全港-最屈機-鐵路-網民細數西鐵完勝位

GK9141 發表於 2019-3-12 01:20
九鐵晒錢起馬晒得值，真係有用d錢去落足本，有遠見
晒錢而家換黎既係豪華寬敞車站，能夠應付而家西鐵龐大 ...

咁馬鐵又點先

jpoon 發表於 2019-3-12 02:10
咁馬鐵又點先

上面咪講左N次馬鐵本身唔夠資金

GK9141 發表於 2019-3-12 02:25
上面咪講左N次馬鐵本身唔夠資金

簡單嚟講唔係馬鐵唔夠資金，係政府唔畀錢
但點解兩條綫有不同待遇呢？

jpoon 發表於 2019-3-12 04:35
簡單嚟講唔係馬鐵唔夠資金，係政府唔畀錢
但點解兩條綫有不同待遇呢？

當年比人話大白象ma, 當然要cut budget起得"實而不華"la

cruisesnet 發表於 2019-3-12 09:34
當年比人話大白象ma, 當然要cut budget起得"實而不華"la

馬鐵我覺得設計好差，一啲都唔「實而不華」，最差嘅係恒安站，個車站大堂位置有問題，應該放響AB同C中間，而唔係好似而家咁近AB但要人屈兩次上去，而C又要行一大段路
仲有就係唔少站扶手電梯方向唔係對正出入口

cruisesnet 發表於 2019-3-12 09:34
當年比人話大白象ma, 當然要cut budget起得"實而不華"la

西鐵03年12月通車，之後運空氣先比人話大白像，但馬鐵係2000年左右已經起緊，所以兩者無必然關係。
其實同期通車既「尖沙咀支線」，尖東站都一樣好豪好靚，落馬洲站除左冇幕門其實根本係西鐵級數既車站

之於點解馬鐵起得特別簡單，網上猜測既原因不外乎︰
1.西鐵要同地鐵爭，但馬鐵係當東鐵支線直接比九鐵起，所以馬鐵唔洗咁豪爭合約
2.沙中線不明朗因素，因為唔知沙中線係咪比九鐵起，如果唔係，馬鐵永遠都止於大圍站，就永遠係接駁角色，唔洗咁大，當初亦起住4/5於月台及大堂
3.西鐵洗大左，但解釋唔到點解尖東站/落馬洲站咁豪咁靚

真正原因係咩，我真係唔知。

GK9141 發表於 2019-3-12 01:20
九鐵晒錢起馬晒得值，真係有用d錢去落足本，有遠見
晒錢而家換黎既係豪華寬敞車站，能夠應付而家西鐵龐大 ...

你講既野我冇反對，我可以同你講，以鐵路迷及外觀角度黎講，我絕對同意西鐵(尖東至屯門段)係香港最靚最正既鐵路，到今日依然比南港島線前衛，比香港西九龍站多D顏色。

1.千九外觀前衛。
2.天水圍站、元朗站同朗屏站月台，以及兆康站大堂、荃灣西站D出口、柯士甸站天幕出口、美孚站公園車站簡直靚爆
3.屯門站及兆康站隻藍色又襯返河上車站既特點
4.錦上路站帶點傅統中國圍村風格又不失現代化
(南昌站最普通唔講)

加上九鐵藍色指示牌、大型站牌及字體，醒目漂亮。而家換晒港鐵黑色指示牌真係破壞晒西咁靚既設計，每站不同顏色既站牌直情樣衰(朗屏隻粉紅色底黑色字真係唔知想點)

對比地鐵當時車站？機鐵車站係靚但要配合返機場設計而好灰好冰冷，西班牙車幾垃圾大家都知。將軍澳線用返紙皮石我真係唔識欣賞(有特色=/=靚)，然後k-train問題，仲有一貫死氣沈沈既列車設計，冇廁所....

講咁多，我都係想講我同意你講法，但西鐵唔係冇缺點，當年亦有不少醜聞，亦比人話大白象，劣評如潮，好難想像今日西鐵會多人坐到比人鬧。

西鐵站唔近屯碼
通車初期常壞訊號/初期要轉多程車
欖隧段好像搭船咁搖晃南昌站南行非跨月台轉車

tomtom2015 發表於 2019-3-12 22:34
你講既野我冇反對，我可以同你講，以鐵路迷及外觀角度黎講，我絕對同意西鐵(尖東至屯門段)係香港最靚最正 ...

車站設計，東涌線/機快同西鐵(紅磡站除外)，可謂同樣最高水準之作(除左地鐵洗手間呢個老問題)，好記得97年尾，路過擴建中、已見雛型既荔景站上層月台，嗰種震撼感真係可一不可再。
之後，兩鐵都不進反退，九鐵「兩隻馬」唔使再講，地鐵就時光倒流80年(代)回歸紙皮石，兩鐵都再冇出現月台有冷氣同幕門(非閘門)既非地底站.......


不過，「車遊」顯徑站粗略所見，月台上既好似係幕門而非閘門？有冷氣同幕門既非地底站會唔會再現呢？

列車，西班牙車漏水垃圾同意，但論外型，西班牙車絕對首推。

話時話，當年兩隻英國車，用左廿年未夠就要翻新，而家西班牙車都用左超過廿年，千九都接近廿年，點解仲未有聲氣翻新？

tomtom2015 發表於 2019-3-12 22:14
西鐵03年12月通車，之後運空氣先比人話大白像，但馬鐵係2000年左右已經起緊，所以兩者無必然關係。
其實 ...

仲有一個網上流傳既原因，就係話「兩隻馬」係東鐵支線，所以同東鐵睇齊。

如果係真，就真係唔好笑既笑話，唔upgrade舊野都算，仲要downgrade新野去同舊野睇齊？傻的嗎？仲有馬鐵收費唔同東鐵睇齊？馬鐵唔整12卡唔整頭等？

不過亦好彩落馬洲站冇裝幕門，如果裝左，東鐵就算全部換新車，都可能因為落馬洲站幕門問題，永遠冇機會改善嗰D有問題門位。

至於真正原因，可能永遠成謎，又可能根本就係冇原因，因為九鐵呢間公司既作風，就係亂七八糟、一時一樣、毫無標準。

離題講下，從以下情況，不難想像九鐵既作風，係幾咁混亂幾咁冇標準無厘頭：

1.一直有輿論要求九鐵同地鐵睇齊，提供12歲以上學生優惠，九鐵一直堅拒，指政府已提供學生車船津貼，九鐵冇必要冇義務再提供學生優惠。但點解同屬九鐵既輕鐵，又有學生優惠(當時輕鐵雖然12歲學生當成人，但設個人八仔積分優惠，學生八仔儲分條件較成人八仔優惠，詳情待補)？輕鐵有，點解其他線東西馬又冇？

2.90年代初，兩鐵為車站出入口編上ABC代號，地鐵全部編晒，九鐵(東鐵)就編D唔編D，僅部份車站有編，連大旺站如九龍塘站都冇編，又係合併後港鐵執手尾。

3.路線命名，有否留意，東輕西均以「九廣X鐵」命名、偶然用「X鐵」簡稱，唯有馬鐵寧舍唔同。印象中，九鐵官方物品一直以「馬鞍山鐵路」或「馬鐵」稱之，從來冇出現「九廣馬鐵」(可能有錯，有錯請指正)(都仲未講佢唔叫「XX線」而叫「X鐵」係幾咁不倫不類)？

4.K巴不均，西鐵就話輕鐵專區政策，東鐵點解零零舍舍優待大埔？零零舍舍優侍大埔之餘又點解零零舍舍無視富亨？

5.紅磡站由「九龍」改名「紅磡」既過程，1996年開始，含含糊糊拖拖拉拉足8年，至2004年至完成。1995年同之前，叫「九龍」；1996年起，出現「九龍」、「九龍紅磡」、「九龍(紅磡)」等幾種版本；1998年，至叫「比較正式」改名「紅磡」，但其他各站南行月台指示牌，仍然係「往九龍」；甚至2003年，大圍站配合馬鐵大裝修後，新裝指示牌仍然係「往九龍」；2004年尾，變成「往尖東」後，呢個含糊不清問題至告一段落。

以前我都問過，tonyng師兄有詳盡解答。
https://www.hkitalk.net/HKiTalk2/thread-251485-1-1.html

一次過由「九龍」改名「紅磡」，真係咁困難？我明白呢個係總站，改名涉及既元素會較多(各站「往XX」指示牌、月台同車廂廣播.....)，但含糊不清咁1996拖到2004(如果唔係2004年伸延尖東，各站指示牌可能永遠「往九龍」)，點講都唔合理啦下話？


所以，新不如舊既問題，可能只係九鐵一貫無厘頭作風既冰山一角。