hkitalk.net 香港交通資訊網

 找回密碼
 會員申請加入
Custom Search

Login

搜索

 

Advertisement

 
(B0)香港巴士車務及車廂設備 (B1)香港巴士廣告消息/廣告車行踪 (B2)香港巴士討論 [熱門] [精華] (B3)巴士攝影作品貼圖區 [熱門] [精華] (B3i)即拍即貼 -手機相&翻拍Mon相 (B4)兩岸三地巴士討論 [精華] (B5)外地巴士討論 [精華]

Advertisement


(B6)旅遊巴士及過境巴士 [精華] (B7)巴士特別所見 (B11)巴士精華區 (B22)巴士迷吹水區   (V)私家車,商用車,政府及特種車輛 [精華]
(A6)相片及短片分享/攝影技術 (A10)香港地方討論 [精華] (A11)消費著數及飲食資訊 (A16)建築物機電裝置及設備 (A19)問路專區 (N)其他討論題目  
(F1)交通路線建議 (C2)航空 [精華] (C3)海上交通及船隻 [精華] (D1)公共交通有關商品 [精華]   (Y)hkitalk.net會員福利部 (Z)站務資源中心
(R1)香港鐵路 [精華] (R2)香港電車 [精華] (R3)港外鐵路 [精華]   (O1)omsi討論區 (O2)omsi下載區 (O3)omsi教學及求助區
(M1)小型巴士綜合討論 (M2)小型巴士多媒體分享區 (M3)香港小型巴士字軌表     最新板務資訊  
 

Advertisement

 

查看: 3478|回復: 4

[飛行報告] 浸鹹水遇溺記 番外篇 KC992 KC929 Air Astana B757 飛行報告

[複製鏈接]

1625

iPower

1556

aPower

1180

HugeC

Level 2

Rank: 2Rank: 2

積分
3432
發表於 2020-2-24 02:00 | 顯示全部樓層 |閱讀模式

                                    Advertisement




係卡薩克斯坦花咗一個星期遊山玩水之後, 小弟係時候返港面對現實。今程機小弟會搭兩程 Air Astana 既 757 由卡薩克斯坦既首都 Nur-Sultan 經 Almaty 返港。呢篇飛行報告除咗講飛行體驗之外,亦會講多少少 Air Astana 既背景同小弟對呢間航空公司既睇法。

註: 如閣下想睇 Air Astana 機上配套以及 ex-HKG 既飛機餐既話,閣下係可以睇翻小弟既前一篇飛行報告 - KC930 HKG > ALA

-- Delay no more? --

當日早上, 小弟收到 Air Astana 既電郵指 KC996 因為航班調動已被取消, 而小弟一行三人已被安排乘搭遲一小時出發既 KC992 前往 Almaty。小弟當晚抵達機場後, 地勤人員亦宣佈 KC992 因為機件問題會延誤起飛, 而原先執飛 KC992 既 P4-EAS 亦被更換為由 P4-GAS 執飛。當小弟上前查詢 Connecting Flight 既時候,  位地勤見到小弟一行三人係前往香港後, 好 cool 咁話 "Same Plane" 之後就叫我地耐心等候。最後 KC992係延誤咗大約兩小時, 而 KC929 係於原定時間後一個半小時降落香港國際機場。

好啦, Delays Aside, 就睇下 Air Astana 係一班內陸航班同一班 Trans-Con 既航班上有咩可以 offer 俾經濟艙既乘客啦~~

-- Flight Info --

KC996 (CX6220) TSE-ALA Cancelled

KC992 (CX6222) TSE-ALA P4-GAS
Boeing 757-200 (B752)
STD 2130 ATD 2335
STA 2310 ATA 0100

KC929 (CX6228) ALA-HKG P4-GAS
Boeing 757-200 (B752)
STD 0020 ATD 0225
STA 0825 ATA 0955

-- Air Astana --

有別於其他中亞國家既 Flag Carrier, Air Astana 係一間非國營既航空公司, 而 Air Astana 自己亦有一段好得意既 Corporate History。踏入二十一世紀初期, 英國軍火製造商 BAE Systems 正與卡薩克政府商討售賣雷達系統既事宜, 而當時卡薩克政府亦 '邀請' BAE Systems 於當地同卡薩克斯既國家主權財富基金 合資設立一間飛國內航線既航空公司。就係咁, 一單軍火交易就促進咗 Air Astana 既誕生。

唯兩者之間既合作關係好快結束 - 卡薩克政府最後係無購入 BAE 既雷達系統, 而 BAE 亦相繼把卡薩克斯坦既職員調走, 並遺下 Air Astana 呢個 "孤兒"。失去政府支持既 Air Astana 亦受到唔少國內既聲音反對同阻撓, 而 Air Astana 初期只係靠多部 Fokker 50 同 Boeing 737 營運內陸航班。 唯 Air Astana 既業務於 04 年遇上轉機 - 當時既國營航空 Air Kazakhstan 遇上財政問題繼而倒閉, 而 Air Astana 係成功接管 Air Kazakhstan 倒閉留下既國際路線, 並成為新既 Flag Carrier。一位國泰既前 exec Peter Foster OBE 亦於 05年加入 Air Astana, 並帶領 Air Astana 發展及開拓新航線。

相信明眼既讀者見到首都名同航空公司名後感到疑惑 - Kazakhstan 既首都唔係叫 Nur-Sultan 咩? 卡薩克斯坦於 2019年三月宣佈首都 Astana 會改名為 Nur-Sultan, 以紀念卡薩克斯坦既總統。其實今次唔係卡薩克斯坦既新首都第一次改名既 - 呢個城市原名係 Akmola, 而於蘇聯時期被稱為 Tselinograd (首都機場既 IATA Code 係源自呢個名)。卡薩克斯坦於 1998 年從 Almaty 遷都時, Akmola 被命名 Astana, 而二十一年後首都再次被改名為 Nur-Sultan。不過究竟 Air Astana 會唔會改名做 Air Nur-Sultan 呢點 小弟就唔清楚啦~~

-- KC992 TSE - ALA --

當日晚上小弟一行三人乘的士到達 Nur-Sultan Nazerbayev International Airport。TSE 係有兩個客運大樓, 而今日小弟係用處理內陸航班既二號客運大樓。雖然客運大樓整體上唔係好大, 不過由於內陸航班唔多, 個樓面大小算係適中既。

航班最終於晚上十一點左右開始登機, 並於十一點半左右起飛。 起飛前, 機長用三種語言招呼乘客並為航班延誤至歉。播放安全短片後, 機組人員向各乘客派發 Boiled Sweets, 並準備起飛程序。

雖然當日執飛 KC992 既波音 757 有 23 年機齡, 不過其引擎輸出依然非常強勁 - 757 係可以選擇配 PW 或 RR 兩款引擎, 而 Air Astana/ex-LTU 旗下既 757 係配上 Rolls Royce 既 RB211-535 引擎。呢部引擎基本上係一部縮細咗既 RB211-524, 而引擎輸出有 193 kN。KC992 航程只有 951 km, 而係油缸半滿既情況下, 當晚一開 full power 部飛機就一支箭咁飛咗上去。

到達巡航高度後, 機組人員隨即開始 Inflight Service。雖然 Nur-Sultan 去 Almaty 既航程只有九十分鐘, 不過機上依然係有一個餐盒派發, 而呢個餐盒入面有一份乳酪, 山楂條同三文治。係一個 1h30 既航班上, 呢個餐盒論份量係綽綽有餘, 而味道方面呢個 "卡薩克版雞卷" 係幾好既~~

相比上程 遇溺記 KC930, 今程機組人員做嘢係非常爽手 - 派餐同收餐基本上半小時攪掂曬, 而收餐後機組隨即把機艙調暗。轉眼間 航班已經到達 Almaty 上空並準備降落 - 進行 Landing Check 後, 航班於凌晨一時到達阿拉木圖國際機場。小弟抵埗後, 隨即進入國際航線既離境大堂, 再次通過安全檢查同辦妥離境手續後, 小弟便前往候機區等候再次登上 P4-GAS。

-- Almaty Airport (ALA) --

Almaty 係卡薩克斯坦既最大城市兼前首都, 而呢個機場亦係中亞入面一個重要既貨運樞紐。 唯由於機場擴展計畫一直都未能拍板, 機場於 04 年重建後就再沒有發展。呢個亦代表機場既使用度已經遠超當年既設計容量 - 由於閘口位置稀少, 唔少國內航班係要用 Bus Gate 登機。同時, 為咗節省空間, 檢查登機證呢個步驟甚至係於登機橋上面做~~

另外, Almaty Airport 既 Airside 位置分配係有少少奇怪 - 真正既候機空間其實好細, 唯商舖空間係大得好過份。Airside 共有三間 Cafe, 一間酒舖, 一間賣手信既, 同一間鋪面面積超級大既 Duty Free - 相信如果機場把免稅店三份一空間改為候機空間, 相信現有狀況係可以大大改善~~

-- KC929 ALA-HKG --

航班於早上二時開始登機, 並於半小時後起飛。由於呢個係一個 Red Eye Flight 既關係, 航班進入巡航高度後 機組人員就第一時間進行 Inflight Service。派熱毛巾後, 機組人員隨即派發 "晚餐" - 主菜有一份牛肉意粉, 配上沙律,餐包芝士, 山楂條同朱古力條。份牛肉意粉係幾好食, 唔會過份鹹, 而沙律係幾開胃既。晚餐過後, 機組人員隨即把機艙燈光調暗。小弟睇多半套 John Wick 同睇埋日出後, 便戴上眼罩小睡四小時。轉眼間, 機組人員已經準備降落香港國際機場, 而小弟既卡薩克斯坦七日遊亦在此結束。

-- Conclusion --

Air Astana 既航班延誤/取消處理係做得幾好 - KC 取消 KC996/CX6220 既時候, 小弟同小弟家人係各收到 SMS 同電郵通知小弟一行三人已經被自動 Rebook 咗上 KC992/CX6222。而當晚 KC992/CX6222 延誤既時候, 地勤人員亦有盡量提供最新既 ETD 俾我地。有位地勤甚至幫小弟確認咗 KC929 同 KC992 係會用同一部飛機執飛 - 儘管佢提供唔到一個確實既航班起飛時間, 不過至少小弟一行三人當晚唔駛擔心搭唔到 KC929/CX6228 呢班 Connecting Flight 而滯留 Almaty。當然, 最好既處理手法就係本身唔好取消航班啦, 不過 Air Astana 既當晚既處理係做得幾好既。

另外, Air Astana 既航班準時度亦有待改善之處 - 小弟之後上網翻閱 KC 既航班, 發現 KC 既航班延誤情況其實係幾普遍。小弟相信呢個問題係源自 Air Astana 細小既長途機隊 - Air Astana 只有 3x B767, 4x B757, 6x A320/1neo, 而呢 13 部飛機更要同時服務 Kazakhstan 既新首都同舊首都 Nur Sultan & Almaty... 當遇上航班延誤或設備故障時, 航空公司係難以作出補救措施, 只能把後續航班順延, 做成一個骨牌效應。希望 Air Astana 引入 A321LR 等新機後 呢個情況可以改善啦~~

留意今日航班用機既註冊篇號係 'P4' 字頭 - 呢個 prefix 並非屬於卡薩克斯, 而係屬於隸屬荷蘭既加勒比海島嶼 Aruba。呢個註冊安排並非獨有於 P4-GAS 身上, 而 Air Astana 整個機隊都係於 Aruba 註冊。據小弟理解, Air Astana 係為咗獲取歐盟既民航處批准飛進歐盟領空而作出此安排 - 所有於 Aruba 註冊既客機係要跟隨 Aruba (i.e. 荷蘭&歐盟) 既標準進行保養及維修。因此, 呢個安排係有助 Air Astana 既飛行安全獲歐盟既認授, 跨過歐盟對非歐盟既航空公司既限制, 並確保航空公司可以進入歐洲市場。

(註: 歐盟屬下既民航處 EASA 會定期為各國既民航處及航空公司進行 Audit Check, 以確保飛行安全。EASA 於 09 年進行卡薩克斯航空局既 Safety Audit 後 認為該航空局為 "Lacking in Regulatory Oversight", 並繼而禁止所有卡薩克斯既航空公司進入歐盟領空。當時 Air Astana 係獲得豁免, 唯其航線的加班申請則被拒絕或壓後。 EASA 於 16 年取消該禁飛限制, 而近年亦有卡薩克斯既航空公司開拓歐洲航線。)

使用 Aruba 等地方註冊飛機 除咗可以有助證明飛機安全之外, 機主有機會可以受惠於當地既稅務安排。同時, 唔少地方亦會有專屬既航空條例, 保障飛機租賃公司。相信比較常見既 Aircraft Register 會係 Guernsey 及 Ireland - 前者係一個有低公司稅率既英屬離岸島嶼, 而後者既航空條例係吸引到唔少飛機租賃公司於當地註冊飛機。相信近期落入新聞焦點既 金鹿航空既 B787-8 就係一個好例子 - 呢部 BBJ 其實係於英屬離岸島嶼 Guernsey 註冊, 而註冊篇號 2-DEER 既 (2-) 則為 Guernsey 既 Registration Prefix。另外, 義大利航空 Alitalia 既飛機大多都係於愛爾蘭註冊 (EI-___), 而唔少俄羅斯既航空都會選擇於 Bermuda 註冊飛機 (VP-___)。

相比其他 CIS 國家之下, 卡薩克斯坦係擁有一個非常蓬勃既民航市場 - 唔少二線城市係有廉價兼頻密既航班連結首都, 而唔少航線上係有良性競爭既。除咗 Air Astana 同 Bek Air 之外, 卡薩克斯坦亦有 Qazaq Air, SCAT 等航空公司服務各城市。Air Astana 近期亦開辦子公司 FlyArystan, 以一個 LCC 模式發掘新市場。

卡薩克斯坦既地理位置亦有助卡薩克既航空業迅速發展 - Almaty 及 Nur-Sultan 位於亞州同歐洲中間, 而 Air Astana 係曾經推出過一套類似 Icelandair/Wow Air 既轉機旅遊套裝, 由亞洲飛歐洲時, 於 Astana/Almaty 轉機時順便遊玩兩日。如果 Air Astana 再推出呢類計畫, 再有政府放寬簽證配合, 相信航空公司係可以吸引到唔少歐亞既旅客拜訪卡薩克斯坦~~ 係卡薩克斯坦開始發展成熟, 以及鄰近國家開始放緩簽證要求 鼓勵旅遊業既情況下, 相信卡薩克既民航市場係一個值得留意既市場。而如閣下係前往哈薩克斯坦既, 相信 Air Astana 會係一個幾好既選擇~


哈薩克斯坦既首都機場係有兩個客運大樓 - 圖中左邊係處理國際航班既一號客運大樓,而右邊則為處理內陸航班既二號客運大樓


Air Astana 既 Check-In Area - 當晚行李係可以直接寄艙至香港,到達阿拉木圖既時候係無需重新寄艙。


內陸航班候機區 - 呢個候機環境係算舒服既,惟座位數量則有增加既空間


Air Astana 派發既機票套同轉機指南 - Small touches like this goes a long way


Boarding but not really? - 經過四個 false starts 之後,登機過程終於開始


Air Astana 既 757 係採用一個標準 3+3 既座位排位


Snack Box - KC992 上既小食盒係有山楂條,奶酪,同一份雞肉三文治


到達 Almaty - 相隔唔夠三十分鐘,小弟由 'Welcome to Almaty' 變左 'Thank you for visiting Almaty'


阿拉木圖既 Landside - 雖然小弟到達既時候已經係凌晨,不過機場內有唔少店舖係依然營業既


阿拉木圖既國際航班候機區 - 候機區其實空間好細,而大多空間都係畀圖中既免稅店佔用


呢間免稅店既酒水種類係非常齊全,無論係本土出產既酒定係西方既名牌基本上佢都有賣


A very, very late dinner - KC929 既晚餐有一份牛肉意粉, 配上沙律,餐包芝士, 山楂條同朱古力條,而份餐係份量大小同味道上都做得岩岩好~~


Air Astana 既 Inflight Entertainment System - 雖然 Air Astana 機上提供既影片數目唔多,不過佢係有唔少 Hollywood Blockbusters 睇,而佢亦有一套介紹哈薩克斯坦既紀錄片。Air Astana 既 Safety Information Video (右上) 係好好睇 - 唯由於呢個短片以卡薩克文, 俄文同英文各播一次, 因此小弟係呢趟旅程係睇咗呢段短片足足九次咁多


祈求風和雨 吹我到理想的遠處
故土沒法跟隨我意願
但為什麼終於 穿過海灣來到老遠
卻很想返回我的屋邨
my little airport 你叫我譯一首德國歌詞


多謝閣下收睇小弟既 遇溺記 - 下一回 遇溺記 小弟會搭乘 Finnair 由香港經赫爾辛基前往荷蘭首府 阿姆斯特丹, 敬請大家期待啦~~


如果閣下鐘意小弟既飛行報告既話, 不妨睇埋小弟之前寫落既浸鹹水遇溺記~~
第七回 BE7671 NCL-BHD-IOM 尋找 Jetstream 41 的故事 - 不日推出
第八回 BA3287 IOM-LCY 一個避完稅走去翻學既故事 - 不日推出
番外篇 KC992 KC929 TSE-ALA-HKG
第十六回 AY100 AY1301 HKG-HEL-AMS I go to school by Airbus - 不日推出
第十七回 拜訪荷蘭航空博物館 Aviodrome - 不日推出
第十八回 BE1094 AMS-EMA 重逢 Dash 8 的故事 - 不日推出
第十九回 拜訪協和號試驗機 - IWM Duxford - 不日推出
第二十回 拜訪 RAF Museum - Cosford - 不日推出
第二十一回 拜訪協和號試驗機 - Brooklands - 不日推出







評分

參與人數 7aPower +7 HugeC +70 收起 理由
KV8948 + 1 + 10 正!
fp8329 + 1 + 10 多謝分享
vilo + 1 + 10 多謝分享
okt05032 + 1 + 10 多謝分享, detailed report
YY487 + 1 + 10 多謝分享
DIH + 1 + 10 多謝分享
S3BL100 + 1 + 10 多謝分享,非常詳盡

查看全部評分

1萬

iPower

3355

aPower

4975

HugeC

Level 5

PhD = piled high and deep

Rank: 5Rank: 5Rank: 5Rank: 5Rank: 5

積分
23390
發表於 2020-2-24 13:02 | 顯示全部樓層
黃色為主、隱隱印有空中服務員樣貌既登機證,令我諗起 Lufthansa 既登機證,今時今日都無咩航空公司揼重本印得咁精美了

睇落 Air Astana 既機艙保養真係做得幾唔錯~


fb.com/scientisthk2usa/

1萬

iPower

598

aPower

1363

HugeC

Level 5

Rank: 5Rank: 5Rank: 5Rank: 5Rank: 5

積分
21006
發表於 2020-2-24 15:06 | 顯示全部樓層
唔講唔知,我之前以為Air Astana係國營航空公司。

即係而家仍然係英國人打骰?以西方思維去做應該會做得幾好。(當然我知西方都有好多失敗例子,但至少唔係蘇式思維)

1625

iPower

1556

aPower

1180

HugeC

Level 2

Rank: 2Rank: 2

積分
3432
 樓主| 發表於 2020-2-25 07:54 | 顯示全部樓層

                                    Advertisement



DIH 發表於 2020-2-24 15:06
唔講唔知,我之前以為Air Astana係國營航空公司。

即係而家仍然係英國人打骰?以西方思維去做應該會做得幾 ...

Air Astana 現時為 51%由哈薩克斯坦主權財富基金持有,49%由 BAE Systems 持有。我唔肯定佢董事局既架構,不過小弟覺得 KC 既管理思想都算開放同有前瞻既 - 相信 Air Astana 上年設立其廉航分支 FlyArystan 會係一個好既例子。

892

iPower

2

aPower

6

HugeC

Level 1

Rank: 1

積分
976
發表於 2020-2-27 13:29 | 顯示全部樓層
香港叫開哈薩克, 見到樓主寫卡薩克斯坦有D唔慣
您需要登錄後才可以回帖 登錄 | 會員申請加入

本版積分規則

Advertisement

Advertisement

站規|清理本站Cookies|hkitalk.net 香港交通資訊網

GMT+8, 2020-11-30 04:13

Powered by Discuz! X3.3

© 2001-2013 Comsenz Inc.

快速回復 返回頂部 返回列表