[2015.04] 東京東北十日遊回顧

DIH 發表於 2020-5-9 16:32
估唔到我一盒麵的故事會引來咁多回響，自此之後我都係唔敢食凍食或室溫便當，寧願直情食即造刺身丼，如必 ...

係，便利店內獨立包裝既麵包全部都無伏，反而佢賣既熱食我都盡量少食。

再退後一步，去starbucks買包叫佢reheat都安全。


講返行程，其實北上、盛岡睇櫻花都好靚

第八日：角館、仙台市

前一晚搞到咁夜，好彩呢日唔使太早。


搭09:59的Komachi 65號，呢班係黃金週加班車，北上直達角館。


上到月台首先見到09:52的はやて（Hayate／疾風）111號


幾分鐘後Komachi 65號到站


車廂以黃色及木裝為主調







角館桧木內川堤理想圖片


配合列車目的地及名稱的秋田小町米意象


在東北新幹線上從左邊拍攝岩手山


轉到秋田新幹線從右邊拍攝岩手山


赤浏至田沢湖之間沿河谷前進，途經3915米長的仙岩隧道，穿過太平洋及日本海分水嶺，一出隧道就進入秋田縣。




車速同景色有歐洲的感覺




到達角館


兩代Komachi



角館小京都......去多幾次自由行之後知道凡係有幾間古宅都叫小京都......


有棵永久紅葉的紅楓




角館只剩低少量櫻花，花樹唔多就狂影近鏡。












不幸事件之五：
桧木內川堤櫻已經全部落晒



有一棵未謝就捉住佢


食埋秋田「比內地鷄」午餐就走


1921年生保內線蒸汽機車動輪。當時生保內線為大曲至角館之間，兩年後延長至生保內，於1966年開通仙岩隧道與東段的橋場線合稱田沢湖線，生保內駅改稱田沢湖駅。全線貫通後30年，用了一年時間改軌成為秋田新幹線一部分。


告別角館


秋田內陸縦貫鉄道售票處及月台



田沢湖線／秋田新幹線大曲／秋田方向


盛岡方向


鄉下地方行得慢陽光夠先影得靚仔


大約個半鐘落到仙台


探下伊達政宗



食牛舌


顯示列車停站點的屏幕，在班次繁多的仙台好有用。如果秋田新幹線條粉紅色線繞過東北新幹線站名連住盛岡就更好。





要影E5系車頭一定要有足夠距離


影片
Hayate 111號及Komachi 65號北上発車：https://youtu.be/RVpeGfePtOI
Komachi 65號盛岡発車：https://youtu.be/K_wtmPlAH7s
Komachi 24號盛岡発車：https://youtu.be/MIdU4IXYCdQ

第九日：平泉、猊鼻渓

10日行程的問題在於，you run out of ideas of where to go。第一次去東北，事前完全無概念，都係睇縣政府推介同搵賞櫻景點，所以呢日去了平泉。

IGR 701系


由北上直接搭JR East 701系到平泉



半自動門


平泉係睇佛寺的地方


毛越寺


毛越寺浄土庭園


文人雅士以前進行流觴曲水（日文稱為「曲水の宴」）的小溪


行上中尊寺途中遠攝東北本線


中尊寺


尚有少量櫻花




午餐之後搭巴士返車站




呢個位用太陽能發電幾好，好曬。


東北本線往北望


往南望


校時間搭ジパング（Zipangu／吉龐）



Zipangu係行走於東北本線盛岡與一ノ関之間的觀光列車，車內有特色設計。





Lounge可以前面展望





到達一ノ関




東北本線701系


轉乘班次超疏的大船渡線


大船渡線キハ100系


大船渡線有個花名叫Dragon Rail


猊鼻渓


泛舟




呢個係獅子鼻喎


我覺得餵魚最好玩


遊完返到出去大約係17:45，搭唔到前一班車，距離下一班尚有成個鐘，附近有間藥房就去行下嘆冷氣。


車站只係一間鐵皮屋



18:44班車來到，遇着高校放學，成車都係學生，冇位坐。


一ノ関雖然係新幹線車站及在來線交匯站，但同北上一樣係個細站，餐廳仔都冇間。時為19:18，見到19:21有班Yamabiko出仙台就即刻衝上去。


E2系


在仙台車站食晚飯


之後搭21:15班Hayabusa返北上


影片
東北本線701系，北上＞六原：https://youtu.be/KgMWI0UFxaQ
ジパング平泉号：https://youtu.be/iUG1zUjTXyA
大船渡線：https://youtu.be/UGBKHefFEeE

第十日：松島海岸、成田空港

要落東京返香港喇，但仍然攝了去松島的行程，首先搭Hayate 116號落仙台。



行李放locker


落地底搭仙石線去松島海岸


好彩係快速，普通勁多站。


205系石森章太郎彩繪車




遊船河，不過冇得餵海鷗，失色不少。遊完之後我覺得西貢好睇過佢。


最懷念燒蠔


兩個鐘之後走，彩繪車剛好行完一轉。






我地班車係普通色205系


車上仙台標誌


前面展望


塩釡港尚在清理海嘯後遺


落東京一程，9日前訂位時Hayabusa已滿，職員幫我地劃Komachi。雖然係同一班車，但內籠較窄，帶住行李及全員滿座之下都幾狼狽。




見唔見到左邊張海報已經轉款


在Komachi上食用Komachi米整的Komachi便當


用蔥同薑砌出秋田竿燈


個半鐘落到東京，見到E7。北陸新幹線在出發前一個月左右延長至金沢，並隨之推出北陸拱形Pass，但我早已買了東京來回機票，而且當時北陸新幹線一切都係未知數，所以冇去嘗新。


上越新幹線E4系


拉住行李穿過重重人潮落到橫須賀線月台


255系房総特急


E259系N’EX


行李架


頭巾


車上設有液晶屏幕提供多種資訊






The last mile


當年快運係在S區用ANA的地勤服務，2017年9月再來時已搬至出面的N區。


搭燒賣



食雞扒飯


影片
Hayate 116號盛岡発車：https://youtu.be/Sp2jsK2Q0rw
仙石線：https://youtu.be/3z4ci3Qmn-4

加送：跟團再戰

2016年4月跟團再去仙台東北，去埋嚴美溪及在盛岡市內食冷麵，行程包括由仙台搭新幹線落東京。


相隔一年，新幹線已經通到函館。


導遊訂了14:44的Yamabiko 144號指定席，但完成手續後時間尚早，於是成團人走去搭14:24的Yamabiko 48號自由席，同前一年落東京差唔多時間。



車內


買雪糕食


到東京


對面月台係E7系Hakutaka




之後原來要轉山手線去涉谷


住迪士尼酒店，間房可以望到單軌。











影片
Yamabiko 48號仙台発車：https://youtu.be/5vtyK4_Yb9M
福島到着：https://youtu.be/Gg1rvrjy2zo
福島発車：https://youtu.be/UfrGh76bsGg
山手線，有楽町＞浜松町：https://youtu.be/HiDchvFwThk
迪士尼單軌：https://youtu.be/A8dtqIs0zPs

感想

回顧2015年這次行程，有以下心得：

10日行程如果去外國還可以，但去日本10日都浸在同一個文化裡面，尤其是鄉下地方在食同景觀方面都分別唔大，個人會開始癲。加上當年搭凌晨機，自己又太大想頭塞好多行程，搞到身心俱疲未能好好享受。我之後都冇再搭凌晨機，搭日機影下野，落機食個晚飯就返酒店，個人同個腦都舒服好多。

如我之前所講，應該去完鄉下至返市區。除了考慮體力同行李重量之外，臨走一日在市區，假如機場交通有乜事都可以搭的士，萬一航班大delay亦較容易搵後路或住宿。呢次我最後一日由北上走，中途玩埋松島，見到黃金週的人潮先知驚，如果交通有問題真係會企響度。

櫻花開花時間極受天氣影響，最靚日子只有幾日，就算有心賞櫻，都要抱住隨遇而安的心態，盡量選擇除了櫻花之外有其他野睇的景點，例如天守、神社等，若遇到櫻花未開／落晒，都有其他野睇下，未至於浪費時間腳力去到得個桔。

去得多就發覺有部分景點係當地政府吹出來，未必個個適合，例如我今次去平泉，同埋後來跟團去江刺藤原之鄉，縣政府極力推介，但除非對日本古代文化好有興趣，否則一般人可能會覺得悶。

食對我好重要，當年貪平，東京同北上都係住東橫，早餐真係好yap，去到北上這種地方亦未必有太多其他選擇。自此之後book酒店一定睇埋餐廳，早餐要夠豐富，間房要大（20平方米以上），最好有溫泉或大浴場，搭車遊要極近車站，JR集團酒店就包保夠近。然而，這次之後我都冇再齋搭車遊日本，幾次都有自駕成分（我做導航），即使2017年5月去山陰都有兩段租車，齋搭車已經要數到2019年去英國，但獨行俠自由度大好多。

住宿一定要揀最快班次停靠的車站，咁就唔使花太多時間在交通，有較多班次選擇，市內配套亦好好多。東北地區好大，景點分散，假如按我的喜好，青森可以自成一組，仙台山形南岩手另為一組，盛岡用來住就好。唔自駕又想有得shopping食野的話，仙台係最多配套的大城市。

埋單計數，與其成日諗住當年幾唔順利幾咁辛苦，不如數下呢次旅程有乜野值得回味：
—ANA見學真係未必再有第二次
—箱根整個體驗都唔錯，大涌谷在該次旅程後已經上唔到，回程時畀錢搭埋特急就更好
—搭東武6050系由淺草到日光，而家已經冇呢支歌仔唱
—去東武世界廣場當日雖然好熱，但佢副火車模型幾好睇
—秋田新幹線的舒適及悠閒令我對迷你新幹線有更多興趣
—睇相發覺基本上每一日都係晴天，影風景相好靚，冇落雨真係謝天謝地
—除了肚痾一日外，其他行程大致依計劃進行，北上同角館睇唔到櫻花係事前都預計唔到，而弘前同芦野公園的櫻花都靚
—新幹線大延誤真係難中過六合彩，雖然遲返酒店好攰，但至少當日行程已經完結，只係遲了大約個半鐘返到酒店，點都好過烈日當空在停電列車裡面焗龍蝦
—當年剛用唔貴的價錢買了一部有18倍光學變焦及可拍攝高清影片的相機，此次旅行係第一次出門用。相片當然冇得頂，多得佢個變焦，我先可以將樹上櫻花放大；亦多得有呢部機，先可以拍到咁多片，動態保存當時的感受。

近年去旅行主要都係同家人去，考慮就會同兩個傻佬去搭車唔同，要安排shopping點，唔可以太趕，又唔想拎行李行遠路，多數都會自駕或跟團，主要靠鐵路出行的機會越來越細。希望疫情快點過去，可以早日「回鄉」。

［全篇完，多謝點閱］

rickywk 發表於 2020-5-9 16:20
其實我o係日本都唔太敢食佢地d凍/常溫便當，硬係形住會好易出事，寧願沖杯麵/立食拉麵都唔會食佢。

除非個 ...

台鐵果個豬8便堂我都疑似拿過野,
不過好彩輕微, 去左兩三次第二日就無事

DIH 發表於 2020-5-9 16:32
估唔到我一盒麵的故事會引來咁多回響，自此之後我都係唔敢食凍食或室溫便當，寧願直情食即造刺身丼，如必 ...

其實呢類凍食便當，甚至 salad 同 cold sandwich，去到美國同歐洲都好普遍。我都試過喺法國一個人既時候，諗唔到有咩可以食，走去連鎖超巿買便當返酒店解決就算，不過係好彩未出過事

但睇左你既不幸經歷，可能以後我都係小心D為上，如果自己本身腸胃唔好都要量力而為~

DIH 發表於 2020-5-9 22:11
感想

回顧2015年這次行程，有以下心得：

多謝分享。十日對住同一個文化可能會癲，可能因為呢個原因，歐洲比較吸引我，但食物又真係幾吸引既（利申：上次踏足日本已經係十年前東京轉機，兩次路過東京都無試過真係入境）

可惜今年去歐洲既大計應該會泡湯

我自己無試過自駕遊，過去咁多次出遠門都係依賴公共交通，包括鐵路。可以話我有偏見，但我成日都覺得，鐵路係地區文化既重要組成部分，享受坐鐵路既樂趣，無咁花精力之餘，亦見到、感受到更多不同事物，我相信會比起自駕更好玩

呢個亦係我享受坐鐵路旅行既一大原因

S3BL100 發表於 2020-5-10 02:04
多謝分享。十日對住同一個文化可能會癲，可能因為呢個原因，歐洲比較吸引我，但食物又真係幾吸引既（ ...

我自己當然都鍾意搭公共交通，但以日本為例，好多溫泉酒店或大自然景點係無公共交通，或者搭車好麻煩，若因交通問題唔去又好似略有所失。同行家人年紀漸大及鍾情爆買（食品同生果），拎住個大行李上上落落的確唔係幾方便，2018年去關西個個拎住大喼上特急都幾係野。日本火車除了少數機場特急外其他都唔luggage-friendly，大城市以外的車站亦未必有無障礙設施（2012年去北海道試過月台地面凹凸不平幾乎拉爛轆，在網走要拎行李上落樓梯，但景點之間又距離太長無辦法唔拎住行李去）。香港去日本東北無直航機，駕車上去亦太遠，如果想再去，即使自駕遊都要安排搭內陸機或新幹線，日本又有好多其他地方可以去，以致一直未能安排再去東北。最大問題在於東北其實冇乜景點係靚到非去不可。

自駕同搭車，plan行程的整個mindset都唔同，自駕可以一直前進無需回頭但要避免夜間行車（周遊式），搭車就盡量stay在一間酒店及可以晚飯後才由外地回歸（放射式），除非好似德國咁，國內交通適宜周遊，就可以採取混合策略，我2014年去14日住了6個城市，景點不多的北部我用4日就飛完。