對兩鐵合併半年之感想(長文)

兩鐵合併半年不經不覺已過了半年的時間，大家對港鐵服務有什麼感想？
而乘客對港鐵之認識、他們之乘車模式及適應情況又有什麼改善？

本人對港鐵之服務有以下感想：
1. 對一些合併後之配套設施肯去改進，如轉線站之指示牌，已因順應乘客意見，加強指引，如尖東站及尖沙咀站間之隧道，在指往車站之指示牌，加上該站所屬之路線名稱，令乘客更清楚他們到哪個站搭哪條路線之列車。

2. 整個鐵路網絡擴大，令乘客可以利用鐵路穿梭香港每一個區域，再加上乘車之路線及方式多了選擇，可令旅程時間縮短及更方便。再加上轉乘優惠，可令車費減少，加強和其他交通工具之競爭力。

3. 在客務中心提供更多種類服務，方便不少乘客，但同一時間，前九鐵車站之當值員工數目略減，再加上上述服務及客量之增加，可能員工因工作量大增，令心情煩躁，令服務態度較以往為差。

4. 車廂清潔次數較以往少，令車廂較污糟，有時更有異味發出。

5. 車站設施之保養及維修較以往差，有好多設施，如光管、閘機、資訊顯示板及售票機壞了良久也未修復妥當。


乘客對港鐵之認識不算太深，口邊仍常掛著搭地鐵、九鐵、火車，甚少人提港鐵。有好多人(指本地人，非外地人，更是年輕人，非長者)，仍不懂甚麼車站可搭甚麼線的列車，如於尖東站有人問去柴灣去邊度搭車，我就叫佢去尖沙咀站搭荃灣線到金鐘再轉港島線到柴灣，佢就即刻唔明問我過海，點解我要坐去荃灣d車?

又例如有人在尖東站及尖沙咀站間之隧道會問去羅湖去邊度搭車，我叫佢去尖東站搭東鐵線，佢就話乜d指示牌兩個都
係地鐵標誌，一個指尖沙咀，一個指尖東，又乜野荃灣線，又乜野東鐵線，識鬼邊個站邊d線去邊丫。

旺角東站係新站？係邊個位置？

仲要出現d乜野柴灣線、中環線、北角線，儸命！

係d轉線站合併左係咪會調過晒ｄ月台編排？

大佬，呢d係基本的香港時事及常識，咁都唔識，你係外地人都唔怪你，但你係本地人，真係有d過份。

至於他們之乘車模式及適應情況，太多數人始終抗拒用原九鐵路線去轉原地鐵路線，如有人在尖東站想去觀塘但入錯閘，但又驚出閘要扣錢，問有乜辨法，我就叫佢去九龍塘，轉觀塘綠就可以，佢會話好複雜，又要比多次錢，我就話其實係同一地方，又任何一個路線去同一目的地價錢都一樣，佢都要猶疑一陣先相信。

希望港鐵能夠透過不同的宣傳方法教育一下乘客對它們的認識，否則十年後會仍然有好多人繼續矇查查去搭車就弊喇！

歡迎大家接力！

[ 本帖最後由 poly43092 於 2008-6-8 02:13 編輯 ]

用地鐵、火車我覺得比用《港鐵》這個「政治正確」的名稱更貼切。《港鐵》只是公司名稱，不是交通工具名(乘坐巴士時，你也不會說乘「新創建」或「載通國際」)。

你地唔識搭車你唔怪得人架

原帖由 ArnoldC 於 2008-6-8 03:28 發表
用地鐵、火車我覺得比用《港鐵》這個「政治正確」的名稱更貼切。《港鐵》只是公司名稱，不是交通工具名(乘坐巴士時，你也不會說乘「新創建」或「載通國際」)。 ...

同意得不得了!!

正如我地唔會叫「深鐵」、「京鐵」一樣, 地鐵就係地鐵, 中文世界從來如是(除左台灣叫捷運)。東、西、馬鐵唔叫「火車」也可以改稱「地鐵」。
如有留意的話, 港鐵公司會將自己d 鐵路分成三個類別：港鐵、機場快線、輕鐵。難道後兩者就不屬於港鐵嗎? 所以叫地鐵/火車做「港鐵」也不見得政治正確。最慘係一眾傳媒都一切改叫「港鐵」, 都今日都覺得好唔順耳。

[ 本帖最後由 leochill 於 2008-6-8 10:20 編輯 ]

我諗左好耐
究竟可唔可以響港鐵裏面拆番九鐵同地鐵出來，但都係由一間公司管理，但下面分左九鐵公司同地鐵公司出來
令人不會再有「東鐵線」、「西鐵線」的疑問
也可平息半年以來鐵路迷間的爭執
更可保留兩鐵特色
還令前九鐵員工的壓力消除

就好像新城一樣，同一集團但兩個品牌
但就將兩家公司的東西融合得很好，一直以來沒有巴士迷為此問題爭執
例：新巴改用城巴樣式電牌、城巴改用新巴樣式內籠

原帖由 mmlcs36 於 2008-6-8 15:44 發表
咁樣果d協同效應咪冇哂..?

咁不如唔合併好過

佢只係話用返九鐵、地鐵個名, 其餘和現在合併後情況不變, 點解會影響到 "協同效應"? (合併網絡, 節省成本等)

只不過咁樣o的市民就更混淆, 更加唔知二者網絡原來互通。

[ 本帖最後由 acctlkk 於 2008-6-8 16:02 編輯 ]