本帖最後由 skibidiot 於 2025-12-14 02:45 編輯
第一次打長文，歡迎大家討論，多多指教。 (非路線建議，要建議路線嘅請去F1)
前言： 中九龍繞道 (前稱中九龍幹線，下面簡稱為中九幹）即將會喺12月21號通車。 作為市區道路網絡嘅最後一塊拼圖，中九幹有如政府所講「特快連貫東西」，油麻地5分鐘直達九龍灣，確實唔係現有道路網絡可以媲美。
然而，特快背後，又有幾多條巴士線會得益？ 而當中又有幾多會係可以全日？ 青沙公路2008年通車後近七年先開到轉車站， 中環及灣仔繞道通車六年亦只有三條全日線。 中九幹通車後，九巴同城巴又可以安排咩全日線去行？
固然繁忙時間客多、車多、線都多，幾班車、幾條線去改行新路較易執行， 但當中有幾多條線可以因為咁就全日？ 又有幾多條現有嘅全日線改行新路會係可行？
分析： 中九幹連接嘅地區相當多， 東至將軍澳；西至大西北、機場，佢都可以做到， 網上亦都有唔少關於中九幹嘅討論， 但大家好多都係就一至兩條線咁零零碎碎咁討論， (例如290系、16P、大西北將軍澳線、九龍東西線、城巴A/E線等) 最後就係同樣嘅觀點喺唔同關事/唔關事嘅討論上面重覆。
今次就想分返唔同路線嘅類型， 集齊咗大家討論過/我諗到嘅走線， 再加埋少少自己嘅睇法。(所以絕對唔客觀)
今次主要會先講東邊嘅出口， 即係由新界西 (即屯元天同埋荃葵青) 經3號幹線，再出中九幹之後去九龍東以及將軍澳， 留意到大部份討論都係集中喺呢種線， 但小弟覺得除非巴士公司為咗湊數去整全日線， 否則呢類線應該比較難去做到全日。
------- 1. 新界西 - 觀塘 相信大家都同意無論係大西北定荃葵青， 現有經龍翔道、觀塘道去九龍東（以觀塘為中心）嘅巴士網絡相當完善， 講緊係接近每個「小區」都有一條全日線， 如果要將呢度任何一條線改用中九幹，代表住一定要放棄九龍灣以西嘅區， 而黃大仙、鑽石山/彩虹/牛池灣本身都有唔少嘅直達同轉乘客， (更加唔好講依家有啲東九線其實做埋龍翔道大流水，例如38、40) 即係話依家嘅東九線，喺替代服務不足下，係無可能改到線。
呢個情況喺荃葵青嘅巴士線就特別明顯， 雖然有啲線係會重覆咗部分範圍 (尤其係38/40P/42C)， 但每條線都有幾個佢嘅獨市位。 喺缺乏一個有效嘅區內轉車站下， 叫一條原有嘅線跳走黃大仙、鑽石山、彩虹係冇接近冇可能。 (就算係最少停站嘅33/33B，黃大仙都係一個客倉+獨市位，所以新嘅33X都好難全日)
理論上大西北係有條件去拆/改線啲， 畢竟有屯公同大欖兩個轉車站「保底」。 但個問題就會變成：究竟拆線會唔會吸多咗客？
要諗呢個問題，首先我哋要知出咗中九幹有咩路線可以行， 以最大客倉觀塘為例，主要有三種路線： (a) 中九幹 —> 啟福道 —> 觀塘道 (現215X西行走線) (b) 中九幹 —> 啟祥道 —> 九商 (宏照道等) —> 偉業街 (現258X走線) (c) 中九幹 —> 啟祥道 —> 牛頭角道 (現101X走線) (當然以去程嚟講，三種走線都可以喺牛頭角站附近轉返入觀塘道)
三種走線各有好壞： (a) 行公路通常最快，但行得啟福道代表出公路頭站已經係觀塘。 淨係靠觀塘做客底，可唔可以支撐得起一條全日線？ (b) 九商觀商繁時固然多客，所以新西九商線改行新路絕對合情合理， 但78X都話咗俾我哋知，非繁呢啲地區根本出唔到客， (可能有人會話大西北客底強過皇后山喎。 但客多路線都多啲，本身每區都有東九線下，點解啲客要搭新線？) (c) 牛頭角道近民生區域啲，但燈位都多啲， 以去裕民坊為例，當龍翔道冇炒車，新路又會唔會快過舊路？
更重要嘅係，大西北係以轉乘食糊，而轉乘最重要係密轉密， 用(b)、(c)走線嘅話，回程九龍灣區一定冇得停相同站位， (b)行嘅megabox區同九龍灣站都要好長嘅步程， (c)行嘅牛頭角道過往除咗234D去程同埋觀荃紅小之外，冇一架新西-東九車停經， (a)走線甚至同九龍灣絕緣。 咁究竟改用新路係咪快到啲九龍灣客會走去自己唔熟悉嘅站位搭車呢？ 呢個有待實測，但我估非繁嚟講，就算係走線(a)都只係會快約10分鐘。
(可能有人會討論，咩叫快得滿意？我覺得以下呢兩個算係： 1 - 朗豪坊-元朗Yoho：268X 30分鐘vs 68X 50分鐘 2 - 朗豪坊-錦駿苑：87C 20分鐘vs 87D 35分鐘 當今日屯門去觀塘要一個鐘嘅時候，快十分鐘係咪算滿意呢？)
亂咁改線嘅話，可能結局係原線站位班次大減，轉乘優勢大減， 新站位又唔熟悉/少人用，最後得不償失。
更更更重要係，就算客buy (a)走線嘅九龍灣「特特快」， 觀塘、九龍灣嘅客係咪多到可以支撐到一條班次正常嘅全日線？ 2021年62X 259D拆咗線之後，每條線只係可以喺非繁25-30分鐘一班， 今年天北嘅69C都縮咗早繁後嘅時段， (講緊連大埔嘅74X都只係會喺繁時拆274X淨做呢兩區，非繁都要做埋彩紅、鑽石山) 就算屯元天有一個好完整嘅轉乘網絡，我都唔覺得咁就可以支持到62X/268(9)C改新路。
------- 2. 新界西 - 九龍中/東 (觀塘、九龍灣外) 有人可能會話，將新西觀塘線拉遠啲，咁埋又做多一水客囉。 先唔講咁會拉長幾多全車時間，用多幾多架車， 無論係藍田山、油塘、甚至係山上好hit嘅安達臣， 非繁都唔會好多人去屯/元天。
論工作機會，屯元天又唔係特別多， 論北上，好哋哋用88/88X轉東鐵/B8，總快過環繞全港一圈去深圳灣掛。 所以呢批客會唔會合理化到拆大西北東九線嘅做法呢？小弟就唔覺啦。
荃葵青本身就有啲直達到呢啲區嘅線(例如38、33、290系)， 要開新線估計新客唔會多，舊線去改又要諗返其他服務，難度唔細。
至於中九幹出口嘅啟德，佢對巴士線嚟講係雞肋般嘅存在。 要用中九幹經啟德去九龍灣以東嘅話，巴士線要喺啟德嘅掘頭迴旋處度轉10個圈， 先可以自轉完啟德，再出返去啟祥道，我相信咁嘅巴士線去到九龍灣全架車跨區客唔會多過20人。 (就算係行跑道區再出偉業街，比起上面三種觀塘走線都要慢唔少) 相對地，如果好似78C咁由觀塘繞道逆走返觀塘市中心、九商，再落啟德嘅， 咁應該要跨區去啟德嘅都會搭返屯馬線。(雖然依家都係)
要巴士服務啟德，甚至拉埋紅土區都好， 啟德站+啟德區完全不利巴士嘅路面設計令到巴士先天地係冇乜優勢。 (紅土區仲要諗埋，有如608 vs 106/116咁， 先啟德後紅土其實唔一定會快過依家行龍翔道/漆咸道北) 或者啟德區可以試開一啲290式嘅跑道區-啟德站-中九幹、3號幹線-葵芳-荃灣， 但呢啲線係咪全日，就有待商榷。
------- 3. 荃葵青 - 將軍澳 既然6號幹線都主打將軍澳，將軍澳冇理由唔值得獨立開一欄講嘅。 小弟唔係住將軍澳，有幸以前因為工作定期要去，但我對當區了解唔多。 今日嘅主題係中九龍幹線，所以除咗相關出口之外，我係唔會得登去討論將軍澳區內嘅走線， 區內走線就交俾各位將軍澳專家討論。 (亦都如我所講，我唔係住嗰區，所以架車喺寶琳、坑口、將中定康城做尾站，都其實唔係好關我事)
有如上面所講，荃葵青區內係缺乏一個轉車站去聚晒三家嘅客， (最似樣喺個係黃大仙，但呢個站同中九幹大纜都扯唔埋) 所以一條合理嘅區內走線對保證客底就好重要。 而我相信大家都會同意，好似290系咁快速經青公、葵涌道(最多入埋新都會)係最合理、最多人會buy， 葵興芳特快，荃灣都唔太慢。
但290系本身就做緊東九龍各個住宅區+將軍澳同荃葵 (甚至黃大仙)嘅連接， 三條全日線都只係20-30分鐘嘅班次，根本冇拆線嘅空間。 最有潛力改經嘅290E，固然繁時嗰三班試下，問題不大。 但淨係服務兩區，非繁係咪就夠客去全日？或者可能連30分鐘一班都支持唔到。 就算係最快嘅290，冇咗寶達嗰區嘅客，淨係坑口寶琳客夠支持全日20分鐘一班咩？ (討論區度觀察到大家就會針住呢個位提出一千種可能走線， 但小弟自己覺得，將軍澳區內嘅走線，最多只會做到兩區嘅客， 點砌都好，去到第三區就一定唔吸引。)
------- 4. 屯元天 - 將軍澳 相信呢條線係好多人，包括我以前嘅FF。 以前我都有喺另外啲討論度提過，收費表21.x其實令九巴冇乜意欲開屯將/元將/天將線，呢度就唔詳述。
但撇除收費因素，我覺得仲要多兩個條件，自己先會支持開一條大西北/將軍澳線： 1 - 大西北/將軍澳再多啲人住/多啲工返，例如洪水橋 2 - 行龍翔道、觀塘道，而且有限度停站 (黃大仙、九龍灣、觀塘)
屯元天同將軍澳嘅距離，係講緊一個正常人都會驚嘅程度。 有好多將軍澳嘅人，幾十年先入過幾次大西北，反之亦然。 咁嘅距離下，係咪真係咁多人會定期通勤、或者去探親朋？呢班客又係咪需要用全日線嚟服務佢哋呢？ 整咗1個鐘車程就由尾站到將軍澳嘅巴士，又係咪會吸引多好多人搭呢？ 咁嘅巴士線，絕對唔會好似260X/263/268X/968咁，用轉車站致富。
有啲人就會退而求其次，做將軍澳之餘做埋觀塘， 但如果係要做埋九龍東嘅，咁不如行返黃大仙，等另一區 (因為屯同元天本身就冇得互轉) 嘅人都可以用自己嘅東九線轉乘？ 咁就同新路已經冇關係。
-------
小結：只會一條線夠快，就會有客？ 記得好耐以前返part time，小弟要由大西北遠征去將軍澳。 嗰時每次喺唔同嘅地鐵/巴士線穿梭，我都會諗：可唔可以俾我一程由大西北坐去將軍澳？
但後嚟了解多咗唔同嘅巴士線，我漸漸就打消咗呢個念頭， 因為好似我咁要定期由大西北去將軍澳嘅，始終唔係多數， 個客量根本就支持唔起一條全日直達線。 巴士資源唔係無限，理應分配去有需要嘅線， 而唔係因為有條新嘅快路，就要格硬整一條「直達，但冇客」嘅線。
下半部份將會向西望， 探討中九龍繞道通車後， 各西九龍巴士線可以有咩發展。 (趕緊工，希望三日後出到 TaT )
------- 辛苦大家睇到嚟呢度。歡迎大家俾啲意見。
| 
收藏
