2025年一次愛丁堡之旅

版友S3BL100成日叫我喺度 post 吓相，但小弟從來影相影得質素又差量又少，要寫飛行報告就一定唔夠貨。不過見到最近有人 post Aer Lingus ATR72 嘅相，勾起我上年一次愛丁堡之旅嘅回憶。題外話，2025年我搭咗 16 程飛機，總共搭咗 13 款機，除咗 A320ceo 搭咗四次之外，其他每款一次，喺今時今日一街都係嗰幾款「公廁機」嘅年代冇刻意因為機型避航班/航線嘅前提下做到，諗返都覺得好神奇。

講返個 trip ，今次由倫敦出發去愛丁堡選擇飛而唔坐火車，一來係火車飛貴，二來我住嗰度要出 central London 同去機場時間上分別不大，機票又唔選貴，就揀咗坐飛機。由於買飛嗰陣仲未決定好具體行程，所以除咗EDI之外，GLA都有睇，然後發覺 GLA 普遍比 EDI 便宜一截。於是就買咗一個好奇怪嘅 itinerary: LGW-GLA + GLA-LCY，但係住喺 Edinburgh。

第一程：LGW - GLA




首先搭火車去到 Gatwick。Gatwick 火車站座落 Brighton Main Line 沿線，所以有別於 Heathrow 之類要另外駁條鐵入去，Gatwick 本身嘅火車 service 就好好，而且由車站月台搭條電梯就上到去機場大堂，非常方便。


Gatwick Station 早排做過大翻新，靚咗好多



候機室望出去，見到 Air Europa 同 Ryanair。Ryanair 喺倫敦主要用STN，LGW主要係Easyjet嘅天下。Ryanair喺 LGW 主要都係飛返娘家愛爾蘭嘅航線。


來自尼日利亞嘅 Air Peace，近年發展進取。影呢張相嘅幾個月之後，仲開埋 LHR 航線。


去到閘口，今次要搭嘅機已經喺度。LGW俾我嘅感覺有啲似 EWR，可能因為大家都係「二奶」機場，同埋室內配色都比較深色。


冇錯，係一架 Aer Lingus 嘅 ATR72。話說唔知係BA唔夠機，定 Aer Lingus 有機剩，定係呢班長期 loading 差，呢班當時 (2025年) BA 係長用 Aer Lingus 濕租嘅 ATR72 嚟飛嘅。執筆嘅今日再睇返 schedule，似乎 BA LGW-GLA 已減班，但呢班機得以保留，不過用返 BA 自家 A32x 系飛。


同樣都係機尾自身梯上落。心水清嘅朋友會發現架機嘅 registration number 係G字頭 (英國)，而唔係愛爾蘭嘅 EI，而且寫住 operated by Emerald Airlines。Emerald Airlines 可理解為類似美國支線航線好多時都由一間細公司幫大航空公司 operate嘅玩法。Emerald Airlines 基本上係負責營運 Aer Lingus 嘅 regional 航線。至於點解架機係 G 字頭，就同今次濕租俾 BA 冇乜直接關係，反而係因為方便喺北愛爾蘭運作，Emerald 本身都成立咗一間 Emerald Airlines UK 嘅子公司，以滿足相關嘅法例要求。
至於呢架機，第一個用家其實係台灣嘅遠東航空。遠東停運後被租機公司收回，然後成為Emerald 嘅一分子。


T字形尾翼


機倉內部，2＋2坐位編排，第一排嘅前面就係行李倉


簡約但舒適嘅座椅


喺架ATR72 上面整色整水嘅顏色燈，感覺反而有啲違和


一般歐洲 standard 嘅 menu，呢架機都有。實際有幾齊就冇 explore 到


ATR 嘅 signature(?) overhead cabin door。不過目測有幾塊都爛爛地


坐喺死氣喉旁邊


抵達GLA，旁邊係BA Cityflyer 嘅 E190


一落機已發現地勤已極速開始 unload 行李


咁睇架機真係好矮


喺蘇格蘭梗係會見到 Loganair。呢架係 de Havilland Canada Dash 6-310，全機隊只此一部

第二程：GLA - LCY

回程揀 LCY 其中一個最主要原因係 LCY 真係好少人，喺假期嘅時候可以避開 LHR 嘅人龍同機龍
估唔到喺 GLA 竟然俾我撞到一架可遇不可求嘅機：


就係佢


架機就唔使多介紹。當日佢係由 Glasgow 飛去 Dresden，話係維修。但由嗰日之後佢就冇再做過生意。呢間嘢由 day 1 就滲著古怪，當年都竟然有人吹奏，真係神奇。


Goodbye, you won't be missed


英國二線機場好多喺 BA 同 Virgin 都放棄嘅情況下，最常見嘅反而係 KLM，同埋 TUI, Jet2 等 leisure carriers


"Nothing beats a Jet2 holiday"


今次搭嘅 E190


BA Cityflyer 係營運 LCY 網絡嘅副線。由於 LCY 連 A320 都唔用得，所以 Cityflyer 係清一色更細嘅 Embraer E190


同樣係 2＋2，E190 嘅空間感大好多


到達 LCY，前後梯落機。相比 LHR ，成個 deplane 過程真係快好多


一眼睇晒嘅 LCY

感想：難得搭兩程機都唔係主流機種，個體驗本身已經值回票價。不過冇比較冇傷害，E190真係快過 ATR 好好好多。ATR用咗兩個鐘由 LGW 飛上 GLA，回程嘅 E190 用咗一個鐘多少少就由 GLA 返到 LCY

至於 GLA⋯⋯我飛嘅日子係 half term 高峰期，但 GLA 依然屬於「冷清」水平。如果票價直接反映需求，咁 EDI 似乎已經超越 GLA 成為蘇格蘭人最喜歡嘅機場。不過呢兩個機場實在太近，而且扮演嘅角色又相似，咁樣累鬥累其實唔係辦法。不過要合作就要搞掂兩個城市之間嘅鬥爭，殊不容易。

終於等到你喺度出報告了

你住得距離 LHR 近過 LGW 同 LCY 咁多，專登為左 ATR 72 同 E190 走咁遠都認真神心（雖然我都會咁揀）。諗返起 2024 年過英國果次，北上果陣因為酒店喺 LHR 隔離而且趕時間所以直接飛 BA LHR-EDI 就算，唔記得留意其他機場有無更有趣選擇添

歐洲內陸無乜神獸坐，你 16 程機坐到 13 款機種仲要坐到 ATR 72 同 E190 兩款咁有趣機種已經算係咁。我呢兩年的確有過唔少有趣飛行體驗，但你想坐到螺旋槳機同 E190 又易過我唔少。E190 同門兄弟 E175 我當食生菜咁坐但螺旋槳機我都唔知下次幾時先可以坐到了

仲要影到架 Global A380 認真好彩，講到呢間野我淨係能夠畀呢個表情符號 仲有 Air Peace 又係，疑似管理不善兼因為某 YouTuber 而搞到聲名狼藉。記憶中佢地當時想繞過巿場機制要求英國政府直接畀佢地 Heathrow slots，仲威脅要檢視 BA 喺 Nigeria landing rights 報復，最後英國民航當局要投降

你既有趣飛行體驗唔係比我少好多，期待之後繼續見到 full reports

你太睇得起我喇，我邊有咁多貨


其實我嗰度去LGW同LCY都唔係真係遠，計時間只比去 LHR 耐 15-30分鐘 (視乎 LHR 邊個 terminal)，而且條 route 都算簡單，尤其 LGW all things equal 我會擺佢優先於 LHR

Nigeria 成個國家嘅民航業都充滿著 corruption 同 scandals，明明係西非嘅 powerhouse 搞到烏煙瘴氣，真係令人搖頭嘆息
(所以其實幾佩服 ET 搞得有聲有色)

講返機型，我 2025 年坐到咁多款都主要係去咗一轉美國同一轉香港/日本，嗰度夾埋就有 A333, 772, A20N, 789, 739ER, 763, A388, 77W 同 A351 九款冇重複嘅機型，細心睇其實亦冇咩神獸，除咗 763 有專登搵過路線/班次之外，其他都真係完全冇 plan，純粹好彩

S3BL100 發表於 2026-6-2 22:03
終於等到你喺度出報告了

你住得距離 LHR 近過 LGW 同 LCY 咁多，專登為左 ATR 72 同 E190 走咁遠都認真神 ...

講真真係無任歡迎
叫做有得睇吓唔同地方同airline都好

講開螺旋漿飛機我比較幸運
大大個YTZ係度，諗目的地就得

滿地可自己揸車性價比仲好啲
睇吓有無機會落南面鄰國出城
唯一可惜係Porter YTZ出得LGA無EWR咁方便

呢間嘢由 day 1 就滲著古怪，當年都竟然有人吹奏，真係神奇。

架Global係真係飛得成先神奇

AV115 發表於 2026-6-2 23:08
你太睇得起我喇，我邊有咁多貨

係你平時無乜擺相上來姐

睇返原來我舊年都只係坐左 19 程飛機，唔係比你多好多，機種數目更加係比你少一款，得 CR9 (x2) E45 E75 319 (x2) 320 (x3) 333 339 346 717 (x4) 744 752 753 夾埋 12 款，當中 339 係毫無計劃下臨時換機型坐到，其他大多數當然都係專登揀的。我都只係因為份工間中有得 travel 先至睇落好似飛得多少少，但呢兩年已經唔及高峰期了

唔係你講我都唔記得原來你住果頭雖然地理上近 LHR 多過 LGW 同 LCY 好多但可以一程鐵路直達 LGW，而且去 LCY 都唔慢。LGW LCY 搵到咁有趣機型當然揀後兩者

JC8385 發表於 2026-6-3 01:08
講真真係無任歡迎
叫做有得睇吓唔同地方同airline都好

講開 YTZ，兩年前大概呢個時候，因事第一次去加拿大、飛多倫多果陣，見到無乜有趣機型揀，請教過樓主意見，佢叫我考慮作 Porter Q400 飛 YTZ。但可惜我果邊點都要轉一次機，然後無可能一張機票買埋 Porter，拆開買機票費時失事又貴唔少，於是放棄，但又換來可以坐 Air Canada A223

EWR 係咪方便過 LGA 就兩睇，睇下你目的地係邊。LGA 係無鐵但一程 Q70 巴士可以不停站直落 Jackson Heights，可以轉乘多線地鐵之餘 Jackson Heights 周圍又大把全球各地正宗美食，要去 Flushing Chinatown 又近。EWR 要坐 AirTrain 駁鐵已經抵返 Q70 而且視乎去邊，坐 NJ Transit Commuter Rail 去到 Penn Station 可能仲要再轉多程地鐵，而 NJ Transit 並唔係NYC MTA 收費系統入面，變相成本都貴一截。如果係去 Lower Manhattan 應該都係 EWR 快，但要去其他地區都大機會係 LGA 贏，兼且 LGA 有靚靚 Terminal

但睇返原來 Porter 已經無 YTZ 飛 LGA，飛 EWR 就有，想坐 Porter 去 LGA 就要由 YYZ 飛，無 Q400 坐但有 E295；反而 AC 有 Q400 飛 YTZ-LGA

S3BL100 發表於 2026-6-3 22:18
講開 YTZ，兩年前大概呢個時候，因事第一次去加拿大、飛多倫多果陣，見到無乜有趣機型揀，請教過樓主意見 ...

我自己唔小心掉轉咗😂
之前無美簽YTZ飛而我去到嘅大城市就得滿地可
但明顯搭巴士甚至我自己揸車都唔輪到佢

YTZ短期內都仲係Q400天下
而家吹風話會擴建市政府嘈到拆天
好大機會反對無效，但以減國工程效率應該仲有10年嘅

Chinatown應該就唔使了
舊年老朋友即興走上嚟Toronto
帶佢食Richmond Hill茶記佢係咁就話new york無咁好
留嚟試其他嘢好了