[US] 城際電鐵三步曲之 尋找「子彈火車」的故鄉

喺上一編「城際電鐵三部曲」入面，小弟希望幫到各位版友揭開咗北美城際電鐵(Interurban)嘅神秘面紗，順便介紹埋一個保留咗20世紀初期原貌、使用百年古董電頭嘅Iowa Traction Railway。當中提及到，城際電鐵由全北美有全長15000英里、極爲發達嘅黃金時代踏入衰退期，其實只係相差二三十年。不過，急速發展途中，北美嘅城際電鐵有無數嘅技術突破，唔少對現時全世界嘅鐵路都有深厚嘅影響。其中，最大影響力嘅突破，就係位於「高速化」呢個領域入面。今次嘅旅行紀錄，就爲大家介紹兩個比較容易到訪、名稱上雖然叫做 "High Speed Line"、但係實際上可能同大家嘅期望有少少出入嘅鐵路綫。
===========================================================================
城際電鐵嘅原理好簡單。將兩個相近嘅城鎮嘅路面電車系統，用距離長少少嘅電氣化路軌，途經鄉郊地帶連接起嚟，就成爲第一代嘅城際電鐵。隨住電鐵嘅路綫網急速噉發展，電鐵嘅列車途中可能會經過兩三個城鎮先會抵達目的地。喺新英格蘭(紐約州以東嘅五個州份)南部，呢個發展歷史比較長、人口比較稠密嘅地域，最早期嘅城際電鐵網絡，密密麻麻噉遍布喺各個小城鎮，使用小型嘅電車行駛頻密但係較慢嘅服務。小弟喺2024年去過康州紐希芬市(New Haven，Connecticut)海岸電車博物館(Shore Line Trolley Museum)嘅running day，拍下咗呢兩部屬於Connecticut Company嘅小型城際電車。

最早期嘅城際電車，每次進入城鎮都會進入車速比較慢、可能會遇上擠塞嘅路面拼用路段。要減少行車時間嘅話，最容易嘅方法就係改行「專用軌道」。當中，服務新英格蘭最大嘅城市波士頓同埋佢嘅近郊嘅市内/城際電車公司、波士頓架空鐵路 (Boston Elevated Railway，BERy) 1897年興建咗全北美洲第一個地鐵系統 (通車日期比紐約地鐵最先嘅一段早咗足足七年)。地底同高架嘅路段作爲市内電車同近郊電車嘅骨幹，現時爲仍然用輕鐵電車服務、直通路面區間嘅波士頓地鐵綠綫。圖中帶頭嘅 "Type 7"，1986-1997年間由近畿車輛製造。

BERy同時間吸納咗唔少付近嘅非電化重鐵，重建成城際電車網絡嘅一部分。其中，有一段屬於大手鐵路、New York, New Haven and Hartford Railroad (New Haven)位於市郊、連接Ashmont同Mattapan嘅Dorchester and Milton Branch Railroad支綫，喺1927年就被BERy收購，用電鐵形式納入路綫網絡。呢條短短2.54英里(4.09km)嘅鐵路以"Ashmont-Mattapan High Speed Line"嘅身份服務至今，現時已經歸於麻薩諸塞灣交通局(MBTA)嘅波士頓地鐵網絡，喺地圖上面甚至係當做「紅綫」地鐵嘅一部分。

（注: 呢條路綫小弟分別喺2020年3月6日、2022年8月17日訪問過兩次，呢編介紹會使用分別喺兩次訪問嘅時候拍照嘅相片)
Ashmont站係波士頓地鐵紅綫其中一條支綫嘅總站，所有乘客需要落車。小弟搭嗰班嘅用車係現時全美國(紐約地鐵R32型退役之後)最舊、將會畀CRRC制嘅車輛短期内完全取代嘅1500/1600系(Pullman-Standard 1969-1970年製造)，喺月台尾睇到佢喺掉頭綫駛返去對面。


今次介紹嘅鐵路，就係使用重鐵掉頭側綫上面嘅高架迴圈。
上到去上層嘅月台，就啱啱好有列車到站。

冇錯，Ashmont-Mattapan High Speed Line嘅用車，就係呢款Pullman-Standard於1945-46年間爲BERy製造、曾服務喺綠綫地鐵嘅「戰時」PCC路面電車。PCC (Presidents' Conference Committee) 電車係製造壽命長達43年嘅經典設計，1935-1978年間由Pullman-Standard、St Louis Car Company以至世界各地嘅授權生產商製造。全世界都有佢嘅蹤影，去過三藩市、布魯賽耳、布拉格、甚至大阪都會有機會接觸呢款電車或者佢嘅愆生車種。當年呢個流線型設計非常劃時代，使用類似巴士嘅腳踏式速度控制、單人操作、牽引系統更加係比較靜嘅架懸式驅動。使用類似巴士嘅操作方式、當年非常新穎嘅外表、全球統一嘅設計嘅呢款車，都係出自各個電車公司嘅總裁聯合起嚟抗衡巴士同私家車嘅競爭而設計嘅成果。喺美國，除咗唔同嘅保存電車同埋博物館可以搵到佢之外，喺三藩市、費城同埋波士頓呢度都可以見到呢啲上70-80年車齢嘅PCC日常服務。呢批車全部增設冷氣，而2022年再訪當時，3265號啱啱翻新完畢，塗上咗比較鮮艷嘅塗裝，車頭燈換咗LED。



呢批老舊嘅電車，最高速度只係36mph (58km/h)，點睇都算唔上「高速」。不過，因爲以前係重鐵路綫嘅元故，Mattapan Line全綫都係使用專用軌道，冇路面拼用嘅區間，唔使承受擠塞嘅風險，20世紀初嘅標準嚟講，呢個已經係"high speed"喇。的而且確，呢條路綫運行速度都比較快，雖然沿途都係住宅區，設站都比較多，不過電車都因爲全程有優先權，好多機會全速行駛。
Mattapan Line全綫複綫，設有6個中途站，沿途所有車站都需要按鐘下車，車站全部爲低月台設計，有平交道，而因爲PCC係單頭電車，兩邊總站都有迴圈供掉頭。全部都係典型嘅近郊電車綫設計。路綫沿Neponset River行駛，通過好多公園同埋閑靜嘅住宅區，大城市近郊嚟講沿途風景都幾寫意。



沿途最獨特之處，就係會通過Cedar Grove墳場，客運列車喺墳場入面行駛呢個場景，全美國只此一處。

短短10分鐘嘅車程，話咁快就完，Mattapan站設車廠同埋迴圈。

Mattapan Line使用PCC嘅時代，可惜時日無多。MBTA計劃喺呢幾年内將PCC換成而家喺綠綫上面運行嘅CAF Type 9電車，同時間將會象徴Mattapan Line全低地臺化。要嚟波士頓乘搭呢款80年古董就要把握時機。
===========================================================================
介紹完波士頓嘅"High Speed Line"之後，係時候轉移陣地，嚟到東岸另一個歷史古城，賓夕法尼亞州費城。
喺市中心可以登上Market-Frankford Line地鐵，到達西面、位於費城市區最西端(其實已經屬於鄰近嘅Upper Darby市)嘅終點站，69th Street Transit Center。Market-Frankford Line嘅獨特之處，莫過於市中心地下段嘅四綫軌道。去過紐約嘅朋友就應該好清楚，紐約地鐵嘅四綫區間入面，外側嘅線路就係各停列車用嘅慢綫，内側係快速列車用嘅快綫，快綫只有部分車站設月台。而喺Market-Frankford Line上面，所有重鐵列車都會使用内側嘅快綫，慢綫嘅用車竟然係...

呢一款，川崎車輛1980-81年制嘅「市内版」LRV，用作直通市内路面電車嘅路綫(Subway-Surface Line)。
講返Market-Frankford Line，全綫嘅用車係呢款Adtranz於1997-99年製造、已經顯得非常殘舊(幾年内將會完全退役)嘅列車，獨特之處就係佢嘅半駕駛室，前排座位可以飽覽前面嘅景色。


69th Street 站外面，有兩條電車路綫停靠，分別係去Media嘅101號同埋去Sharon Hill嘅102號。呢兩條路綫同其它費城市内嘅交通工具一樣，都係棣屬東南賓夕法尼亞交通局(SEPTA)。大部份區間都係專用軌道，行駛速度都係比較高速(達62mph/100kmph)，用車係啱啱介紹嘅川崎制LRV嘅雙頭、集電弓集電「近郊版」。呢兩條路綫同市内電車、地鐵一樣，使用費城獨有嘅"Pennsylvania Trolley Gauge" (1588mm)。冇錯，呢兩條綫嘅前身都係城際電車，作爲費城近郊交通公司(Philadelphia Suburban Transportation Company)嘅"Red Arrow"系統嘅一部份。單綫區間嘅風光、沿途嘅小站、高速行駛嘅感覺、以至比較適合長途乘車嘅用車，都好好噉展現咗20世紀初城際電鐵嘅情調。(個人甚至覺得，雖然無緣廢止前到訪，日本嘅名鐵岐阜600V綫區，話多話少可能就係呢一種感覺！)

(兩張舊相來源:https://thetrolleydodger.com/201 ... ow-in-west-chester/)
但係，訪問69th Street嘅目的，除咗呢兩條非常值得試搭嘅市郊電車綫之外，仲有一條「全世界獨有」嘅鐵路。呢個，就係Norristown High Speed Line。

終端式月台，正正有一抽兩卡長度、外形奇特嘅輕鐵電車停靠。呢款就係1993年由瑞典ABB製造嘅N5型電車。


可以見到，Norristown High Speed Line嘅獨特之處，就係佢嘅集電模式。呢個係全世界唯一一個第三軌集電嘅輕鐵路綫。呢條同樣棣屬SEPTA嘅路綫(内部稱呼爲100號電車綫)，全長13.4英里(21.6公里)，1435mm標準軌，600V第三軌條供電，連接69th Street同位於鄰近嘅小城市嘅Norristown Transit Center，設有22個車站。沿途有少部分單綫區間，全綫專用軌道，完全冇平交道，最高速度達到70mph (112km/h）。
2020年首次訪問當時，NHSL嘅列車竟然有分普通、急行同特急三個運行模式(其實繁忙時間甚至有多兩款冇喺地圖表示嘅「區間急行」添)，但係去到再訪嘅2021年6月21號，已經改爲全列車各站停車。不過，一直以嚟，NHSL都係用類似香港山頂纜車嘅按鐘落車/按制截車嘅方式，沿途除咗比較多乘客使用嘅車站之外，全部都係request stop，所以唔同嘅運行模式實質上用途都唔大，乘車時間其實都冇咩大差別。喺各個中途站都設有按紐作通知列車停車用，但係2021年再訪當時，已經變咗(好似英國鄉郊嘅小站噉)需要向列車揮手停車。順帶一題，N5通常都係兩卡噉行駛，現時鮮有單卡嘅列車。




===========================================================================

呢條已經較名副其實嘅「高速綫」嘅前身，當然亦都係城際電鐵。1907年通車嘅Philadelphia & Western Railroad (P&W)，興建嘅原意係作爲跨大陸鐵路嘅一個部分，但係最後只興建咗一小段，用第三軌供電、連接69th Street總站同埋位於市郊嘅Strafford嘅電鐵路綫。Norristown支綫喺1912年開通，用當時非常高嘅規格興建，全綫專用軌道，極速已經達到現時嘅水準，好快已經替代咗Strafford正綫嘅地位，正綫亦都喺1956年廢止。雖然作爲跨大陸鐵路嘅夢想失敗收場，但係Norristown支綫一直帶嚟可觀嘅收入。而1951年之前，Norristown支綫亦都充當長距離城際交通嘅一翼，皆因Lehigh Valley Transit往從Norristown北延36英里外嘅Allentown市嘅城際電車，廢止前爲咗直達費城市區，會直接直通P&W。不過，去到最後，P&W因爲管理不善，呢條短短14英里嘅傳奇路綫，都要喺1970年易手，受州政府買下，正式成爲SEPTA網絡嘅一部分。
第一代嘅車輛係北美當年比較普遍嘅重型城際電車。 (呢架正行駛喺90年代喺費城市中心興建、架空電纜供電、只服務過幾年就廢止嘅保存綫上)。
(資料圖片，來源wikipedia)

第二代比較輕盈嘅電車，1920年由J.G. Brill製造，後來經過改裝同翻新底下，成功達到70mph嘅極速，最後1980年退役。

不過，P&W綫最馳名嘅車型，就無非係呢款1931年同樣由Brill製造嘅Bullet。製造嘅原因，就係除咗同平行嘅重鐵競爭，仲有慢慢開始普及化嘅自動車。呢批列車嘅極速達到當時嚟講簡直係瘋狂嘅80mph(128km/h)，亦都係最初期嘅流線型電聯車。當年投入服務時，甚至路綫都要再次高速化，好多彎道都要改建。當佢係「子彈火車」嘅始祖，其實都貼切不過！



(來源:http://www.phillytrolley.org/philwest.html)
(來源:https://nrhs.com/gallery-item/se ... interurban-car-209/)
呢款Bullet嘅服務壽命長達63年，1993年N5型投入服務嘅時候先退役。N5型獨特嘅外觀，其實某程度上都係向Bullet致敬。
比P&W短命得多嘅Lehigh Valley Transit亦都有研發流線型電車。呢部米白色、有紅色花紋嘅單端型流線型電車正喺P&W嘅第三軌區間上面擔當由69th Street直通Allentown嘅"Liberty Bell"特急列車。去到Norristown，職員會升起集電剛，繼續沿LVT嘅架空電纜路綫向Allentown前進。
(來源:https://cera-chicago.org/Blog/3319112)
不過要介紹P&W獨特而劃時代嘅用車，點都唔少得一款奇特嘅過客。連接芝加哥同埋佢北部嘅近郊同埋威斯康辛州米華基市(Milwaukee，Wisconsin)嘅Chicago North Shore & Milwaukee Railroad係高速城際鐵路嘅表表者，88.9英里(143.1km)嘅路綫一直使用重型電車行駛最高速度同樣係80mph嘅服務。小弟喺2024年，同樣喺康州嘅Shore Line Trolley Museum拍下咗呢個North Shore Line嘅保存車。

不過North Shore Line最傳奇嘅列車，就莫過於1941年由St Louis Car Company參考咗10年前由Brill設計嘅"Bullet"，製造咗兩抽高速流線型電車、Electroliner。呢款用作對抗私家車同巴士嘅競爭嘅列車，參考咗重鐵嘅長距離高速柴油列車嘅設計，有四節車廂，中間使用連接台車，設有餐車服務，最高速度係神乎其技嘅110mph(180km/h)！！！呢款列車，甚至會直通芝加哥嘅架空鐵路網絡，直接進入芝加哥市中心。
(來源: wiki)
(來源：https://www.facebook.com/photo/? ... rvanity=55585724280)
最後喺North Shore Line喺1963年廢止嘅時候，兩抽都成功過檔咗畀P&W，改稱爲Liberty Liner，喺NHSL上面服務咗短短14年，最後喺1978年退役。去到最後，雖然喺一條全長不足14英里嘅鐵路服務，依然以亮麗嘅形象示人，餐車服務亦都保持到最後。
(來源:https://www.facebook.com/photo/? ... b.10156564707036644)
咦？？？點解呢款車咁似陳相識嘅？？？
冇錯。喺世界另一端嘅「高速城際電鐵」、小田急電氣鉄道，曾經聯同日本國鐵，參考(=山寨)North Shore Line而製造佢哋自己嘅高速流線型電聯車。呢個，就係香港鐵路迷冇可能未聽過嘅小田急ロマンスカー(浪漫號)喇！初代嘅3000型SE，可以完全見到山寨成份都係幾重下嘅。(不能不題，小田急喺2008年製造嘅60000系MSE充當地下鉄千代田綫直通嘅班次，同佢嘅「曾祖先」Electroliner充當直通芝加哥架空鐵路嘅班次，其實幾有異曲同工之妙。)
(來源:https://www.odakyu.jp/romancecarmuseum/)
而日本國鐵方面，就用咗呢款小田急3000型喺東海道綫進行高速測驗，創下咗150km/h窄軌嘅速度紀錄。國鐵隨後基於呢款列車而研發嘅151系こだま(回音號)，就定立咗「長距離高速電聯車」嘅先河，將速度紀錄以163km/h刷新。呢一倫喺美國開始、移師東洋嘅電聯車高速化測驗，最後發展成舉世聞名嘅革命性產物、新幹綫。
(來源:wiki)

===========================================================================

不過，喺時候返去呢個傳奇故事嘅出發點。
乘搭嘅ABB N5到達咗其中一個寧靜嘅中途站，Township Line Road。呢個係NHSL典型嘅中途站，有兩個非常短、只可以容立兩卡N5嘅月台，要跨過月台就需要使用上面嘅道路橋。

沿途都係閒靜嘅市郊景致。列車輕快噉通過呢條綫型優良嘅路綫。

最後，路綫喺Bridgeport站進入一段單綫區間，爲嘅係進入橫過Schuykill River嘅鐵橋。去到對面岸，就已經到達呢條綫嘅終點，Norristown Transit Center，全程需時35分鐘。

兩卡N5啱啱喺Norristown Transit Center開出，準備返回費城市區。

今次嘅介紹，除咗希望可以用一個比較少亞洲鐵路迷會熟悉嘅出發點講「鐵路高速化」呢個範疇，亦都希望鼓勵有興趣去美國嘅版友，去紐約、華盛頓之餘，有時間嘅話可以順道探訪下波士頓同費城呢兩個歷史濃厚嘅城市，感受下兩個地方獨特嘅氣氛同埋非常多樣化嘅鐵路交通。下次、亦都係最終回「城際電鐵三部曲」，小第將會同大家探討城際電鐵後期嘅歷史，同埋探訪下現時「最正宗」嘅城際電鐵，大家密切留意。

===完===

Ted's Train Travel Tales
[US] 城際電鐵三步曲之 尋找「子彈火車」的故鄉
https://www.hkitalk.net/HKiTalk2/thread-2233716-1-1.html
[US] 城際電鐵三部曲之 大草原上的百年凸型電機 (日本同款)
https://www.hkitalk.net/HKiTalk2/thread-2232347-1-1.html
[US］山旮旯益鐵記之 沙漠中徘徊的台鐵近親
https://www.hkitalk.net/HKiTalk2/thread-2211819-1-1.html
[CA] '20 北美獨遊記之 雪國通勤電鐵的最後寒冬
https://www.hkitalk.net/HKiTalk2/thread-1170656-1-1.html
[UK] '18歐州漂流記之 拖拉機的怒吼+臥舗列車上的夜曲
https://www.hkitalk.net/HKiTalk2/thread-1111306-1-1.html
[BE] '18歐州漂流記之 搭比利時古典電車去浸温泉
https://www.hkitalk.net/HKiTalk2/thread-1128847-1-1.html
[US/CA] '17 北美國際列車初體驗 — 東岸最靚嘅車窗
https://www.hkitalk.net/HKiTalk2/thread-1128791-1-1.html

波士頓我之前去過無數次（上次係兩年前），Red Line 都坐過好多次，就係咁多次都無去過咁南端 一直都為意南端有一條好得意既支線，多謝你終於展開面紗。估唔到 PCC streetcars 都可以裝冷氣

唔講唔知 Red Line 原來仲有 Pullman 行緊，但真係所剩無幾。早年去果陣都坐過好多次。諗返先驚覺經典程度唔係同紐約地鐵 R32 差好遠（三年幾前 last day 果日我咁岩喺紐約，前一晚先知，果日有去送別）

反而 Philadelphia 我兩次去都係路過一日半日咁樣，無行得咁深入，幾條咁得意既鐵路同電車都係聽過未坐過。你仲走去河邊影相真係好有心機。下次我有機會再去都要留多一兩晚了

師兄你介紹咁多條鐵路線，其實都有一個共通主題：就係美國無一套統一標準、規劃同解決問題方法，好多決定交畀地區層面去做，加上資源同財政限制，成個 project 往往斬件左好幾次先做完，於是造就左唔少獨特、有趣而有創意既鐵路系統同車輛。規劃同運作角度當然效率麻麻，欠缺系統性，但又有好多野因而值得細味

期待下回分享

S3BL100 發表於 2025-10-17 10:57
波士頓我之前去過無數次（上次係兩年前），Red Line 都坐過好多次，就係咁多次都無去過咁南端 一直都為意 ...

多謝師兄支持。R32退役當日小弟都喺度，唔知有冇碰到面呢？😁😁紐約每次有列車退役活動都好多鐵路迷參與，場面幾墟坎下。不過就係因爲R32退役時有不良鐵路迷搞破壞，唔知有冇下次...最近史丹頓島嘅R44其實靜靜雞退出咗日常服務，都冇退役活動，冇咩人留意。唔知係唔係已經唔再搞，一或係因爲唔係核心嘅地鐵綫、冇人知道佢退役，還是只係未正式搞。當年R32退下火綫之後都試過因爲R179啱啱載客就出現幾次大問題，需要臨時復出行J/Z行咗幾個月，之後過咗成兩年先搞呢個退役活動。
波士頓地鐵嘅車輛都係比較殘舊，例如以前橙綫嘅Hawker-Siddeley列車都超精彩。不過，紅綫1500/1600系咁長壽嘅原因都係因爲佢嘅替代車款搵咗CRRC做，遲遲未交車，況且已經投入服務嘅列車都超多問題。費城同LA嘅交通局都同CRRC訂過車，但係因爲MBTA嗰批嘅表現實在太差太差，最後都cut單甚至取消收場...
不過R32係小弟心目中都幾有感情地位，個人覺得都係比MBTA嘅列車有味道，尤其佢設計超經典之餘，仲係紐約地鐵最後一款設有railfan window(前面展望窗)嘅列車。
波士頓同費城(其實要計埋三藩市)嘅鐵路都好有獨特之處，精彩嘅程度都唔輸蝕比大佢幾倍嘅紐約或者倫敦、上海之類嘅大城市。背後咁複雜、咁「散收收」、咁多唔同嘅系統嘅原因當然除咗地理環境之外，仲有美國早期嘅鐵路史，尤其電鐵/市内電車/地鐵嘅發展全部都係私人公司參與，後來先慢慢過檔畀政府接管。波士頓都好啲，因爲BERy當年慢慢壟斷咗成個波士頓嘅市内鐵路交通，雖然個別路綫嘅設計都唔一致(例如藍綫雖然係重鐵，但係使用以前行駛電車嘅小半徑隧道、地面段更加係窄軌嘅城際電鐵改建而成，仍然使用架空電纜集電，列車要中途升起集電弓)，唔同路綫喺早期私營期間已經值着方便嘅轉車站同埋路綫合拼，都變咗一個比較容易使用嘅network。SEPTA就有少少唔同，因爲費城當年貴爲鐵路公司(PRR同Reading重鐵，同埋唔同嘅城際電鐵)嘅樞紐，每個「路綫群」都使用唔同嘅標準，基本上市内列車都完全冇機會進行整合。簡單如軌距，部分公司使用極罕有嘅Pennsylvania trolley gauge廣軌都係爲咗防止競爭對手(受政府強逼底下)使用佢嘅路綫。不過近郊鐵路就已經喺80年代透過一條市中心嘅隧道，將前PRR同前Reading嘅路綫整合，好似東京或者巴黎噉嘅跨域通勤鐵路就全美國得費城先有。

theodore.c 發表於 2025-10-17 22:22
多謝師兄支持。R32退役當日小弟都喺度，唔知有冇碰到面呢？😁😁紐約每次有列車退役活動都好多鐵路迷參與， ...

我當日送別 R32 經歷

講開波士頓，Orange Line 堆 Hawker-Siddeley 我都好深印象，十幾年前第一次坐已經覺得幾殘。係估唔到 Red Line 堆六、七十後 Pullman 會玩得耐過 Orange Line 果批八十後。話時話 Blue Line 曾幾何時都係用堆外觀相似又差唔多年歲既 Hawker-Siddeley，但行岸邊銹蝕嚴重，三十年唔到就玩完

不過 Blue Line 一半路段第三軌供電、一半路段架空電纜，去到機場站要豎起集電弓轉換供電模式，呢個設計好似全世界都好少有。仲有 Silver Line SL1/2 巴士當地鐵，行到半路要叉起集電弓入隧道，又係好得意、好特別，其他地方聞所未聞

三藩巿而家 BART 轉晒新車、Caltrain 又變晒新車，就無咁特別了，但 streetcars 同纜車特別程度不減。仲有兩條 BART connectors 又係幾得意（我淨係坐過 Oakland Airport 果條），MUNI 又地鐵又電車個運作模式又同波士頓 Green Line 幾似

S3BL100 發表於 2025-10-18 00:19
我當日送別 R32 經歷

講開波士頓，Orange Line 堆 Hawker-Siddeley 我都好深印象，十幾年前第一次坐已經 ...

陣間抄下啲R32送殯嘅相出嚟跟下先😅😅
嗰日之前都有幾個週末搵咗R32行D綫嘅特別聖誕列車，59街沖上125街飛7個站又左穿右插嗰段企車頭超刺激，好似過山車噉。冇唸到之後去NY讀書，住170街但係喺66街返學，日日都係搭呢條綫噉樣沖，雖然係搭R46/179/211
MBTA Blue Line噉樣要半路中途昇返個集電弓上嚟呢個做法，喺美國就只此一處。(雖然以前喺Norristown High Speed Line嘅直通班次都需要噉）但係喺歐洲呢樣嘢都比較普遍，例如倫敦嘅Thameslink同埋以前阿姆斯特丹嘅51號綫。喺北美，地鐵使用架空電纜都比較少有，除咗喺波士頓會見到之外就只有Cleveland同埋啱啱開始喺Montreal改建/新建嘅Reseau Express Metropolitain
波士頓嘅銀綫BRT其實最近已經將Neoplan嘅dual mode無軌電車/巴士退役，而家全部已經變成NFI嘅電巴。同時間象徴北美只剩返四個城市有無軌電車(費城、西雅圖、溫哥華、俄亥俄州Dayton市)
講起Seattle，以前市中心嘅輕鐵隧道都可以行巴士，如果我冇記錯，好似柴油又行得，無軌電車又行得。不過已經轉咗淨係行得輕鐵好多年喇。（雖然我無緣去過）
BART舊車退役其實小弟都特登飛咗過去睇，超精彩，但係同紐約嘅活動不同之處，就係剩係行得一程，冇得好似R32退役噉可以慢慢玩、慢慢影。都幾遺憾冇日常服務嘅時候搭過，亦都冇機會見到之前已經退役、有貫通門嘅C Car😥不過三藩市嘅交通依然好多特別之處，而Muni Metro嘅Breda制舊車都差唔多冇晒，有機會都值得去追。Caltrain喺最南端嘅一段都仍然用柴頭拖，但係冇曬EMD製造嗰兩批嘅F40同Gallery car😥

theodore.c 發表於 2025-10-18 00:58
陣間抄下啲R32送殯嘅相出嚟跟下先😅😅
嗰日之前都有幾個週末搵咗R32行D綫嘅特別聖誕列車，59街沖上125街飛 ...

三藩巿都仲有無軌電車既

唔講唔知原來 Cleveland 條 Red Line 用架空電纜，年底可能有機會去 Cleveland 出差，到時留意下，如果去得成再上來報告

Seattle 條 transit tunnel 2019 年先再無巴士行，我上個月岩岩去過一轉，呢度貼過文分享。佢地地底留返鐵路專用其實係合理。但 Seattle 起唔成地鐵，其實真係幾可惜

BART 堆舊車退役之前我坐過好多次，一直都印象麻麻，覺得內籠殘舊，尤其是堆軟身座椅同座墊，同埋行車聲浪好大。但好多野都係失去左先會珍惜