東京諸島遊記 - 東海汽船 橘丸 東京 > 八丈島

今回 遇溺記 ，小弟會乘 東海汽船 橘丸號 由 東京(竹芝港) 前往 八丈島。

八丈島係一個太平洋中既火山島，為伊豆七島中最南既島嶼 - 由於島嶼附近既海域擁有優美既自然生態，呢個島嶼係受唔少日本既潛水愛好者愛戴，亦係唔少日本人既暑假旅遊勝地。雖然呢個島嶼其實距離東京 270 公里有多 (同東京 - 名古屋既距離相若) ，不過八丈島行政上係屬於東京都。

今日既航程係有十個半小時。就就睇下 東海汽船 橘丸 既搭乘體驗係如何啦~~

小弟既旅程喺東京竹芝碼頭開始 - 呢個碼頭除左有 東海汽船 前往東京諸島既飛翔船同一般客船班次之外，呢個碼頭亦有一星期一班前往父島既客船班次。當日既利島/新島/式根島/神津島服務因為 さるびあ丸 正進行年檢而停航，因此當晚碼頭係特別冷清，只有數十人等候 三宅島/御蔵島/八丈島 既船次。

留意電視屏幕既標記 “⬤三宅島   ☆御蔵島   ☆八丈島” - 呢個代表船隻會前往 三宅島，不過能否於 御蔵島 八丈島 靠岸則視乎當地既海面狀況。船員會於途中通過乘客廣播宣佈能否前往呢兩個島嶼，而當晚乘客登船時係有船隻有機會要中途折返既可能性。

(後記: 後來小弟同島民談話得知 由於 橘丸 曾經於海面欠佳時靠岸發生意外 自此以後船公司都對天氣預報採取一個偏向保守既態度 - 雖然小弟探訪八丈島既三日都風和日麗，不過小弟抵步後三日既船次都全部因為海面欠佳而被取消。由於 東京諸島 既各種生活必需品都係依賴 橘丸 由東京送抵，小弟喺 八丈島 既三日間都見證住 八丈島 既各商舖貨架慢慢清空... )

相信本地交通迷唔會對東海汽船呢個名字感到陌生 - 東海汽船擁有世上第二大既 Boeing 929 船隊，並為伊豆諸島提供每日往來東京既航次。值得一提既喺圖中左方既 Seven Islands Yui 結 - 呢部由川崎重工製造既飛翔船於 2020 年才投入服務，同其他同系列既 929 足足年輕二十年有多。

小弟都係呢度介紹下東海汽船既收費同購票程序 - 橘丸 係有多個等級既客艙，而票價介乎 ¥9550 (2 等和室) 到 ¥26750 (特等) 不等。小弟今日購買既係 特 2 等，票價係 ¥14330 (港幣大約 $750 左右)。

不過購票程序則相當有 “日本風味” - 東海汽船既日文網頁係可以作出留位同購票功能 (註: 登記時需提供日本地址)，唯英文版既網頁則沒有以上功能 - 嘗試購買船票時，網頁會自動轉至另一個英文網頁。呢個網頁係可以為由東京出發既來回船次留位，不過最後因為小弟並沒有日本地址，而小弟係購買單程船票既關係 (小弟回程會乘 ANA 既 八丈島 - 羽田 航線) 小弟最後都係選擇於啟航當日親自到竹芝碼頭購票...

橘丸 於 2200 開始登船。登船前乘客係要先填寫乘船券，登船時將右邊交予港口職員，而乘船券左邊部份則要於下船時交予船上職員。

橘丸 於 2230 準時啟航 - 一位水手於位於 第四層 既乘務室響鑼之制， 橘丸 靜靜地把繩纜鬆開，駛離東京竹芝港，向南駛去。船隻好快就加速到 19 海節，無聲無色地將東京既夜景拋後，向漆黑一片既東海進發。

P.S. 細心留意門上面既航線圖，閣下會發現三宅島同八丈島都有多個走線 - 船公司會因應海面情況而選擇停靠唔同既港口。一般情況下，船隻會停靠 三宅島阿古港 及 八丈島底土港，不過遇到特殊情況時 船隻亦會停靠 三宅島三池港 及 八丈島八重根港。

橘丸既客艙係位於船隻既後半部份，並散佈於五個樓層 (船隻前半部份係用左貨運用途) - 1 等 同 特等 既客艙位於最高兩層， 而 2 等既客艙則位於最底兩層。船上有少量公共設施，例如餐廳，供小朋友用既 playroom，以及淋浴設備。不過以上設備規模比較小 - 以淋浴間為例 - 喺一部可以容納八百人或以上既船隻上面，男士淋浴間只有三個，如果遇上旅遊旺季既時候就真係自求多福啦...

同其他日本既客船一樣，呢部船上面係有非常多部自動販賣機 - 雪糕 杯麵 叮飯 香菸 甚至 紀念品 都可以買到。 上述提到 供 二等和室 乘客用既毛氈 - 乘客係需要先於販賣機購買一張 貸毛巾券 (100¥)， 再同船上職員領取毛氈。

船上亦有一間餐廳，不過其營業時間則比較短 - 除左離港後一小時 以及到達八丈島前一小時 佢都係休息中既 (不過相信佢喺日間回程航班時 會比較多人光顧~~)

橘丸亦有唔少室外空間 - 乘客可以進入 第五、六層 既甲板空間，而第五層既甲板空間更有桌子供乘客使用。雖然小弟今日搭乘既係晚間班次，不過小弟已經想像到喺回東京既日間船次上，可以邊食海風，邊睇日落 成件事幾有詩意~~

不過今晚就咪攪我啦 - 入秋後，東海既海風係相當強勁 - 俾海風吹落海 同啲魚訓覺就唔係太好啦 OAO

橘丸 既二等席其實有三種，分別係 2 等，2 等優先席，以及 特 2 等。 每一位 2 等 乘客會獲分配一個和室位置，而 2 等優先席 既乘客則有一張可調較椅背既 Recliner (唔係好知佢既官方名係咩，不過佢同日本既長途巴士單人座位有八九成相似)

橘丸 上大部份座位 (嚴格黎講係席位?) 都係 2 等 - 每個和室 都可以容納 十位 2 等乘客，而 2 等和室合共可容納既乘客應該多達 600 個。不過 2 等和室既配備則非常簡單 - 每位乘客只會有一個保險箱同一個枕頭，而毛氈等設備則要另外租用，而和室係直接連住船既走廊 - 連門都無隻。

而小弟今晚就係喺呢個 特 2 等 既客艙度過 - 佢既配套就比較完善 - 除左保險箱之外，每個床位都配有插蘇頭同床頭燈，而船公司亦有另外提供枕頭同毛氈 (枕頭下一塊類似毛氈套既白色布，不過小弟就唔係好識點用啦)

私隱度方面，每張床都有自己既窗簾，不過客艙同走廊係依然無無門做分隔 - 基本上 呢個船艙係一個 152 人既大型中學宿舍 - 閣下一舉一動都會俾人聽到曬。

橘丸 於 0500 準時到達三宅島阿古港 - 船隻停定後，港口工人先將跳板連接到船上第四層既入口 再開始卸貨程序。船上的吊臂將四個 12’ 貨櫃逐一放到碼頭上，再由港口工人用鏟車運到港口內部處理。整個卸貨程序非常有效率，而所有貨櫃於幾分鐘後已經被工人運走。確認所有前往三宅島既乘客已經下船後，橘丸 於 0515 離港， 繼續往御蔵島同八丈島進發。

//藍海 請體恤我極渺小

緩緩融化在海裏 好了//

[我願靈魂漂浮於藍色的海 - iii]

橘丸 於 0600 準時到達御蔵島 - 同早前停泊既三宅島一樣，御蔵島既港口設施係非常簡單，除左遠處有一個票務處同等候室之外，碼頭只有一個跳板同兩部剷車，而照明甚至係由船上三個射燈提供。港口工人亦同樣有效率 - 把多個貨櫃卸下後， 橘丸 於 0610 已經喺東海中繼續往八丈島南行。

目送御蔵島後，小弟便回到客艙小睡兩小時。御藏島同八丈島之間既海域 比之前海域明顯多湧浪，不過幸好今趟旅程既目的地 八丈島 好快便於水平線上出現，而 橘丸 十個半小時既旅程好快就結束~~

順帶一提，船內既乘客廣播係相當頻密 - 抵達每個島嶼前十五分鐘，船內都有廣播提醒。而船上既照明系統亦有於 2330 - 0430 & 0615 - 0800 間調暗 - 不過呢個意味乘客只有六個幾鐘既睡眠時間 - 前往八丈島又想一覺到天光既朋友 就敬請自行帶備眼罩耳塞啦~~

[橘丸 & 橘丸小子]

見到部剷車真係笑左出黎 - 成件事好合理，不過偏偏剩係啲日本人先會做啲咁既野出黎~~

好快總括小弟既 橘丸 體驗，小弟會話呢個體驗係不過不失 - 雖然住宿方面真係好似回到中學的暑假，不過即使海面情況一般， 橘丸 都能夠駕馭到，而小弟都訓得唔差。

論船次時間，南行既船期係非常理想 - 可以上船訓 , 起身落船 - 而正正係因為咁 雖然 14000 円搭一程船好似唔平，不過計埋一晚酒店費用既話，條數其實係唔差既~~

最大限制因素應該係航次既穩定性 - 班次比較容易受海面情況影響，而相比之下， ANA 一日三班來往羽田機場既班次就穩定得多。正如上文提及，小弟到達八丈島後 連續三日既航次都被取消，閣下前往呢個島嶼渡假時 必須 必須 必須 有兩手準備。

(據小弟理解，島上大部份島上物資都係經 橘丸 運載，而呢條航線無疑係島嶼既生命線黎 - 係英國， 朋友之間既對話開場白大多都係評論天氣；唔知八丈島上，島民之間既對話又係咪討論 東海汽船 既船次呢? )

Thanks for reading!

小弟落船後便前往位於港口旁既民宿，並展開小弟三日兩夜既八丈島之旅。身經萬苦先黎到一個細版沖繩 究竟值唔值得呢？ 小弟租左部單車 環島一圈之後，可以好肯定咁講 - 係 值 得 既

--------------------------

有興趣既話，不妨睇埋小弟之前寫既旅行報告?

浸鹹水遇溺記 番外篇 MOL Ferry Sunflower 唔搭因航遭天譴的故事

http://www.hkitalk.net/HKiTalk2/thread-1092923-1-1.html

浸鹹水遇溺記 番外篇 The Isle of Skye - A Tale of Two Ferries

https://www.hkitalk.net/HKiTalk2/thread-2165869-1-1.html

跟下相～10月頭的時候坐咗最 top 的特一等房間，每人盛惠 24000 yen，就有獨立廁所同過夜包。






餐廳每個時段只開一個鐘，感覺佢都係預咗啲人一上船就瞓。



P.s 見你10月12日去，可以搭到佢架無人巴士

反而我好想去佢隔離青之島，不過太困難。

八丈島仲有ANA，但青之島只能靠直升機同冬季經常運休嘅輪船服務

S3BL417 發表於 2023-10-26 20:42
跟下相～10月頭的時候坐咗最 top 的特一等房間，每人盛惠 24000 yen，就有獨立廁所同過夜包。

咁岩既~~

見就見過幾次 - 不過我去既三日兩夜都係租單車 所以無搭到

13 號佢仲試緊車既時候 (佢好似 14 號先第一日載客) 部車係我個民宿出面泊左陣 - 部車外殼係堆滿曬 sensor，而部車入面目測都有十幾個工作人員試緊野~~

碼頭個兩隻929 模型係東海汽船員工自己砌出黎。

佢亦都係整過其他款，不過擺寫字樓。