屯門南延線項目建議書

eternalflame 發表於 2021-1-27 20:59
居民係唔會識得天馬行空咁答問題
好多你提出嘅都嘅都需要初步設計先可以深入討論
你連個預想圖都無

RDS2014 夠剩係得張小畫家地圖添啦
咁係咪個咨詢流嘅呢？
咁憑咩資料決定起屯門南延綫先？
又或者掉返轉問
居民冇預想圖憑咩去合理支持屯門南延綫？
難道憑FF 可成真？
依家我冇叫話要深入討論可行性
意向調查呢啲好皮毛都冇喎
至少居民應該要有公平機會表達意向、關注優先、憂慮
呢啲都唔需要有乜預想圖先有得咨詢調查

不過點解香港啲基建咁耐都上唔到馬
就係冇好有效率去同步做準備工作
成日研究又設計又咨詢又研究又設計又咨詢
成日等嚟等去
結果就係浪廢大家時間

最好屯門南延綫拖多幾年
就唔好冇足夠咨詢又要求兩三年就夾硬上馬
再一個屈尾十賴政府同龜鐵咁囉

ryandroid 發表於 2021-1-27 20:05
其實富新區議員收集問卷過程中
係有整埋網上問卷的
但屯碼好似乜都冇喎

呢位版友，咁樣不斷製造「稻草人」無意思的。
比閣下嘈得贏呢度諸多版友，亦唔代表你講嘅嘢符合現實環境。

必須再重申一次：針對重大社區議題（包括呢度講緊嘅屯馬綫延綫），個人認為做問卷調查基本上係Must。
至於議員／地區工作者幾時做、點樣做、做幾大，佢哋自有其考量。
已經做過調查嘅，固然值得欣賞；但未做調查嘅，又係咪代表人哋「唔做嘢」？
況且距離做正式公眾諮詢、刊憲等法定程序仍有一段時間，如果到嗰時呢班地區人士都無認真自己做一次諮詢的話，又無鼓勵居民踴躍發表意見的話，到時再譴責呢班「已完」都未遲（呢個人亦Deserve被成為「已完」）。
除非閣下十分掌握屯門碼頭區區情，好清楚區內未有其他社區議題，對新鐵路項目群情洶湧（即絕對有空間時間做大規模諮詢），否則鍵盤上話人「唔做嘢」，都幾不負責任。

再落地講，大多居民關注事項其實亦無閣下想像得咁複雜：呢班未來用家最關心都係未來鐵路與車站嘅模樣同設施。
2019年8月，「有幸」於南區聽過保皇黨立法會議員夾住兩位「後來輸曬嘅候選人」開南港島綫西段居民會。
你認為居民最關心「203X年通車後巴士重組」、「噪音景觀通風」、「休憩設施重置」？
其實當晚最多人問係「新站有無洗手間」、「要求加育嬰間」，或者係「要求隧道鑽挖機同時由香港大學同黃竹坑兩邊同步開工」。
本版版友心諗：洗手間、育嬰間係新站必備規格、多處同時施工根本係「Common Sense」，但居民最關心只係呢啲。

有市民好似你咁關注整體規劃及配套固然值得高興，但問心呢班人又係咪香港內嘅大多數？
真正嘅社會大多數其實真係「沉默大多數」：面對任何政策、規劃，無所謂、是但啦。
如果有更多人有心力鑽研政策規劃發展等，香港公民社會發展遠比現在蓬勃、進步。

aaron 發表於 2021-1-28 12:29
呢位版友，咁樣不斷製造「稻草人」無意思的。
比閣下嘈得贏呢度諸多版友，亦唔代表你講嘅嘢符合現實環境 ...

第一
https://m.facebook.com/story.php?story_fbid=430018018349097&id=111013546916214
//正式開始之前，FAQ咗先：
Q1. 我好憎黨鐵，可唔可以執Q咗佢？
A1. 唔得
Q2. 我唔想要黨鐵南延線，點解榮仔你唔反對？
A2. 從個人立場上講，榮仔都反對南延線，但可惜係我哋上任前已經批晒所有野，榮仔都無得Say。
Q3. 聽講有兩個新站，到時會叫咩名？
A3. 總站應該會叫南屯門站，而中途站係起係現時嘅屯門泳池果個位，暫時未有名，暫時以A16站為稱呼。//

現任區議員話自己無得say 喎
「已經批晒所有野」喎
有位張議員喺其他議員post 回覆「怎樣反對也沒用，未來十年，興建西鐵南延線！」喎

區議員自己都唔知自己嘅議會功能同程序喎
咁係稻草人？
其他版友都睇得出區議員嘅心態

第二

//考慮到項目的詳細規劃及設計，包括相關法律程序(例如根據《環境影響評估條例》進行環境影響評估研究和根據《鐵路條例》刊憲)及公眾諮詢等工作，需時約二至三年，屯門南延線項目預計於二零二三年動工建造，並在二零三零年竣工。//

23年動工
2-3年咨詢期依家已經係咨詢階段
刊憲嗰陣已經係咨詢到一半啦
你係咪唔熟程序？

https://www.info.gov.hk/gia/general/200907/24/P200907230096.htm

//自二○○八年初起，政府及港鐵公司已就該鐵路項目與南區區議會合作，進行了廣泛的公眾諮詢，向地區人士包括區議會簡介擬議的鐵路方案//

南港島綫09年7月刊憲
08年初就已經開始同區議會合作咨詢
你仲話要刊憲先嚟咨詢
刊憲嗰陣就已經預計係微調方案階段
然後係咪到時又話「但可惜係我哋上任前已經批晒所有野，區議員都無得Say」？


第三
南港島綫一咨詢就一直都受大部分居民歡迎
地底起站又對景觀環境冇明顯影響
居民大會當然剩係問啲濕碎嘢
再者當時係兩鐵合併無耐
大部分居民都未發覺有啲咩可以關注嘅問題

但依家屯門南延綫明顯係爭議性較大嘅項目
架空車站明顯對景觀環境有明顯影響
而屯馬綫通車亦令更多市民關注票價問題
而好多屯門居民都知道仲有一條屯門沿海鐵路
仲有好多嘢都可以明顯見到屯門南延綫同南港島綫有重大分別
你都可以撈埋嚟講
難怪就算真係有區議員當居民無知都真係唔奇

ryandroid 發表於 2021-1-28 13:23
第一
https://m.facebook.com/story.php?story_fbid=430018018349097&id=111013546916214
//正式開始之前 ...

講到「屯馬綫通車亦令更多市民關注票價問題」一點，本人表示笑而不語。如果真係有更多市民關注票價問題的話，本人自2019年開始做相關倡議，唔會無咩迴響（應該係我太廢唔識做倡議工作），2020年開屯馬綫一期就唔會繼續出現短貴長平問題。
如果覺得曾議員、張議員唔知自己嘅議會功能同程序，閣下大可去佢哋個Page開火嘛，留在iTalk做Keyboard Fighter係無意思。

自問自己唔係好熟程序，作為九龍居民，只知諮詢期間一波三折嘅沙中綫，當時一樣大把爭議：
－沙中綫2008年開始做詳細設計，2009年3月起傳媒開始放風土瓜灣段改行上路；
－2009年年中沙中綫正式落區做諮詢，港鐵出書仔、擺展覽、開居民會（利申：當年睇住土瓜灣下路居民同竹園區居民，開諮詢會開到開片）；
－2010年底刊憲，用近年幾時間處理反對意見；
－最終2012年中先開始鐵路主體工程。
刊憲期間話鑽石山做列車停放處，最終變成紅磡列車停放處＋啟德加側線。
連書仔都未出，肯定趕住聽日（星期五）要刊憲啦！居民一定無時間表達意見啦～

留意返，保皇黨議員係2019年（唔係2009年）開「南港島綫（西段）」居民會啵，當時都算係兩鐵合併無耐，對比「租用九鐵資產五十年」，合併第十二年做諮詢都仲可以叫「合併無耐」。
再者2019年年中睇到南區居民Facebook Group/Page，見到後生個班開始「質疑是否需要興建西段」；不過出席保皇黨議員嘅居民，就應該唔係呢班「質疑者」了。

aaron 發表於 2021-1-28 14:22
講到「屯馬綫通車亦令更多市民關注票價問題」一點，本人表示笑而不語。如果真係有更多市民關注票價問題的 ...

其實要講都講哂
喺度都係議事論事
又係你話我整稻草人
我其實都唔想post link
Post 出嚟又話我針對個別區議員
叫我做keyboard fighter去佢哋度開火
依家你又唔使幫區議員講說話嘅？

還有就係你估開個page 就一定人人follow 你？
有冇多咗人關注同你個page 有幾大迴響冇必然關係㗎喎
除非你真係覺得自己係鐵路界KOL 囉
冇人喺你度迴響就必然冇多咗人關注咁囉

沙中綫係多爭議但又係咪好似屯門南延綫咁
相當部分居民要反對起個湖景路架空車站甚至成條綫呢？
連最基本要唔要起站/綫嘅民意都未量化過
咩條件情況居民會去支持起站唔知
咩條件情況居民會去反對起站唔知
冇準備定呢啲最基本嘅民意資料
就坐等港鐵放料甚至出哂詳細方案再算
工程唔會拖延就真係奇了
同佢哋動議盡早西鐵南延屯門碼頭嘅取態好似有出入囉

南港島綫西段十劃都未有一撇都有居民會啊原來？
咁屯門南延綫碼頭區都未開過就有啲相形見絀囉
難怪facebook 大把居民洗板反對屯門南延綫啦
之前有簡單咨詢過居民嘅
啲居民使上Facebook 求啲議員？
//其實 議員希(望) 你地真係表達我地居民的訴求,同政府施壓//
一字不漏轉載居民對議員言論嘅反應(補返佢漏咗嘅一個字)

053h4 發表於 2021-1-28 17:00
其實個別人仕全程投入反對, 都係個句啦, 唔好覺得區議會會同你一個立場先得GA

重有, 民意唔一定要支持或 ...

區議會唔同我同一個立場冇關係㗎
唔好口講反對
之後話自己冇得反對囉
上任前批好哂囉
冇責任要負囉

你接受區議員呢種做法冇問題
但我唔會接受啲區議員口講一套實際又另一套
或者老作/曲解程序去誤導居民

居民唔介意起從來都係一個option
支持起係一個option
反對起亦係一個option
問題在於議員有做過啲咩俾居民及早回應
或自己點樣去回應居民