定點班次的好處/壞處

原帖由 kmb113 於 2013-5-4 03:52 發表
明顯係要控制車速控制得好好，轆車同飛車都唔得。

行市區最影響車程既似乎係燈位
大半年前搭過一次 N8X，由港澳碼頭至則魚涌竟然要用成 40 分鐘，比星期五六頭幾班 N8X 行車時間都仍然遲左 10 分鐘以上
當日係平日三點零鐘，客量唔多，總站開車時間正常，但全程經過咁多交通燈，幾乎鋪鋪都係紅燈 (只有唔夠 10 次係綠燈)，連司機都渣到哎聲嘆氣


個人搭過前中巴司機由炮台山至則魚涌可以全程唔過 30，但都一樣搭得好爽，感覺甚至比起部分流水線快
重點係每次經過大站佢一望完鏡見後面無電車黎已經二話不說抽頭攝去自己站頭
甚至北角海逸酒店對出個段路都唔例外 (隔離有欄杆分隔開電車軌同馬路)
睇位同埋計時間計得非常準確，既然交通燈順暢度無得自己控制，就更加係其他環節盡量唔徒時間，穩定車程


作為香港人，搭車預算時間似乎係常識，20 分鐘一班既路線，相信搭慣既人都識得係就時間等車，中途站送車尾既都會預料下一班車將會係 15-25 分鐘內黎到
但若果本身係豬紙寫 15-25 分鐘，假設沿途車程誤差快慢各 5 分鐘，即係下一班車將會係 10-30 分鐘內其中一個時間出現
對於少搭該線而送車尾者，效果如同趕客，除非真係搭左好多年，否則睇落去應該喪失晒大部分潛在客源 (新搬入某區上班上學或居住既乘客)
甚至對於通勤客黎講，雖然以正常出入時間可以預到部車幾時到，但某日突然需要遲一兩個鐘出入，
豬紙上可能仍然都係同一個大包圍班次，但開車時間可能已經偏向成個範圍最疏既數字，連埋中途站誤差分別就更大
似乎即使係熟客都好，一旦離開左自己固定通勤習慣時段內搭翻平日常搭個條線，係預算時間方面已經同一個生客無乜分別
除非九巴係車速/價錢/地區上係獨市，否則班客試過幾次大失預算之後，九巴就連呢堆客既生意都無埋

我覺得係九龍巿區做生意，如果有心做既話
班次一定唔會咁疏

廿分一班講既係無乜錢賺，基本客源唔多既線
不過依家九巴個款係為減而減，為定點而定點

淨係睇 2F 都知老九為減而定點
壞處多過好處...

其實就算定唔定點
站長同司機一樣可以玩野令班次混亂
之後賴落塞車度

87B咪其中一個例子囉..

我只係希望九巴推廣定點班次之餘, 都要求下面班人做靚條數
如果唔係即係白講唔做

知唔知有無定點班次既路線有收過車???

用得定點，本身班次就比較疏

對於路面情況較穩定的時段，或者路線本身唔會點塞車是可行的
但一旦路面情況轉差，等車時間便變得難以接受。

以往在非繁忙時間，用得定點班次的路線，需求都唔係太高
但近年已經出現一些需求較高的路線行定點，例如九巴14
問題係本身班次只能剛好應付需要時，一旦塞車就會好多人上唔到車

與其搞定點班次,不如發展到站預計系統好過,話知佢1-59分鐘一班...
好多人都有smartphone流動上網,
在新加坡,按個app,就知部車幾時來,
宜家香港仲停留在九十年代,要打去熱線,靠總站顯示至知部車幾時開...

原帖由 ME9661 於 2013-5-5 11:02 發表
知唔知有無定點班次既路線有收過車???

72A 有
上年11月28日大埔工業邨開2230 那班因壞車收車了
如果307 完全回唔到車, 尤其係城巴係大埔開的班次.... 應該會收車的(九巴唔可以亂開車來頂左人地班次吧~)

上年11月30日大埔開1820 因回唔到車遲開15分鐘(這班好有印象, 因為城巴司機要休息,係九記司機去替城巴司機開的)不過唔係收車

好處係當每次喺中途站追唔到車送車尾時，就大概知道下班車到站時間，例如知道要等25分鐘，就可以用呢段時間做其他野，唔駛喺巴士站吹風

以前眾安街等20分鐘時段68A
日日都唔同時間黎