浸鹹水遇溺記 CX521 一個偶遇 Aria Suite 的故事

-- Prelude --

2023 年 8 月，國泰航空於記者會上發佈新一代商務艙產品 Aria Suite 嘅概念圖，取代自 2016 年引入嘅 Zodiac / Safran Cirrus II 座椅，而第一部配有 Aria Suite 商務艙嘅 777-300ER B-KPO 於翌年 10 月 18 日投入服務。

筆者於同年 12 月由東京返港時遇到呢部飛機 - 就睇下呢個新嘅商務艙產品何方神聖啦~~

-- Flight Info --
CX521 NRT-HKG B-KPO
Boeing 777-300ER
STD 1645 ATD 1758 (JST)
STA 2200 ATA 2241 (HKT)

-- Tokyo Narita Int’l Airport --

東京成田機場應該唔使小弟介紹太多啦 - 小弟先坐 Keisei Skyliner 由東京市區去到 2 號客運大樓，迅速辦妥登機手續之後，就到禁區免稅商店買咗幾盒同紐約無太大關係嘅 New York Cheese。由於 Inbound Flight (CX520) 遇上半個小時嘅延誤，今日航班亦都因此順延約一小時。經過一輪帶有少少混亂嘅登機之後， B-KPO 於當地時間 1750 分 pushback，展開小弟嘅呢個 Aria Suite 初體驗~~

-- Aria Suite --

既然小弟係為咗張凳而成為呢個航班嘅座上客，咁小弟就先介紹呢張凳嘅硬件啦~~

先講硬件上變咗啲咩 - 新座椅嘅餐枱係由螢幕下面伸出來 (國泰上一代長途商務艙座位位旁用機關去放出嚟~~) ，以及多咗一道門。新座位嘅物料同顏色選擇都係貫徹返國泰嘅設計風 - 盡量避開一啲太過豪華嘅顏色，並選用較沉實嘅顏色。座位後方全部鋪上木絨皮革，枱面貼上雲石貼紙 - 整個座椅隱約帶有少少北歐風格~~

再講下有咩係無變到 - 同上一代長途商務艙座位一樣，國泰嘅 Aria Suite 都係採用一個反魚骨 (Reverse Herringbone) 嘅設定 - 每一個座位都位於走廊旁，而由於所有座椅都係背向走廊嘅關係 乘客感覺上私隱度會比較高。新設計嘅儲存空間亦用上唔少舊設計嘅元素 - 座位嘅 table level 係有一個存放 耳機 水 同 過夜包 嘅小櫃，而 footwell 旁嘅三角形儲物空間設計亦獲保留。

因此，小弟第一次坐落去呢張凳嘅時候 反而係有一股熟悉感湧出嚟 而小弟好快就摸熟座位機關同各個按鈕。每張凳皆配備六組唔同嘅燈 以及有四個唔同嘅地方供乘客調較座位仰臥同燈光 - 所有按鈕都位於一個小弟 expect 佢喺嘅地方，以及一個容易接觸嘅地方。不過呢張凳瞓落嘅感覺就一般 - 雖然私隱度係非常之高，不過座位嘅長度係稍微欠奉 - 如果閣下有 1.9 米嘅 閣下躺平時或會遇上少少困難 (同埋，由於今次航班為中短途航班，機上面並沒有提供床褥同埋枕頭 - 因此 aria suite 喺一個長途航班上嘅真正表現係如何 - 就要由其他網友代我解答啦~~)

Aria Suite 亦配備新嘅機上娛樂系統 - 新系統除咗有新嘅介面之外，系統螢幕亦明顯比上一代螢幕高解像度 - 雖然娛樂系統內 並非所有內容皆可以以 4K 解像度播放，不過小弟睇電影嘅時候 就非常之留意到 正常解像度 同埋 4K 解像度嘅戲嘅分別~~順帶一提，飛機嘅 external camera 亦得到升級 - 除咗 Camera Feed 解像度提升以外，B-KPO 翻新時亦另外裝上一個 “Bottom Camera” - 乘客可以高清多角度咁觀賞機外環境。

不過新嘅娛樂系統最令小弟驚訝嘅 就係娛樂系統同座椅硬件之間嘅各項 integration - 正如上文提到，呢張凳係有四個唔同嘅地方供乘客調較座位仰臥同燈光效果，而其中一個方法就於娛樂系統中通過選擇 “Seat Mode” 去做到。 Aria Suite 係提供五個座椅模式供乘客選擇，分別係 Movie, Work, Relax, Dine & Sleep，而每個模式皆有自己嘅座位仰臥設定同燈光效果。進入該模式後，閣下亦可以獨立調校各樣效果，而系統係可以將呢個改變儲存喺呢個模式入邊 - 如果閣下之後想返回呢一個模式設定 (例如閣下食咗飯之後想返回 Relax 模式)，按一個鍵就可以將座椅調較到剛剛儲存嘅座椅設定同燈光效果~~

同時，娛樂系統亦有同飛機機艙之間做 Integration - IFE 嘅 Landing Page 係會將航班途中嘅各個 timepoint 列出，好讓乘客計畫航班中嘅作息以及用餐時間。同時，新嘅 Seat Map 設計亦顯示出 Galley & 洗手間嘅各個位置，以及洗手間嘅即時 occupancy - 係非常實在地照顧到一般乘客嘅需要。喺各航空公司之間嘅商務艙軍備競賽中，國泰航空可以話係憑 aria suite 嘅引入而得到一個領先優勢。

-- Service --

不過講咗 aria suite 嘅軟硬件之後，小弟係時候介紹下今次航班上嘅服務 ~~ 國泰喺上年開始使用一個 Refreshed Business Class Concept，於商務艙嘅服務以及餐飲作出微調，亦可以話係為當時尚有一年才投入服務嘅 aria suite 而鋪路。雖然 Meal Service 喺短, 中短途航班上同過往未有太大差別，不過整體上 國泰嘅新商務艙飲食係依舊保持高水平嘅~~

小弟先接過一杯 Welcome Drink & Warmed Nuts，再接過一份非常之醒胃嘅頭盤。今日嘅頭盤係滿滿日式風情 - 玉子燒 八爪魚 同 日式鰻魚 各有一小份。 主菜方面，小弟今次揀咗麵豉醬比目魚 - 呢份主菜係有驚喜嘅 - 比目魚係煮得啱啱好 並沒有任何鞋或者煙靭嘅感覺至於，味道亦恰當不過~~ 最後，小弟亦要咗一份生果拼盤同芝士拼盤，為呢個晚餐作結。

雖然本次航班嘅 Catering 係稍有驚喜，不過好可惜嘅係 今次嘅 Service 係完全唔合格嘅。 死因 - 慢。

呢一餐飯食咗小弟三個鐘 - 雖然用文字表達出嚟唔係一件容易嘅事，不過基本上 小弟喺名古屋上空食前菜，不過去到台北上空嘅時候先至有甜品食。 我食完頭盤之後 機組人員收走頭盤嘅碗碟後 基本上 45 分鐘內都冇人嚟過我個位嗰度，而機組人員拎住個 Bread Basket 走到去我個位嘅時候 個蒜蓉包早已經結翻冰，而整個航班上 有 80% 時間都有一塊 tablecloth 喺檯上面。

當然，小弟明白機組人員亦只係根據上面定立落嚟嘅作業流程去服務各位乘客，而相信各位機組人員對新縮細咗嘅 Galley 佈局係需要時間適應，不過呢個晚餐服務真係實在太耐喇... 希望佢哋可以盡快檢視翻呢個流程，俾翻一個正常嘅晚餐體驗各位旅客啦~~

順帶一提，國泰近期唔係唯一一間遇上 Galley 空間配置問題嘅航空公司 - Iberia (IB) 同 Aer Lingus (EI) 近日引入 XLR 版本嘅 Airbus A321neo 時都遇上營運長途航班時 Galley 空間不足嘅問題。 實話實說，小弟見到呢兩單新聞時都係有少少驚訝嘅，始終 IB & EI 兩間都係營業咗至少 75 年以上嘅航空公司 - 有新嘅飛機投入服務無疑係一件好開心同值得慶祝嘅事 - 不過死喺一啲咁簡單細節位嘅時候，有時候小弟真係會感到莫名其妙~~

-- Conclusion --

航班於香港時間 10 點 41 分 於新嘅北跑道降落 - 既然我哋要滑行至少 20 分鐘先會到達閘口，咁小弟就用呢個時間簡單總結下今次嘅航班啦~~

Aria Suite 絕對無令人失望，不過亦沒有俾到小弟一個 wow 嘅感覺 - 可能係國泰用咗半年時間 hype up 呢個新嘅商務艙概念嘅關係 - 小弟見到呢張凳嘅實物時 只係覺得佢 1. 交足貨 2. 符合到期望 3. 沒有違反商品說明條例。不過 本身國泰航空長途商務艙已經係行業中數一數二嘅產品 - 要超越自己其實唔係容易嘅事嚟。 今次嘅 evolution 雖然唔係一個 revolution，不過亦係一個 welcomed enhancement。

飛機內籠設計絕對係一門藝術嚟 - 設計者除咗要明白品牌設計同精通人體工學之外，更要理解材料損耗以及洞察未來潮流 甚至親手去創造未來潮流。喺各航空公司之間嘅商務艙軍備競賽中，國泰航空可以話係憑 aria suite 嘅引入而加大咗本身嘅優勢。今次嘅設計除咗為原有嘅 Reverse Herringbone 設計出一個加強版之外，新設計亦讓機艙配置更加貼近 Cathay 嘅 Branding - 而相信後者係國泰推出新設計嘅最大動機之一。

不過服務方面，今日航班上的確遇到唔少物流上嘅阻滯嘅 - 國泰嘅管理層對新機艙設計投入服務係採取一個非常之保守嘅態度 (飛機於 10月進入服務，不過至 2024 年 12 月為止亦只係服務 北京、上海、台北同東京呢幾個短中途目的地*~~) 希望佢可以盡快解決呢啲物流上嘅問題，並將呢一部飛機投放到長途航班上，用盡機艙嘅 full potential 啦~~

* 國泰於今年 1 月 28 日開始派配備 Aria Suite 嘅 77J 執飛 CX255/CX250 倫敦航線


據小弟理解，77J 執飛短途航線係一個過渡性安排 -  B-KPO 投入服務首兩個月只服務每日一班來往北京或臺北嘅航班，並於 24 年 12 月起服務每日一班來往東京嘅航班。


新座位嘅物料同顏色選擇都係貫徹返國泰嘅設計風 - 盡量避開一啲太過豪華嘅顏色，並選用較沉實嘅顏色。座位後方全部鋪上木絨皮革，枱面係貼上雲石貼紙 - 整個座椅隱約帶有少少北歐風格~~


唔知係咪大家都等到有少少煩躁嘅關係，登機時 有好幾個經濟艙乘客好著急咁直接衝往自己嘅座位 - 有一個甚至喺我擺緊行李上頭頂嘅時候 嘗試係我身後推過 - 有時候真係唔知道佢急啲咩 老實講 你一日唔坐穩 佩好安全帶 飛機一日都唔會 pushback 㗎啦，大家放鬆少少啦好無~~


小弟第一次坐落去呢張凳嘅時候 係有一股熟悉感湧出嚟 - 新設計嘅儲存空間亦用上唔少 Cirrus II 嘅元素 - 座位嘅 table level 小櫃係用作存放 耳機 水 同 過夜包，而 footwell 旁嘅三角形儲物空間設計亦獲保留。


新座位喺 table level 設有一個存放 passport / 貴重物品 用嘅空間 - 不過落機時務必檢查呢個櫃桶，以免遺留護照同其他貴重物品係機上~~


座位亦設有充裕嘅電源設備 - 除咗有一個 wireless charger 之外，座位前方亦有一個Universal Socket, USB-A & USB-C 嘅 outlet。呢個擺位係做得幾好 - 唔會 clutter up 檯面空間之餘，乘客睡覺或伸展時亦不會誤碰各個充電設備~~


螢幕下方空間以及座位旁嘅儲存空間都帶有 Cirrus II (國泰現有商務艙座椅) 嘅影子~~


大家可能記得 國泰於 2016年引入 Zodiac Cirrus II 作為其旗鑑長途商務艙產品時 受到生產商 QC 問題影響 - 座位損耗比預期中快 希望今次由 Collins 製造嘅座位唔會重演歷史啦~~


個座位入面有好多細節位 係睇得出國泰真係有搵人去認真研究乘客體驗同設計呢張凳 - 呢個餐檯嘅防夾設計係一個好例子~~


機上娛樂系統嘅螢幕像素非常高之外，IFE 內嘅各個功能亦同樣地高解像度~~


播放完長達五分鐘嘅安全影片之後，商務艙入面係會繼續播放 aria suite 嘅專屬影片，介紹座位嘅各個新按鈕同功能。


受航班延誤影響，今日航班嘅座上客同黃昏下的富士山無緣 - 不過東京灣嘅夜色亦同樣美麗動人~~


Welcome Drink & Snack - 小弟當然點咗杯 Cathay Delight 啦~~


今日嘅頭盤係滿滿日式風情 - 玉子燒 八爪魚 同 日式鰻魚 各有一小份。


主菜方面，小弟今次揀咗麵豉醬比目魚 - 呢份主菜係有驚喜嘅 - 比目魚係煮得啱啱好 並沒有任何鞋或者煙靭嘅感覺至於，味道亦恰當不過~~


最後，小弟亦要咗一份生果拼盤同芝士拼盤，為呢個晚餐作結。


POV: You're having Suite Dreams~~


呢張凳係配有六組燈光同兩組控制座位仰臥嘅機關，乘客可以逐一調較各個選項之餘，亦可以通過娛樂系統選擇 “Seat Mode” 去選擇各個燈光同機關設定。 Aria Suite 係提供五個座椅模式供乘客選擇，分別係 Movie, Work, Relax, Dine & Sleep，而每個模式皆有自己嘅座位仰臥設定同燈光效果。


位於 Table Level 下嘅觸碰式螢幕係以控制燈光為主，方便乘客平臥時依然可以獨立控制各組燈光嘅開關。


雖然私隱度係非常之高，不過小弟個人認為座位長度係稍微欠奉~~


//二百年後這裡什麼也都不是　宇宙裡有什麼不是暫時?//
九龍公園游泳池, my little airport


好多時候設計師會跌入一個陷阱 - 就係佢會設計咗一個回應 “設計師覺得顧客有嘅需要”，而唔係回應 “顧客嘅真正需要” - 不過小弟可以好肯定咁話 - 呢個絕對係一個 “顧客嘅真正需要”~~


國泰照顧完乘客嘅 感覺 味覺 同 視覺，再用呢個 “Song of Cathay” 征服埋聽覺 - 基本上只差嗅覺 國泰就可以征服曬人體五感~~


估唔到飛機外置鏡頭解像度可以咁高 - 連地勤車輛嘅車輛編號都可以喺飛機上見到~~


One last look at the Aria Suite - 國泰嘅管理層對新機艙設計投入服務係採取一個非常之保守嘅態度 (飛機於 10月進入服務，不過至 2024 年 12 月為止亦只係服務 北京、上海、台北同東京呢幾個短中途目的地*~~) 希望佢可以盡快解決呢啲物流上嘅問題，並將呢一部飛機投放到長途航班上，用盡機艙嘅 full potential 啦~~

-----------------------------------------------------------------
小弟開咗個 IG 專頁啊~~ Follow along my adventures at @bombe_de_terre

如果閣下鐘意小弟既飛行報告既話, 不妨睇埋之前寫落既其他旅行報告~~

一個初嘗法航商務艙的故事

• 浸鹹水遇溺記 第十一回 Air France AF1781 AF188 LHR-CDG-HKG
  

一個歸家的故事

• 浸鹹水遇溺記 第二十六回 Cathay Pacific CX252 LHR-HKG
  

-----------------------------------------------------------------