2010個人大事回顧

過去幾年,本人都有諗過自己有乜野大事值得記低,不過最後都因為唔得閒冇打出黎與大家分享

一月份已經過左三個星期
希望我唔係最後一個板友回顧過去一年
請大家多多支持!

整體黎講,2010年過得並唔如意

1月
- 半夜三更因大牙牙痛突然痛醒 ,因蛀牙太深又或者無良牙醫補牙時補得唔好,花左二,三千蚊補牙都係救唔到隻大牙
- 出席反高鐵嘉年華
- 首次買股票

2月
- 本人公司有個疑似有精神問題o既憤青同事辭職,可算係在晴朗的一天出發,本人無意與佢結怨,不過佢誤會本人同佢爭佢心儀o既新黎女同事(而家係我o既好朋友),結果本人除左俾佢出言恐嚇外,更試過有身體接觸,呢個憤青同事o係到鑽牛角尖,多次放工跟蹤女同事時見到女同事o既同居男友,但係佢都唔死心,誤會本人o係第三者更加多餘,本人對憤青同事膽顫心驚係因為佢曾經有前科,試過幾年前拎起架送貨o既手推車掟傷被憤青列人黑名單o既同事

- 首次惠顧$50十分鐘極速剪髮,不過剪一個髮要差不多二十分鐘
- 年初三去超市執過期貨時唔小心打爛支"天地壹號陳醋",被玻璃樽割傷右手姆指 ,當時令店內員工擔心,雖然冇去到醫院,不過因傷口太深,攪左半個鐘都未止血,之後傷口隔左幾個星期先埋口,而家都懷疑姆指有疤痕會唔會過關 "e道" 時出問題
- 首次遊覽濕地公園,另外當日在香港站換取港鐵戀愛星願免費車程到天水圍,點知出閘時扣左廿幾蚊車費,事後成功取回車費

4月
- 本人在公司工作多年,職務愈來愈多,再加上老闆娘話好多野做想退休,總經理於是急忙聘請一個下屬俾我,希望呢個新同事能夠盡量接手本人以往o既工作,我就可以做多o的老闆娘o既工作,等老闆娘唔駛咁辛苦(其實係想花多o的時間做o的與業務冇幫助o既野),至於呢個係我工作生涯o既首位下屬後來發現係一個幫唔到手仲更加增加本人工作量o既大肚婆,唔怪得總經理話請多個人都係冇乜效果,其實總經理都唔知咁急住請佢返黎做乜?!招聘過程只係接見佢一個,又話佢o既知識經驗可能仲好過我,當時仲未見到大肚o既求職者話想快o的返工就請左返黎,點知做到差不多生得BB o既時候都犯o的低級錯誤,簡直係一個局

5月
- 在公司附近發現到有食肆賣外賣$9一碗o既一餸飯,若果食一餐可以慳好多錢
- 首次嘗試日式放題,最後半個鐘內要 last order 又要埋單真係趕頭趕命,過左時間離開張枱,店員會好唔滿意

- 首次遺失信用咭,之後竟然有人執到,當晚與同事食飯付款時用完張咭冇即時放回銀包,可能係搭地鐵入閘拎個銀包出黎時張信用咭跌左,之後與同事在大堂傾計十分鐘,突然聽到乘客廣播叫我與車站職員聯絡,原來係有人執到張咭後交俾地鐵職員,今次算係好彩,自己唔見左張咭都唔知,另外,若果唔係與同事入閘後在大堂傾計,立即上車離開o個個車站,咁唔見左張咭就要向銀行報失及補領

6月
- 朋友買左隻得意玩具貴婦狗,本人自此對小狗產生興趣,雖然之前冇養過寵物,不過以往本人都係偏好貓多過狗

- 向朋友推介股票,最初一,兩日隻股票升o既時候可以賺一,兩千蚊,當時朋友想賣,但係本人覺得可以再升叫朋友唔好賣,點知幾日後開始跌,朋友多次想止蝕離場但係我又話日後會升返,幾個月內跌左四成,最後朋友忍唔住賣左(損失萬幾蚊),朋友認為本人刻意害佢高位入貨累佢輸錢,不過o個隻股票間公司基本因素不變,錢又賺多過以前,都唔明點解升唔返,本人之後都有買呢隻股票,到而家仍然持有

8月
- 成年只係呢個月幫襯吉野家,因為大力支持麥提莎與吉野家o既推廣,憑兩個麥提莎吉包可以$20購買和風牛肉飯(大)及椰果賓治一份,本人o係一間相熟超市執過期貨,執到16包7月20日到期o既麥提莎意大利泡沬咖啡 37g,經理俾我以每包$1 o既價錢買左去,過左最佳食用日期o既朱古力食唔晒都可以用呢16個吉包以所謂半價購買8份和風牛肉飯(大)及椰果賓治套餐

- 榮幸透過一本雜誌o既介紹,認識剛在香港興起o既網上團購,以差不多半價o既價錢o係參與商號吃喝玩樂

10月
- 成日聯絡開o既朋友失蹤以及覺得本人做錯事想與本人保持距離,突然令我有份孤單o既感覺
- 參與網上拍賣七年來首次到東涌mtr(呢個好多賣家都唔去o既地方)交收貨品
- 身體不適,又痾又嘔,向公司請左全年唯一一日o既病假

11月
- 先後有兩隻股票持有後升左一倍,一隻係抽新股抽返黎,另一隻係買入大半年後升左100%
- 細佬結婚,被人爬頭
- 透過網上團購優惠,嘗試多間漢堡包店
- 咸蛋三寶或者四寶飯就食得多,首次品嚐由煎釀三寶演變出黎o既九寶飯,當時只係賣堂食$16一碟

- 做左全年網上拍賣最大一單o既交易,金額$564,兩位買家拎左個行李o急盛載購買貨品,不過呢次交易並不順暢,由於買家選左好多貨品,交易時又問長問短,兩位買家不但在地鐵站內逐款點數,又要好似繡花咁放o的貨品入行李o急,仲要大家打情罵俏,攪左接近半個鐘咁耐,途人覺得好奇,可能以為有禮物派添

- 時間唔能夠沖淡一切,針唔拮到肉唔知痛,原來朋友一直都認為本人害佢高位入貨累佢輸錢,自己最初又冇買呢隻股票,大家都覺得呢件事有責任,最後本人俾返朋友o既一半損失,當o係大家都有份參與投資

12月
- 在本人生日當天與朋友和好如初

- 到一間食物與價錢唔符合o既鈴木珈啡館慶祝生日,餐廳雖然悠閒舒適,不過有幾多令人唔滿意o既地方,侍應除左唔太願意向客人提供免費開水,仲想叫人花大約$20買支自家品牌礦泉水,另外顧客可以加$42配餐湯及飲品,不過餐湯細杯到用好似酒樓飲茶用o既茶杯裝湯,就算店外有人等位,都唔應該o係食客未食完以及未埋單前清理跌o係枱上o既食物及醬汁,就算兩個人同一張單,都要每人各自填妥顧客意見表先可以用兩張 coupon,仲要唔夠 $250 冇得簽咭,真係用左網上團購o既 coupon 減左$80 後都覺得唔抵,唔怪得多間鈴木珈啡館在 Openrice o既喊臉係多過笑臉

- 大家樂在多個嚴寒o既日子推出$1杯熱奶茶,本人先後買左3杯
- 一如以往好多年,連同家人親戚o係聖誕節返鄉下

- 本人o既下屬大肚婆當時快將放產假,原來勞工法例規定大肚婆放產假前未做滿40個星期係產假冇人工,大肚婆知道後與老闆冷戰,又話乜都唔做等公司炒佢,成間公司o既人都怕左佢,產假前最後兩日o既返工時間都係與世隔絕,一個人坐o係電腦面前上網之後再上網,佢冇上網睇戲聽歌玩遊戲,只係睇唔同報紙及財經網站,究竟坐足成日 One Day Sit 與 One Night Stand 有乜野唔同感覺呢?

- 大肚婆罷工,將佢手頭上一大堆唔知係做左抑或係未處理o既文件俾返我,不過放緊產假o既佢個位仲有幾多野,佢個位o的紙張究竟係有用o既文件抑或係廢紙呢?

- 把握時機,在當時係歷史高位o既時候賣出部份持有o既澳元
- 在團購網站的抽獎中得到瘦身茶一盒,領獎信中註明得獎者須接受影相作宣傳用途,不過領獎時保健美容產品職員見本人可能係男士關係,並未要求影相


另外,今年仲有以下四件事值得記低
- 首次惠顧多間在港開業多年o既連鎖式食肆,例如 Jollibee 及 Oliver Super Sandwiches
- 手快有手慢冇,錯過多過團購網站o既好抵優惠,包括兜巴星月餅連咖啡,吉野家火鍋,點心專門店及日式放題優惠,當本人與朋友討論後或者諗清楚要買 coupon o既時候已經賣清
- 支持環保,拎到o既免費報紙及拍賣貨品o既包裝紙皮積少成多,全年賣廢紙獲得$225.2
- 一個以前o既興趣竟然成年都冇參與:全年冇去行山

已新加四至十二月份事件,請大家多多支持!

[ 本帖最後由 bigfish_hk2 於 2011-2-9 23:03 編輯 ]

原帖由 bigfish_hk2 於 2011-1-24 12:13 發表
過去幾年,本人都有諗過自己有乜野大事值得記低,不過最後都因為唔得閒冇打出黎與大家分享

一月份已經過左三個星期
希望我唔係最後一個板友回顧過去一年
請大家多多支持!

整體黎講,2010年過得並唔如 ...

憤青？哈哈，甚麼機構都有。記得兩年前剛投身社會時，我也身受其害！
那位憤青不斷散佈謠言，令人工作處的人都怕了我！

不久，當他辭職時，我的心才好過了點。

原帖由 fatku 於 2011-1-27 08:28 發表


憤青？哈哈，甚麼機構都有。記得兩年前剛投身社會時，我也身受其害！
那位憤青不斷散佈謠言，令人工作處的人都怕了我！

不久，當他辭職時，我的心才好過了點。 ...

憤青令人難以相處o既地方係佢覺得凡事只有自己o既諗法先係正確
若果其他人唔跟佢o既做法就會好唔滿意發脾氣
至大問題係佢又唔係人地老闆或者父母
咁大家又駛乜聽佢講呢?!
簡直係鑽牛角尖,活o係自己o既世界

無奈部份同事為左方便工作,同埋令公司多o的安寧,只好勉強忍受憤青
不過大家o既融洽關係只在於工作時間
難怪放工後都冇乜同事與憤青聯絡

另外,本人已經加返呢年其餘o既事情
請大家留意樓上貼文,多多支持!