"老安" 登上大帽山 (長文, 多圖注意)

(麻帆良市時報記者鹿目まどか報導)
自 1960 年代起, 九巴嘅單層巴士車隊, 都係以英國嘅 "亞比安" Albion 作為主力車款,
服務客量較少或者雙層巴士唔能夠行走嘅地區, 其中九巴喺 1976 年引入嘅維京型 Viking EVK55CL,
更被九巴選中用作行走途經荃錦公路嘅車款, 跨越全港最高嘅大帽山往返大角咀碼頭至錦田同元朗嘅 51 號線
(但係隨住地鐵通車令服務不斷縮減至現時嘅荃灣西鐵路站至上村),
呢批巴士配以由 Leyland 提供嘅 0.401 引擎同 5 前速手動波箱,
並且由香港本地嘅聯合汽車公司提供車身, 及後由九巴自行重建車身。

九巴一共購入 40 部配有本地車身嘅 "亞比安" 維京型 Viking EVK55CL, (L269 - 308),
亦係九巴最後一批引入嘅 "亞比安" 巴士。除左 51 號之外, 64K 亦係亞比安巴士經常出現嘅路線之一,
以佢地不足十米嘅車身長度, 途經林錦公路往來元朗同大埔,
呢批維京巴士一直服役至九十年代初, 最後一架服役於九巴車隊嘅維京型 Viking EVK55CL 巴士,
喺 1992 年三月退役, 同時亦標誌住 "亞比安" 巴士喺九巴服務嘅光輝歲月正式結束,
L308 (車牌 BM248) 亦係其中一架最後退役嘅維京型巴士,
退役後獲得九巴保留成為九巴古典巴士之一, 喺特別嘅場合,
例如九巴傑出車長選舉, 同埋去年嘅九巴 80 週年紀念活動展出,
供市民大眾參觀。

今日, 麻帆良市正式歡迎九巴 "亞比安" 維京型 Viking EVK55CL 巴士登場!!
市長 Super Bus 話, 呢款巴士因為主要係行走新界路線,
身為九龍人嘅佢自然極少機會見到佢地, 佢話印象中都好似坐過呢款車,
不過因為佢果陣太細個, 仲係讀幼稚園嘅時候, 所以印象都好模糊啦,
但係最記得嘅, 係上小學嘅時候, 有時亞嫲會同佢入元朗行,
見到呢尐全身紅色嘅單層巴士, 經常穿梭元朗區行 64K,
佢地嘈吵嘅引擎聲, 同當年嘅勝利二型巴士不遑多讓,
全紅色嘅巴士車身, 同當時紅頂紅裙腳嘅九巴車身色,
以至當時盛極一時, 只有九巴平治獨有嘅車身色形成強烈嘅對比!
同埋有時入荃灣, 見到呢款巴士行走 51 號線,
經過大河道上天橋嘅情景, 亦令 Super Bus 對呢款巴士留下深刻嘅印象,
到左 1993 年九巴鑽禧六十年, 九巴喺維園攪左個巴士城活動,
佢同中學一個鄰班同學一入場就見到呢架已經退役並且被九巴保留嘅 L308,
佢亦不禁 "嘩" 左一聲, 興奮之餘過去對佢地嘅回憶又返哂嚟啦!
Super Bus 話, 雖然佢細個果陣有冇坐過呢款車印象都好模糊,
但係依然覺得呢款車好特別, 更難得嘅, 係呢架 L308 喺退役之後,
獲得九巴保留, 喺一尐特別場合, 例如九巴傑出車長日,
同埋去年嘅九巴 80 週年紀念活動出現,
比大家重温呢款曾經喺九巴車隊立下汗馬功勞嘅 "亞比安" 維京嘅風采!

隆重歡迎! 九巴 "亞比安" 維京型 Viking EVK55CL 巴士, L308 見參!!

今日同時收到新出嘅中巴 MCW Super Metrobus 12m 連座檯月曆一個, 兩個郵包, 雙重精采! XD
(見另文: http://www.hkitalk.net/HKiTalk2/thread-883051-1-1.html )


本文主角




證書編號 00082, 限量 200 架


正式落地! 小櫻都嚟歡迎新車到埗!




行走 51 號嘅老安, 雖然車已退, 但係路線依然存在, 只係路線已經縮短左...














同前輩 "亞比安" Albion Victor VT17 AL 相會


相比之下, 老安嘅服役年期始終唔及 VT17AL 長,
皆因佢地由 1961 年開始服役, 最後一批一直到 1987 年至宣告退役,
一共服務左 26 個年頭!


九巴嘅單層紅燈籠, 最右邊嘅 Seddon Pennine 4 型,
喺 1970 年代甫一投入服務, 就已經問題多多,
儘管九巴如何補救, 全批巴士最後亦只係服役左短短十個年頭就要講 "さよなら"


九巴 51 號線大帽山爬山好漢




真車相, 攝於 1994 年 12 月 4 日, 九巴傑出車長選舉日




車前留影



Thanks for reading~

[ 本帖最後由 VocaloidMikuBus 於 2014-12-5 23:36 編輯 ]

感謝饅頭卡的落力介紹
兩副模型都相當不錯，大開眼界
希望樓主可以繼續推介不同的新模型

OT1：饅頭卡還追緊第五集@維基台
OT2：小櫻仍在東京from好奸笑

原帖由 CardCaptor 於 2014-12-8 19:30 發表
感謝饅頭卡的落力介紹
兩副模型都相當不錯，大開眼界
希望樓主可以繼續推介不同的新模型

OT1：饅頭卡還追緊第五集@維基台
OT2：小櫻仍在東京from好奸笑 ...

你隻小櫻都係喺 GSC Online shop 訂? 照計應該十一月尾出左貨啵...?

辛苦曬小圓臉,介紹得好詳細~!!
BM248,身為90後既小弟只係見過佢幾次,近幾年見得多D(九記80周年function及科學館展覽)
80周年個次仲有幸見到BM248完場時泊位一刻,澎湃既引擎聲加上強勁加速起步,"火箭"呢個花名真係名不虛傳!!
基於幾部車都起友人度未寄付(AD1,丹拿E長龍,ATSE等等),考慮遲下先買

P.S.小櫻粘土人信和好似返左貨,師兄個隻應該就快送到府上.

[ 本帖最後由 HJ2127s 於 2014-12-9 01:56 編輯 ]

原帖由 HJ2127s 於 2014-12-9 01:55 發表
辛苦曬小圓臉,介紹得好詳細~!!
BM248,身為90後既小弟只係見過佢幾次,近幾年見得多D(九記80周年function及科學館展覽)
80周年個次仲有幸見到BM248完場時泊位一刻,澎湃既引擎聲加上強勁加速起步,"火箭"呢個花名真係名 ...

火箭係 41 型, 車身較長同車頭係有尖頂嘅 即係下 面Link 果款, 55 就唔係叫火箭, 通常叫老安,
不過有傳呢款 55 亦有車長叫佢做 "大災難", 不過我都證實唔到...

火箭我都好想入, 印象中亦見過佢行 15 號
http://www.orientalmodelbuses.co.uk/resin/chs004.htm

[ 本帖最後由 VocaloidMikuBus 於 2014-12-9 02:51 編輯 ]

原帖由 VocaloidMikuBus 於 2014-12-9 01:19 發表
你隻小櫻都係喺 GSC Online shop 訂? 照計應該十一月尾出左貨啵...?

出左貨
只是有一堆一番賞，CD，電腦零件之類未到集運貨倉而已
反正不急用，過埋聖誕先送回香港都沒問題

再OT: figma版都訂了兩隻

原帖由 HJ2127s 於 2014-12-9 01:55 發表
辛苦曬小圓臉,介紹得好詳細~!!
BM248,身為90後既小弟只係見過佢幾次,近幾年見得多D(九記80周年function及科學館展覽)
80周年個次仲有幸見到BM248完場時泊位一刻,澎湃既引擎聲加上強勁加速起步,"火箭"呢個花名真係名 ...

小弟對服役中的火箭印象不多
只記得坐64K那時
門掣好像在後座伸手都開到

回PS: 以前都有在信和“海盜船”訂貨，是不用付訂金那種
不過因為配貨，需求等等的問題而很少這樣訂貨了
講起來， 當年51衝落超市那部是哪型號？

[ 本帖最後由 CardCaptor 於 2014-12-9 18:53 編輯 ]

原帖由 CardCaptor 於 2014-12-9 18:48 發表

小弟對服役中的火箭印象不多
只記得坐64K那時
門掣好像在後座伸手都開到

回PS: 以前都有在信和“海盜船”訂貨，是不用付訂金那種
不過因為配貨，需求等等的問題而很少這樣訂貨了
講起來， 當年51衝落超市那部是哪型號？ ...

都係亞比安維京 55, 因為果陣係得呢款車行 51, 直到爬山 MCW M仔引入為止