九龍城區議員關注日後啟德體育園散場交通安排

kay 發表於 2024-9-23 19:14
今日睇報道話議員都去親身感受
散場D路比大球場闊
商鋪租左8成

咁就再望下商鋪開嘅時間同去程交通如何了
不過針對啟德居民夜生活唔多，呢啲到最後階段先安排到

睇返政府之前規劃人流走向，主軸係靠體育大道行出去啟德大道公園，轉左去宋皇臺站，轉右去啟德站
其次係經酒店隔離條橋過去宋王臺公園，就可以直去宋皇臺站
如果個乜乜美食港灣可以同步開放的話，應該可以吸引一批睇完騷去飲野消遣嘅人客，亦可以吸引人行過去九碼坐巴士
但要睇美食港灣過九碼條海濱長廊起成點，最壞打算封少少路做行人專區就得

要規劃散場巴士服務都相對簡單，東面有九廠，西面有九碼，泊車同調度都方便
承啟道兩邊周邊道路都可以好快上公路，例如東行過少少可以直上中九龍幹線，或出返啟祥道經偉業街上大隧
去新界各區散場車可以設置係承啟道東行
而西行經土瓜灣道、新山道可以上東九龍走廊，去九龍市區同過海散場車放係西行線上客就得

eternalflame 發表於 2024-9-24 04:44
睇返政府之前規劃人流走向，主軸係靠體育大道行出去啟德大道公園，轉左去宋皇臺站，轉右去啟德站
其次係 ...

問題係你提及嘅方法 好多都仲起緊
例如中九龍幹線四月好明顯未得
好多路都仲係地盤
P.s.圖中有堆嘢嘅設計都改咗 例如室內體育館
海邊馬頭圍道安置邨等等都係本身冇預會有嘅

kingprowm 發表於 2024-9-22 12:04
將九龍城碼頭做總站既路線 6C 11B 61X 75X 85 241X 延長去啟德體育館開出幫手清散場客 ...

派特車加班就好﹐唔好攪亂正班。


註 : 這堆路線對於乘客的吸引力﹐真係成疑。
如果吸引力係大﹐紅館就唔會由當初的4R 變成唔知幾多R啦。

kei_hk 發表於 2024-9-24 09:55
派特車加班就好﹐唔好攪亂正班。

不過大球場散場既R線都唔多政府係體育園方面似乎參考大球場經驗多

反正大球場最多4萬
啟德多佢1萬
如果4萬搞得掂
正常推論唔會多1萬就世界末日

kay 發表於 2024-9-24 10:19
不過大球場散場既R線都唔多政府係體育園方面似乎參考大球場經驗多

反正大球場最多4萬

我自己就唔擔心散場人流﹐最多只係最初未摸熟安排﹐同埋四周仲有唔少地盤﹐會有些少混亂。


你問有巴士係唔係好些?
我會講一定係好些﹐但唔一定每次活動都需要。

日間/黃昏散場﹐實在睇唔出點有巴士的必要性。
紅館都沒有此安排。

但係去到23點後散場﹐有巴士做散場特別線﹐就真係有點需要性。
一來大家都有 "歸家似箭" 的心態﹐特別係鐵路唔直達的乘客﹐早點回家休息﹐翌日要早起返工。
二來日間的交通接近尾車班次較疏﹐多了這一班散場客﹐就會影響正常使用服務的人﹐嚴重者可以上唔到尾班車。

所以﹐有散場R線都好合理。

觀乎樓上所有朋友仔講嘅情況, 個人諗嘅係, 不鼓勵入場人士揸車先係正路
任何新場開張前係應該要做壓力測試, 除咗搵人試路, 仲要搵人正式 "試場",
先可以有數據可睇點要入場同疏散人流

紅館樓上有朋友仔講咗, 四面台萬幾人每條綫最少兩架車,
但亦有情況係出現於長老騷, 對巴士需求上可能更多,
只係紅館位處於市中心, 有東西兩鐵加隧巴, 除咗做少少交通人流管理就散到, 講緊30分鐘內OK
不過亦試過有個別歌手唱遲咗 (主要係尾場), 鐵路同散場車都要局住加夜配合,
多數連開幾日嘅演唱會, 做完第一晚會調整放車策略

會展現時叫做有會展站同灣仔站, 有船亦有大型巴士站, 最極端套用書展人流管制都食得住,
派交警做車流管理都可以, 但首要會展呢處都係唔多人揸車入場

係博覽情況差少少, 不過位置偏遠, 入場上普遍啲觀眾會多預留時間,
散場其實之前多年都唔係處理得好好, 以往博覽館係唔會主動通知巴士公司幾點散場,
去到後疫情之後, 博覽館會主動通知巴士公司歌單同預計散場時間,
日韓騷同外國騷傾向準時散, 本地歌手先會勁OT encore,
呢樣放車上都好考港鐵同巴士公司經驗,
你開1號場同2號場, 對比5-11號場係完全兩回事
反而而家博覽館遇到嘅情況係散場時車流過多, 11 SKIES+五號停車場+航天城露天車場+東閘的士流一次過頂死,
講緊加埋係超過4000車流一次過走, 加上機場客運大樓本身交通,
結果係塞足25分鐘先出到公路
最終, 最近先叫城管分流啲車去國泰城出市區, 同埋先讓巴士離開先叫加快到車流
之前有一兩次係塞到X40/X43/A29行舊路出市區快過經人工島

迪士尼都做過類似情況, 大會同迪士尼都知道迪士尼綫運力最密只可一小時做到12班車,
單向人流做到7200一小時 (實際6000左右)
處理手法係 1.盡量限制私家車進場 (直接封場), 2. 協調兩間巴士公司各派50架車提供多6000個坐位
結果做到一小時鬆少少成功散到15000人流,
不過, 協調巴士公司咁多部車都有問題, 除了要限制車長幾點入場, 甚至要有大偈工程車stand-by應付巴士故障,
大會亦要安排飯盒畀車長及工作人員, 背後人力同物流上唔係咁簡單處理

返到啟德體育園, 場館鼓勵觀眾行多幾步路係有原因:

1. 分散人流, 多10-15分鐘步行時間, 已經可以讓公共交通準備到
2. 指示方面, 有關方面要預點樣清晰去指出點樣限制人潮分別去宋皇臺及啟德站
3. 冇辦法都要講, 鐵路係散場最有效嘅骨幹, 近近地睇下人地高雄搞演唱會, 一散場都要即時加到3分鐘一班捷運,
屯馬綫要加到peak headway 2.7分鐘一班配合走唔甩
4. 九龍城碼頭將會成為巴士公司日後提供散場車嘅要點, 不過, 不一定係加新綫,
既有路綫stand-by 加班已額外幫到千幾兩千人
5. 巴士公司額外要塞應該要放喺富豪東方酒店車站, 安排定中載車疏導人流, 呢處相信都幫到過萬人流,而且此站嘅巴士服務已經夠cover 大部份主要區域
6. 要使巴士加車, 可能係幫手做shuttle 去分流人潮至觀塘綫一帶, 所以唔好太FF要新散場車
7. 最重要係, 唔該限制公眾人士揸車, 850個車位都可以足以搞到塞, 除非有定綫指明車流即上公路離開
8. 另外警方要配合喺不同行人過路處維持秩序, 確保人流安全同交通暢順

kei_hk 發表於 2024-9-24 10:39
我自己就唔擔心散場人流﹐最多只係最初未摸熟安排﹐同埋四周仲有唔少地盤﹐會有些少混亂。

同意
周末日間活動唔太擔心
一來活動無咁易坐滿（美斯嚟多次都未必得😂）
二來進場離場時間都打得散啲
日間常規交通班次都好啲，就真係多幾萬人唔多

係夜晚大型音樂會就真係會好集中散場
有叫座力嘅音樂會唔難坐滿，舉例就算陳醫生之前開十幾場場紅館都照搶手，連開幾晚5萬人場無咩難度，如果做到啲國際殿堂級演唱會就更加
夜深散場基本上一次過走
但又同時要照顧附近居民歸家需要，車站同列車都要留番啲capacity俾附近居民

kei_hk 發表於 2024-9-24 09:55
派特車加班就好﹐唔好攪亂正班。

紅館就算8、90年代，靠紅磡火車站+佐敦站+大量常規巴士，已經足夠應付萬幾人
本身交通容量並無問題，但以前返大西北就有啲麻煩，260X同西鐵都係後期嘅事，直達大西北嘅散場車應運而生

但之後開埋西鐵+屯馬，散場車反而愈開愈多，前文粗略推算應該佔20%觀眾左右，特快散場返屋企嘅吸引力唔係少

HV7025 發表於 2024-9-24 20:52
紅館就算8、90年代，靠紅磡火車站+佐敦站+大量常規巴士，已經足夠應付萬幾人
本身交通容量並無問題，但以 ...

紅館演唱會晚間散場﹐你話以前無問題又得﹐有問題又得。

只要想清楚﹐最初點解會有 4R 出現(首4條散場線﹐之後越開越多)﹐就會明白為何這樣講。


就係大家都想快點回家﹐於是有村巴睇準這個市場﹐針對一些鐵路不能直達 or 一般巴士服務行車時間長 的地區﹐開一些直達路線。

而這堆村巴因為需求大﹐數量越來越多﹐在等散場的時間及上客位置﹐都影響交通﹐令到政府不得不處理問題。
結果就先開 4R做試驗﹐發現市民真係有此需求﹐於是慢慢再開更多路線。


套用去啟德晚間散場﹐其實都係一樣。
當個個都想快點回家﹐個個都會搵一些最快的路線。
鐵路雖然係快﹐處理人流能力係高﹐但都有一批人唔係鐵路受惠者﹐開一些直達的散場路線﹐輔助鐵路處理人流﹐真係多贏做法。


日間散場﹐巴士就沒有太大需要。
同樣地﹐紅館日間散場都沒有巴士的。
甚至連鐵路及隧巴﹐都沒有特別安排加班。