[降級消費] HK Express A321neo: HKG - KIX / HND

今年春天，機緣巧合之下，有一個機會比我隨家人到東京旅遊，當然果斷接受。出發日期正值淡季，加上日本爆發流感、日本快將發生嚴重地震等負面新聞/謠言四起，今次來回日本機票，應該係我有意識自己睇機票去日本以嚟，價格最低的一次；不過比起上年聖誕時搭 JAL 往返日本，點都算一個 downgrade。

至於 KIX ... ？
計劃行程時，我打算先抽一日去長野滑雪，然後回東京匯合家人繼續行程
-  最直接、省時做法，係搭 UO624 red-eye 飛 HND，再搭新幹線去長野，但航班價格最高；
> UO 亦有一班 red-eye 飛 NRT，價格較低，但較遲到達 NRT，較難處理後續交通；
> 退而求其次，前一日下午飛 NRT，之後搭夜行高速巴士到長野，但巴士到達長野時間太早，嚴寒天氣下要喺戶外等幾個鐘到天光；
> 既然都係夜行巴士，點解唔喺大阪上車，車程較長，可以增加睡眠時間？

唔睇由自可，一睇就發現 KIX 機票仲平過日間飛 NRT！於是決定飛大阪/關西，用一晚時間前往東京（可以預告，買唔到平價 red-eye HND 最後飛 KIX，絕對係塞翁失馬 - 留待其他報告分曉）

所以今次機票嘅組合係：
HKG > KIX（中午機，因爲預計第一日行程不多，出發前一晚可以夜瞓可能仲有用）
HND > HKG （UO 一日兩班 HND red-eye 返香港，其中之一）

- HKG departure -
前一日 online-check in，已經發現班機上座率非常低，所以沒有加錢選位，任由電腦安排；UO 於 HKG 已改用自助 check-in 櫃位，當日亦有足夠職員協助乘客完成手續


入閘後，尋找水機裝水（不過水機正對面擺樽裝水售賣機，唔知係邊個商業奇才之作？


意外捕獲中華航空 SkyTeam 塗裝 A330-300


水機對面有自動販賣機，可選購香港特色紀念品；但此處並非主要通道，人流相對有限，售賣機選址可以更好


- UO 898 -
Route: Hong Kong Int'l Airport (HKG) - Kansai International Airport (KIX)
STD - STA: 11:50 - 16:20 (3 hours 30 mins)
ATD - ATA: 11:48 - 16:13

Aircraft: Airbus A321neo
Registration: B-KKD
Seat: 34A

去程用 outer bay 登機，要搭國產比亞迪接駁巴士；當日只需一部巴士，已可接載全機乘客


outer bay 上機，加上 KIX 閘口角度問題，兩邊機場都未能拍到客機全貌


11:35 所有乘客已經就座，但未有 take-off slot，等到原定出發時間先 pushback；HK Express 安全資訊係由座艙長 (?) 現場按稿宣讀，空姐空少用實物道具示範


taxi 路過中場客運廊，圖中香港航空、香港快運及 Air Asia，均為 MFC 主要用戶


向西起飛，見到港珠澳大橋香港段


廣東省牛頭島、桂山島


回望南丫島、港島南區、遠處九龍半島的高樓大廈


A321neo safety card、機上附費餐牌、免稅購物目錄，用上 HK Express 企業形象紫色


今次提前預訂了緊信號 collab 的豬扒菜飯；其中一個考慮，係此次飛行前，UO 傳出與譚仔三個米線合作餐點的風聲，當時就有人推測，可能係緊信號合約到期，所以趁尚有供應時，先試為妙；不過到成文之時，HK Express x 堅信號 collab 的兩項餐點，依舊健在


HK Express 機上提供木製餐具


份餐的豬扒軟硬恰當（個人口味，會想佢整淋少少），米飯處理良好，算係質素不錯的飛機餐，就算係母公司 CX 用佢嚟做經濟艙 entree 都無咩問題；不過 UO 而家似乎網上訂餐都無任何優惠（只係可以確保有得食，以及部份選項僅限網絡預選），如果短期內再搭 UO，我應該會想試譚仔麻辣杯麵

lavatory tour: 一如所料，洗手間空間偏窄，備品只有皂液一枝


當日班機上座率甚低，客機前、中段 (HK Express A321neo 約 4-29 排) 接近全空，只有零星乘客（相信係去程時間對 ex-HKG 旅客而言，唔算太靚）；我都搵咗一排三個吉位稍作休息，接近降落前才返回原位


一如以往，東海上空多雲


進入日本九州，路過鹿兒島櫻島火山


到達四國東南部，亦緩緩開始下降；德島那賀一帶的山區，有點意外四國島上都見到積雪


德島縣安南市沿岸、對岸的小勝島


今日全日也密雲.jpg


沼島南半部，可見沼島港、沼島海水浴場


淡路島南部、灘漁港
（按：本身以爲以上兩張相分別係 德島縣/淡路島，或淡路島/山陽海岸，所以後期睇衛星圖搵咗好耐 :v）


從淡路島東南端飛入大阪灣，右下角爲由良市、成山


由南向北降落關西空港；KIX 機場島由填海而來，唔難見到海景


滑行時所見，Finnair A350-900


中國東方航空 B737-800 (?


Singapore Airlines B787-10


Japan Airlines 787-9


Qatar Airways A350-900


上一次經關西空港出入日本係 2018 年秋天，事隔近七年，終於再見返 KIX 熟悉嘅 "橙色大堂"；為配合行程（以及減少搬運、寄存行李），今次用宅急便將行李由機場直送至第二晚入住的酒店


完成手續後，過橋到對面的 JR / 南海電鐵 關西空港站


搭關空快速出市區，經過關空聯絡橋下層；由於係中午機飛日本，到埗時外面天色漸暗


喺日本搭機場鐵路出市區，例牌動作: 便利店食品醫肚


本身應該要搭到新今宮站落車，點知發雞盲，去到天王寺就跳咗落車，之後搵出口先發覺瀨嘢 :{


落返月台搭大阪環狀線，估唔到因禍得福，第一次同最後一次搭 201 系（不過正值通勤時間，人頭湧湧，我只搭一個站，且當時未層正式宣佈退疫，完全無意識影多幾張相，相當可惜...


- comments -
本身搭得 HK Express，都唔期望有任何值得期待的機上服務，比我用低廉價格飛一轉日本（計返距離、飛行時間、行李限額等因素，分分鐘仲平過我喺歐洲搭 Ryanair 等 ULCC 的平均消費），我無任何投訴。

難得地淡季飛日本，上座率如此低的機艙，我都係第一次遇上，相信係我執到平機票的原因之一。

以下開放無獎猜謎，到底我最後用咩方法由大阪前往長野？

（待續...）

行程相片精選 #7（不包括大阪 > 長野之交通分享）

回程飛行報告 #9

香港快運如果訂餐要留意已經唔係第一次有人提早book但上到機就話已經無咗好一段時間，要個客先畀錢買其他餐點事後申請退款，樓主算好彩

亂估：問得即係有景轟，唔通樓主結果無搭巴士，係搭JR去長野？

szeto993 發表於 2025-9-16 11:47
香港快運如果訂餐要留意已經唔係第一次有人提早book但上到機就話已經無咗好一段時間，要個客先畀錢買其他餐 ...

HK Express 大力推廣網上訂餐，如果訂完上人
但上到機得個吉，想必相當掃興

而且唔係每款餐點都可以網上預訂，如果要搞到機上即場買嘢食，選擇都會非常有限

Waiyin12 發表於 2025-9-16 23:30
HK Express 大力推廣網上訂餐，如果訂完上人
但上到機得個吉，想必相當掃興

我2017年已經試過，成田上機後發現電腦落漏一個餐，而且機上熱餐已經無晒，只能以杯麵、叉燒酥補償，而且要補差價。

我兩個月後飛，都係諗住臨出發先訂餐，以免掃興。

講開前排座位，大灣區航空都試過咁樣，前排座位都係無人坐，然而後面就坐哂人。我覺得應該要檢討下前排座位安排，到最後都係無乘客使用就要減價比人升級坐。

- 部份行程相片 -
今次留喺日本時間不算多，一共只有 4.5 日，但行程遍及大阪、長野、東京三地，每個城市只能淺嚐；東京部份與家人同行，較爲休閒，以飲飲食食爲主。

喺大阪的唯一景點：通天閣


由 3/F 落到 B1/F 的長滑梯


之後前往長野縣志賀高原滑雪，並於溫泉旅館留宿一晚

湯田中溫泉


雪中林間步道（由巴士站，要行至少 30 分鐘先至見到馬騮浸溫泉）


地獄谷野猿公苑，有大量歐美遊客慕名前來


返到東京後，搭 JR 中央線往酒店，有一段與神田川並行


築地市場食早餐


麻布台 Hills


33 樓展望台，應該係東京眾多觀景台中最接近東京鐵塔的一個；不過當日天陰有雨，東京灣、台場彩虹橋顯得相當模糊


coffee break


東京站 KITTE 丸之內 屋頂花園


日本橋附近行街


嚟日本嘅例行公事 - 厚燒牛舌


晚餐 Omakase


（圖文不符）有一日搭上野東京線，見到窗外嘅 J.P. Morgan 東京辦公室；當時尚算求職季節，而我手上未有 offer ... :/


（待續 ...
不過唔建議對最後一 part 有太大期望 XD）

KG1428 發表於 2025-9-17 15:10
講開前排座位，大灣區航空都試過咁樣，前排座位都係無人坐，然而後面就坐哂人。我覺得應該要檢討下前排座位 ...

今次部 A321neo，一共 41 排，唔考慮緊急出口位，2-19 排係 "前排座位"（佔咗半架機 XD）

HK Express 派位由後面開始派，當日目測 30-41 排近乎坐滿，1-29 排就只有零星乘客

如此情況，比錢揀位嘅價值，唔係指定座位（窗口、走廊，或者相連座位），而係可以篤定一個人用多於一個位，唔加錢選位就會被安排機尾底位，3-3 排排坐滿

升空後空姐有廣播，可以加錢升級至加長空間座位（bulkhead / exit-row），或者 2-19 排前排座位，但無提及 20-29 排嘅空位可否自行調位；反正我都唔覺有空姐揸正嚟做，並無核對座位表或索取調位費

由一開始訂機票，已經篤定回程搭 UO red-eye 返香港，用盡喺東京的時間；UO 每日有兩班 red-eye HND > HKG，我搭邊一班都無所謂（遲少少喺東京出發就仲好），不過 red-eye 唔係經常有 promotion，好彩等咗幾日終於等到平機票，如果唔係可能要死死地氣搭早幾個鐘的 NRT 夜機返香港（但計及市區出機場的時間，接近無咗一個下午，並唔化算）

- journey to HND -
今次班機近零晨兩點先喺 HND 出發，HND 靠近東京市區，我預 1.5 小時前到機場，都仲有成個夜晚可以用～

見時間充裕，喺上野一帶入居酒屋食埋宵夜；食到一直想嘗試的雞刺身


由仲御徒町站落地鐵，先搭日比谷線，幾鍾意 13000 系的內裝配色


如果係日間，基本上東銀座站轉一次車，換都營淺草線（直通京急線）便可直達羽田空港；但到夜深時間，最後一班直通運行列車已開，我搭嘅京急線尾班往羽田空港列車，始發站僅為品川站，所以要喺泉岳寺、品川兩站分別轉多一次車，即係兩程變四程；
如果由 HND 搭半夜機出發，建議多加留意列車時刻表，切忌大安旨意依賴直通運行

京急線 急行 品川 > 羽田空港 T1/2；有點意外全程都係京急線內，但派車為都營淺草線 5500 系


當時我手機 memory 迫爆（旅行影得太多相），加上夜幕低垂，身體疲憊，由上機瞓到落機（都仲未夠），所以拍照甚少，報告內容會比起平常大縮水。

- UO 629 -
Route: Tokyo International (Haneda) Airport (HND) - Hpng Kong Int'l Airport (HKG)
STD - STA: 01:55 - 06:15 (5 hours 20 mins)
ATD - ATA: no record

Aircraft: Airbus A321neo
Registration: B-KKF
Seat: 4E

喺市區食完晚飯 + 宵夜，同時 HND 凌晨時份有大量廉航 / 中長途航班起飛，出境人流眾多，無論係時間定胃容量都唔支持我再去食嘢（如果唔係，我應該會想試 food court 的六里舍沾麵），所以直接前往閘口

喺 HND 竟然有空橋用，唔駛出 outer bay
（按：之前由 HND 朝早搭  ANA 返香港，都無咁好招待）


UO 名物 "行刑架"


當晚全機爆滿（目測香港、日本旅客各佔一半），只獲發中間座位；隱約感覺到飛機 taxi 期間過了橋，應該係前往 HND 南端的 “海中跑道”（RWY 05/23）起飛


訂機票時有諗過好唔好訂餐，宵夜食個生煎包，或者魚蛋燒賣都諗得過，但最後都係決定忍吓口，喺日本 / 香港陸地上會有更好選擇。
最後決定係相當正確 - 我由離開陸地後，一直瞓到部機降落後到閘口停定（中途 pre-landing 廣播時，短暫醒過一次），除咗幾張唔知影到咩嘅 selfie(?，無任何其他相片，亦無任何機程中的內容可作報告。

印象中落機後係用 outer bay，要搭接駁車返入境大堂；出境後搭巴士離開，見 E11 咁啱有 Cityflyer，就唔理三七廿一跳上車，瞓到天后站轉車返歸（其實 Cityflyer 張櫈仲舒服過 UO 機上 :p

可能因爲程巴士有多個半鐘休息，我返屋企梳洗後，精神狀態幾唔錯，仲可以即刻出街約人食早餐


- comments -
如果想喺東京玩到盡，UO 兩班 red-eye HND 應該係首選，除咗 UO 623/629，應該無邊班機可以最後一日喺日本食埋宵夜再離開；UO 無免費機上餐飲，無任何機上娛樂，反而幾適合 red-eye，就係由上機瞓到落機，全程瞓到隻豬咁不醒人事，唯一 downside 係 UO 最新座位不設 recline，舒適度受影響。

今年（2025/26）冬季 ANA 會重啟 香港 - 東京/羽田 red-eye 班次，以 787-8 執飛；暫時未知季節完結後會否繼續，但如果有機會，我都會想搭 ANA red-eye 飛東京。

報告完結，歡迎討論！

過往飛行報告：
2025.03 [夕陽西下] CX A359: HKG > London/Heathrow
2025.02 [重遇因航] CX A359: London/Heathrow > HKG

2025.01 [初嚐 C Series] SWISS B77W PEY + BCS1: HKG - Zurich - London/LCY
2025.01 [謝主隆恩] JAL B788 J: Tokyo/Narita > Taipei/Taoyuan
2024.12 [提前送殯] Lufthansa A21N + A346 PEY: London/LHR - Frankfurt - HKG

2024.06 [IFE 有彩蛋] Aegean A321neo: Athens > London/LHR
2024.06 [藍白色調] Aegean A321neo + Olympic Air ATR72: London/LHR > Athens > Santorini
2023.12 [冬日冰河] BA Cityflyer E190: London/City - Zurich

2023.09 [中東沙漠] Qatar Airways B77W: Hong Kong - Doha - London/Heathrow
2023.08 [Where Dreams are Destroyed] Korean Air B777: HKG - Seoul/Incheon
2023.07 [畢業旅行：日系情懷] ANA Hong Kong - Tokyo Narita/Haneda
2023.07 [夢幻破滅] Qatar Airways: London Gatwick - Doha - Hong Kong

2023.01 [飛越絲路] Finnair A359: Hong Kong - Helsinki - London
2022.12 [First LCC] HK Express HKG - Fukuoka: A321/A320neo
2022.12 [北方雪國] Finnair A320 +A359: London/Heathrow - Helsinki - Hong Kong

2022.09 [Missed Connection] Lufthansa A320neo FRA - LHR
2022.09 [逃不過 Delay] Lufthansa: A343 HKG - FRA
2022.07 [回港之路] Lufthansa FRA - HKG + 我在法蘭克福的17小時
2022.07 [典型歐洲] Lufthansa A320neo: LHR - FRA