本帖最後由 HZ8186 於 2021-9-27 21:59 編輯
"由於英國多處皆錄得確診感染肺炎個案，英國首相約翰遜宣布英國將於二零年三月二十四日進入封城狀態，為期至少三個禮拜。"
雖然英國於三月尾宣布封城，不過本地感染個案數字一直未有回落 - 喺港府開始收緊對來港人士的限制以及小弟所屬嘅大學宣布取消當屆畢業禮之後，小弟便決定於四月乘國泰航空由英國返港，提早結束小弟三年零七個月的留學生涯，並為此行寫下最後一份 浸鹹水遇溺記。
P.S. 小弟再喺呢度講翻聲唔好意思先 - 話說小弟本身係希望按時序將遇溺記推出，惟由於第二十一回遇溺記喺資料蒐集同研究上都比預期耗時，小弟會將介紹 Brooklands Museum 嘅文章押後，並先推出呢份國泰航空嘅飛行報告。小弟於二零年四月乘搭呢個航班，而文章主體則於二零年年尾已經寫好 - 為咗保持小弟於疫情初期時的觀點看法，小弟並沒有更改文章內容，惟小弟會喺文章中加上補充資料，希望大家諒解。
-- Flight Info --
CX252 LHR-HKG B-KPI Boeing 777-300ER STD 1220 ATD 1230 (BST) STA 0705 ATA 0635 (HKT)
-- Acknowledgement --
首先，小弟要喺呢度多謝呢個飛行報告嘅贊助 - 小弟老竇 - 事緣小弟同家人討論緊回港同隔離事宜時，老竇提出用佢嘅 Asia Miles 積分換一張單程商務艙機票回港。雖然當時小弟 (明顯過分樂觀地) 認為疫情應該半年就過，留翻的里數日後家庭旅行嘅時候換機票可能仲好，不過喺老竇嘅堅持下，最後佢係幫小弟換咗呢張單程回港嘅機票，並促成呢份 遇溺記 嘅出現。小弟老竇果然好有先見 - 年半後小弟仲係被困香港，寫緊呢篇遇溺記嘅同時，同鄰國通關嘅日子依然係遙遙無期...
-- 結束的開始 --
雖然航班於當日正午從希斯路機場起飛，不過小弟於航班前一日已經啟程前往機場。事源英國政府宣佈封城後，當地嘅長途巴士公司同火車公司都跟隨政府指引大大減少班次。小弟最後早一日乘 National Express 到達倫敦，於希斯路附近嘅酒店留宿一晚，再於翌日善用希斯路機場嘅 Free Travel Zone 乘巴士前往客運大樓。
喺政府發出嘅 'Essential Travel Only' 指引下，當日長途巴士上嘅乘客係寥寥可數，而連接英國南北嘅 M1 公路亦明顯比平日暢通。於 Heathrow ibis styles Hotel 留宿一晚後 (呢間酒店喺之前嘅遇溺記都出現過 - 小弟前往倫敦探訪 Brooklands Museum 嘅時候都係住呢間)，小弟喺酒店嘅自助早餐區攞咗份鬆餅，便乘免費巴士前往客運大樓，準備乘搭小弟留學生涯中的最後一程飛機。
雖然政府於兩個禮拜前宣布封城，不過當地嘅公共交通服務則維持一個 skeleton service - 小弟當日先乘諾定咸嘅輕軌系統 Nottingham Express Transit 由市郊前往 Nottingham (Midland) Train Station，再轉乘由 National Express 營運嘅長途巴士前往倫敦希斯路機場。
Taking one last look at the Leicestershire Countryside - 由於封城令已經實施越兩周，因此當日車上乘客係寥寥可數 - 即使巴士公司已把多條路線合拼及縮減班次，當日車上只有六位乘客南下而已。 (今日嘅走線為 Nottingham - Loughborough - Leicester - Heathrow - Victoria， 而疫前班次為 Nott'm - (L'boro) - Victoria 及 Nott'm - Heathrow)
Heathrow 嘅長途巴士站位於 T2 T3 之間，而巴士站亦有Heathrow Free Travel Zone 計畫內的巴士服務，免費連結客運大樓以及希斯路周邊嘅貨運設施以及酒店等，惟當晚嘅巴士站同翌日嘅客運大樓一樣，都係連人影都見唔到嘅~~
小弟當晚喺希斯路附近嘅一間 ibis styles 留宿一晚 - 雖然小弟喺英國留學期間住過多次呢個品牌嘅酒店，不過每次見到佢放喺床頭嘅裝飾 (間間房嘅配圖都係唔同嘅) 小弟都會不禁懷疑 - 究竟間房嘅設計師受咗啲咩刺激?
-- 空 城 --
喺英國嘅眾多機場之中，小弟對希斯路機場係絕對唔會感到陌生 - 雖然小弟使用呢個機場進出英國嘅次數應該係十隻手指數得晒，不過小弟喺留學生涯入面係多次黎過呢度接機同影相，小弟亦慢慢習慣咗呢個地方嘅節奏。見到一個空無一人嘅客運大樓 呢種陌生感覺真係一言難盡 - 平時滿載機場員工嘅免費接駁巴士 當早只有兩三名保安職員乘搭，而平時比肩接踵嘅 Check-In 櫃檯同離境層 當早只有回港嘅幾十名乘客以及處理該航班嘅地勤員工留連而已。
由於離境層嘅舖頭大部份都沒有營業，小弟亦沒有喺離境層久留。通過安全檢查後，小弟就直接前往三號客運大樓嘅 Cathay Pacific Business Lounge，喺接下來十二小時嘅航班之前飲杯咖啡同借份報紙睇下。(話說小弟通過咗安全檢查後先記得小弟係搭緊商務艙，係可以使用 Priority Security Lane - 雖然小弟明顯係 baka，不過由於當日航班數量有限，目測兩邊嘅人流其實係差唔多，而小弟進行安全檢查嘅時間只係用多一兩分鐘而已)
同時，除咗 Cathay Pacific 位於希斯路機場嘅貴賓室之外，由於多間屬於 Oneworld 聯盟幾航空公司都選擇使用於希斯路機場使用三號客運大樓，因此多個航空公司都選擇喺 T3 設立專屬嘅貴賓室 - 如果閣下係乘搭任何屬於 Oneworld 嘅航空公司嘅商務艙或頭等艙，或擁有相等於 Sapphire/Emerald 嘅 Oneworld 會籍，閣下係可以使用 BA, AA 或 QF 旗下嘅貴賓室嘅。(MF & QR* 於 T4 設有貴賓室，而 BA 嘅旗艦貴賓室則設於 T5) 如果國泰航空嘅貴賓室滿得滯 (可能性唔細)，或者閣下喺國泰嘅貴賓室坐悶咗嘅話 (可能性極細)，閣下係可以考慮下轉場 使用其他貴賓室嘅。
不過小弟嘅如意算盤係完全未能打響 - 原來航空公司嘅貴賓室都被政府列為 non-essential business，因此由三月尾開始，所有機場貴賓室皆被要求暫時關閉。同時，由於大部份商舖皆落入 non-essential business 嘅歸類，因此整個客運大樓只有 Boots 同 WH Smith 兩間連鎖藥房同報社營業。喺無貴賓室可歸嘅情況下 (#firstworldproblems)，最後小弟係被逼喺 Terminal 3 入面遊蕩一個半小時 - 幸好小弟當早喺酒店退房之前攞咗一份鬆餅，喺機上食午餐前都算係有少少野頂下肚咁~~
既然小弟仲有一小時先登機，不如小弟先喺呢度講少少小弟對呢班機嘅期望先啦 - 雖然小弟係之前嘅遊歷都係乘搭經濟艙居多，不過小弟係有幸乘搭過兩次商務艙嘅 - 第一次係乘國泰航空由香港飛往首爾, 而第二次係乘法國航空由倫敦經巴黎前往香港 (當中嘅經歷亦分別記載喺 第十一回遇溺記 同 冬日拜訪漢城篇 之中)。小弟對呢兩程航班都留有非常深刻嘅印象 - 前者讓小弟見識到國泰機組人員嘅敬業, 而後者則讓小弟見識法航對機上同貴賓室中膳食嘅講究。當然，呢兩程航班都係喺一個未有肺炎嘅背景下乘坐 - 究竟國泰航空嘅商務艙服務喺短途航班同長途航班上有幾大分別, 而國泰會喺疫情陰霾下提供到一個咩嘅服務, 而機上膳食又會唔會保持到疫前嘅水準呢？ 呢度全部對小弟而言都係一個未知嚟嘅。
喺機場蹉跎咗一小時歲月之後，小弟就前往閘口登機 - 由於當日乘客數量不多，當日嘅登機流程非常暢順。排隊時，地勤員工除咗為每位乘客量度體溫以及檢查證件之外，亦有一名地勤員工向各乘客派發獨立包裝嘅外科口罩 (看註)。讓地勤人員檢查登機證後，小弟快速通過登機橋，登上小弟留學生涯中的最後一程飛機。
註: 相信大家都記得一年半前大家都係喺度 "兩盒 thx" 嘅盛況啦 - 同樣地當時外科口罩喺英國都係一片難求。基於呢個短缺，英國於初期嘅防疫限制只標明民眾需要在公共室內空間配戴 "Face Covering"，而沒有指明必須配戴外科口罩。雖然當日大部份乘客皆配上外科口罩 (甚至有幾位乘客 Full Gear 上陣)，不過小弟當日喺機場亦見到兩位乘客用頸巾充當 "Face Covering" 之用。
疫情初期，由於英國政府希望減少病毒傳播，英國政府宣布民眾進行essential travel 的時候必須保持兩米社交距離 - 雖然呢個指令原則上喺倫敦地鐵服務上生效，不過相信有搭過倫敦地鐵嘅讀者都會知道呢個建議係完全無法執行嘅，而英國政府好快就放棄執行呢個指令，取而代之嘅係大量標語，更加多嘅印刷品同海量嘅乘客廣播。
一個空空如也嘅三號客運大樓 - 記得小弟四年間多次喺呢度送別友人回港，豈知今次小弟重臨舊地時，返港嘅 卻是小弟自己。
由三月尾開始，英國政府要求當地所有 non-essential business 暫時關閉，連郵政局亦不能倖免。
呢個禁令同樣適用於禁區內的商舖 - 因此整個客運大樓中只有兩間商店營運，分別係 Boots (連鎖藥房) 同 WH Smith (報社/便利店)。
[There’s no other way than to say goodbye] 疫情下嘅航班資訊屏 - 雖然呢個顯示屏只係顯示由三號客運大樓出發嘅航班 (i.e. T2,4,5 嘅航班不在此列)，不過小弟真係好難想像全球其中一個最繁忙嘅客運大樓一日只係處理九個航班嘅情況...
先唔評論究竟 ‘Britain is Great’ 呢句係咪違反商品說明條例 (之後小弟會喺 Brooklands Museum 嘅博物館報告 答呢條問題)，不過小弟係幾鍾意英國政府嘅呢個廣告 campaign - 想帶出嘅訊息簡單又直接，用黎 project soft power 無疑係最適合不過~~
Isle of Wight 係一個非常適合交通迷探訪嘅地方 - 小弟亦曾經贊文介紹 Isle of Wight 上嘅觀光巴士路線 - 有興趣不妨上 hkitalk 觀賞小弟四年寫嘅劣作 :p
So apparently airline lounges are not essential businesses. Who would’ve thought?
話說小弟同眾人一樣 有一個壞習慣，就係每次搭飛機時點都會喺登機閘口影張相 放上 ig - 一年過後，小弟可以好自豪咁講 小弟已經有一年無做過呢樣野啦
-- CX252 --
基於疫情關係, 機上嘅 Welcome Service 的確係有部份被縮減 - 當日嘅 Welcome Drink 只有水同果汁提供，而果仁同熱毛巾亦欠奉 - 取而代之嘅係 幾張由香港衛生署發出嘅表格同檢疫通知。儘管如此， the flight must go on - 機門關上後，機組人員隨即進行安全廣播同示範，而飛機喺 pushback 不久後便使用 27L 跑道起飛，開始呢個十二小時，跨越六千英哩嘅航程。
雖然國泰因為疫情關係而縮減咗機上提供嘅服務，不過機上嘅餐飲服務就無被影響 - 當日航班上係有兩個正餐提供，分別係起飛後 (英國時間) 嘅午餐，以及降落前 (香港時間) 嘅早餐，而乘客可於兩個正餐之間點叫小食。
機組人員喺起飛不久後就為乘客點餐 - 當日機組人員係配備一個類似 iPad 嘅裝置記錄乘客點餐 - 頭盤兩個選項，而主餐則有六個選項。小弟最後點咗份 ”水煮蝦配番茄辣根汁拌牛油果，蔬菜，碎蛋”、“烤鱈魚配他他醬拌小甘筍”、芝士拼盤 同 綠茶意大利芝士餅。
雖然今日起飛前並沒有派發 warm towel 供乘客 “freshen up" ，不過今日嘅午餐頭盤絕對做到呢個效果 - 沙律係嫩綠而清新，而水煮蝦係鮮甜而爽口，不過呢個頭盤嘅 MVP 絕對係沙律上嘅 辣根 (radish) - 呢塊 "蘿蔔" 同生洋蔥一樣甜中帶辣，食完之後有醒腦醒神嘅效果，為呢個行清爽路線嘅頭盤畫龍點睛。
主餐亦同樣地有驚喜 - 小弟當日點咗份 烤鱈魚配他他醬拌小甘筍 鱈魚嘅質地係嫩滑多汁，而鋪喺鱈魚頂嘅薯蓉亦焗到非常香脆 - 喺四萬呎高空做到呢個效果絕對不容易~~ 雖然呢個餐唯一美中不足就係有兩條過熟嘅蘿蔔，不過用一個芝士拼盤 同 綠茶 tiramisu 為呢個午餐作結，再配上一杯帶清新薄荷香氣嘅 Cathay Delight，真係一個享受黎。
食完午餐之後，小弟喺機艙行咗一個圈伸展頸骨，便回到座位播放電影，順便為 flyBE 嘅飛行報告準備內容。小弟亦喺呢度講少少關於座位同 Inflight Entertainment System 嘅睇法啦 - 相信呢度唔少人都會坐過 Zodiac Cirrus 嘅產品，而座位一如嘅往都係提供非常高嘅私隱度同舒適感，惟經過多年使用，商務艙所使用嘅觸碰式電視螢幕已經老化。同時，由於經濟艙用上新嘅 Vector 座椅，諷刺地經濟艙嘅螢幕配置係比商務艙高 - 希望國泰會喺下一次大修時，為商務艙座位換上新嘅屏幕啦~~
過了五小時，到了英國嘅晚餐時分，小弟點了份 芝士牛肉漢堡伴醃菜及薯條。同午餐一樣，呢個小食嘅質素亦非常高 - 漢堡包嘅麵包係烘得香脆，而肉質係完全唔乾，基本上係完全食唔出呢個係 "airline food"。小弟亦非常鍾意呢份小食嘅擺盤 - 呢個擺盤方式可以俾乘客自行為漢堡包加減配料，而對一個鍾意食 gherkin (i.e 圖中插喺麵包上嘅小黃瓜)， 不過唔鍾意漢堡包夾 gherkin 食嘅小弟黎講，呢個安排係俾滿分嘅。
晚飯過後，小弟喺一杯 Pacific Sunrise 嘅陪伴下完成香港衛生署嘅 “功課” - 睇埋 The Rise of Skywalker 之後，小弟便稍作小休，醒來的時候，航班已經到達湖南上空，而機組人員則忙於開始航班嘅 Breakfast Service。
順帶一提，雖然當日小弟機上係戴住口罩訓覺，不過戴口罩訓覺又無想像中咁焗促，而意外地小弟反而覺得機上戴住口罩訓覺係仲舒服過正常咁訓 - 由於機艙空氣係比正常乾燥，小弟之前幾次搭長途飛機訓覺時 起身時難免都感到口乾 (尤其係搭 747(KL), 757(KC) 等舊一代嘅客機) - 可能係有戴口罩嘅緣故，今次小弟起身嘅時候個喉嚨係完全唔覺得乾渴，惟口氣則有少少重而已 - 幸好 amenity kit 入面係有提供嗽口水，起身簡單梳洗後已經覺得精神煥發~~
機上早餐則可以由歐陸早餐，中式早餐，西式早餐 以及 便捷早餐 四者之間選擇 - 小弟點咗西式早餐，而呢份早餐包含芝士蘑菇奄列，英式香腸，薯仔，牛角包及生果盤。早餐嘅質素亦拍得上其他兩餐嘅質素 - 奄列唔會太熟或太老，而牛角包係香脆嘅。
小弟認為呢餐嘅牛角包係要特別表揚嘅 - 話說喺機上用有限嘅設施將一個酥皮類嘅包點翻熱，又同時保留酥皮嘅香脆係一件難度系數超高嘅事嚟。話說小弟喺機上食過最好食嘅牛角包 係三年前乘搭 Swiss Global Air Lines* 嘅 Avro RJ100 由蘇黎世前往倫敦 City Airport 時食嘅 - 由於牛角包係喺蘇黎世新鮮焗起之後直接送上機，個程機嘅牛角包嘅酥脆程度真係前無古人，後無來者 - 雖然個副作用係啲酥皮碎爆到一褲都係，不過 it was bloody worth it。今日份牛角包當然就做唔到新鮮出爐嘅酥脆效果啦，不過酥脆效果都還原到八成，而呢個已經足夠令小弟感到非常之滿足~~ (*由於當時瑞士航空正進行業務重組嘅緣故, 原則上當日營運航班嘅公司係 Swiss Global Air Lines, 而唔係 Swiss International Air Lines)
食完早餐之後，機組人員便開始為航班降落準備 - 把餐具收好，窗口打開，座椅椅背調直後，航班便於香港時間早上六點半於 07L 跑道降落，為呢個十二小時嘅航程話上一個句號。
[熟識的面孔] 雖然今日執飛 CX252 嘅 B-KPI 係披上舊塗裝，不過飛機早於 2019 年進行翻新，而經濟艙係配上新嘅 3-4-3 排位~~
相信在坐咁多位讀者見到呢個座位嘅時候都唔會咁到陌生 - 小弟亦一樣，坐低咗五分鐘已經覺得好似翻咗屋企咁。
小弟今日坐喺 12A - 呢個座位係位於頭等艙後，二號門前嘅位置。由於整個 mini cabin 只有八個座位，相對上呢八張凳嘅私隱度係比較高 - 唯由於有機艙內一塊 bulkhead 把頭等艙同商務艙隔開，因此空間感係比較少~~
Speaking about grounded planes, this majesty (G-BOAB) has been grounded for nearly 20 years...
當日航班上，國泰係維持到疫前嘅膳食水準，而基本上疫情前後膳食上嘅唯一分別只係外觀上 - 上餐時食物係附上膠蓋，要乘客自行移除而已。
當日嘅 Main Course 係有驚喜 - 小弟點咗份 烤鱈魚配他他醬拌小甘筍 鱈魚嘅質地係嫩滑多汁，而鋪喺鱈魚頂嘅薯蓉亦焗到非常香脆 - 喺四萬呎高空做到呢個效果絕對不容易~~ 雖然呢個餐唯一美中不足就係有兩條過熟嘅蘿蔔，不過用一個芝士拼盤 同 綠茶 tiramisu 為呢個午餐作結，再配上一杯帶清新薄荷香氣嘅 Cathay Delight，真係一個享受黎。
喺外國浸咗四年鹹水之後，芝士盤已經變咗小弟一個飯後缺一不可嘅菜色 - 雖然今日只有一片 Cheddar 同 Brie，不過小弟已經覺得非常滿足~~
趕快記錄 生命的美好 延後發現 世界多糟糕 無用太快 了悟這百態 上千個問號 某天才存入腦 用那水筆 蘸起雲霞 染於畫布
[在經濟艙散步才是正經事] 雖然當日商務艙係幾乎滿座，不過當日嘅經濟艙係異常沉靜 - 小弟目測經濟艙只有四十至五十位乘客，基本上每個乘客都可以免費升級 skycouch~~
記得之前喺 9gag 見過一個笑話，話當你喺空中飛行時候，你同其他人嘅 BS 係相隔至少 41000ft - 豈知 當日我同一位無症狀嘅肺炎患者相隔只有三個座位...
小弟非常鍾意呢個漢堡包嘅上菜方式 - 呢個擺盤方式可以俾乘客自行為漢堡包加減配料，而對一個鍾意食 gherkin (i.e 圖中插喺麵包上嘅小黃瓜)，不過唔鍾意漢堡包夾 gherkin 食嘅小弟黎講，呢個安排係俾滿分嘅。
小弟認為呢餐嘅牛角包係要特別表揚嘅 - 話說喺機上用有限嘅設施將一個酥皮類嘅包點翻熱，又同時保留酥皮嘅香脆係一件難度系數超高嘅事嚟。今日份牛角包當然就做唔到新鮮出爐嘅酥脆效果啦，不過酥脆效果都還原到八成，而呢個已經足夠令小弟感到非常之滿足~~
[出賣年齡系列] 唔知點解見份文件有呢個 logo 之後，成件事好似小學時代去牙科保健要家長簽同意書咁...
POV: You are home
-- Conclusion --
喺商務艙體驗完呢十二小時嘅航班後，小弟可以話 - 呢一間小弟從小認識嘅國泰航空公司從來都無離開過我地。機上嘅座椅同娛樂系統都係一貫五星級航空公司嘅質數，而航班上嘅膳食亦令小弟驚喜。
喺肺炎疫情嘅影響下，乘客體驗的確係打咗少少折扣，不過專業嘅機組人員亦彌補到呢個不足。對小弟而言，影響比較大嘅應該係喺倫敦候機時無貴賓室可以用，以及上機時沒有報紙同熱毛巾派發，不過機組如常係專業同體貼嘅 - 即使當日航班上全部機組都戴上口罩同眼罩，小弟都感受到佢地份敬業嘅。
同時，小弟亦見到機上唔少服務走向電子化 - 除咗點午餐時見到機組人員用手機為乘客記下選擇，當日機上亦沒有機組人員宣傳免稅品 - 乘客若希望購買免稅品，則需要透過椅背嘅電視系統點叫，再由機組人員將免稅品送上。究竟呢個係一個暫時嘅安排亦或是 '新常態'，小弟就不得而知，不過見到航空公司積極順應時勢推出新嘅體驗，小弟都覺得欣賞嘅。
雖然今次只係小弟第二次乘搭長途航班能夠坐上商務艙，不過無疑呢十二小時嘅旅程亦會為小弟日後嘅旅程定下一個非常高嘅要求。小弟最後亦有寫 appraisal letter 讚揚今日服務航班嘅機組，希望小弟日後會有機會喺旅途上重逢國泰航空，可以再次體驗小弟 home carrier 嘅優質服務啦~~
-- On terra firma, or am I? --
雖然小弟已經降落香港國際機場，不過小弟依然要隔多十四日先可以自由踏足香港。步行落機後，小弟先經過體溫檢查站，再步行前往衛生署喺轉機櫃檯前設立嘅辦事處。先有職員幫各旅客安裝一個叫 "居安抗疫 stayhomesafe" 嘅監控程式，再順住個隊去就有一位職員派監控手帶，檢查電話號碼 同 為旅客設置監控程式。過咗呢個位之後就有一堆櫃檯 - 喺呢度繳交之前喺機上填妥嘅文件之後，再完成多少少文書，衛生署職員派咗幾份檢疫令相關文件同一個深喉唾液樣本收集瓶俾我。完成曬所有步驟之後，小弟就可以如常辦理入境手續同取回行李，再自行前往酒店隔離十四日。
奇怪地，容許居民無接觸式入境嘅 e-道 當早係沒有開啟，全部乘客係要前往由入境處職員站崗嘅櫃檯辦理入境手續嘅。後來，小弟查考機管局網站發現 原來 e-道係有指定開放時間，而唔係 24/7 開放嘅 - 相信大家都知道全世界正值非常時期，希望 e-道 嘅開放時間會延至 24/7 啦~~
某程度上呢趟旅程好 80年代 feel - 當時唔少地方依然流行猩紅熱及瘧疾，而遊客探訪亞熱帶地區時 係要先接種猩紅熱疫苗或於探訪期間服用預防瘧疾的藥物...
雖然大家未必 100% 同意當時政府採取嘅防疫政策，不過呢樣野小弟係非常肯定嘅，就係當日為來港人士辦理檢疫手續，無論係衛生署職員定係外判職員，都係非常之專業 - 疫情爆發初期，社會對肺炎嘅認知依然唔多，而社會各界多多少少都會對有機會輸入疫情嘅外地來港人仕抱有保留或迴避嘅心態 - 小弟當日遇上嘅職員全部都非常專業，亦有職員主動幫小弟處理檢疫相關問題 - 而小弟亦想用呢個機會喺呢度感謝咁多位一年半以來 一直謹守崗位嘅機場員工~~
[結束的結束] 小弟辦理好檢疫手續及辦理入境後，小弟便前往取回寄艙行李及乘車前往檢疫酒店。一程十二小時航班嘅總結亦意味一個十四日強制檢疫嘅開始 - 小弟生性嘅話應該可以喺呢個閉關自修嘅時間寫多兩片飛行報告嘅...
-- 後記 --
雖然呢篇飛行報告係紀錄小弟留學生涯中乘搭嘅最後一程航班，不過 浸鹹水遇溺記 嘅第一季係唔會咁快結束 - 除咗有三篇 遇溺記 尚未推出之外，小弟之後亦會出文介紹其他小弟喺英國留學時嘅經歷 - 雖然呢幾篇遇溺記未必會放上呢個討論區，不過都希望各讀者繼續支持~~
浸鹹水遇溺記 呢個系列總共記載小弟乘搭 38 程航班，探訪 6 個博物館，踏上 2 班火車，以及一程船，並用上十五萬字，以 35 份旅遊報告推出。多謝咁多位四年來嘅支持，尤其係 hkitalk 同 HKADB 上嘅前輩，小弟朋友 阿 Max, 西米, 阿菜 & many more - 希望小弟呢個微少，亂寫同不完整嘅旅遊系列會啟發到大家去尋找同紀錄世界的美麗，放假唔好剩係去消費 
-- 完 --
如果閣下鐘意小弟既飛行報告既話, 不妨睇埋小弟之前寫落既浸鹹水遇溺記~~
第七回 BE7671 NCL-BHD-IOM 尋找 Jetstream 41 的故事 - 不日推出 第八回 BA3287 IOM-LCY 一個避完稅走去翻學既故事 - 不日推出 第二十一回 拜訪協和號試驗機 - Brooklands - 不日推出 第二十四回 EI283 LCY-DUB 尋找 Avro RJ 的故事 - 不日推出 第二十五回 FR534 DUB-EMA 初嘗瑞恩航空的故事 - 不日推出 第二十六回 CX252 LHR-HKG 一個歸家的故事
| 
