龜巴可見有咩未來？

龜巴，或者有啲人叫開畸巴，咁多年嚟都係咁畸形。係就係非專，佢張PSL又唔同啲，可以跟專利巴一樣有柴油免稅優惠，但啲新車同非專一樣得十五年命。服務詳情又可以話改就改，唔駛上聖經，不過加價就要跟佢老母一齊加，但其實佢又有兩邊老母，結果大西北同大埔今時今日可以唔同價嘅。

寫呢篇吹水文主要係有兩個契機。第一係因為早兩個禮拜隔離po有風吹，話其實大龜嫌龜仔冇肉食想斷捨離，但係又拆唔成帳，又氹唔掂太公，所以逼住捱落去。二嚟係睇左條綠van 95K嘅片，呢條線本身係前畸記同營運商一齊開線嘅，比西鐵乘客免費駁翻上荃灣站，但今年七月改為同其他小巴睇齊嘅五毫子優惠冇耐，就大幅減班改為平日早繁服務，證明轉乘客佔大多數。加上近月大西北取消包含龜仔同中龜嘅全日通嘅舉動，難免唔被人認為，大西北盤數真係冇以前咁好景。

事出必有因嘅，龜仔網絡其實自從西鐵通車之後，其實冇點大變。但近年似乎因為有啲有心人坐陣嘅關係，做多左好多唔一定直接有錢賺，但絕對可以加強市佔率嘅動作，計有幫紅van清客嘅紅葉專線K66A/S (清到同紅巴一齊爭客)，有幫綠van捱義氣嘅K74拉到博愛/開K53特班落業旺，有自家服務範圍延伸嘅K76S/K52A，有取代聖經做新區接駁線嘅K54，當然亦有善用有限資源而出現嘅 K52拉直/K58拉線/K54A/K51A之流。前者代表佢好有心做大，亦都搵到啲有真銀落袋，唔駛比轉乘嘅市場，但後者都代表其實佢資源緊拙，佢唔係冇車，事實上佢買車都幾進取，但似乎人嘅問題居多 (亦都出過名話待遇唔靚)。

好，咁嚟緊可以點？

其實呢幾年嚟都唔係冇風聲話希望放棄龜仔，例如2017年曾經有新聞指出，龜老母有同紅巴研究過將大埔龜仔正式收歸紅巴旗下。又或者兩年前，亦有交通界議員提出將部份龜仔改為小巴，雖然兩者都無疾而終，但空穴來風又未必無因，有可能大龜嗰陣已經冧過放手。

網絡方面，相信大龜以後唔會再咁順攤，聽啲區議員建議插旗開新線，所以將來大西北新地盤，例如康寶路，丹桂村甚至廈村，都未必會再有新龜仔，極其量順路嘅話可以用現有路線兜下(例如橫州公屋/朗天苑)。咁樣可以確保車隊唔再擴大，亦可以控制轉乘人數。另外，我都有興趣睇下大龜會唔會主動放多啲地盤比其他人，例如54區可以有其他顏色嘅區內線，或者流浮山/大棠可以有區外線，以分流當區新增人口嗎？

龜仔最有價值在於東西鐵轉乘，咁多年嚟都令冇龜嘅地方(富亨為表表者)眼紅。當然最好亦最政治正確嘅做法就係一切不變，而理論上大龜有財力都有社會責任繼續咁做。但若果政策上有改變，令到大龜有機會破局止血呢?

第一個可能性係，龜仔可以加價，或者減轉乘金額。現時大西北龜加價要跟大龜整體調整，導致每年先加得一毫，若果可以獨立加價嘅話，假設唔影響轉乘，最大影響會係大西北村落嘅人，因為佢地搭龜仔唔一定係轉西鐵出城。但佢地本身大多都有車或者更貴嘅小巴，所以理論上影響應該唔大，同時呢批客為數唔多，唔一定太幫補到條數。至於大埔龜就跟開紅巴加價，但係本身大家禮拜日都要另外課金嘅時候，又會唔會對減轉乘冇咁大抗拒呢？

另一方面，若果減轉乘一次過減太多嘅話，百分比會惹人非議(尤其如果重鐵路程較短)，但減得太少嘅話又會令到收費系統更加亂。其中一個做法，係提早預告下次加價會減五毫/一蚊轉乘，再用幾年時間加上去，當然始終作為龜仔，最終都唔一定要完全取消轉乘嘅，半價轉乘亦可。同埋當然要同中龜夾下轉乘，冇理由中龜有得免費轉，龜仔冇得，到時條506就載空。

第二個可能性係轉營運商。事實上呢幾年嚟都見到太公取態係想打破獨市，雖然由619綠van到初代元天線甚至冇出過世嘅屯天線都好失敗，但市場上都慢慢多左69/E36A/621/50M呢啲選擇。直接將龜仔過檔就肯定會暴動，過完檔好大機會都要補貼轉乘一段長時間，結果啲臨時措施隨時又臨時翻十幾年。另一方面，其他營運商又有冇誘因收一個冇乜肉食嘅價錢接手呢啲區內線，請多一大批師傅呢？又隨時要好似當年95K咁包底先得。已經唔講搵邊間營運商做，呢度都夠講三百版。

龜仔始終唔係本業，唔同三巴呻兩句就有金蛋口岸線執金。所以去到最後點呻都好，都好難就咁放生啲龜仔，如果上面搵到個大家都心服口服嘅方法嘅話我都會佩服，尤其太公咁尊重傳統，冇咩事就以不變應萬變算數。

大西北嗰邊，如果取消除506外龜仔轉乘可以換屯馬綫平日非繁開5.5分鐘一班、星期六朝七晚十紅日朝九晚十開4.7分鐘一班，又點睇？🤭

統一價錢做輕鐵最低消費係致命傷，好似506,K51,K52,K53,K65全程咁
其實總乘車里數已經遠超越輕鐵相同距離車費，
所以K52A開始兩段票已經係一個好開始，如果各K巴都加到$5.4，
雖然令短程輕鐵轉乘多咗錢，但就少咗好多收費漏洞。

首先佢堆巴士路線係大部分都係轉鐵為主，如果因為「蝕錢」而唔做嘅話，咁本身重鐵嗰大份會跌幾多客？當年西鐵無人坐正正就係因為貴又唔方便，取消轉乘優惠就中晒。

退多步講，龜仔唔想做巴士呢個傳聞間唔中都有出現，但最後就係又申請要咗條K54，又要埋架K52A同九巴爭客。個人真係唔認為佢會放棄到巴士。輕鐵夠蝕足咁多年錢，咪一樣未放棄。

Ricky403 發表於 2025-11-11 10:55
大西北嗰邊，如果取消除506外龜仔轉乘可以換屯馬綫平日非繁開5.5分鐘一班、星期六朝七晚十紅日朝九晚十開4. ...

田少有講過票價包含鐵巴價錢，咁係咪條重鐵去相應大西北車站都要減返價先？
以大西北-荃灣西為例，$14.9已經係輕鐵再加荃灣M巴價錢……

當年K16最後時期都不設轉乘優惠，其實部分龜仔又得唔得？

話咁易放棄，嗰個部門養左幾多人，安置到先得。況且，又唔係其他地方冇錢賺。呢啲處理得唔好，份工都無埋，以不變應萬變。

話唔想做不過又咪係搶K54返黎

如果巴士cut哂轉乘優惠咁輕鐵又使唔使cut

如果鐵巴轉專利嘅話，會唔會解決到票價問題？