新記呀,你搞到條線咁樣,你不如唔好搞啦...(長文)

今日小弟中午搭82M,一班公公婆婆叔叔嬸嬸同carlo齊齊討論82M既走線...

上圖為1174剛到站

上圖為1174的carlo與一眾公公婆婆叔叔嬸嬸召開 ''乘客聯絡小組非正式會議''

伯伯: 哇!等8個字先有車架!有冇搞錯...我等到腳都痛啦...
婆婆: 呢個82號M係咪同之前84號一樣架?
師傅: 唔同...有d地方唔經架...柴灣站一開下個站就係常安街...
嬸嬸: 即係巴士廠? (中記廠)
師傅: 係呀...巴士廠呀!
婆婆: 哇!即係唔停環翠呀?
叔叔: 係啦應該...連漁灣都唔停?
師傅: 係呀,唔停漁灣架!
嬸嬸: 哇!行死人咩!乜站都唔停...咁我坐小巴好過啦!
叔叔: 呢個82M係咪夜晚唔開?
師傅: 係呀,夜晚唔開...
眾人: 哇...有冇搞錯呀...........呢d咁既線真係博執!....



上到車,一眾公公婆婆叔叔嬸嬸全部坐下層,繼續討論...

當1174由柴鐵出發,沿柴灣道東行...
(高速飛過宏德居)
婆婆: 該燴啦...呢到都唔停...
(高速飛過漁灣村)
伯伯: 哇!連呢到都唔停呀?
嬸嬸: 係0羅,行死人咩...
(到達中記車廠)
婆婆: 死0羅,行死啊婆啦!
------------------------------------------

82M貼紙遮住的,不止是84M,還遮住新記對乘客的良心...正如人們成日話: ''阿公阿婆你都蝦,你仲係人黎既?''
架車明明就經宏德居,漁灣村,環翠村,樂軒台,但就係唔停,係都要阿公阿婆晌烈日當空下行番轉頭,唔通新記你真係咁想陰乾佢?服務優質?似係糟質乘客多d喎!乘客第一?第七下話!?

以上只為個人意見,不喜勿插!
小弟多言了...多謝收睇!

所以話呢
唔改名咪好囉

改左名都無人知
又欠宣傳

真係搵著黎搞

新巴根本就唔想做非繁82M....

講真, 40分鐘我真係行過去藍灣都得~

不如成條線cut了去吧!

同意樓主講法，呢次新記82M/84M改動反映出新記的良心

如果8號車可以改番以前柴灣區咁行就好啦，
至少可以服務番新翠去宏德居,漁灣村既客

呢個又係涉及社會資源如何分配既課題，
短短一條82M同84M都有得講。

我唔係鐘意追RDP (路線發展計畫)既人，
如果我冇記錯，
早年區議會建議新巴開一條新線由藍灣特快出鰂魚涌一帶，
但基於政府開新線既政策過去一段時間內收緊好多，
唔同以前你鍾意開線就開線，
加車就加車，
極多時都要由現有車隊資源做調配。

今次84M摺埋，
基本上就係用黎交換82X同埋82M，
而82M，
稍具分析力既人都知用黎敷衍一下區議會同小西灣區居民，
八個字一架，
我來回小西灣一次都得喇。
(以上有錯請代指正)

798、797M同796B都係同一類別，
可能你會好似樓主咁講，
巴士公司咁樣真係冇陰公，
我不諱言係！
但有乜辦法？
你係巴士公司股東，
你都望佢年年賺錢分多D息畀你啦，
(相對)蝕本、存在價值低既路線無可避免要摺埋，
減低巴士公司虧損，
呢個動作又係無可避免犧牲部分乘客利益，
但係冇辦法，
商業社會就係咁。
你必須適應個大氣候，
而非個大氣候去遷就你。

但係，
樓主批評新巴做法所謂「涼薄」既同時，
有冇考慮到政府過份傾斜同側重於鐵路既運輸政策？
而呢個政策正正搞到巴士公司都冇啖好食，
捷達都晨早執包袱走啦！
「周叔」又要買埋城巴，
你睇呀純官當年投左新巴、新渡輪返黎，
加上佢畀「老友」昆左成億，
都唔荒叻左啦！
我都好想做佢「老友」！

想當年新巴同綠頂47M價錢上都鬥個你死我活，
偏偏因為據聞綠頂公司投訴而取消呢個84M具競爭力既收費，
加上84M走線比綠頂直接得多，
(好似當年綠頂仍要屈埋入新廈街)
真係吸返唔少客。

呢個事件，
你可以話新巴以本傷人，
係呀，
但係，
又有乜問題？
商業社會物競天擇適者生存，
集體運輸唔係講求「集體為先」嗎？
政府運輸政策有冇以「集體」為先？
鐵路優先，
巴士次之，
小巴再次之？

雖說的士、小巴、旅遊巴士同專利巴士數目政府都有所限制，
但係，
綜合埋四者從業員駕駛態度，
的士小巴往往就係係條街舞龍咁舞，
話停就停，恕我真係未見過專利巴士係咁。
的士小巴司機一句「搵食者，犯法呀？拉我囉！」真係殺死你！
的士小巴路中心上落客、禁區停車等等，
真係即使差佬經過都唔會理，
反而巴士個別一兩單大意外就又要安全帶又要雙扶手等整埋不設實際既野，
一切可說源於制訂政策者。

營運專利巴士公司可以話真係一個夕陽行業，
兩大財團(九龍巴士的新鴻基及城巴新巴的新創建)盡可能都唔投資咁多落去，
九巴都重有觀塘、屯門廠地皮可供發展補貼九巴業務，
城巴新巴真係刮痧都刮不到一塊地皮出來。

長篇大論完，
都係希望看官唔好只睇巴士公司cut線摺線「涼薄」，
不顧乘客，
都要宏觀一點，
睇睇政府政策有冇令呢個行業可以持續發展落去，
我諗呢樣都係大家掛在口邊的「可持續發展」。

大家可以反對我既意見，
討論一下，
交流意見，
歡迎之至。

多謝！

我又唔明, 點解阿婆明知部車唔停漁灣都照上?
又明知搭小巴好過又唁去搭呢?

可能有好多「婆婆」乘客啦，
我覺得要體諒有D老人家細個屋企冇錢畀佢地受教育，
導致今天唔識字。

唔好怪佢地。

原帖由 1005 於 2010-8-23 18:58 發表
所以話呢
唔改名咪好囉

改左名都無人知
又欠宣傳

真係搵著黎搞

新巴改名就係要等人知道同以前既84M有分別,咁先至可以搏cut車cut時間。

禁小西灣運動場有大活動,好多人一定遲大到......