本帖最後由 skibidiot 於 2025-12-18 02:20 編輯
前言： 中九龍繞道 (前稱中九龍幹線，下面簡稱為中九幹）即將會喺12月21號通車。 作為市區道路網絡嘅最後一塊拼圖，中九幹有如政府所講「特快連貫東西」，油麻地5分鐘直達九龍灣，確實唔係現有道路網絡可以媲美。
呢個情況尤其喺往來九龍西路線嚟講特別明顯， 以前由將軍澳/九龍東，無論行邊條路去九龍西都唔太好， 龍翔道太唔穩定， 亞皆老街/太子道西/界限街就多車， 更加唔好講漆咸道北/南嘅死亡交叉。 情況同當年青沙前嘅新東-西九線好相似。
或者同青沙情況相似，有唔少現有路線都可以試改新路， 甚至今日已經聽到運輸署話某啲線可以全日。 但我覺得我哋更要小心唔好重蹈當年青沙嘅覆轍， 因為兩條高速都係連住連翔道 -- 一條望落好快， 但出入口極度唔對稱、出核心區域需時嘅道路。
喺呢度都想多謝一個好耐以前嘅post： 樓主當年嘅分析，去到今日我到仲係好有得着， 都令我今日想寫呢篇文。
再多謝埋呢篇post： 呢度都有好好咁啓發我呢兩篇文嘅內容。
分析： 上次講咗隧道東邊嘅出口，今次就講西邊， 透過三號幹線、連翔道同埋佐敦道，基本上九龍西大部分地方佢都去到。
但要留意嘅係，中九龍幹線嘅最左邊正正係西隧嘅出口， 都幾肯定依家西隧嘅塞車一定會將車龍倒灌入呢個出口， 如果往大角咀/葵涌巴士只可以行左線嘅話，都幾大機會會無辜塞多幾分鐘。
當然，對全日線嚟講，呢個唔係最大嘅影響， 更重要嘅係，用完新嘅路去返舊地方，係正常交通情況下係咪快咗。 過往青沙路線可能都話咗俾我哋聽， 連翔道同佢相關嘅網絡，好容易造出「假特快」路線， 呢次將會以唔同分區嚟睇，睇下每區有咩路線係可以考慮。
1. 長沙灣、深水埗 (、西九填海區) 淨係計車程改善嘅話，相信長沙灣、荔枝角商貿區應該係西九龍嘅最大贏家， 所以小弟覺得九城兩巴其實都可以試下一啲本身唔近地鐵站、或者要多重轉乘嘅地區(冇錯啦，係將軍澳)，用中九龍幹線整返啲長沙灣特快，絕對係一個好機會。
但當條線變半全日甚至全日，咁個問題就變成長沙灣、深水埗都要出到客， 呢個時間一個清晰嘅走線就好重要，咁究竟有咩走線呢？
用一條線做晒長沙灣道嘅長沙灣、深水埗，連翔道應該可以俾到呢四組路線： 往九龍西 (以連翔道出口嘅南至北排) (a) 中九幹 -> 連翔道 -> 寶輪街 -> 美孚 -> 長沙灣 -> 深水埗 (795X式逆走) (b) 中九幹 -> 連翔道 -> 興華街西 -> 荔枝角站 -> 長沙灣 -> 深水埗 (936北行 + 286C/270B南行) (c) 中九幹 -> 連翔道 -> 東京街西 -> 南昌站 (富昌邨) -> 欽州街 -> 深水埗 -> 長沙灣 (近286C北行/286X) (d) 中九幹 -> 連翔道 -> 海輝道 -> 欽州街 -> 深水埗 -> 長沙灣 (或者聚魚道+南昌街，參考13)
往九龍東/將軍澳 (以連翔道入口嘅南至北排) (e) 深水埗 -> 長沙灣 -> 美孚 -> 貨櫃碼頭南路 -> 連翔道 -> 中九幹 (f) 深水埗 -> 長沙灣 -> 荔枝角站(長荔街) -> 興華街西 -> 連翔道 -> 中九幹 (g) 美孚 -> 長沙灣 -> 深水埗 -> 欽州街 -> 連翔道 -> 中九幹 (h) 美孚 -> 長沙灣 -> 深水埗 -> 欽州街 -> 海輝道 -> 連翔道 -> 中九幹 (當然呢邊嘅走線選擇多啲)
上面儘量都係1對1，即係去程(a)+回程(e)係「對稱」。 (當然連翔道本人啲出入口係好唔對稱，好容易會「一邊快一邊慢」，例如(g)回程深水埗可以直行欽州街特快，但(c)去程就要東京街落，兜下富昌邨。)
而每對路線都各有好壞： (a) + (e) 明顯係用逆走嚟做荔枝角商貿區嘅客，但對深水埗嚟講都好肯定會慢好多。795X都話咗俾你知，淨係靠商貿區，旺角段前就會載空。 (b) + (f) 同樣都係逆走概念，去程仲要去興華街西城巴廠度自轉一圈，應該慢過(a)添；而且燈口超多。 (c) + (g) sell直達深水埗+做埋南昌站，但做唔晒全個深水埗，同埋欽州街都要塞燈。 (d) + (h) 對稱同埋會做埋大角咀，但停多咗咁多站，好容易變假特快。 (要記得行中九幹同連翔道喺地圖上面本身就係里數長咗， 巴士唔係的士，限速係得70，所以長咗係一定要多咗幾分鐘跑公路。)
全日線而言，合理地做到深水埗客係好重要， 所以順走嘅(c)(d)會比逆走嘅(a)(b)好，至於(c)(d)，要睇埋做緊咩地區。
即係點？ 例如藍田山+油塘，或許(c)快啲，又做到鐵唔太順路嘅南昌站。 或者13全日嘅時候想改線，咁可能(d)好啲，可以做得番本身大角咀啲客。
掉轉嚟講，西九填海區去東九龍，情況就可能複雜啲。 依家最似做緊呢批客嘅，係296C， 但呢條線可唔可以改中九幹呢？相信九巴都用短途分段講咗個答案俾你聽。 填海區本身嘅客都係以保鐵為主，巴士線好難幾個站就上高速，亦好難淨做觀塘， 咁嘅話，公路前同公路後嘅走線就要拉長， 撇除專營權問題，巴士公司有冇心去砌條夠客又唔慢嘅全日線呢？我哋拭目以待。
2. 大角咀、旺角 (、油麻地、佐敦) 其實大角咀就唔係啲咩客倉，不過佢喺公路出入口，要用連翔道直去旺角就點都要做埋佢， 但亦都因為要做埋佢，好多旺角-連翔道線喺大角咀-旺角呢個位就拉慢咗佢全程， 大家睇返287D-87D / 281E-281A / 72X-272X就知。
可能有人話，上面呢三組除咗喺大角咀多停幾盞燈， 新東嘅走線同埋路況都關事。 (例如87D/281A沙田路落公路，比287D/281E大埔公路落少燈位， 或者係大名鼎鼎嘅272X兜白石角) 但今日去到九東線，相近問題都會出現， 例如當你想新清水灣道落山嘅213D轉新路嘅時候， 要由新清扭返去中九幹嘅時間，分分鐘架舊213D已經過咗富豪東方酒店。 更加唔好講好多旺角線往來亞皆老街、太子道有大量流水客，分分鐘多過要去旺角嘅客 (呢個位唔係好肯定，如果有錯版友可以指正)。
當然，喺云云嘅東九/將軍澳-旺角線， 我絕對同意部份客量唔高嘅線可以試下改去新路，前提係主要流水要處理好 (例如13D/未全日嘅13)； 或者好似16呢種大線，喺冇收車、冇收資源嘅情況下分拆。 (畢竟喺九龍市區，九巴的確係主打流水客，要快嘅好多時紅小/地鐵更稱心， 你可以話佢喺特快線上冇港島咁進取，但本身嗰盤流水客都唔可以一下打晒， 除咗係易過區議會外，呢樣嘢都係尊重返本身嘅流水客)
至於油麻地同佐敦， 我相信比起順走 (which要兜大角咀，塞新填地街/旺角道)， 巴士公司可能會主打逆走，經返佐敦道去彌敦道。 但佐敦道都係一個塞得好勁嘅主幹道， 或許得X6C、795呢種用開漆咸道北嘅車嚟改線先係合理， 而好似X6C嘅消息咁，淨係美孚方向 (即係食正死亡交叉嘅方向)改，會更為適當。
當然有啲線由旺角做到長深荔嘅話，情況就比較麻煩。 例如98C繁時啲客係主要由山上/下去九龍嘅，就可以試下整啲中九幹特班。 但非繁嘅時候，流水客就重要好多， 咁呢個時候全日改新路又係咪好呢？ 如果改完中九幹都要好似904/5咁，由旺角碌到美孚嘅，又係咪會吸引返地鐵客呢？
3. 尖沙咀 東九/將軍澳嘅尖沙咀線，一係就好似26咁旺角開始碌車，或者紅土區就行返上/下路， 而其他大部份就行啟隧，少不免會塞死亡交叉。 但將啟隧線改晒中九幹，係咪就等於解決問題？
對於呢啲啟隧線，我自己會覺得改路可以，但要符合呢兩個條件： 1 - 最好係循環線，而只係西行改用新路 2 – 條線本身唔算好多車/客
啟隧線本身都有幾個散嘅點要做：舊九展、山谷道 (曲街)。 例如如果九巴貿貿然將215X改中九幹嘅，相信何文田一定會反檯。
更重要問題係，改咗新路後， 去程就只可以用廣東道或者柯士甸道-彌敦道， 當中大部份新西-尖沙咀線都會揀用冇咁塞車嘅廣東道。 但咁樣本身行開漆咸道南嘅啟隧客， 落車位就會由尖東變尖西，對本身去尖東嘅客好唔合理。 循環線嘅話，就可以保留到中九幹 -> 西九龍站 -> 廣東道 -> 漆咸道南 -> 啟隧， 相對上就更加可以平衡到唔同乘客。
至於回程，如果本身停彌敦道嘅，就更唔應該改新路， 要由彌敦道出佐敦道，逆走上海街會送走晒所有特快嘅時間， 如果大家唔信，可以上網揾「271 vs 271X」。 (另外本身東行死亡交叉嘅路況係好啲，多數都唔慢) 當然九龍線啲客比較會接受到停九龍公園徑，但有如上面咁講， 如果你要本身喺美麗華廣場嘅人去中港城搭車嘅，車程優勢嘅誘因就要非常大。
4. 過海 雖然初初中九幹係諗住俾九龍東/將軍澳嘅人用西隧過海，但相信去到今日大家都打消晒呢種念頭。 或者咁講，九東/啟德/將軍澳-中上環嘅過海巴士，不如都係用返紅/東隧算。
至於其他配搭，一係就客本身唔多，一係就有其他線做。 例如西區-九商觀商本身就有101X，南區-九商觀商本身就有671系， 而101X喺南行要停銅鑼灣同中環，唔似係會想改線。 (繁時都唔一定改，何況全日) 至於九龍東-薄扶林道 (即係做港大、瑪麗醫院、數碼港)， 依家嘅33X全日咗之後，已經有合理嘅巴士服務。 (繁時嚟講，其實依家連數碼港嘅自己先係得3班shuttle返九龍東/將軍澳， 連直出嘅shuttle都唔多客，巴士線就只會更少客)
我知道有人就會話，新界西-港島東改行東隧又點睇？ 但我自己係非常唔同意咁樣改。 先唔講東隧唔係完全唔塞、而西隧條龍尾依家去到美孚，你入中九幹前要塞一大段路， 就算係馬鞍山以前嘅988，喺三隧未分流前，其實都冇快過682P好多。 點解？ 因為兜太多路，所以只要任何一小段係塞車，已經會慢過正常走線。 本身側喺西邊嘅大西北，最多都只應改用紅隧而唔係東隧。
5. 機場 (A/E車呢度，篇幅所限，同埋自己認識唔深，就唔去仔細comment啦。)
小結：用新路+理順舊有走線 = 真特快 喺「青沙，係咪大家想象中咁吸引？」最後一段都有講， 與其盲將新東線改青沙，不如諗下點樣改善埋舊有嘅走線。
青沙線都發展咗十年， 我覺得相對上做得好(只係相對上)係86C/286C嘅重組， 286C除咗改用青沙，比起86C嚟講，佢都早兩個站就上公路， 對於第一城以北嘅客嚟講，就算係去行青沙比較「蝕底」嘅深水埗，286C都可以做到同86C差唔多車程 (甚至更快)。 (我亦都好希望有一日，馬鞍山可以更快直達青沙)
但如果好似287D咁，為青沙而青沙，仲慢過87D， 最後要靠返一條行獅隧嘅87C嚟做真特快， 咁除咗加價之外，咁樣嘅改動真係好失敗。
相信呢個道理，去到今日嘅中九幹都適用。 個人對改新路帶嚟嘅影響係樂觀嘅， 至少行全高速嘅路線，對乘客觀感上較受落， 當然要理順埋高速前後嘅走線，揀好目標嘅特快客， 咁先係對成個巴士網絡有真正嘅貢獻。 (例如如果好似傳聞話嘅234D繁時變全日，吸多咗客嘅話，我相信居民同巴士公司都會開心嘅)
後記： 沙田青沙線重組係上至政府、下至巴士公司都有努力規劃， 當年嘅沙田區喺東鐵過海段+屯馬全線通車前，資源都尚算充足， 先會陸續有唔同線改行青沙。
今日嘅九龍市區同將軍澳， 又有冇咁多資源去投入落一啲新嘅特快線？ (掉轉嚟問，運輸署同巴士公司又有冇魄力去推動呢啲市區線嘅重組呢？) 嚟緊幾年嘅RPP就會揭真章。
全文完，多謝各位。歡迎大家討論。
| 
收藏