數學題，101嘅101次係? (更新至Post 9)

leo_ku 發表於 2023-4-17 13:05
唔好玩啦, 紅磡站有一咋人落車, 東鐵又密, 即班上真係easy job。

即班上到，要車頭等先上到，即係金鐘都要行要上8-2嘅，第一班係有人落，但上嘅仲多過落
去到金鐘，你要轉車嘅又唔係即班上到
去中環好少少 (雖然無咩可能啱啱趕到唔使等)，去西行輸蝕小小，但東行好多時都要等兩班

以上仲要係沙甸魚嘅情況，即係幾程車都係人夾人，連攞手機都唔得，唔知有無板友視之為"優點"?
咁樣都解釋到點解11月之後，101客量會回升，尤其灣仔同中上環

AV296 發表於 2023-4-17 13:14
即班上到，要車頭等先上到，即係金鐘都要行要上8-2嘅，第一班係有人落，但上嘅仲多過落
去到金鐘，你要轉 ...

唔明點解你咁堅持紅磡上唔到車
我紅磡轉車轉咗11個月，加埋都無5次即班上唔到車 (當然可能時段上差15分鐘人流就相差好遠)
至於轉車去中環，只要睇扶手電梯下行人流就知道上一班車走咗幾耐，自己研究下啦

Ohm 發表於 2023-4-17 14:43
唔明點解你咁堅持紅磡上唔到車
我紅磡轉車轉咗11個月，加埋都無5次即班上唔到車 (當然可能時段上差15分鐘 ...

咁「上唔上到車」呢樣嘢有時都好見仁見智嘅，有人見企到埋門口就寧願等下班，有人就算頂閘都搵條罅壓埋去企；仲有咁啱嗰日嗰度門有冇人拖喼，有冇車仔etc都會有影響嘅

anyway，上繁無試過紅磡轉東鐵（通常屯馬轉102／110），但下繁日日搭都冇乜見會展留後好多人，估計上繁唔會太惡劣啩；不過我認為紅磡上唔上到東鐵過海同101多唔多人搭無衝突

nate115 發表於 2023-4-13 05:26
101既走線其實都算直接, 雖然睇落好多站條線好長, 但服務既範圍廣, 對西區紅隧/紅土, 中環灣仔紅隧/紅土/太 ...

乘客對101呢類正正經經嘅市區流水線仍然好有需求。

AV296 發表於 2023-4-17 13:14
即班上到，要車頭等先上到，即係金鐘都要行要上8-2嘅，第一班係有人落，但上嘅仲多過落
去到金鐘，你要轉 ...

101 客量回升，係全港多人返番工，
同東鐵迫人回流無咩關係。

對比屯馬線通車既疫情前「光輝歲月」，到而家所謂「你好香港」世界，
101／111 系整體跌左成 2 成客，而依班客係一去不返果隻。

試想像下以前幾多人搭 101。

PS：更有趣係，東鐵「沙甸魚」情況係連港鐵自己都高估左。

Post 9 - 展望及建議 (Part 1)

唔好意思，前幾日比較上，無更新過呢到嘅資料。

而家應該係101客量最低迷嘅時候 - 西港島線、觀塘線影響甚微，但屯馬同東鐵好明顯係勁敵。喺最大對手出場之後，101客量居然無咩打擊，呢樣我諗好多人都好驚喜，因為好多紅隧線都全軍覆沒，而101本身同鐵路都唔少重疊，但而家仲保留到線皇嘅名，繁忙時間 (實際) 仲開緊4-6分鐘，非繁仲開緊10分鐘。無錯，101之前係班班車過百人，前面板友都有講，九龍城已經上唔到車，但就算而家一架車80-90人，其實離"客量差"都仲有好大段距離。

未來嘅101，預計將會跨過低潮，因為佢沿線未來仲會吸到唔少客。先講九龍，

1. 觀塘市中心重建仲未完成，但每班車已經有十幾人返觀塘。到時重建完成，應該多好多人喺九龍區前往觀塘，尤其裕民坊嗰帶。至於過海客嚟講，當italk資深板友主流意見覺得觀塘碌去紅隧慢到趕客，我又有少少保留。香港實在太多懶人，寧願坐耐啲，都唔想行去地鐵站罰企兼轉車，尤其係夏天。601 619 地鐵都大機會要企嘅時候，而101又唔使等車，又唔係慢到離譜，又可以邊shopping邊等車，絕對會吸引唔少唁趕時間嘅人，尤其家庭客/兩蚊客/遊客。同埋唔好唔記得，601 619 地鐵都是要碌北角的。 (補充: 我知市中心塊地流標，但中長期發展嚟講，呢期短期因素就唔好放得太大啦)

2. 啟德北一帶都仍起樓中，除咗稅務大樓/工業貿易大樓，遲啲又有唔少住宅/商場，例如崇光/地下街。作為全條太子道東唯一去到灣仔中環嘅巴士，又係最密嘅隧巴 (就算係非隧巴，都係得1A/27鬥得過)，喺屯馬嘅7分鐘營運模式之下，101客量絕對有得升。

3. 土瓜灣雖然舊，但唔少舊樓亦重建緊，10年後可能會煥然一新，尤其地理位置上咁近尖沙咀/旺角，又係維港沿岸。所以未來可能會愈嚟愈多人，亦愈嚟愈有活力，有利101未來嘅客量。但而家香港都無咩地區係成功由”舊區”轉型做”新區”，客量升幅會係點? 有幾多人真係有101唔搭，走去搭地鐵? 我都唔知。

4. 最重要一樣野，西隧8月俾返政府，六幹2025年通車，唔使諗都知死亡交叉同埋紅隧嘅塞車，某程度上會得到大幅舒緩。到時101嘅行車時間縮短，又會抆返一批地鐵客。

5. 唯一威脅在於九龍灣 (德福/淘大/牛頭角道)。呢到而家係客量支柱，但亦相信係人口老化緊嘅地區。佢地將來究竟有幾大需求過海，或者去CBD返工，絕對係未知之數。但九龍灣持續有新樓/新建築落成，帶動人流之餘，或者可以帶動101客量上升。

港島方面，灣仔內街持續有唔少新商業大廈落成，而金鐘中環更加唔使多講，未來又無咩新鐵路，101都唔需要擔心客量會萎縮。至於上環同西環，而家佢地未有大型發展計劃，不過坐得101嘅，都唔太介意速度，西環人可能當佢係有冷氣嘅電車就算，唔係主要客源。

我喺隔離post睇到有人話紅隧線定線大多過時，但我覺得唔少路線，包括101，定線都尚可。上環至九龍灣固然行得靚，但頭尾兩段可執嘅空間都唔大。我以前都以為101入觀塘係浪費資源，但而家發現觀塘一個站客量分分鐘勁過成個西環。而西環嗰一段，如上面所述，係俾啲唔趕時間，或者嫌地鐵太遠嘅人坐；看似運緊凳，但係巴士公司呢一段嘅收入，分分鐘好過797同50M。與其話過時，不如話101流水線嘅定位做得好，或者好有效地，將架100人嘅車去服務200人。

Post 9 - Part 2

但係咁唔代表無空間執，尤其係同111。依營運狀況，我覺得可以分成上繁、下繁、非繁去執。嗱嗱嗱，我打咗咁多字，我諗唔使擺F1啦掛，反正我F1開新po，又會俾人話呃分。但係恕我無咩創意，唔能夠好似資深板友咁，諗到41兜九龍塘上葵涌，或者98C拆10條線嗰類咁有前瞻性嘅建議。以下係比較平實少少嘅建議，各位資深板友大大有咩不滿，懇請手下留情，千祈唔好留句”垃圾不如”就走人。

上繁方案1:

*可以考慮將X101代替101牛頭角道服務，淘大下站紅隧，港島段行101灣仔至中環，再直飛堅尼地城/上環止步，7-9am 每12分鐘一班，收101X價。

*101縮短至坪石，行觀塘道、彩霞道調頭，停啟業邨後返返原線。預計新101同111總站去富豪東方酒店時間差唔多，而沿線塞車位又唔多，咁兩線就可以10分鐘一班梅花間竹咁開，土瓜灣又可以享受5分鐘一班嘅聯合班次。

*101坪石調頭好似好癲，但重點係啟業邨起載。我有諗過擺彩福/啟業開，但夠位擺咁多車嘅總站，似乎得坪石 (一係就九廠私去啟業邨起載)。咁就可以俾牛頭角人經啟隧直飛紅隧，中間又有聯合班次。

*當然，保留幾班101X，紅隧後行告士打道同干諾道中，直飛上環。但最好停一停港澳碼頭，跟26號入皇后大道西。修打蘭街先係最多人，101X而家唔停，咁唔怪得唔夠客。

上繁方案2:  

*X101觀塘行到采頣花園，直飛紅隧(類似5X)。

*101坪石開，下一站采頤花園；預計比111快5分鐘，所以兩架車10分鐘一班一齊坪石開，就做到聯合班次。

*想再聯合得好啲嘅，坪石版101可改告士打道，去到中環先入內街，咁分流灣仔中環客之餘，又可以拓闊新客源 (灣北)，又唔使擔心聯合到站。

*九龍方向嘅101X，本質上同258X X6C 55差唔多，都係返工線，咁最好就行觀塘海皮，同埋獨立編號。

*而九龍方向101，建議部分車彩虹止步，部分車經牛頭角道入觀塘。咁上繁觀塘就釋放大量quota，到時78x又好，33又好，6D又好，大家唔使爭，齊齊加班入觀塘道，皆大歡喜。

可能大家會問，如果最後兩車聯合到站，咁有咩用? 答案就係，就算真係唔成功，起碼唔會衰過現狀，橫掂而家都係咁嘅樣。

下繁(5-8pm) 101分做兩線:

*一條 (101X)堅尼地城開，碌到港澳碼頭先飛去紅隧，然後停九龍區各站。

*一條 (101) 港澳碼頭開，同111聯合班次，紅隧/山谷道後，經啟德隧道、九龍城天橋，直達譽港灣。港碼兩條線，即使疏到開12分鐘聯合班次，觀感上俾人感覺都係6分鐘一班，依然頻密。

*新101X服務到多人嘅東邊街/港澳碼頭，就算拉疏至12-15分鐘一班，依然會多咗客，因為101X實在快太多。而港碼版101提速，即係又有藉口加價；而111亦趁機拉疏，兼且唔再出現拖卡，整體上應該減到車，巴士公司亦會好開心。

一定有人問: 咦，101/111下繁係唔同公司喎，點算? 我嘅見解係，兩巴應該意識到下繁唔同公司嘅問題，會為咗upgrade班客兼收車，寧願重新傾過時段，務求某個時段可以獨市。呢個方案提供一個誘因，俾兩巴協調一下。

至於非繁，101/111大致都係同時段同公司。時間表上可以執一執，例如兩車都係12分鐘一班，但101比111早2分鐘開。因為堅尼地城至林士街係21.7分鐘。假設111 港碼去林士街要2分鐘，咁101咪可以比111遲6-7分鐘到林士街囉。咁就自然整到個聯合班次。個問題係，兩車有幾大機會變成聯合到站?

統計學上，我將問題改做: 101有幾大機會，同111相隔唔夠一分鐘到站? 即係話101有幾大機會，堅尼地城至林士街係少過16.7分鐘，或者多過26.7分鐘? 呢樣就係normal distribution出場嘅時候:  

有14%嘅機會拖卡，其實唔大。當然，呢啲咁theoretical嘅野，實有資深板友出嚟話 “你覺得現實真係咁簡單? 西區分分鐘塞過紅隧” 或者 “咁樣都計到嘅，咁全香港所有巴士都聯合到啦” 云云。我當然覺得以上數據未足以反映現實，但統計學就係咁樣，無可能考慮哂所有野，惟有用數據模擬現實。呢啲數字某程度上都反映緊實況，如果咁都要俾人鬧，咁全世界所有研究都即刻作廢。我純粹只係想show一下，聯合班次唔係唔可能。

101最佳出路,就係維持原狀,現在雖然都跌2成客,但收視仍然偏高,也不須再進一步減班.

反而101X我覺得已沒必要再加班或改善,搭得101,都唔係志在趕時間,而101X得繁時有需求. 至於西區,已驗証左,單靠做西區客必死,我都唔明點解呢區既人唔鐘意搭巴士.

Ohm 發表於 2023-4-17 14:43
唔明點解你咁堅持紅磡上唔到車
我紅磡轉車轉咗11個月，加埋都無5次即班上唔到車 (當然可能時段上差15分鐘 ...

首先多謝師兄分享紅磡站上車嘅經驗
我呢幾日都有用東鐵過海，或者我分享下我嘅經歷:
7-8點 完全無問題，可以即班上車兼且揀車尾靚位
8-9點 一係揀車頭/中間，一係等下架，因為車尾嗰度太多人

我唔係要"堅持"咩野，我都無話到師兄你"堅持"紅磡即班上到
但希望你可以明白，我地呢班普通乘客無你咁醒目，有套繁時上車嘅攻略，然後落到金鐘可以一眼關七，分析幾條扶手電梯再衝上去轉車 (我唔評論後面，因為比較少以中環為目的地)
或者咁講，"返工已經夠煩啦，搭個地鐵啫，使唔使搞咁多野呀，你上唔到，轉車轉遲咗，會遲好多咩? 俾你咁好彩上到都唔會坐得舒服啦，連手機都拎唔到" — 當然係因人而異，有啲人覺得為咗三分鐘，值得咁做

老實講，齋睇車程，港鐵係有優勢（我用一般乘客嘅19分鐘嚟計)，但乘客都會睇其他野㗎嗎，所以喺我#40都有講，101客量回升，而且唔係1/2個咁小，我純粹主觀覺得東鐵客回流係一個主因

不過無論如何，都多謝師兄分享，幫手促進一個有質素嘅討論