年青人是否對鐵路依賴？

久唔久又談坐鐵路定坐巴士的問題
然後又拎 D 極端例子出嚟講
搭車好多時都係慣性問題
有人希望快, 有人希望有位坐, 有人喜歡方便而各取所需
我覺得唔可以用自己的觀點套入其他人度
巴士迷記得晒有甚麼轉乘優惠, 似是理所當然的事
總不能就套用在一般人身上
唔知就被看成背經離道, 罪大惡極, 唔用腦去做查資料等的指責

好似我咁, 近期要上慈雲山看場
明明樓下有架 116 直達
不過我每朝都係地鐵轉小巴
觀塘線就實冇位坐
但通常七, 八個字就可以返去到
我坐 116 可能先係過左隧道冇耐
係平 D / 有位坐
但係時間就差好遠
我日日都咁坐, 唔通就係好蠢咩

從來沒有一種搭車方法先至叫做皇道
當覺得人地取笑你搭巴士慢, 耐而深深不岔時
反過來嫌人家地鐵逼逼夾都搭, 或者搭巴士會暈會嘔而覺得稀奇
道理也是一樣

其實唔同人有唔同的搭車模式,要方便的,要最快的,要最平的都有
我係要最快的人,時間為首要考慮,價錢是次要
特別係過海線,避得就避
例如深水埗<>小西灣
有直接的118唔搭
去程寧願搭789轉荃灣線
回程搭荃灣線轉港島線再去天后轉8P都唔搭118
就算冇港鐵半價都會咁搭

就如水街>北角
有10,18,18P,A12,電車選擇
快的可以坐A12,平的可以坐電車,10
中價的有18,18P
各取所需,有咩問題?

但係巴士響部份年青人心目中就係慢,貴,班次少
試諗下夏天響條街等一架7-21分鐘咁的班次的巴士有幾難受,
上完車坐成個鐘都未到目的地之餘仲要貴港鐵成倍
試問邊個會唔搭港鐵?
雖然以上係一個極端的例子,但在部份年青人心目中,巴士的確係咁的印象

[ 本帖最後由 ........ 於 2011-6-7 15:33 編輯 ]

巴士公司次次都話經營困難唔加學生特惠
但做學生特惠收入係咪一定少咗呢
小弟住地鐵沿線，如果有學生特惠我諗我搭巴士既次數多咗至少3至4倍
收半價佢都有收入加咗一倍至倍半

當然對唔係鐵路沿線既人呢個可能係咪都搭巴士，收入減少

我覺得年青人傾向搭鐵路原因有幾個。
1. 地鐵有學生優惠，但係其他交通工具就冇，咁會培養年青人一出門就會搵鐵路。
2. 巴士網絡遠遠比鐵路復雜，對於一D唔熟路嘅，地鐵會比較容易掌握，即使落車要行20分鐘，但坐巴士隨時幾時落車都唔知。
3. 巴士車程長、兜路、塞車。香港唔少巴士的行車路線係唔多直接，有部分更加係兜來兜去，而香港人多車多，塞車時常出現，巴士不時會脫班、誤點，令人失預算。
4. 宣傳。個人認為，MTR的宣傳，對比幾家巴士公司是稍勝一籌。

其實不嬲都覺得，鐵路比巴士，唔算係100%無缺點，但優勢係壓倒性的多。巴迷們，不要逃避事實了(呢篇野貼得呢度，我預左畀人扣分扣到傻，但扣之餘請提供合理原因)。

(以下係以香港既重鐵同專利巴士黎講)

1.準時：係！鐵路會有延誤、故障，但遠遠冇巴士咁常見咁普遍，而且鐵路一有咩風吹草動，新聞幾乎一定報，因為鐵路延誤而返工/返學遲到，都有多D籌碼向公司/學校求情，巴士延誤、脫班？邊個知？邊個理？而且鐵路有事而冇車黎，就算唔睇/聽新聞，o係車站都嗌到爆晒咪，鐵路公司亦可能有所安排；巴士有事而冇車黎？繼續痴痴地等啦。

巴士始終受太多內在外在因素影嚮，如司機駕駛態度、車型、上落乘客數量、天氣、路面情況(有冇其它撞車壞車、修路、封路、爆水管、燈位、其他道路使用者數量....).....，絕冇可能有鐵路咁準時可靠。而且巴士班次普遍冇鐵路咁密，一旦有事故，又或是司機病假又冇替工，引致收車、脫班，延誤程度幾乎一定比鐵路嚴重。

巴士脫班，等半粒鐘甚至更耐，家常便飯，唔係奇事；鐵路等半粒鐘？第日唔上晒全港報紙頭條？港鐵敢話自己準時率99.9%，你可以唔信，但巴士呢？有邊間巴士公司敢講自己準時率係幾多？

2.班次：即使無延誤，巴士班次普遍不及鐵路頻密，鐵路非繁時班次，都密過好多巴士線既繁時班次。某D人成日話西鐵線、東涌線非繁時7-10分一班係「疏」，慘得過好多「密車」巴士線，即使繁時都係咁上下.....

3.安全：鐵路唯一會引致乘客喪命既意外，只有等車時墮軌(不論畀人推定自己企唔穩...)，但而家唔少鐵路站都有月台幕/閘門，呢個問題已解決一大半，而且你可以選擇企o係較遠離月台邊位置。

巴士呢，一樣有可能等車時跌出馬路，巴士站有冇幕/閘門呢？亦唔可以畀你企o係較遠離馬路邊位置(以大部份巴士站而言，除非你甘願做最後上車既一個)，就算唔係自己仆出去，都可能有車剷上巴士站；鐵路，又會唔會有列車或任何物體剷上月台呢？

上到車，巴士可能有奪命車禍，灣仔杜老誌道翻車、將軍澳翻車、汀九碌落山.....。鐵路，試過行車途中有意外令乘客喪命嗎？

4.收費：鐵路唔一定平過巴士，收費亦非絕對合理，但鐵路收費較巴士簡單又公道。只要入/出閘車站、車廂等級(機場快線/東涌線，東鐵線頭等/普通等)、車票種類相同，收費就一定相同，唔會計你當中搭邊條線、邊度轉車、所搭列車起訖點....。即使特快線，都係同價，例如中環<->荔景，不論搭較快既東涌線，定較慢既荃灣線，都係同價；又例如美孚<->南昌，不論搭較快且免轉車既西鐵線，定較慢且要轉車既荃灣線+東涌線，都係同價。

巴士收費複雜又混賬。兜少D路加個X字就話特快線，可以收貴，兜到阿媽唔認得又話車程長，又收貴。絕大部份路線一上車就當你搭足全程，收足全費，昔日就有大量中學生，冇選擇下，被逼搭81C/86C，由馬鞍山去沙田城河東一帶返學放學，可憐佢地要畀足去紅磡/長沙灣既全程車費(你話九巴呢度謀左幾多暴利？)，鐵路(馬鐵)一通車，此問題即迎刃而解，兩鐵合併後，還有學生優惠。

即使有分段收費，但又常有同路程同服務，但唔同價既唔公平收費，例如沙田市中心出發，去穗禾苑，80M同81K根本一模一樣，但80M $5，81K $4.1；去博康沙角，81K、47X、E42又係一模一樣，但就有$4.1、$5.5、$6.5三種收費。類似同路同服務唔同價例子，多如恆河沙數。

大時大節，鐵路通頂服務，都係照常收費，絕無掠水。同時巴士做緊乜？，開一堆所謂「節日特別通宵線」，收費往往較相若既常規路線貴得多，斬到你一頸血囉。

仲未計鐵路有12-25本地全日制學生優惠。

5.支援：搭巴士，上到車，先發覺冇帶八仔，或八仔冇錢、壞卡，身上又冇足夠神沙，或夜蘭人靜時中途站等車，唔知尾班車走左未，都唔知死等定打的好(常見例子：城隧轉車站)....有邊個幫到你？係冇呀！！搭過龍、搭錯車？畀多程錢轉車啦(除左少數有轉乘優惠情況)，如果落車後搵到合適路線的話！

搭鐵路遇同樣情況，有一站式支援，有關八仔問題？客務中心幫到你，冇現金增值？幾乎站站有提款機，就算情況壞到連「禁」提款機都「禁」唔到，只要夠錢買一張單程票就得，有唱錢有找錢，無須神沙。夜蘭人靜時唔知尾班車走左未？點會唔知？車站有廣播、可以去客務中心問，又或者根本連個車站入口都落左閘了。搭過龍、搭錯車？免費回頭車。

6.認站落車：搭慣搭熟就大家差唔多，人生路不熟的話，鐵路明顯比巴士容易知道邊個站落車。唔好拗話咩九巴有報站，o個部野根本完全唔可靠，全靠司機人手按掣報站，班友錯按/漏按/亂按，屢見不鮮(呢樣我唔怪佢，始終佢要顧既野實在太多)，有時又唔知點解直情冇開，唔熟路旨意佢就死得。城新就仲死，報站機「測試」多年仍未正式運作。仲未計巴士站命名有幾混亂，幾個站一個名，一個站幾個名、站牌/報站機/網頁/路線紙站名版本不一致、唔係總站又叫總站.......同埋萬一落錯車，又回到5既情況...

7.鐵路只要畀$10(原站出閘)或通常$4既最低車費(隔一個站出閘)，就可2.5粒鐘內任縱橫(除機場快線)，無無聊聊牛河又得，逐站同人隔閘交收物品又得。巴士？

[ 本帖最後由 mckhgc 於 2011-6-7 16:41 編輯 ]

小弟認為樓主focus既point應該係
年青人對鐵路已經造成依賴
事事鐵路行先，而並非理性選擇交通工具
各位師兄舉出鐵路同巴士既利弊其實完全正確
是經過考慮先選擇合適既交通工具
但係有部分年青人係真係出街只考慮MTR
而"平"只係一個藉口
實則係諗左搭MTR先作個理由呃自己
(其實小弟都係咁~想搭118就話佢快
想搭港鐵就話佢平)
但係前提係佢地識唔識搭其他交通工具
想知一個人係咪過分依賴某種交通工具
可以問下佢知唔知其他搭車既方法
過分依賴MTR既人通常就係唔知其他辦法
只係一味以平個藉口欺騙自己
其實小弟個人認為MTR學生半價既優惠真係好有遠見
(可能小弟有少少陰謀論啦!)
令學生細個就以價錢為由只識搭港鐵
大個就真係唔識搭巴士先只識港鐵了

上述只屬個人愚見

平係一個好合理既理由
如果佢地大個咗都唔識搭巴士就真係巴士公司D marketing有問題
正如D電腦軟件公司出D平D既學生版，就係希望佢地用慣隻軟件第二大個咗買