一條陪我長大的巴士路線--九巴82M線

82M

雖然依條線係八十年代投入服務,
但係我係九十年代初出世,
所以未睇到依條線當年客量係幾咁勁。
到咗九十年代中後期,我仲係細路仔一個,對依條線嘅客量又幾勁我又冇咩點留意,
但依條線可以話係我由細搭到大,雖然我唔係由總站搭到另一邊總站,但係我有親戚住係沙角邨,
所以細個果陣,無論每次去沙角邨同返屋企,都係搭82M。
雖然樓下有83K,可以係麗豪酒店落車然後行過去,
但係搭82M係博康邨落車行過去對面就到,對我嚟講,會比較方便啲!

我唔係一個專業巴士迷,對客量冇咩研究,但我記得馬鐵仲未通車之前,
印象中每次係沙角邨上車,都有好多人落車,日頭對面去九龍塘方向都有唔少人排隊。
直到馬鐵通車後,就慢慢發現係沙角邨落車嘅人逐漸減少,而對面去九龍塘方向得兩三個人排隊,甚至冇人排隊。
再每次見到去九龍塘嘅車入面嘅乘客十隻手指都數得哂,都不禁搖頭輕嘆!

到讀中學階段,聽到82M要取消,要同85A合併,
一有時間或者放假去街,無論去九龍塘定返屋企,
都會抽啲時間去搭82M。
因為唔知幾時會取消......

直至睇到新聞話82M會係8月24日取消,就更加趁有時間搭多幾次,
直到8月23日,當然都唔例外,有坐最後尾班車!

我鍾意巴士都係依條線而起,因為我以前搭82M就會搭到水塘蘭,
一上車就會坐導航位,睇住車長揸車,又鍾意聽水塘蘭行車聲,坐得多,就漸漸鍾意巴士啦!

而我睇番資料,以前82M都行過唔同嘅車款,例如有珍寶,3N......等,
但係我冇以上所舉例車款嘅相,所以我以下貼嘅相都係講下我印象記憶中82M掛牌嘅車款同演變,會分開熱狗篇同冷馬篇。

(我好少影巴士,所以唔多九十年代,千禧年代同近年82M所有掛牌車車款嘅相,
有兩張係細個係總站影,其餘係外購相,
如果上述同以下資料有錯誤,懇請各板友能加以提醒及請見諒!)

熱狗篇-水塘蘭

(外購相)
我冇記錯同係我所見嘅印象中,佢同銀柱龍係82M九十年代嘅主力掛牌,
我鍾意巴士,除咗係82M,唔多唔少都因為依款車。

(外購相)

(外購相)

(外購相)
仲有以下依部,應該係82M最後一部吉蘭掛牌


後尾印象到2001-2002年依段時間唔多見水塘蘭行82M,反而係見得多吉龍行,
細個冇電腦,當時我估係水塘蘭可能退咗役(後來睇番資料,依批車果時應該係早退),才換上吉龍。
(由於冇吉龍行82M時代嘅相,請各板友見諒!)。

熱狗篇-老虎豪

到咗大約2004年時間,見到大量老虎豪行82M,果陣就知道應該又係82M換熱狗掛牌啦!


(外購相)
到咗2006年,82M熱狗掛牌得番S3V22-GK9636同S3V28-GL431,
直到2006年9月26日為82M熱狗最後一日,我最後都有坐,
但當時仲讀緊書,為咗就腳所以只係麗豪酒店上車坐返屋企,當日坐嘅車係S3V28。

而當年82M熱狗最後兩兄弟,GK9636而家得以保留,反而GL431就......

其實係我細個所見嘅82M熱狗掛牌除咗有S3BL,S3N同S3V之外,
仲記得有ES龍(東華龍)同老虎蘭都做過82M掛牌,不過印象中好似掛咗冇幾耐就離開82M掛牌啦!

另外請問各師兄知唔知82M初初開線果時用車係咩車款呢?因為我搵唔到相關資料,先謝解答!

冷馬篇-銀柱龍

睇番資料,82M係1993年9月27日加冷,係我印象中,九十年代嘅82M冷馬主力掛牌係銀柱龍,同水塘蘭好似係「工作伙伴」。
而銀柱龍亦可以係話82M嘅「老臣子」,雖然有部份銀柱龍轉掛第二條線,
但至少有一部係82M掛牌,離唔開82M嘅影子,以上依部就係82M最後一部銀柱龍掛牌-AD112-FL562。

到咗2003年左右,開始見到3+2黃柱龍行82M,就知應該又係換掛牌嘅時候啦!
唔知點解,感覺上當年82M換上3+2黃柱龍,好似有啲「大材小用」咁!
(由於冇3+2黃柱龍行82M時嘅相,請各板友見諒!)

冷馬篇-AV

(手機攝)
記得細個坐82M坐得AD多,偶然見到有AV特見,係度諗,如果有AV掛牌就好啦!
結果到咗2004年左右,冇記錯第一部82M AV掛牌就係康豪AV79-GF6351。
當時每次見到佢都行82M,我嘅「推測」應該無錯啦,見到真係好開心!
後來到2005年,再換上兩架AV同幾架2+2黃柱龍,兩部AV分別係AV243-HH4721同AV250-HH8578,
之後82M果幾部AV掛牌先後離開,係得依部從未離開82M,HH8578可以算係「老臣子」啦!

冷馬篇-AVC

(手機攝)
當我諗82M應該唔會有金巴掛牌時,估唔到82M會有四部AVC先後上牌
(AVC38-PJ8709,AVC39-PJ9701,AVC30-PH8029,AV31-PH8276),
如果九巴唔係入咗批新單層,我諗82M就算要換車,應該最多都係換ADS(除非退咗批白板)。

隨著82M 2006年9月27日全冷,換上AV38-GE2641,AV142-GX9712。

83K兩部AV掛牌(AV123-GX6858,AV187-GZ9025)同82M兩部2+2黃柱龍(AD324-HC892,AD351-HC2145)對調,
及AD112-FL562到期退役換上AV116-GW6918。

令82M多年由AD為主力掛牌逐漸變成AV為主力掛牌,得番一部AD掛牌(AD291-HB586)。

到2010-2011年先後換上四部AVC,再到後期AD291同當時85其中一部掛牌AV378-HN8007對調,
令82M掛牌一度為「全豪宴」!

直到AV38-GE2641退役,再度「回歸」一部AD(AD289-HA9916),
始終82M冷馬掛牌車嚟講,我自己覺得AD最為代表性!

直到取消前,
82M最後七部掛牌為:
AVC38-PJ8709,AVC39-PJ9701,AVC30-PH8029,AV31-PH8276,
AV250-HH8578,AV378-HN8007及AD289-HA9916。

最後送上82M尾車當日嘅情況!

當日尾班車的尾二車






真正的82M最後尾班車!







準備開出尾班車啦!

返到廣源總站







連站長都影相留為紀念!

估唔到會派部AVBWU行,真係夠驚喜之餘,為82M畫上完美嘅句號。


多謝82M為沙田區居民提供近三十年來嘅服務!!


接下來嘅「新路線」85A,希望延長上去廣源後,客量可以節節上升!
坦白講,而家見到85A係廣源出現,硬係有種「唔習慣」嘅感覺,哈哈!

以上嘅內容同資料,都係我對82M印象中所記得同搵資料所描述出嚟,
此乃為回憶文,文章嘅內容有可能錯漏百出,希望各位板友能多多包涵,
亦歡迎各位板友能指正錯誤或補充資料!
雖然依條線可能唔係較多人注意,只係一條接駁區外鐵路線,
但係對我嚟講,82M令我諗起好多細個同坐熱狗嘅回憶!

[ 本帖最後由 82M 於 2013-8-29 02:52 編輯 ]

以前82M係九龍塘四M之中最好客既,早晚都爆住走,但馬鐵通車後客量跌得最勁也是82M.

貼一張

之前去影 81M同88M Last Day 果陣冇動機去影82M , 而家想影都無得影

85A上廣源其實在90年代已經有人提議過
估唔到差唔多廿年才成事


我是80年出世, 90年代沙田第一城長大

82M, 85A的水塘蘭都是我的巴士知識啟蒙

70x同82m同一日取消，但黎留念的巴士迷數目就差天共地....

原帖由 kongisp 於 2013-8-28 11:23 發表
70x同82m同一日取消，但黎留念的巴士迷數目就差天共地....

82M取消講得太耐
一早有心理準備
搞到D人冇晒感覺

其實82M 夜晚九龍塘總站都幾多人坐架, 一部AVC 都可以坐滿

第一張相入面部DM1671更是長期掛牌，由兒時90年(或更早)掛到佢02年退，從未離開過82M

果一晚我都有去坐70X,但只係喺上水坐去觀塘(因為前一晚都有係觀塘坐返去上水),
返到翠屏就行返出去搭地鐵,去到九龍塘見到歡送嘅人數比我想像預期差唔多,
雖然人數唔多,但果日歡送氣氛都幾愉快