從轉乘優惠分析新城經營方針

因為930X擴展服務，所以岩岩睇左930系嘅新豬紙，發覺有幾樣野都值得分享：
以下關於轉乘優惠嘅研究，不會強調「轉乘優惠額」這個問題，因為很多板友之前也提及過，所以再在這個論點上重重覆覆，也沒有太大意思。

一、一直被忽視的東區至大西北市場
作為一個定期會來往大西北至東區嘅乘客，我可以肯肯定講，坐7系東廊線轉9字頭西隧線，係無得輸。
以價錢黎講，經過幾次加價之後，全程坐地鐵，車費已經同坐巴士（如788轉969）差唔多。
但我巴士只需要轉一次車，仲要大部分時間都有位坐，而地鐵唔好彩嘅話，隨時要企足成個鐘。

問題係，西隧線唔係架架都咁密。
簡單黎講，我試過由太古坐720轉967（車接車），50分鐘入到麗湖居，呢個時間地鐵絕對無可能做到。
但有時唔好彩（加埋新城仲未有ETA），如果非繁走左班969，就要白等15分鐘，結果時間上隨時蝕返轉頭。

所以單單賣有位坐，係唔足夠打低地鐵。
如果你提供個轉乘價錢係合共$25，而地鐵一程過係$28，有$3差距，咁就可以俾乘客更大誘因去全程坐巴士。

仲有，唔好諗漏左，而家新城唔係單單對戰地鐵架，你西隧線仲有九巴呢個對手。
雖然九巴獨營西隧線，因為加過兩次價，所以貴過城巴，但當你962系、967、969閒閒地要等15-20分鐘，而960同968班次相對密嘅時候，我有時候都會忍唔住幫襯左九巴。再加上屯轉同欖隧轉乘，有時坐722 -> 968 -> 265M入天水圍仲好過坐967、969漫遊天水圍。

但如果新城提供7系東廊線同自家西隧線嘅轉乘優惠，咁同無優惠嘅九巴960、968相比，價錢會相差$4、$5，成個情況已經唔同哂。
仲有，而家新城唔駛提供免費轉乘架，只要佢提供減$2-$3嘅轉乘優惠，已經提供足夠優勢，俾佢打低地鐵同九巴。

二、930 -> 789有優惠，但點解唔俾人轉788？
930係比較特別嘅大西北線（雖然荃灣本身就唔算大西北），佢係唯一一條有同東廊線做轉乘優惠嘅路線，不過只能夠轉789。
呢啲叫捉到鹿唔識脫角。
如果城巴真心想俾乘客更快去柴小，點解唔俾轉乘優惠788？
反正930同788怡和都有站，而788唔駛慢兜軒尼詩道、灣仔道，仲要直插小西灣同班次較密。
本身930嘅車費已經唔吸引，如果連轉788嘅優惠都無，咁不論車程定車費，都會輸哂俾地鐵。

三、既然789可以有優惠，點解720、722、780又會無？
好神奇。
既然城巴有俾到789轉乘優惠，點解其他東區又無得享用呢個優惠？
720、722、780點解無？
唔好唔記得，720、722仲要收貴789 $0.3，你俾返$1.5轉乘優惠，都唔係好難啫。

就算我幾唔鍾意坐地鐵都好，由東區去葵芳，保鐵係唯一選擇，因為720轉930實在太貴。

四、東半山都有待遇分別架
除此之外，930轉11係有$1.5轉乘優惠。
但轉25、25A、26就無。
點解呢？你話25A、26收得太平，所以唔想再俾轉乘，我都尚算理解。
但25呢？25收緊$6.9架喎。

五、俾得10仔有優惠，唔差在俾埋23啦
而家930轉10仔係免費嘅，咁既然去維園至北角一段都可以免費轉車，點解唔俾埋23人地轉呢？
反正係金鐘轉車，23都一樣咁方便，仲唔駛塞皇后大道東。
一來10仔已經比西港島線通車前疏左唔少，難等左好多；
二來23都因為地鐵通車而少左客，絕對唔會因為呢批新增轉乘客而影響本身乘客。

總結：新城優惠得個樣
我唔係要求新城做到九巴賣大包果種轉乘優惠（畢竟賣大包呢樣野係咪sustainable，都幾值得討論），
但唔該你新城俾少少誠意出黎。
減$1已經好象徵式，再加上轉乘有啲線就得，但另一啲同類型嘅線又無加到轉乘優惠，逼乘客要焗等某幾條線。
轉乘要做得成功，就係轉車唔可以等得太耐。
青沙失敗，除左本身路線planning出問題外，另一個問題就係青沙堆線太疏，轉乘站發揮唔到功效。
掉返轉講，如果當日新城一早俾左720、722、780、788、789 <-> 5X、18P嘅合理金額轉乘優惠，18X根本就無必要全日開辦，更加唔會有88X呢壇大頭佛。

新城，好自為之。

柴小就係要迫你就範真金白銀比錢上貴車

cruisesnet 發表於 2016-8-29 23:54
柴小就係要迫你就範真金白銀比錢上貴車

佢想咁做，但實際上可能仲會賺少左。

上文都講過，萬一我走左班722，唔想等15分鐘，我真係會走去搭地鐵；
又或者走左架962X，我可能會走去搭960 <-> 59M。

要記住，新城而家唔係做緊完全獨市架。
如果各種因素都唔吸引，係會流失左啲客去地鐵 / 九巴。
你想賺足$28，到時你可能只係賺到$6.5，甚至係$0。
倒不如你加個轉乘優惠，賺$24、$25，但起碼多啲人會忠心地等你啲車。

neoplan720p 發表於 2016-8-30 00:26
佢想咁做，但實際上可能仲會賺少左。

上文都講過，萬一我走左班722，唔想等15分鐘，我真係會走去搭地鐵 ...

佢想咁做，但實際上可能仲會賺少左。

佢地既思維就係敢. 得一個客收$9好過十個客位位收$5

其實樓主堆問題都係同一個答案，
因為 930 o係港島堆轉乘優惠遠古年代新創建入主前已經o係度，
呢樣已經一次過解釋晒點解同新巴線無轉乘優惠。

但至於點解只俾轉 789 就要城巴先知，
可能因為當年 789 仲未係全日。

cruisesnet 發表於 2016-8-30 00:40
佢地既思維就係敢. 得一個客收$9好過十個客位位收$5

同樣道理亦可以解釋到例如點解城城死都唔想117好似108咁樣日日都全日，最好點都係要迫跑馬地客轉多程1/8X。

有時轉乘都係做落就照做你睇新城新加的轉乘的思維
個堆大西北線轉970/X/973往九龍的轉乘
到底係為左吸客定純粹應酬TD/公眾要求提供優惠?!
咩似係真心想過會有人用咩?!

paul2357paul 發表於 2016-8-30 01:07
同樣道理亦可以解釋到例如點解城城死都唔想117好似108咁樣日日都全日，最好點都係要迫跑馬地客轉多程1/8X ...

根本就係因為 117 唔夠客先唔全日，就算依家假日服務聽聞推手都係新城，如果佢咁至在呢程駁腳，咁佢就唔會俾轉乘西隧線，順手放晒西隧線o係金鐘灣仔，逼你俾錢轉車落老銅啦。

ksmbh 發表於 2016-8-30 01:19
有時轉乘都係做落就照做你睇新城新加的轉乘的思維
個堆大西北線轉970/X/973往九龍的轉乘
到底係為左吸客定 ...

呢樣大家都明知係應酬政府交數，
有無人用都好，起碼真係轉到先，對面海九巴交數係交出o的 95M <> 298E 要俾散紙搭一程車去轉既轉乘，創意超越誠意。

新城比較當轉乘係補償路線重組的手段

無咩重組下，都唔會忽然加BBI

或者係加D唔加D

瑪麗醫院轉車，好多線都轉唔足

例如30X只可以轉4去西營盤
91只可以轉30X特快落中環

不過咁既局面，運輸署要負好大責任
政策推動不力

新創建又怕蝕底，又唔想益乘客
呢D心態做巴士好難做得好