浸鹹水遇溺記 番外篇 JX232 星宇首航記

千呼萬喚之下，星宇航空 於 五月二十七日宣佈將會於 七月十六日開始開辦 臺北-香港 既航線。見到咁多位網友對其服務誇獎 (以及小弟有朋友不斷慫恿)，小弟就決定首航當日乘 JX 既 香港-臺北 服務，順便黎一個臺北一日遊。

-- Flight Info --

JX232 HKG-TPE B-58303
Airbus A330-900 (A339)
STD 1055 ATD 1214
STA 1220 ATA 1345

-- JX232 --

今日航班由登記櫃檯開始已經有滿滿既 Snoopy 色彩 - 由登記證同手提行李既 Bag Tag 全部都有呢隻卡通 Beagle 既影子。進入禁區後，小弟同朋友先到 Qantas 既貴賓室稍作休息，再前往登機閘口觀看 B-58303 來港既儀式。

雖然小弟正嘗試減少社交媒體既用量，不過今日小弟就俾自己破介一次，有閒就上下 Facebook 一同趁下熱鬧~~ 正如小弟所料，今日 JX231/232 既關注度係非常高 - 除左 fb 上各個群組上有 minute-by-minute 既動態更新，JX231 更係 flightradar 上面 Most Tracked 既航班。適逢小弟有一位朋友正乘搭 JX231 回港，小弟都經過 Whatsapp 收到即時動態 ~~

B-58303 於 0935 抵達香港 - 獲得機場安排水柱迎接後，停泊於 Skybridge 旁既 24 號閘口。登機閘口係相當熱鬧 - 除左今日航班既座上客之外，航班亦吸引到唔少其他乘客及機場職員既目光。JX232 於抵達後一小時開始登機 - 每位乘客分別獲得一個 Starlux x Snoopy 既袋子後，小弟就踏上呢部 A330neo，展開呢個星宇航空首航體驗。

如果要用兩個字形容小弟對呢部 A330neo 既第一印象 - 小弟會用 “時尚” 二字 - 機艙配色係以咖啡色同灰色為主，而經濟艙座椅則同國泰 777 機隊一樣 都係使用 RECARO 既產品。每張座椅背後都有一塊 13” 既螢幕，而每塊螢幕都有 Snoopy 歡迎各個乘客前往臺北。唯受機窗大小所限 (A330neo 機身設計沿用 A330 既設計)，機艙內既自然採光同空間感係比較少。為增加商務艙內既空間感，星宇航空選擇把中間既 overhead bin locker 移除 - 唯由於商務艙既座椅設計比較貼近窗口，自然採光受阻，因而商務艙內係稍微昏暗既。

正當所有乘客終於安頓好 機門關閉之際，一場暴雨隨即來襲機場島，而機長隨即通過廣播通知各乘客航班會遭到延誤。即使雨帶離去，基於今日將會經過既航道會受到流量管制，航班會順延一小時才起飛。

既然航班仲有一小時先起飛，小弟就先研究下星宇既機上娛樂系統 - 硬件上，呢個系統係有驚喜既 - 除左配上一個 13” 既高清螢幕，同時呢個螢幕下方係有一個實體既開關按鈕既。軟件上，JX 則用上 Panasonic 既 IFE 系統 - 除左有電影，音樂，航班地圖等基本功能之外，佢亦將今日航班既 Menu 以及當季既免稅商品清單用一個 PDF 既模式於系統內展出。無疑系統係有少量 Bug 以及 UI/UX 上比較奇怪既位置，不過對一般乘客而言 (i.e. 只要閣下唔係一個寫緊文字飛行報告，湊緊字數既鹹魚) 相信所有不足都會由一個 13” 既 4K 螢幕禰補。

雨帶飄過後，飛機隨即滑行到 07R 排隊起飛 - 十多分鐘後，星宇航空既 A330neo B-58303 係兩台 Trent 7000 引擎既推動下，於 1215 優雅地升空，向臺灣進發。

進入巡航高度後，機組人員隨即展開今日既 Meal Service - 經濟艙既午餐選項只有 紅燒牛肉球飯 一個，而托盤上亦有紙包果汁，鮮菓同烤米餅。呢份午餐具臺灣特色之餘，賣相同味道都同樣吸引 - 相信唔少乘客同小弟一樣，係呢個 90 分鐘既航班上對呢份午餐讚不絕口~~

結束午餐服務後，機組人員隨即展開免稅品既銷售 - Starlux x Snoopy 既商品係相當吸引 (相信特意選乘星宇首航前往台北既乘客 更會被吸引到啦~~)，而當日機組人員基本上係做到停唔到手既 - 小弟既 order 更因為 貨品已沽清 及 機組人員要為降落臺北而作準備 而被拒絕 - 咁別無它選之下，小弟只好等待回程既時候再次嘗試購買啦。

另外，機上亦有提供免費既無線上網服務 - 採用 SITA OnAir Solution，所有乘客皆可以免費使用呢個服務作文字通訊，唯希望傳送相片或需要更大數據流量既乘客則要另外付費。 一個比較特別既地方就係星宇航空係於 Wi-Fi Landing Page 中寫上正使用該服務既裝置數目 - 小弟係極之欣賞呢一個細節位 - 當機上上網科技係未能為 200+ 位乘客同時提供一個中高速既，呢個顯示係可以作有效既期望管理 (expectation management) - 與其讓顧客感到 “喂 點解個網頁 load 得咁慢”，不如讓顧客明白佢同另外一百人係一齊排緊隊~~

飛機好快就到達臺灣上空，而機組人員亦開始為降落而準備 - 分別播放有關預防非洲豬瘟同臺灣海關既短片後，飛機於 1350 降落臺北桃園國際機場。分別通過檢疫，入境同海關三個關卡後，小弟乘桃園捷運前往臺北車站，展開小弟既臺北一日遊。

小弟朋友既旅程則比較特別，佢今日既目的地為名古屋 - 雖然其 HKGTPE 同 TPENGO 機票係分開購買，香港嘅地勤亦有為其安排 Through Check 晒兩程，到達臺北後 亦無須重新處理行李寄艙。

星宇亦因為 JX232 延誤而為他作特別安排 - 降落後，地勤人員已於登機橋前迎接需要轉機嘅乘客。首航航班上分別有轉機前往名古屋, 東京及曼谷 嘅旅客 - 地勤人員隨即護送旅客抵達轉機安檢處前往出境層 - 雖然當日前往名古屋既 JX838 航班使用較遠既 B1R 遙距閘口，小弟朋友最終都能順利登上航班。

-- Reflections --

今次首航係一個非常好玩既體驗 - 相信機上過半既乘客都係為此而來，而係機上度過既三小時係相當歡樂既。

受疫情影響，星宇航空係一間由創立至今一直都在逆水行舟中既航空公司 - JX 於創立首兩年都被小弟朋友戲稱為世界上第一間網上擁躉多過實際乘客既航空公司 - 不過當世界正踏上復常步伐之際，星宇亦終於可以踏上其發展步伐。佢既基石係相當穩陣 - 除左有一個明確既品牌形象同雄厚既財力之外，佢亦能夠聘請唔少資深既航空界人員，為呢間新晉既航空公司效力。

首先講下星宇航空對小弟留下最深刻印象既地方 - 期望管理。正如上文提到，航空公司能夠預計乘客會遇到既 Pain Point，並預先管理乘客既期望 - 提供免費 Inflight Wi-Fi 既同時預先避免乘客對網速既期望太大；遇上延誤時，透過清晰既乘客廣播給予乘客一個耐心等候既理由 - 雖然星宇航空只係一間經營左四年既公司，不過呢度就格外顯出航空公司既成熟程度。

不過 JX 亦有唔少可以完善既地方 - 首先講下 IFE 系統內既 “兒童世界” - 由於佢既位置同正常內容係放於同一位置，一般乘客真係好容易就會按左入去 (相信唔少乘客同小弟一樣 都唸左好耐點解個航班地圖入面會有咁多種動物走黎走去)。其次就講下 IFE 內既餐牌同免稅品列表 - 所謂餐牌其實就係一個 PDF 檔案放進 IFE 系統而已 - 當然，小弟本人就實行一個 If it works, it ain't stupid 既宗旨既，不過長遠上，相信會有其他更好既辦法顯示呢類資訊。最後，其 Safety Video 亦係有需要完善既地方 - 由於影片內並沒有提醒乘客於逃生時，離開機艙時才將救生衣充氣，機組人員係要於影片播放完畢時人手加插上述提醒。  

當然，小弟的確正於雞蛋入面挑骨頭，不過正如上文提到，星宇係一間已經經營左四年既航空公司 - 如果 Starlux 真係有心打造一個完美既乘客體驗，希望前文提到 PaxEx 既不足會盡快被改善啦~~ 亦係呢個原因，雖然小弟對 JX 既硬件會俾滿分，其軟件最多都係拎到 85 分而已。

整體來說，小弟相信星宇航空將會於 香港-臺北 航線上帶來唔少競爭 - 係顧客或會比較在意 航班膳食質素 同 機艙整潔 既短途航班上，JX 係絕對有其優勝之處 - 飛機餐無論係相機食先定係真係食落去都同樣吸引，而小弟當日搭上既 B-58303 係非常年輕同整潔。係顧客會比較在意 座位舒適度 同 機上娛樂 既長途航班上， JX 亦會有一定優勢 - 雖然其 IFE Content Library 或比不上其他航空公司，不過其舒適既座椅配上 A350/A330neo 既環境相信會滿足到唔少消費者既~~

呢個亦代表星宇航空係具備條件打入 香港-北美 市場 - 雖然航空公司現時因為機隊尚小，遇到事故時未必能夠靈活調配機隊，不過隨著之前訂落既 Airbus 陸續送抵，相信呢個情況將會得以改善。小弟朋友亦提到 - 由於目前 JX 在桃園機場以目的地分航廈區 (i.e. 東北亞以及港澳線使用 T1，而北美航線則使用 T2) ，需要跨航廈轉機既乘客或需預留更多轉機時間。 不過，臺北桃園機場亦算係一個有多年處理轉機乘客經驗既機場 - 雖然候機空間同機場設計依然有待改善，不過希望 TPE 擴展後可以於駕馭既問題啦~~

小弟既臺北一日遊好快就告一段落 - 踏上 CX479 回港之際，就睇下星宇未來可以點樣係 香港-臺北 同埋 香港-北美 兩個市場分一杯羹啦~~




今日地勤係非常有效率 - 小弟早上八時到達機場，而五分鐘後已經辦妥登記手續~~


It’s the small things that count - 一個簡單既 Seat Map 已經可以為旅客 (尤其係第一次乘搭呢間航空公司既乘客) 提供簡潔易明既資訊。


今日航班由登記櫃檯開始已經有滿滿既 Snoopy 色彩 - 由登記證同手提行李既 Bag Tag 全部都有呢隻 Beagle 既影子。


進入禁區後，小弟同朋友先到 Qantas 既貴賓室稍作休息，再前往登機閘口觀看 B-58303 來港既儀式。


相信大家都係各大媒體同討論區見過呢張相啦 - B-58303 以 JX231 身份降落香港後停泊於位於 SkyBridge 下既 24 號閘口





登機時 每位乘客皆獲得一個 Starlux x Snoopy 既袋子 - 等間再睇下呢個 goodie bag 有咩餡料啦~~


First Impressions - 時尚 整潔 - 機艙配色幾特別，就算污糟左都唔會太明顯


Second Impressions - 個螢幕真係好大 - 13” mon 真係唔講得笑 真係好大~~


既然航班仲有成粒鐘先起飛，小弟就先睇下先前提到既  Goodie Bag 究竟有咩野啦~~ 右下方既 SAWAA 係一個 Amenities Kit，而右上方既 TAIWAN 盒子則有兩瓶香氛。


每個座位背後都有相當豐富既閱讀材料 - 航空雜誌同 Inflight Shopping Catalogue 係分開上既~~


星宇航空既 IFE 內容尚算 OK - 其 Content Library 當然無 CX 般豐富，不過 IFE 內既電影都幾 up-to-date


//誰都可發光只要找對地方
誰人都可發光若我熱情依然未降//
陳蕾 凡星


經濟艙既午餐選項只有 紅燒牛肉球飯 一個 - 呢份午餐具臺灣特色之餘，賣相同味道都同樣吸引 - 相信唔少乘客同小弟一樣，係呢個 90 分鐘既航班上對呢份午餐讚不絕口


雖然小弟對 JX 既 IFE UI 設計係抱有不解 - 不過正如小弟係主文提到 - 一個 13” 既螢幕係解決到好多問題既~~


Starlux x Snoopy 既商品係相當吸引，而相信特意選乘星宇首航前往台北既乘客 更會被佢吸引到啦~~ 當日機組人員基本上係做到停唔到手 真係生意好呀              


預防非洲豬瘟 你我有責~~


見到 長榮 中華 近年相繼推出同其他品牌合作既彩繪機 - 唔知星宇幾時會迎來第一部 Snoopy 既彩繪機呢？


桃園機場當日相當繁忙 - 降落後 小弟花左接近一小時才完成所有檢疫、入境、海關程序~~


And this wraps up my Trip Report! 下回 遇溺記 小弟會由 Heraklion 乘一班旅行社包機航班前往奧地利北部城市 Linz - 敬請各位期待~~

-- Housekeeping --

小弟開咗個 IG 專頁啊~~ Follow along my adventures at @bombe_de_terre

如果閣下鐘意小弟既飛行報告既話, 不妨睇埋之前寫落既其他旅行報告~~

浸鹹水遇溺記 (All Reports)

• Linktree
  

冬日拜訪漢城記

• Cathay Pacific CX416 HKG-ICN Business Class
  

一個唔搭因航遭天譴的故事

• Hong Kong Airlines HX690 Hong Kong - Sapporo
  

星宇航空係一家我會好想試下嘅航空公司，近期開咗 HKG - TPE 方便好多，價格比起同航線其他傳統航空公司，亦無話貴過人；但星宇啟航時嘅兩個 signature: 胡同燒肉、星宇特調（雖然唔知去到 2024 會唔會已經過氣 ?），香港線經濟艙都無供應，享受唔到全套服務，應該會略為可惜

商務艙採光問題，睇落係包箱式座位設計嘅通病，私隱度的確一流，但當窗口位乘客升起擋版，機艙入面會無咗自然光，空間感亦大大減少；反而第一代（無獨立門）反魚骨 / 交錯式 座位，感覺比較開揚
（利申：我無搭過任何航空公司商務艙，只係睇相片嘅觀察）

用 PDF 顯示餐飲選擇、免稅品目錄，我又唔覺得係咩大問題，傳統上呢兩樣都係印刷品，然後派紙本 copy 比乘客，亦有部份航空公司會定期將航線餐牌、免稅品雜誌載於網站公開，PDF 都係一個常見呈現方式；不過如果個 PDF load 得好慢，揭頁時好 lag ，的確係幾影響觀感

難明JX IFE mon做乜要用令面mon，特別係窗口位，反光睇到眼都攰，就算唔係窗口，坐中間一樣會俾照明燈搞到反光

Waiyin12 發表於 2024-10-5 09:50
星宇航空係一家我會好想試下嘅航空公司，近期開咗 HKG - TPE 方便好多，價格比起同航線其他傳統航空公司， ...

之前短途Y都有星宇特調但個個都要就做死班crew 先限商務有