討論港鐵可加可減機制方程式的修訂

原帖由 053h4 於 2012-10-29 22:47 發表
股東有人會話自己賺得多咩
你計劃咪即係要政府進一步補貼港鐵

九巴新城都係私人機構咪又係政府批

點解係進一步補貼港鐵？

政府持有港鐵77%股份，去年港鐵車費收入135億，派息44億，其中政府分得38億。如果政府拎一半(19億)出嚟派番俾乘客，等於車費減14%。

而家大家話港鐵牟暴利，但事實係港鐵因賺錢而派嘅股息，大部份都落入政府庫房。既然要公平，就應該將股息同利潤回饋乘客，而唔係夾硬將港鐵變成一間四不像嘅共產式社會企業。無錯，股東唔會話自己賺得多，所以乘客利益要同政府(大股東)利益掛勾，股東賺得越多，乘客得益越多，先至係順其道而行。

至於另一半股息，如果你唔喜歡用嚟投資鐵路，可以選擇唔收現金以股代息。以港鐵今日市值(1,736億)計，19億股息等於1.1%股份，約20年後就可以收歸國有。

國有企業要有持續盈利，先可以為市民帶來價值。你可以用間公司所賺嘅錢還富於民，但唔係調轉頭為咗還富於民而令間公司無錢賺。當鐵路公司淪為鐵路局，往往都係虧本收場，最後咪又係要由市民埋單。

如果港鐵收益可以直接回饋乘客，駛咩理巴士公司有無生意做？你一方面擔心港鐵好生意益咗小股東，但另一方面又咁關心新鴻基新世界等呢類巴士公司股東利益，好矛盾。

越講越無厘頭，講到港鐵車費可以隨便開價，將軍澳去中環可以突然由$12.5加到$20，真係佩服！

講到尾就係輸打贏要，港鐵加價有機制，要根據通脹同行業工資水平變動(港鐵加人工高過九巴，跟行業工資先對港鐵唔著數)，通縮時唔出聲，通賬時又要改規則唔可以跟通脹，真係玩晒。調番轉我話生果金調整唔跟通脹，改跟扣除通脹後嘅實質工資增長，一年加唔夠2%，你又收唔收貨？

你話跟巴士嗰套，跟巴士有咩好？九巴經營不善，服務每下愈況，乘客離佢而去，拆開賺錢嘅Roadshow，俾載通獨佔賣樓收益，整衰盤數反而有得加價。城巴積極改善服務，重組路線，提高盈利能力，最後反而要受罰不單無得加價仲要提供優惠，呢個咪就係學你講按盈利表現去決定加價嘅惡果囉。

[ 本帖最後由 PB602 於 2012-10-30 19:11 編輯 ]

今天(2012年10月31日)的立法會又有議員對此發問了.

政府新聞稿:
立法會十題︰港鐵票價調整機制及優惠計劃