本帖最後由 HZ8186 於 2019-10-9 08:26 編輯
浸鹹水遇溺記 第十五回 AY1072 AY99 尋找 ATR72 既故事
不經不覺間, 小弟已經完成係英國既第三年學業。 繼上回 [遇溺記] 乘搭 airBaltic 由倫敦格域前往里加後, 今次小弟會乘 Finnair 由里加經赫爾辛基前往香港。小弟會先乘坐一部 ATR72 由里加飛往赫爾辛基, 係當地停留十小時後再乘一部 A350 返港。
-- Flight Info -- AY1072 RIX-HEL OH-ATN 11/6 Avions de Transport Régional ATR72-500 (AT75) STD 1015 ATD 1035 (GMT+3) STA 1125 ATA 1130
AY099 HEL-HKG OH-LWK 11/6 Airbus A350-900 (A359) STD 2355 ATD 0020 (GMT+3) STA 1445 ATA 1435 (GMT+8) (+1)
-- Riga (RIX) --
呢個 RIX-HEL-HKG-HEL-AMS 既 Multi-City Itenary 既第一程就係 AY1072 RIX-HEL。當日早上, 小弟於里加乘巴士由市區往機場 - 里加機場位於里加以西十公里, 乘巴士約二十分鐘即可抵達。 無論係 Airside 定 Landside, 里加機場既設計為頗時尚, 而整個機場既設計係實而不華。
里加機場既 landside 大部份辦理登機手續既櫃檯都係俾 airBaltic 使用, 而標誌 airBaltic 既綠色亦唔難係客運大樓入面見到。通過安全檢查之後, 小弟進入 RIX 既 airside 候機。同一般歐洲機場一樣, 里加機場既候機區係有分 Schengen Area & Non-Schengen Area 既 - 所有旅客會先通過安全檢查進入 Schengen Area, 而前往非 Schengen Area 既旅客會再通過 Passport Control 進入 Non-Schengen 部份既候機區。 Riga 既 Schengen Area 候機區係非常強既空間感, 同時亦唔缺商舖同咖啡室既選擇。雖然場內有唔少設計都此以黑色做主調, 不過感覺上個客運大樓絕對唔會覺得陰沉, 反而有種好強既摩登感覺。
今日航班並非由 Finnair 直接營運, 而係用一部 NoRRA 旗下既 ATR72 營運。 NoRRA 既全名係 Nordic Regional Airlines, 而公司係由 Danish Air Transport 及 Finnair 合資而成。雖然公司唔同, 不過機上既品牌同服務則同 Finnair 既短途航線睇齊。
-- AY1072 RIX-HEL --
今日航班係用 Bus Gate 登機 - 乘客會先乘巴士前往停機坪再步行登機。ATR72 既登機閘口係設於飛機後方, 而機上亦有內置 airstairs。
NoRRA 既 ATR72 係使用一個 2+2 既 Cabin Layout, 並設有18排座位。ATR72 既機艙空間算寬敞, 唯 Overhead Bin Locker 既空間比較細。同時, Finnair 聲稱機上座位係有 31-inch Legroom, 唯由於座位椅背比較厚既關係, 實質 Legroom 只係有 29~30 inch 左右。座位椅背偏厚 呢點用舒適度黎講都唔算係壞事黎 - NoRRA 機上係用上仿皮座位, 而座椅既 Padding 亦非常舒服。唯座位唯一既缺點就係佢設有 Recline 既功能 - 係一個 29~30 inch legroom 既情況下再加上前方乘客躺後, 基本上你係被困係個座位入面。
飛機於 10:30am pushback 及開始滑行。 ATR 既其中一個特色就係飛機進行 pushback 時係無需地勤協助 - 雖然引擎只可以單方向轉, 唯螺旋槳既角度係可以調教。因此引擎係可以把空氣向前推, 而機長係可以善用呢個功能於降落時使用引擎提供的 Reverse Thrust, 及於停機坪啟動引擎後, 直接使用 reverse thrust pushback。
今日既用機有八年機齡 - 雖然飛機既內籠屬於上一代既設計, 不過機艙係保持得好妥善同乾淨既。唯整體上機上既舒適度則令小弟有少少失望 - 今日小弟坐係 3A, 位於引擎前方。 飛機起飛及爬升時, 引擎聲量同震動都非常之大, 直至飛機進入巡航時才減至一個可接受既水平。 即使小弟佩戴配有消音功能既耳機, 小弟依然可以好清楚咁聽到引擎既咆哮聲。
另一個比較次要既問題為等候滑行的時候機艙內沒有冷氣供應。由機門關上至引擎啟動的十五分鐘間機上並無新鮮空氣提供, 而機艙內係比較焗促。不過如果等候時間再延遲, 或當時正值盛夏, 機艙環境係會極不舒服。而小弟亦開始有少少同情某國家會 "開窗吸口新鮮空氣" 既人仕...
到達巡航高度後, 機組人員迅速開始機上既 inflight service。芬蘭航空係短途航班上係只提供免費飲料 - 酒精類飲品同小食等都係要另外購買既, 而價錢方面亦算偏高既。當日小弟點咗杯芬蘭航空既招牌飲品 - 藍莓汁, 而係一個一小時既航班上有杯嘢飲濕下口都算唔錯既。
機上提供既 Inflight Entertainment 則比較原始 - 乘客係可以睇窗外景色, 或翻閱 Finnair 既雜誌。呢本雜誌叫 Blue Wings, 而內頁亦介紹唔少波羅的海同北歐既景點。雜誌內亦花咗唔少篇幅介紹芬蘭既城市, 例如芬蘭既舊首府 Turku 及內陸城市 Tampere 等等。同時, 雜誌後半部亦提供唔少有用資訊, 例如 Finnair 既路線版圖, 以及係 Helsinki 轉機既安排等等。
餘下既航程則非常順暢 - 航班穿過芬蘭海峽便開始準備降落, 而機組人員亦透過 PA 公佈轉機安排及 Connecting Flight 既閘口。AY1072 於 11:30 到達 Helsinki Vantaa Airport, 並迅速滑行至停機坪。直接串過 Baggage Reclaim 後, 小弟乘搭當地火車前往市區, 展開小弟既 Helsinki Day Trip。
一個充滿青色既里加機場離境大堂 - airBaltic 係波羅的海三國既主要航空公司之一, 而佢係里加既 Route Network 係相當廣闊既 - 基本上由 Abu Dhabi 到 Aberdeen 都有航班直達~~
里加機場既候機區 - 雖然機場係以黑色為主調, 不過感覺上完全唔陰沉。另外, 走廊盡頭為出境設施 - 過咗 Passport Control 後則可到 Non-Schengen 部份既候機區。
Finnair 既機票 - 小弟非常鐘意張機票既背景, 又可以帶出芬蘭既特色之餘又唔會過份搶眼。
有唔少第一二代既 ATR 於退下客運服務後被改裝成貨機, 而呢部 Sprint Air 既 ATR 72-200(F) 亦唔例外。里加機場係有停泊唔少特別既飛機 - 除咗機場旁係有一個航空博物館之外, 跑道旁亦有部 Aeroflot 既 Tu-134。
今日既 Inbound Flight AY1071 降落 - 留意位於機頭位置既貨倉門 - 由於位置限制關係, ATR 既客艙下方係無位置放置機艙行李, 而機艙行李係會放係機頭及機尾兩個位置
ATR 既登機門係位於機尾, 而飛機亦內置樓梯, 到達目的地時亦無須另外向機場借用登機梯 P.S. 唔知點解呢個角度影 影到部飛機好肥 lol
ATR72 既標準 2-2 座椅排位 - 機上既座椅係幾舒服既, 唯 Legroom 則稍為欠奉
ATR 既機頭 - 圖中左方為行李艙位置, 而圖中間為一張可移動既 Jumpseat。 Crew Jumpseat 後方則為通往駕駛艙既通道 以及背向飛行方向既座位 1C & 1D, 相信呢兩個座位係世上少有向後既經濟艙座位之一。
Complimentary Service on NoRRA - 藍莓汁
誰 無辜 不應公開傷勢 搏安撫 然後放心 分給我 推給我 做那位屠夫 周國賢 我們都不是無辜的
雖然航班係由 NoRRA 營運, 不過基本上機上既服務都同 Finnair 睇齊 - 而機上既 Buy Onboard Menu 同雜誌都係用芬蘭航空既 Branding
今日既用機 OH-ATN ATR 72-500, 機齡八歲, 算係第三代既 ATR。順帶一提, Finnair 亦係 ATR72 既 Launch Customer, 並於 1989 年開始使用 ATR72 執飛其區域航線。
Helsinki Airport 既 Schengen Area - 雖然呢個客運大樓係比較舊, 不過係同樣 Functional & Navigatable
-- Helsinki Vantaa (HEL) --
於赫爾辛基遊覽一天後, 小弟乘火車再次回到 Helsinki Vantaa Airport。由於小弟於里加已經把行李寄艙至香港, 小弟當日於赫爾辛基無需再次辦理登機手續, 穿過安全檢查直接前往 airside 便可。
同里加機場一樣, 赫爾辛基機場可以分為 Schengen 及 Non-Schengen 兩個部份。雖然 Schengen 部份既客運大樓比較舊, 不過商舖種類及候機空間係應有盡有既。Non-Schengen 部份設計非常新穎, 木紋牆身配上落地玻璃除咗做出一個非常空曠既感覺之外, 亦做到一個好柔和, 舒服既氣氛出黎。
小弟特別欣賞 Helsinki Airport 設於 Schengen Area 既候機/展覽空間 "Aukio"。 機場於呢個空間設置多部投影機及 LED 顯示屏, 並會模擬芬蘭的郊區景點並播放相關影像及聲頻。旅客除咗可以係呢個空間感受芬蘭既自然景觀之外, 亦可以係呢個空間休息。
-- AY099 HEL-HKG --
於候機區遊蕩一小時後, 小弟便前往閘口登機。今日 AY099 既派機為 OH-LWK, 為一部剛剛年滿兩歲既 A350-900。今次為小弟第一次乘搭 A350 - 即使小弟於過往暑假接觸過唔少 A350, 不過 A350 對小弟而言依然有股魅力係度。首先, 飛機俾小弟既第一印象就係機艙空間感覺上非常空曠, 基本上係毫無壓迫感。呢點可以歸功於 Airbus 既機艙設計 - 由於頭頂既行李架既位置比上一代設計貼近機頂, 頭頂空間其實係多咗好多。第二, A350 的窗口亦比上一代客機大 - 雖然論窗口大細 A350 係比唔上同期既 B787, 不過 A350 既設計一樣係可以減少幽閉感, 而 A350 係配上實體既窗簾。
硬件方面, 芬蘭航空既長途經濟艙產品係幾好既。一上到機 每個座位已經有一支水, 一個枕頭, 毛氈及耳機, 而座位亦設有 Universal & USB 既供電設備。 Finnair 既 A350 經濟艙係用一個標準 3-3-3 既座椅排位, 而座位各有 32 inch legroom。小弟座位為 27C, 為一個位於經濟艙前半部份的走廊位。即使小弟身高 5"9, 小弟係依然有唔少 legroom, 坐足十小時亦唔會覺得辛苦。
進入巡航高度後, 機組人員便開始航班上既第一個 Meal Service - 當晚小弟點咗份繪牛肉配薯蓉, 配一份酸菜沙律, 一塊北歐版 Oreo, 同一個餐包。個酸菜沙律係幾開胃既, 唯份牛肉對小弟黎講就偏鹹。雖然整體上 晚餐既份量偏細, 不過用一個 red eye flight (i.e. 食飽就瞓) 既標準黎講, 呢個份量係啱啱好既~~
順帶一提, Finnair 係長途航班上係有一個 Buy Onboard 既 Menu 既 - 芬蘭航空係航班途中係有提供小食或杯面供購買。另外, 芬蘭航空只會於用餐時免費提供紅白酒 - 其他酒類, 例如 Gin 或 Whiskey 等, 都要另外選購。
機上娛樂系統則只屬一般 - 雖然椅背螢幕反應非常快及高解像度, 唯系統內容方面則令小弟比較失望 - IFE 係有齊 Marvel 既新劇同出名既荷里活片, 不過電視劇集同音樂方面基本上係無咁滯。另外, 座椅設計同 IFE 設計都有改善之處 - 基本上只要閣下前方既乘客躺後, 閣下只係可以斜住用 IFE。同時, 由於螢幕係無自動關閉既功能, 當日航班上有唔少螢幕長期亮着, 小弟唔用眼罩都瞓唔著。
機組人員於降落前兩小時派發早餐 - 早餐係有份配時蔬既薯餅, 乳酪, 鬆餅及餐包。早餐味道方面只係一般 - 時蔬係偏苦, 而設計餐單既職員明顯地呢世人係未食過一個煮熟咗之後擺左半日既燈籠椒...
Meal Service 完結不久後, 航班進入香港上空並準備降落。航班於 14:30 降落, 並為小弟既芬蘭航空體驗畫上一個逗號。九月中小弟會再次乘搭芬蘭航空經 Helsinki 前往 Amsterdam, 而屆時小弟將會乘搭 Finnair 既 A350 & A320。
-- Conclusion --
總結呢趟旅程, 小弟會覺得芬蘭航空經濟艙體驗係一個勉強合格既體驗 - 雖然芬蘭航空經濟艙既設備同服務都齊全, 唯整個旅程欠缺一個 wow factor。
首先, 芬蘭航空既機組人員服務態度亦只屬一般 - AY1072 既機組人員為非常專業同友善 - 雖然航班只有六十分鐘, 不過機組人員係派餐同收餐都好爽手, 全程都面帶笑容, 同乘客亦有傾有笑。唯 AY099 既機組人員相比下 面色則比較黑同埋硬板 - 收餐派餐同樣爽手, 不過俾到小弟個種感覺係趕住收工個種爽手咯...
另外, Finnair 既網上預辦登機系統唔係咁 User Friendly - 網上預辦登機系統只會於航班開出前 36 小時開啟, 同時航班出發前 36 小時閣下亦可以免費揀位。唯呢個 -36h rule 係每個航班獨立計算, 變相小弟於 Check-In AY1072 既時候係可以同時辦理 AY099 既登機手續, 唯揀位方面則只能辦妥 AY1072 的揀位, AY099 既揀位則要再等多半日先可以免費揀。
今次旅程入面最精彩莫過於有十小時可以係赫爾辛基遊玩, 而由於兩班航班相隔小於 24h, 小弟可以於里加直接把行李機艙至香港, 無須為寄存行李而煩惱。其實唔少航空公司都會容許乘客有 long layover, 並於 layover 期間離開機場既 - 只要兩班機既時間足以讓閣下, 以及閣下確認機艙行李可以寄往最終目的地, 其實呢類型既 Day Trip 係幾好玩既。
最後, 論性價比而言其實呢趟旅程既 CP 值係非常高 - 雖然小弟於航班出發前早兩個月先買機票, 不過張機票最後埋單只係盛惠 €500。同時, 加上歐元匯價長期低迷, 最後小弟只係俾咗 $4400 買咗呢張 RIX-HEL-HKG-HEL-AMS 既 Multi-City 機票。據小弟理解 自芬蘭航空從把 HKG-HEL 航線變左 Twice-Daily 之後其實 Finnair 既價錢相對上一直偏低, 而如果閣下係慳住北歐或波羅的海三國既, 芬蘭航空絕對會係閣下可以考慮既航空公司之一。
Helsinki Airport Railway Station - 車站設計帶有少量工業風味, 小弟係幾欣賞個設計既~~
Helsinki 其實係一個幾適宜 Day Trip 既城市黎 - 雖然小弟對佢既大博物館唔會有太大興趣, 不過 Helsinki 係有唔少建築睇。小弟今次去咗 Littala 既 Design Studio 同 Katajanokka 睇教堂, 行咗九個鐘之後就搭火車翻機場搭 A350 翻香港~~
Helsinki Airport 既 Landside - 如圖所見, 內陸機既客運大樓係比較舊, 不過個機場係幾有效率既
赫爾辛基機場係通過安全檢查後同出境後都設有 Duty Free Shop, 變相乘客係要行兩次 DFS~~
Simply serene.
赫爾辛基既 Non-Schengen 候機區係設計得幾好 - 有足夠既座椅之外亦有唔少商舖, 環境亦幾清潔及空曠~~
登機 - 機艙空間係比上代 A330 感覺上大
芬蘭航空既刊物 - 購物雜誌, 旅遊雜誌, 餐單及安全卡
Dinner Service on Finnair's A350 - 晚餐份量係偏細, 而份牛肉薯蓉係偏鹹
Inflight Entertainment System - 螢幕係高清, 亦有唔少 Marvel 既電影, 唯無電視劇睇呢點反而有少少扣分
Breakfast Service on Finnair's A350 - 早餐質數只係一般 - 薯餅係幾好食, 不過蔬菜係帶少量苦味既
And that is the end of my trip report! 小弟係九月會再次搭芬蘭航空經 Helsinki 前往 Amsterdam, 屆時睇下 ex-HKG 既膳食同機上服務會否有改善啦~~
如果閣下鐘意小弟既飛行報告既話, 不妨睇埋小弟之前寫落既飛行報告~~
浸鹹水遇溺記 第七回 BE7671 NCL-BHD-IOM 尋找 Jetstream 41 的故事 - 不日推出 第八回 BA3287 IOM-LCY 一個避完稅走去翻學既故事 - 不日推出
| 
樓主
