估到點解回程要waitlist