Flight Report EK 382 DXB - HKG 23 Jan 2025

上回講到小弟乘座阿聯酋航空EK016由倫敦前往杜拜，喺杜拜國際機場停留咗大概三個鐘頭之後，小弟就乘搭阿聯酋航空EK382繼續前往香港。
航班編號：EK382
飛行日期：23-01-2025
座位：30H
機型: B777-300ER
註冊號: A6-EPD
飛行時間：7小時1分鐘
ETD: 03:30, ATD: 04:16 (GMT +4)
ETA: 14:45, ATA: 15:17 (GMT+8)

小弟Layover 時間比較長，所以都走咗入去PP Lounge坐一陣。臨近農曆新年，貴賓室都換上新年裝飾。





貴賓室入邊嘅嘢食主要係中東菜，但係都有啲西式食品，留意到佢嘅蛋糕都比較多選擇。 另外枱上亦都貼咗個QR Code 比客人睇Menu落單，不過餐單上面嘅嘢要另外收費。


酒水方面貴賓室入邊設置咗幾部咖啡機同埋汽水機，另外亦都有個酒吧，不過酒類飲品亦都要課金。


除咗上圖嘅休閑區之外，貴賓室亦設置浴室，吸煙室，同埋幾個比客人瞓覺嘅包廂。
大概坐咗個半鐘頭之後，小弟就開始行去登機閘口。上一班EK016係泊係T3 A大堂，而EK382就由 T3 C大堂出發。

(地圖來源: https://www.dubizzle.com/blog/cars/dubai-airport-car-parking/)
A大堂同B大堂中間有無人駕駛列車連接，而B大堂同C大堂就互相打通。 但係三個大堂加埋嘅面積係非常之大，小弟由A大堂坐無人駕駛列車去B大堂，再行去C大堂用咗大約30分鐘。





今次EK382就係C6閘口，出面就係今次載小弟返香港嘅777-300ER (F:8, C:42, Y:310) 佢喺2015年交付到阿聯酋航空。今次呢一班機幾乎全院滿座。 順帶一提，小弟訂機票嘅時候呢班機本身係用A380， 但係出發前兩三個月左右EK 決定改用77W。


小弟今次嘅座位30H。Seat Pitch 32吋，闊度就得17吋 (3-4-3 配置)。座位提供一個13.3吋Panasonic Ex3 1080P 電視螢幕，以及2個USB插頭。位上亦都放低咗枕頭，毛氈同耳機。 相比起上一程嘅A380 ，呢部機嘅IFE新好多，畫面靚啲同埋個系統順暢啲。值得一題呢個系統支援藍牙耳機連接同埋提供電視直播。
航班本身係03:30啟航，但係去到凌晨04:17先至push back

起飛冇幾耐本身有提供一餐小食，但係小弟太攰，所以skip咗直接瞓覺。

同樣地呢架機配備左星空機頂。

降落前兩個鐘頭，空中服務員就開始派早餐。小弟就選擇咗日式大蝦炒麵。 碗麵都煮得幾煙韌，同埋都落咗幾多蝦。

最後航班就係15:17 降落香港國際機場，比原定時間遲咗32分鐘。

雖然呢一班機好爆，同埋用咗3-4-3 layout，不過張凳夠舒服，同埋電視機夠大夠新淨。小弟都好享受今次旅程。若果將來有機會去旅行，阿聯酋航空都會係小弟嘅考慮之列。

我幾欣賞中文餐牌係用香港用語：「三文治」、「芝士」同「朱古力」只有香港人係咁叫。通常外地公司出繁體中文會係台灣式，或者簡體轉繁體，認真睇會見到破綻，佢肯專登做香港版算有心思。當然，咁大間公司識得分cultural nuances其實係應該。

DIH 發表於 2025-2-17 12:56
我幾欣賞中文餐牌係用香港用語：「三文治」、「芝士」同「朱古力」只有香港人係咁叫。通常外地公司出繁體中 ...

EK之前有喺中環搞活動，佢都算幾重視香港市場
當然in-town check-in就仲未有咩進展🤣SQ都準備開始做番🤣呢到要努力爭取下

DIH 發表於 2025-2-17 12:56
我幾欣賞中文餐牌係用香港用語：「三文治」、「芝士」同「朱古力」只有香港人係咁叫。通常外地公司出繁體中 ...

EK不止有中文餐牌，連safety video有廣東話版

除EK外，仲有哪間外藉航空公司有廣東話safety video?

Ricky403 發表於 2025-2-22 20:42
EK之前有喺中環搞活動，佢都算幾重視香港市場
當然in-town check-in就仲未有咩進展🤣SQ都準備開始做番🤣 ...

EK 連自助 check in 都未有，in town check in 等吓先啦

Ricky403 發表於 2025-2-22 20:42
EK之前有喺中環搞活動，佢都算幾重視香港市場
當然in-town check-in就仲未有咩進展🤣SQ都準備開始做番🤣 ...

機場icuss都未用到

更加唔講咩in-town check in問題