先講交通: -Zug fällt aus 「班次取消」-大家來德國玩搭火車一定要認住呢個字,我開頭唔識,要查字典先知大鑊。 -成個NRW都有不少鐵路工程進行緊,可以參考 呢度,係德文,但有圖睇。 -至於Köln - Düsseldorf - Duisburg - Dortmund 呢條繁忙嘅走廊,就會有升級改造,包括換新車,換營運商,路段同車站改善等,話會做到15分鐘一班車喎(老實講我覺得仲係唔夠密),仲改左個新名叫做 Rhein-Ruhr-Express (RRX),今年十二月就會有新車落地(稍後貼相)。而家呢段路幾條RE線雖然有夾過時間,但不時延誤,明明半小時好似旺角東去大埔嘅車程,搞到又要追車又要中途轉車咁麻煩,仲要完全無平衡嘅巴士線可以選擇,一係你自己開車,真係幾唔方便,希望日後有改善啦!
講講文化: -德國人行乞都常見架,反而土耳其人或中東人行乞則較少。 -土耳其人/中東人係難民定移民勉強都可以分辨到,會講流利德文嘅都係落地生根嘅,尤其係中年以下嘅人,加上移民嘅有工做有學返,唔會聯群結黨喺街上遊手好閒。NRW可能係因為七八十年代需要外勞,所以引入左好多土耳其移民。 -至於車上嘅飲酒青年/中年,算係呢度嘅文化,可能係去睇波或其他活動要飲酒,三五個人尤其係男人就會唔開車搭火車,一路飲啤酒一路大聲傾計,可能會吵吵鬧鬧咁,但通常都無乜事嘅。
|